Orphan 孤疑 - 20090904

Orphan

孤疑

今次電影公司絕對絕對要多謝《殺人犯》。作為2009年度最具爭議性最cult最奇港產片，其聊過《聊齋》局中局加香港編劇史上空前絕後之冒險精神及創意，為數個月後《孤疑》帶來間接宣傳效益，相信好多人同我一樣，入場睇《孤疑》全因睇過「原作」，想知道呢套遲兩個月上畫之「鬼佬《殺人犯》」，會唔會好似「原作」咁勁上幾耐畫俾人小幾耐，非此曲線宣傳，好多人根本唔會睇甚至唔會留意。

「其實電影公司係咪見《殺人犯》上左咁哄動，先決定上《孤疑》加襯潮退前極速上畫食埋浸水？我成日型住。」

兩套戲都用不老奇人殺到主角家破人亡做主線，除左好奇，仲抱住民族意識入場：「翻版」能否敵過「正版」？大家同一條橋，港方以夢幻組合迎擊西方大片，誰勝誰負？我當然知兩者除左「不老症」根本完全唔同，可能《殺人犯》實在太驚為天戲，一心希望會有人／有戲e.g.《孤疑》「糾正」番，加上三級有點吸引力，諗一輪結果搵左個禮拜二同白告到奧海城睇，後感係果真非事前因素影響我絕對唔會加唔應該入場，同電影公司要多謝《殺人犯》仝人幫手呃我果四十蚊戲飛落袋。

單睇劇情介紹同預告片，《孤疑》其實十分old-school：兩公婆領養左個細路女，原來係殺人狂，橋段似曾相識硬覺得好熟口面，如果你同劉Sir一樣，是八九十年代舊片爛片死忠迷的話。有段時期好興呢種家庭式恐怖片，屋企某個家人或外來新成員突然有古怪，笑裏藏刀慢慢危害其他人拆散家庭殺完又殺，嚇在成家人表面冇野兇手突然變樣殺人，同觀眾知道黎緊會發生咩事，但劇中角色當然唔知臨死仲要笑騎騎，睇住佢慘死又救唔到灰到爆，加上處境切身，從最初明珠930起，之後無線「政治正確化」買戲盡量避開暴力血腥甚至改播外購劇大幅減少電影，到而家國際930接棒，此類恐怖電影仍是重播常客。正正《孤疑》上畫個幾月前，國際台就播左套劇情十分相近之舊戲，講個殺人為樂變態褓姆，為勾引男戶主不斷離間甚至殺死女主角家人同鄰居，所以論故事編排《孤疑》在我全無特別，前車多到塞車，亦難以避免同類電影之大小cliche，好似第一單「大野」殺雀，發生時魔女未正式顯露邪惡真面目時，在場的阿哥細妹見到知道魔女心理變態，又唔會話番俾老豆老母聽，而且例牌地一定講到阿哥同佢關係唔好、照計實會篤爆（但冇）；去公園推個靚妹落滑梯，個靚妹明顯知道有人吊緊佢尾，又要照走去冇人加成層樓高的滑梯俾機會人害佢，蠢加抵死；住左孤兒院咁耐，居然一直冇牙科同醫療報告，到主角一家領養左先叫養父母帶佢去睇醫生補番，而且佢個檔案成本電話簿咁厚，孤兒院院長同養父母竟然睇都冇睇過，發生好多事後女主角問起，「查番紀錄先知原來個靚妹好有問題」，跟住份檔案仲要神奇地不翼而飛（全套戲最似《殺人犯》居然係呢樣，呵呵）；冇乜特別深入描寫過雙方人際發展，但縱使發生無數怪事命案，老豆一定相信個女無辜，甚至會為佢同老母反面；開估後全屋開拖，一定係正派求祈打一打撞一撞，反派訓低左，就當佢已經死左之後唔理佢走左去；死剩女主角同親生女走出屋外後園，警察（先）趕到，畫面睇到警車去到兩個人面前冇幾遠、差佬入埋屋搜，跟住自然魔女再現身最終死戰，兩個人打到九彩開埋槍都冇人出現，打完場交差佬至姍姍來遲，而且屋內窗口望出去就見到後園，打得咁揚咁嘈屋入面班警察冇可能唔發覺。

「可能套戲冇錯、編劇冇錯、導演冇錯。係阿媽由細鬧到大果樣：錯在我成日睇咁多電視。」

橋舊唔緊要－我地稱之為「tribute」－弊在導演功力未夠高。睇開呢類戲都知，就算一早知道誰是真兇，大家享受是氣氛同殺戮過程，《孤疑》唔知點解完全冇晒，頭四分一講背景有點拖，到魔女入屋立即好似唔夠時間係噉去，全套戲成兩個鐘長唔叫短，照計要舖排時間空間絕對充裕？大把枝節情節其實頗多餘。而且所有事故都係一發生就大單，而非傳統式陰ｄ陰ｄ，次次去到幾盡令觀眾唔覺得魔女越來越恐怖，反而因為嚇人程度一直冇乜大上落搞到見怪不怪，最失敗冇乜大場面夠迫力，好似推靚妹落滑梯全段好長卻冇恐怖感，最後大戰無論畫面定過程亦完全唔驚險刺激，整體導演加剪接十分平淡，睇到片尾字幕先知原來里安納度狄卡比奧做監製，何解出到黎咁失水準？講劇本失望可能更大，因為八十年代同類笑裏藏刀B片追求官能震撼，劇本可以好平淡，以過程同氣氛取勝，大反派背景往往非常輕輕帶過，通常「因佢本性邪惡」或「原來邪靈附體」甚至「外星人？？？」搞掂，觀眾亦普遍接受因明白無大痛癢，《孤疑》卻有《殺人犯》「催谷」加明顯想嘗試扭橋，電影重點從「原來係個細路搞事」轉移至「個細路到底咩來頭」，但早有港產強片搶先登場，傳媒再作比較大家入場前已道路晒咩一回事，連最後一著都冇埋。

睇完覺得幾唔對路，套戲有幾三級？血腥暴力程度遠比想像中輕微，就連一ｄ國際台出到街之西片都可以勁過佢，反而《殺人犯》場面激烈得多殺得更性起意識更極端只俾2B，如果話因為一開始已經魔女出手，即使最後先解釋已夠教壞細路就冇得駁啦，定還是港產片批鬆手ｄ幫自己友？全套戲其實我覺得好悶，睇得太多爛片卦，而家想爛又爛唔晒新又新唔到，不過要好過《殺人犯》的確唔難，唔係外國人拍係西片一定好、港產片就肯定垃圾之拜高踩低心態，除左兩個細路演技同邪惡度冇得比，《孤疑》整體佈局了冇驚喜起碼合情估理，就如講強片時討論過之「玩得安全」，有ｄ戲編劇同導演太自作聰明／自以為聰明是死因。

相信最需要談論，係魔女想引誘醉酒老豆一幕，結果老豆回頭是岸，搞到乖女心碎插十幾刀殺左佢。相信大家會覺得一路冇乜大場面，而家仲要搞唔成值唔番張戲飛，反正都三級啦，有乜野唔可以去盡佢？套戲掂唔掂唔緊要，大家最緊要明白呢幕箇中寓言：好醜老嫩都係肉，煮到埋黎一定要食，否則後悔一回事，分分鐘累死自己呀！