《I Am Legend》，中文譯名係《魔間傳奇》。香港電影譯名有幾個特色，一種係玩食字，一種係果期興乜就譯乜，例子有提左無限次的「《死亡魔法》與《死亡筆記》的不解（孽）緣」，仲有一種係按（名）導演作品史為新戲名加註解，好似《迷幻列車》導演拍成《The Beach》，雖則套戲唔多迷幻，中文名照譯《迷幻沙灘》，慌死你唔知邊個出品。《I Am Legend》一樣，你會問點解係魔間唔係人間？因為個導演舊作係《魔間行者》（極力推介之好戲也！！）。
「只係唔知點解係讀gaan1奸而唔係gaan3澗。因為《無間道》？」

你以為係魚蛋戲？其實原著小說寫於五幾年亦即五十幾年前，屬科幻小說名作，香港唔多人識好正常，但外國係流行文學，rock同metal屬於文化音樂（所以點解punk&hardcore咁多十年都係跑贏rock&metal？搞文化藝術從來唔會夠市井現實鬥），唔少metal band借用過為音樂同歌詞靈感來源：ARCH ENEMY第六隻碟"Doomsday Machine"有一首二部曲"I Am Legend / Out For Blood"，"I Am Legend"係器樂序曲。STORMLORD "At the Gates of Utopia"首"I Am Legend"就係將小說故事symphonic black metal化。但最多人識應該係大量引用恐怖片同科幻片之WHITE ZOMBIE/Rob Zombie，WHITE ZOMBIE又有首"I Am Legend"，WHITE ZOMBIE係正野但Rob Zombie個人唔多滿意（同LORDI相同原因：與外型不乎），不過條友歌詞玩爛片玩恐怖片玩科幻片，迷到自己玩metal都要拉埋電影（知佢點解要玩industrial metal嘛？），仲做埋爛片cult片導演，可以咁貫徹始終我就好欣賞。

想知一套戲劉Sir會唔會睇，十分簡單，只要包括以下其中一樣，條傻仔實會落搭：

1. 動作。越多越好。由頭打到尾打到劇本都唔知講乜為佳。
2. 血。大量。不過唔要真血。要假血。假假地先夠娛樂性。
3. 末世or大災難or大屠殺，死越多人越精彩。相反地頹門敗瓦廢墟連連，死到冇晒人的「post」境界都可以。
4. 千軍萬馬。人多好造作。
5. 不知名連環殺手。莫問出處不問因由見人就殺果種。
6. 同樣唔知邊度出現或變種出黎的嗜血異種。
7. 有幾科幻得幾科幻、異常天馬行凶的世界觀。
8. 星際大戰，巨型宇宙戰艦同戰機。
9. 機械人＆未來戰爭機器。
10. 牛仔。加送紅番都唔拘。加少少玩野變crossover更一流。
11. 喪屍。少不免要茹人飲血一番。
12. 所謂的「cult」。亦即爛。當然越cult（亦即越爛），劉Sir越合皮。

劇情好簡單：人類研究空氣傳播癌症疫苗，點知疫苗變左病毒，短時間內全球99%人受感染，變成定位於僵屍同喪屍中間之變種人。紐約變左野生動物同植物充斥之郊野公園，全城人類只剩身為病毒學家＆咁蹻屬於世上1%免疫之主角一個，電影就係圍繞主角帶住佢隻狗於喪屍世界中求存生活同內心掙扎。一如傳統，所有人類變種前因過程後果，戲中頭半個字同中間主角幾個回憶片段，夾埋唔夠兩個字講晒。
「喪屍戲喪屍game就係噉架啦！喪屍係咩黎係點黎有需要解咁多咩？」
不過戲中喪屍 － 正確黎講係變種人 － 設定同其他同類戲好唔同。感染之後全身呈紫藍色名毛髮甩晒，個口可以開到勁大、大到好似冇左顎骨同皮膚變到橡膠咁有彈性（純為視覺效果之不合情理設計），動作極度敏捷，同喪屍一樣見人同動物就食，似吸血僵屍一照陽光就死（劇中醫學解釋係患者皮膚對紫外線嚴重過敏）。但變左食人怪魔之後仍然極具智慧，見主角整陷阱捉同類，識得用工具整番同一個陷阱甚至再強化，又識得利用身邊道具、地理甚至策略襲擊，同埋保存階級觀念，全套戲其實係主角同一個「大佬」鬥，其他變種人只係聽大佬話去行先死先班靚。呢樣我就唔多鍾意，係我知道唔係喪屍，但先入為主地諗住入場係睇喪屍片，而心目中喪屍就係冇智慧只識得一大班人／屍伸直對手呻住吟追人食，同埋較鍾意old-school喪屍一步一步埋身，而唔係一見人立即發癲高速衝過去果種，幾萬隻喪屍慢慢躝過黎圍你先夠危機感嘛，所以見到隻隻喪屍飛燕踏水咁好輕功再加好武功仲要醒到爆加有「大佬」照，就同當年睇《侏儸紀公園三》恐龍進化到有智慧已經由恐龍變成特攝怪物一樣，難免不滿及失望：
「我入黎係想睇喪屍片呀，唔係想睇《異形》呀！」

一講到死城喪屍片，自然會提到《廿八＿後》，《我是傳奇》前提同《廿八日後》類似，主角係喪屍領域中僅存生還者，不過佢因為個人堅持留守疫區幾年唔走，同以暴易暴對抗變種人。因為到最後四份一先有人出現，中間幾段交代事發經過回憶唔計，頭一個鐘得主角一個人獨腳戲，最多加埋佢隻狗一齊演，不過Will Smith做戲得喎隻狗仲要同佢一樣咁好戲，所以《廿八日後》式講生活求存多過講打打殺殺，變種人晝伏夜出夜晚先出動，但全套戲八成時間日光日白，唔好話血想打多幾分鐘都難，打鬥場面亦冇乜特別加唔驚險刺激，例子有一場主角入到一座大廈俾喪屍追，佢、佢隻狗同一條喪屍一齊一樓破窗跳落樓，全程十幾秒亂鏡完全睇唔清楚，定神之後發現主角同隻狗乜事都冇只得喪屍有事。你就知道動作場面只係佐料唔係主菜。唔多似劉Sir要求果種調番轉八成時間見血，但佢都唔悶喎，證明演技呢家野好重要。只可惜劇本較為馬虎。想反思人類滅亡，係抵死定係天意？但冇乜真正深入討論可言，到最後半個鐘直頭係馬虎。去到中後，隻狗死左，可能為免太多冷場，好快就出現一對母子生還者，只係由呢部份開始，套戲開始探討人為還是天意而有點走火入魔：主角將近俾變種人殺死時，女主角出現救番，因為係「神話黎紐約」，佢黎到救主角係「神的安排」，之後知道仲有一個生還者聚居之避難所，知就係知唔好問點解，因為「係神話我知」，再到最後主角同女主角「相認」，一切一切講到係天意、乃順其自然，女主角同佢個仔出現前仲好地地，大家遇上之後，主角行徑同發展解釋一切頓失常理。亦令到本應感動之場面完全冇晒感覺，男主角臨死關頭研發出疫苗，再犧牲自己拯救母子以至人類成為片名之所謂傳奇，平淡；兩母子最後去到真係存在的避難所，亦平淡。最令人感動，只有隻狗護主而遭病毒感染成喪屍狗最後慘死。隻狗應該被提名最佳配角。

講到音響，《我是傳奇》玩ambient，真係ambient現場聲果隻：腳步聲、蟲聲、風聲、葉聲、動物聲，配樂接近冇用過，插曲因為Will Smith而選到幾首黑人名曲如Bob Marley《I Shot the Shrieff》（經典金曲也），夾夾埋埋都唔知夠唔夠出隻soundtrack。導演反傳統玩靜做到萬里無人之空城效果，甚至比根本就係一個post-rock、britpop MV的《廿八日後》更有效。所以請不要妄想會聽到ARCH ENEMY、STORMLORD、WHITE ZOMBIE或Rob Zombie。假如係交由任何一個現代商業導演去拍相信會較大機會聽到。只係套戲當然會變成完全另一回事。（咪就係劉Sir鍾意果種全套戲八成時間夜晚果種囉）

喪屍片吸引在文明滅亡之世界中，官能刺激同警世省思可以同時兼備，你要玩血腔暴力玩動作場面得，透過碩果僅存之人類逃離喪屍追殺重建文明探討人文同心理又得，一切睇編劇導演造化（同睇大老細頭），都算係既可商業又可藝術之百搭片種。
「玩完廿八又玩完傳奇，或者應該重抬經典，睇睇＆寫寫《_____ of the Dead》全線？」