睇完《少林足球》，到《乒乓》上畫。因為《少林足球》之前科，加上預告片及媒體介紹，覺得《乒乓》同類，都係漫畫式動作體育片，《少林足球》叫做本地創作加黃金陣容，同埋周星馳「回勇」，睇左兩次，往後電視重播，撞到必睇，差在未買埋隻DVD回味再回味。《乒乓》反而完全冇理過。一來已經睇左武俠足球，日本又黎多套武俠乒乓波？唔係卦？二來漫畫改編，從來唔多識欣賞日本電影特別動漫改編作，因為劇情同演出太多日式（硬）滑稽加誇張失實過頭，賣相設計非我所喜，口碑一致正面都冇打算過買飛捧場。其後已淡忘其存在。一直到曾利文彥《2077日本鎖國》，唔知係命運安排還是電視台之精心，睇完《鎖國》幾日後，開電視就撞到同樣出自曾利文彥手、佢第一套執戲電影《乒乓》。如此應景，唔睇唔俾面。

漫畫冇睇過，所以唔知原著畫功設計及劇情，但睇到銀幕上已經夠誇張之角色設定同演出，相信相差不太遠：幾個對乒乓波各有觀點同抱負之角色，於全國大賽中碰頭，各有輸贏亦各有領悟，各自面對自己之性格障礙，從中反省、和解、進步，一年後再遇，好友及宿敵碰頭，賽後各奔前程，其中穿插各式各樣友情、理想、夢想、（請填入任何正氣詞彙）。亦即係典型日本流行勵志片格。主要色色有幾個，每人有自己背負之壓力：家鄉球壇失意而遠走他方、深信自己必勝而感賽事沉重、因為過去之錯誤選擇抱憾一生，但主線始終圍繞兩位主角，一星一月。星係「正主角」，亦即浮誇得過份之主角，想出人頭地但資質不足，最後將勤補拙再「得道」；月係必然存在之完美靚仔型相對主角，係乒乓波天才不過欠鬥心而未能出頭，經歷各種人事後明白「乒乓波對我好重要」下山。雖然星月兩位方為主，其他每個角色仍然描寫得好深入好立體，配角輩都可以令你對佢有所了解同投入，角色關係同建立相當成功。只係初期之講故事方式太飄渺。一開波幾個主角要色出一出鏡，大家猜猜波加少少flashback，唔使半個鐘已經入比賽，你可以話交代晒所有應知之背景同資料，可能係我資質差理解力弱，頭半個鐘我之印象係
「一個鍾意打波但唔勁，一個勁但唔鍾意打波，兩個人自細識，大個左繼續打乒乓波，點知鍾意打波果個同人鬥波輸左，然後就打到入全國大賽。」
好快加好唔知做乜就入到正題之大賽，但進入「正題」後，發展同節奏立即實在得多。

以乒乓波為題，除左睇角色，梗係仲為睇打波。會唔會打到好似《少林足球》或者《足球小將》咁天花龍鳳？上畫時宣傳以迫真CG作賣點，初時真係怕打乒乓波都可以衝力擊球或倒掛金抽。好在冇事。CG只係協助清晰表達球勢之來去，並冇任何武功秘笈必殺技牽涉在內，一招一式合乎常理同現實比賽。只係主角就係主角，人人都做唔到，只有主角一個人可以：話主角打到腳傷，幾乎波都打唔到，點知重要賽事處於下風時，突然開竅加神功附體，立即反敗為勝，不合理到爆。
「打乒乓波都可以打到入Zero領域？搞Ｘ錯！」
最後星月對決，二人分別由多年前兩位互有爭鬥但未有了結之教練傳授，兩位徒弟決賽相遇之處境，正正同當年兩教練未了之最後一戰相同。至於戰況如何，電影並冇交代，開賽後，已跳至「若干時日後」，浮誇英雄之星如願到歐洲出戰國際賽，天才無爭之月退隱教細路打波。果真粵語殘片。好在拍得好睇。

對日本市場冇乜研究過，演員來頭唔多清楚，只係主角之超過於浮誇及大細路風，正正係我唔鍾意日本電影之原因，好在除左佢其他人演技同造型都好討我歡心，唯一可以講多少少，係來自中國上海少年隊之孔文革。由李燦森飾演，搵香港人演唔算出奇，但奇在唔係講日文而係講中文（難得呀！），仲要係講廣東話唔係國語（．．．「上海」？？？），日文只講得幾句，仲要連佢個教練都係講廣東話，雖然發音完全唔純正（「上海廣東話」卦？），同有時講到鄉下話噉，真係講一大輪都完全唔知道原來佢係講緊廣東話。反正係搵，點解唔索性搵個真係講廣東話之香港人演埋教練一角呀？至於孔文革的存在，初出場時講到佢球藝高強，
「單用耳聽都聽得出你咩料、聽得到你破綻係邊。」
非常具中國武俠色彩。但去到後來，所謂「中國少年軍頂級高手」，去到日本原來都係不堪一擊，輸波前重申「去歐洲打都好過黎日本打」、之後其他大賽中再經已為觀眾之佢把口講出日本仔球技有幾超卓、球道去到幾高深，佢個角色只係為俾主角／反派上位，同以中國人身份宣揚大和精神，原來又係大日本戲。唉。灰到笑，再笑到灰。另外唔知點解，戲中角色要十分要國際性地講多國語言，已有日文有中文，又成日無端端講幾句英文。唔知係咪漫畫已經係噉。我只覺造作得難頂，另一日本創作通病。

配樂就相當吸引，好多青春片用(pop) punk用(pop) rock，《乒乓》配樂反而重post-rock、ambient、英倫味，同體育片呢種活力電影似唔多配合，可能係為襯番第二男主角，部份觀眾（特別女性）先覺得佢係第一男主角之月沉靜性格。另有樣野想特別講講，就係product placement，相信幾家乒乓用品廠牌贊助左套戲唔少，每三四個鏡頭，就有一個清楚地俾你睇到某家廠牌之商標，球好球場好球拍好，就連打緊波時，個波迴轉飛行中，都要加番大大個商嘜上去驚你睇唔到（難怪要用CG製作了），就連其中一個教練「藝名」都起「蝴蝶」，有打乒乓波的朋友都知咩事。玩代理產品代入，仲勁過無線電視劇。

始終唔太鍾意日本太誇張太漫畫化之演技方式，亦唔鍾意頭半個鐘之「導入」，但後半除左「Zero領域」同主角更浮誇演出，確係冇乜挑剔之處，尤其分鏡剪接一流，同難得每個角色之建立非常完整。雖然似集中星月二人、其他都係路經交叉插入，但幾個角色、背景、大小事件等，其實好多連結同相互影響，編劇應記一功，睇落一切似去得好平（或者係我已被美國商業電影荼毒太深了），劇力係有，只係內歛，同好多內容及寓意冇正面公開而留俾觀眾自己思考出黎。另一深刻印象，係好奇：
「冇女主角。女人數量接近零。非同性戀電影中，實屬難得。」