《戰狼三百》。港產片戲名譯名從來係柒多於好，一係見果期興乜就拎最hit最潮之字眼同topic入名，而完全唔理套戲本身講乜，令好多戲因為改錯名而趕客同俾人極差印象，好似《死亡魔法》，同期上《死亡筆記》就係唔係都要《死亡ＸＸ》，搞到好似食住人地條水上果ｄ二線廢片，當堂令好多人冇興趣睇做死自己電影市道；一係其實正正經經按字面原意譯甚至唔譯已經夠晒，但就更係要加ｄ野入去整到ｄ名好死老土，當然係講《300》啦，好地地叫《三百》咪得囉，點解硬係又要加多ｄ野去個頭度？（我點都唔會叫佢個中文名，太柒）真係要中文名的話，你俾我譯，我譯做《三百伕》，都唔會要而家個譯名。

會睇自然係因為Frank Miller，畫《蝙蝠俠》、《罪惡城》同《300》，題材同敘事較寫實黑暗，正正係我愛美國漫畫之原因。之前《罪惡城》變左電影版，無論劇情定畫風都出乎意料地精彩，今次《300》同樣係電腦製作半動畫，仲要加上古戰爭同歐洲史詩，非常吸引，劇情報紙雜誌廣告日日講都唔使我多解釋，就係波斯入侵希臘，希臘政權昏庸，皇帝御駕親征，以三百壯士抵擋波士百萬大軍。簡單黎講，即係《三百無雙》，一個人對三千個，由頭斬到落尾果ｄ，我鍾意。文戲夠少，但簡單得黎足夠交代晒所有歷史同背景，講故事技巧確值一讚，亦將大部份篇幅保留最重點之三千人斬。講打鬥確係一流，睇一個個人fit到漏個款已經夠殺，電腦特技真偉大。再加埋古裝打鬥從來好睇過現代武打，無論規模上還是設計上（美國現代動作片通病係動作生硬之餘慢動作，灰在已經成為荷里活特色），不過既然設定到波斯軍係支異色軍團、幾乎所有亞洲奇兵異獸都有，但往往打一種兵／一種獸都係帶一帶過就算，既然用得電腦動畫式製作，要幾誇張都唔係咩大問題丫，仲使乜集中人打人呢，我諗講三百個人點樣打殘一隊象兵點都好睇過同一班忍者鬥卦？同埋ｄ血實在假到．．．一刀斬埋去，ｄ血係一粒粒飛出黎，都假得太過離奇喎？煽情同感動位亦達唔到所想之效果（可能係我一心想睇血所以麻木遮）。呢ｄ超現實戲本身就係想超乎現實地誇張，但《300》畫同劇本都冇《罪惡城》去得咁盡，有少少失望。不過都係果句啦，鬧係噉鬧，但鬧完又係噉樣睇法，冇計啦美國迷嘛。

事隔半年，再臨。遇著九月底又上，襯十一假期再睇。唔係太多戲入戲院睇過一次會再入，《300》咁有興致，因為係IMAX上，
「巨幕重生。」
IMAX從未去過，因為未夠吸引力：每期只上一套戲，開市時係《Harry Porter》，一日幾場播足個幾月，冇興趣；落左畫之後係益智片《海洋探秘乜乜乜》（唔記左個名亂作的唔好意思），好想知有冇人會睇？第二套到已經落畫半年的《300》。有假期，又未試過入IMAX，套戲又唔係差，入場一試。IMAX宣傳係「超大銀幕、超強音響、立體效果」，自然係做《300》呢ｄ荷里活動作片最有爆炸性啦，但一早去到，排到隊買飛先知道巨幕版並唔等於立體，只係巨大化的普通版張飛大大隻字印住「2D版」，但一場黎到，Megabox冇野好睇，連套戲都唔睇就真係好灰，就跌左七條半，當買左隻DVD算。

再睇一次，就以重睇角度寫寫。套戲頭半講波斯外交入侵，國王排眾組三百壯士團向北抵抗。後半國內政局鬥爭同邊彊大戰交替，最後自然係三百殉道，國民出兵，擊退波斯。動作片，就當然係睇動作，第一次睇因為冇乜預期，文戲多冇乜問題，而且剛剛好唔太多。但第二次睇，頭半就顯得慢，一面睇舖排大戰，一面想佢快ｄ過入正題，出兵後步伐快左，國內外情景交接亦顯合理，整體順暢得多。講打自然係無敵，睇第二次仍然相當震撼，加上「巨幕重生」，有爆炸性得多。
「點解冇一套中國武打片、史詩片可以拍得出呢份氣勢？有此排場，都欠此磅礡凌厲？」
只衰IMAX音響冇我想像中咁勁，諗住咁大銀幕會配環迴三百六十幾台大喇叭係噉炸，但ｄ聲集中晒前面兩側唔夠包圍性，去新世紀GV睇都炸得勁過呢度，有點兒失望，。戲中想批判強權同政治意識，但未夠深入，因為漫畫改編，重點始終係三百鬥百萬嘛，作為整體之轉折、帶動氣氛同交代發展，已經足夠了，雖然我覺得完全唔加入政治鬥爭部份，都完全唔會有影響。

雖然冇立體版，音響又未夠，但對IMAX初步印象，尚算滿意，而第二次睇《300》，除左頭半文戲，大戰場面仲係睇得非常滿足，勁多血，勁多頭手手腳飛黎飛去，係假，但爽。只係相信睇埋今次，除非電視撞到，都唔會再特別睇，因為屋企冇最勁hardware，又唔入戲院，真係唔可以完全體驗得到。

有見《300》上畫時用著NINE INCH NAILS首"Just Like You Imagined"，同年NIN造訪香港之後就到上IMAX，特贈：
「fan made《三百伕》MV乙個。made得比官方trailer更出色。」