Outlander



或者衛斯理小學開始由細睇到大,既神是外星人又時光倒流是平常,好鍾意作者將天外來客及未來人士插入歷史,講到外來因素點樣影響歷史/世界發展之類情節,因為拉到現實較為切身,加上「一窺野史/秘史」之神秘感同滿足感,易比其他完全原創題材受落同多驚喜。難怪《Outlander》睇過劇情簡介,trailer氣氛又唔錯,冇乜猶豫就入場。中文名叫《越空魔龍》,行者越完空,而家輪到魔龍接更,此又乃一本地戲名cliche,繼「無間」同「魔間」今期流行是「越空」,本冇多少意思的兩個字,話咁快又俾電影公司翻譯組玩爛。


唔好以為套戲同《Highland》有關,除左大家都走中古北歐格局(世界觀上《Highlander》其實冇觸及太深),故事完全唔同:《Highlander》中文者《挑戰者》譯得好,打到最後一強就是皇者,而《Outlander》講隻怪物偷上架太空船搞到撞左落地球,倖存主角發現身處公元八世紀維京時代挪威,怪物魔龍同樣生還加開始屠殺食人,因為全部未來科技冇晒,主角同兩個維京部落聯手屠龍。中世紀英雄屠龍故事好多人玩過,我絕對承認身為科幻迷,唔係加左天外來客設定,套戲拍到點精彩用左幾多錢整特技我一樣冇興趣入場,何況《Outlander》只係套相比下低成本獨立製作。


因為睇得太多大片,梗想睇魔龍點樣大屠殺,不過獨立規模成本問題,被迫眼高手低地將焦點放於人而非怪物身上。第一個鐘頭基本上睇主角點融入維京部落,但深入過頭用左太多時間,又想反思人性貪婪同戰爭悲慘諸如此類可惜冇乜建樹。打的話兩幫維京人互毆仲多過龍食人,打怪獸最勁一場只係整個陷阱捉佢咁大把,而家唔係睇《Braveheart》呀大佬我想睇怪物食人同戰士屠龍咋。我都知現有成本有限,整成群怪物出黎冇乜可能,就算拍一隻怪獸殺幾百人場面都好難,導演嘗試懸疑化,前半好少機會睇到全相,殺人食人鬼咁鬼祟,又帶唔出《Predator》視而不能見種緊張,最無奈本來話得一隻,唔夠抽時無端端話原來一早生左隻細魔龍,最後幾丁友深入地底殺晒兩隻魔龍,全個過程完全唔刺激。現實上就算大家手持同樣有限資本,始終專業商業片導演拍動作場面,同文戲打戲兩者間取最佳比例平衡,比多數業餘/獨立導演出色得多。


或者我期望太高同預期導演/編劇更天馬行空,而家成為外星人流落異鄉生活日誌多過似屠龍故事,即使特技以獨立電影黎講非常超班,睇完只覺平平無奇,有時仲覺得自己睇緊電視電影。唯有嘆句又科幻又古代老細們唔知點谷,從而搵唔到大水喉,既然特技同設計搞得掂,夠錢請勁人執執劇本同導演,再擴張動作部份,可以升級到一線尾特技片。故事設定發揮空間更加比好多一線片大:「仙人」降世,對後世影響涉及政權、族群、科技、血統等多方面,一開始跌左枝槍,起碼冇行貨到最後危急關頭無端端執番枝槍殺死隻怪物咁戇居,但既結局係用湖底太空船船殼打造霸王神劍屠龍,亦冇交代到枝槍、神劍、太空船同其他高科技殘骸點。枝槍跌左落河漂去唔知邊度,會唔會俾第二個部落搵到?同樣所有科技產物短期、中期甚至幾個世紀後,俾其他人發現又會有何影響?魔龍擺明留伏線地只象徵式跌落瀑布冇正式殺死,同講到可以無性繁殖,開多幾多集都冇問題,就算唔要怪物,外星人隱居地球導致天地混血,能夠從生一個英雄系列,加上流落地球外星科技,發展到純種人類同混血人鬥、人類內戰至到星球大戰都可以,要拉番去巴比倫、亞特蘭提斯亦得。創作空間大到無限制,既然《Underworld》現代兩集再第三集拉番去中世紀都冇問題(見字此刻我仲未睇第三集),《Highlander》起點正是《Braveheart》時代蘇格蘭橫跨千幾年(本身又想玩外星人,好在懸崖勒馬),《Outlander》好有潛質成為新一個異人系列。問題係乜都講錢時,得唔得先?得,首先要搵大老細注資,加重新制定編劇導師方針成超商業向,跟住搵條女做主角。而家仲係《Highlander》時代咩?《Underworld》都要靠女主角頂住先引到咁多人入場啦。電影題材其實相當八十年代至九幾初,可惜而家係廿一世紀。