悍戰太平洋 Pacific Rim
(a.k.a. 打爆維多利亞港 Victoria Harbour)



老實,《悍戰太平洋 Pacific Rim》唔算拍得好好但係好睇,仲有衝動入戲院睇多次3D版,難得在套戲會好睇過trailer(係,其實trailer整得好鬼悶),美中不足係點解唔直頭叫《打爆維多利亞港 Victoria Harbour》,個故事根本係香港發生,地面唯一一場大打戲都係香港遭殃,好難得一套外國大製作咁睇得起香港俾佢擔正做主角。其實本身冇乜期望因為由頭尾都帶住一陣濃烈爛味,牌面有點似大人國與小人國版《Real Steel》,更加似恐龍戰隊劇場版,仲要兩個鐘長好鬼危險,點知睇完發現衰唔晒之餘仲唔錯添。


世界突然出現大怪物,人類整巨型人形兵器抵抗,因為精神負擔太大要兩個駕駛員先可以控制到,點睇都擺到明係tribute日本動畫尤其EVA,故事發展都好似,又係怪物越出越勁之餘越出越密,又係控制機器人要玩同步,男主角咩料唔使理差唔多完全冇提過背景咁滯總之以前慘啦,然後搵多個同樣有悲傷過去女主角,又自然會對佢起痰,跟住連暴走都玩埋。其實故事幾薄弱,首先因為係tribute自然乜都cliche到爆,好在導演非常醒目心知肚明入場睇呢套戲有幾多真係好關心有咩深層意思點樣有內函丫,所以雖然學埋《Man of Steel》衰野明明係打片偏偏要頭半套戲吹水尾半先打,都好過超人,因為超人就係又要商業又要(扮)有深度,結果要講故事但個劇本爛到仆街,《Pacific Rim》就係我擺明係唔理故事架喇係簡單到暈架喇你吹咩。


而我覺得套戲最成功係,冇錯打戲基本上集中晒後半而且其實唔算多,但唔著重故事同時吹大半套戲水之餘,居然冇悶場。以呢種戲呢個「爛度」黎講,班演員其實叫好有演技,不過當角色咁平面時,人人都冇發揮,所以好浪費,演大個女同細路女兩個日本妹都好好戲,細個版叫有得solo全套戲演得最好係佢,大個版對白已經少,仲要上到機器人果陣永遠得男主角講野,女主角相反打時接近乜對白都冇得講,搞到好似成部機得男主角一個駕駛員噉。最搶係兩個瘋狂科學家同個怪物屍體黑市拆家,睇佢地三個誇張演譯真係好似睇卡通片一樣,不過亦因為噉每次有佢地出場時立即令套戲變返恐龍戰隊級數,同埋其實呢三個角色可以話完全唔需要存在...如果改改劇本整走佢地,套戲可以短半個幾鐘。


講到打呢,其實都幾多問題,主要在於次次都要夜晚打,機器人設計靚但部部都都暗色,怪物調轉造型好鬼悶都算仲要隻隻黑色,又成日都要水戰水面打完潛入水底再打,加埋大量近鏡,結果黑暗背景前面大舊灰色打大舊黑色再水花四濺好多時你都唔太知其實佢地做緊乜,所以最後唯一一場地面戰打香港好好睇,只要你接受到維港一望出去就係海,同唔介意明明係維多利亞港打打下會去左葵涌貨櫃碼頭就得,但冇乜所謂啦因為打到仆街,睇佢地拆左半個香港真係幾爽。但打落去又有點唔對路,明明機器人經常要同怪物打埋身戰,點解打左十幾年班機器人都可以得咁少武器,冇槍冇炮都算,連近身武器都唔整齋打拳腳,會唔會戇居得滯?唔係冇,主角機都要到最後先出主角做左咁多年駕駛員都唔知道有的秘密武器一擊必殺(呢野真係夠晒日本機器人動畫同特攝片feel),但講到全世界都要靠呢班機器人,而居然可以冇招式冇武器冇遠攻一尾埋身拳拳拳拳拳拳,你班人類會唔會對幾部機幾雙鐵拳大信心得滯呢,就連每次打都會附近圍住飛來飛去堆直昇機,都可以乜武器都冇真係只會兜圈食花生睇戲,大佬唔會連普通戰機坦克支援都冇卦,EVA呢類日本動畫最起碼反派出場時都會整堆常規武器出黎射一輪彈幕先啦。(話時話,點解咁大部機器人,靠幾部直昇機仔就可以吊起佢地去邊都得?仲要全個基地中左EMP,乜都死晒,就係直昇機冇死繼續飛得咁堅?)而且一拍埋「宗師」日本派,就顯得太笨重出招完全唔夠迫力唔夠氣勢,我明要寫實嘛但有時可以戲劇性少少架,但美國佬拍戲就係死都想真實,所以作為tribute戲完全拍唔出日本特攝種激情,《Real Steel》都熱血過佢,結果諷刺地最好睇段打戲反而係男女主角比棍,呢段真係精心設計過比唔少拳腳武打動作片精彩,雖然我唔明點解成隊人個個都會耍棍,同時又唔會整棍類武器俾機器人用...


鍾意導演一開始已經唔玩劇本膚淺到盡,只係始終有點抱負唔想拍一套打戲咁齋,所以兩個鐘入面實際上咩都有少少,一開波主角睇住大佬俾怪獸整死講兄弟情、澳洲隊老豆睇住個仔去送死講父子情、黑鬼同日本妹父女情,仲有劫難點樣改變社會生活同政治、災難經濟學等,不過都唔深入提提就算,唔知算好定唔好。結論係我覺得一套特技動作片,一開波就打,跟住吹成個鐘水至再打打到尾,兩個鐘長但拍出黎冇乜悶場位,而且成套戲會好睇過預告片,已經係成功左,至於角色劇本點單薄...套戲係贏在帶回細個睇機器人動畫份回憶,你會唔會屌卡通片劇情垃圾、屌點解次次怪獸打到黎,成個城可以一個人都冇點打都冇人死?你都係睇機器人點樣打大怪獸嗟屌。不過都有樣野唔妥到出面:其實如果最後男主角為拯救世界而死,先至係完美結局。可惜呢種商業戲點都要大團圓。


仲會想睇多一次,除左套戲真係唔差,同想知3D版有幾精彩,梗因為本土情意結啦。其實設定好過癮,戲名話太平洋但個異次元入口位置好近香港,幾架直昇機飛出去唔使好遠就去到,所以香港因為「地利」成為打怪物重鎮同最後基地(咪話套戲應該叫《Victoria Harbour》囉),雖然如果係噉個異次元入口其實位處淺水,同點解如果咁近香港行幾步就到,打左十幾年,好多怪物好有心機走到其他國家母雷公咁遠打仲要打贏,而最近的香港咁多年都冇事而且接近完好無缺(「因為強國勁囉!要不是強國照顧...」)。最感動當然係雖然外國人對香港印象仍然係九龍城寨,但基地入面講廣東話、用繁體字(雖然好多字一睇就知直接用Google Translate譯出黎就算得啖笑),而且提到其他國家糧食要配給,香港全賴自由貿易港優勢所以任君選擇幾鬼威,某程度上,戲入面個香港,比而家大家身處緊住緊個香港更似真正之香港。噉當然亦有似返現實啦,例如戲入面全部「香港人」面口完全唔似地道香港人,仲要個個一口流利普通話;怪獸來襲唔驚,政府係乜都唔會做唔會第一件事走去避難先,解放軍咩黎架梗係唔會出黎防守啦,你班蟻民你死你事啦;打完怪獸之後,善後果班唔係政府,唔係軍隊,而係一群社團式暴徒第一時間走出黎搶屍執雞。計返戲中年份,係現今廿幾年後,其實《悍戰太平洋》會唔會係一部寫俾現今香港人睇之預言書?


http://en.wikipedia.org/wiki/Giantkiller


睇完戲順便講講一本美漫,好蹺故事同《Pacific Rim》幾大雷同。本漫畫叫《Giantkiller》,係一部六期完中篇,但故事一講你就覺得熟口熟面:話說有日加州一個火山口出現時空裂縫,裂縫入面湧出好多巨型怪獸,人類用怪獸基因製造一隻半人半怪生物兵器,靠佢制止一隻超巨大怪物進入現實空間同封閉異次元入口。聽完係咪覺得好熟呢,分別在於一個係怪物上山打怪物順便打爆異空間,一個係機械人下海打怪物順便打爆異空間(再媾埋條女),不過《Giantkiller》比《Pacific Rim》早十四年出。我諗要搵唔難而家用睇漫畫app應該好易搵到,不過因為十幾年前仲未興電腦作畫,加上要模仿日本六七十年代特攝動漫,種粗糙水彩木顏色畫風,睇慣而家鬼佬漫畫未必頂得順。