Project: Saw




Phase 1: Saw
(20061210)


咩叫成功?睇睇獨立電影系列《恐懼鬥室》就知。兩個主角起身之後,發現比人鎖係一間密室入面,房內仲有兩把鋸一條屍,原來係用遊戲殺人大奸角「砌圖」佈置之死亡遊戲,要走只有三個方法:一係殺左對方,一係用把鋸鋸斷自己隻腳,一係自殺,成套戲大半時間就係睇兩個人點掙扎,加多幾個景同少少血做個半鐘。呢種咁cult咁綽頭之劇情,好容易會變成高不成低不就的扮野,但《恐懼鬥室》低成本加獨立味濃,反而贏得商業同口碑重大成功,全靠接近無可反駁劇本同拍案叫絕佈局,之前睇左已經睇到歡呼,襯住第三集上第二集又出DVD,買第二集果時特登買埋第一集隻DVD重溫一下。


成套戲其實好簡單頭先幾句已經講晒,血要到最後主角自斷一隻腳先夠多,其餘大部份時間幾平和血腥場面都拍得低調。點解咁簡單又可以咁有吸引力完全冇悶場,睇到最後埋尾仲可以拍爛手掌?點解連用左唔知幾多十億美金拍到唔知幾大陣仗之荷里活電影都做唔到呢樣野?因為係獨立電影,錢同時間唔係多,要用有限資源完成全套電影,自然會逼迫出無盡意念,始終劇本係電影決勝關鍵,單係最後結局,已經冇幾多套大片拍得住果份震撼性。所以三集之中,最少野玩最簡單最平舖直敘之第一集最得我心最鍾意。支持indie。


結局精彩,片尾一樣得我歡心,因為揀左FEAR FACTORY首《Bite The Hand That Bleeds》,係同《Saw》一樣04年出之《Archetype》全碟三首冇死腔歌中最正果首,但會鍾意成噉唔止因為首歌,仲有歌詞同套戲內容意識夾足100%。因為個片尾呢輪特登摷番FEAR FACTORY出黎聽,呢隊band除左某幾隻碟真係聽極都咁鍾意,就同套戲一樣。




Phase 2: Saw II
(20061210)


第一集勁成功,唔知點解當年第二集好似冇片商買結果香港冇上到,等左好耐到而家先有DVD,唔係到第三集上有得食住個勢都唔肯出,我又戇居地唔會/唔想/唔識download or BT喎(在這個年代,這種戇居是完全不會被欣賞,只會被狠狠嘲笑),可想而知等左幾耐。但結果係對我黎講水準較低之一集。又難怪會冇上。


今集規模擴大左,由兩個人變成一班人,由一間室變成一間屋,因為換左導演同編劇所以故事加製作風格唔同左,影像玩顏色玩得好勁,主題色仍然係綠色,但用到好多重色同鮮色,菲林又重粗糙顆粒感,雖然夾劇情同處境,但唔太對我口味。故事一開頭已經冇咁大吸引力,老豆係差佬但個仔行蠱惑,個仔有事老豆去差館的佢出黎,已經估到之後會發生咩事,當故事講到一班人俾「砌圖」困左入毒氣屋度兩個鐘內搵唔到解藥就會毒死,唔使講都知道主角即係差佬佢個仔實係其中一個,而佢當然帶成班人去「砌圖」個竇口度要人,跟住班友一個一個死完全預左,只不過今集遊戲唔多又死得唔夠精彩,最後由玩遊戲死變成班人內訌自己友打自己友食或者中毒死,睇得唔夠過癮。


又因為上集一開始已經耐人尋味果份懸疑,對續集劇情抱幾高期望,一開始冇左大半思考空間已經失望,跟住仲有更多野係睇過第一集好大機會估到,好似女主角Amanda,第一集唯一一個遊戲生還者,今集遊戲又有佢份一齊玩,老實講,見到佢再次出現已經有預感佢同「砌圖」有關係,尤其是上集得佢個遊戲係最「簡單」而今集佢玩個遊戲就算贏唔到都唔使死,即係點都要保住佢條命唔死留到最後,真正身份實在太過明顯。好在結局總算冇失望到,做到同上集結局一模一樣只係角色唔同左,已是一絕。可惜,對我黎講只有結局夠吸引力。


今次片尾係MUDVAYNE《Forget To Remember》。第二集插曲多左好多metal野。好明顯導演同編劇果班都係metal友。




Intermission I: Behind the Saw

睇晒兩隻DVD,第二集仲多隻製作特輯一次過講晒頭兩集,我最鍾意睇就係幕後精華睇人點做野諗野,齋睇花絮訪問都睇左個幾鐘,抵玩。《恐懼鬥室》導演叫James Wan,原來係馬來西亞人,移民到澳洲定居同讀書,跟住同佢朋友即係第一集其中一個主角諗到個劇本,噉就搞掂。三集之中得第一集係導演,跟住兩集已經交俾其他人導自己做監製,而第一同第三集故事佢都有份編劇,可能因為呢個緣故,佢參與最多之第一集同之後兩集風格好唔同,直到第三集做番編劇,唔同得黎又有番第一集想帶出果種感覺,而只做監製之第二集係系列中較遜色之一集。呢樣都唔係勁,最勁係佢超後生,拍第一集時先廿中未夠同我差唔多老!當堂覺得自己on99!



Intermission II: Calbee

一面睇戲,一面食薯片。上《恐懼鬥室3》時,七十一宣傳緊兩隻新卡樂B,有意大利芝士味同德國肉腸味薯片,推廣價$17兩包,唔食就算一食大劑,死,隻德國肉腸味已經成為我最愛卡樂B薯片,原味當然係皇道啦冇必要比較,但德國肉腸冇咖哩味同熱浪咁激,香口得黎又冇pizza味咁濃,就係咁剛剛好,大劑!另外隻芝士味都唔錯!可惜在出左半個月就再見唔到!

「卡樂B呀卡樂B!點解咁好食,你成世人只俾我食半個月咁少呀?你唔再出熱浪轉出呢兩隻新味其中一種仲好啦!」



Intermission III: Time Crisis 3

屋企睇完頭兩集DVD,即出旺角睇第三集。一場黎到旺角,當然落新之城打/爆多舖Time Crisis 3先。隻game有三關每關三版即係全九版,score attack一向冇乜興趣,time attack亦玩到唔多想玩我試過讓夠人地整整一關先開始玩仲可以快佢版幾爆機,所以玩gun attack,一個夠晒無聊的玩法。有四種槍你用,包括無限彈的基本裝備手槍、機槍、shotgun同榴彈砲,照常理當然係以冇彈數限制之手槍做主力啦,但調番轉gun attack係用其他限彈數槍為主,初步戰績係全關第一關冇用過一次手槍,但現階段僅止於第一關同第二三關某幾版,因為後來d關敵人數量多好多補給唔夠,同埋後面d大佬一定會用盡晒你所有/大半彈藥先做得低。更大問題係有d位係大大個目標企係度任你射加分,呢d情況通常會手痕換支手槍出黎玩,大佬,就算唔玩分,射十槍同射一百槍都係入三蚊,噉入左錢有乜理由唔射番夠本先?


「Time Crisis,萬煲不厭。」(有冇發覺每隻劉Sir話「萬煲不厭」的game例如Time Crisis同C&C,都係佢闔埋眼都屈爆電腦果d?膚淺也)




Phase 3: Saw III
(20061210)


為左Project: Saw,專登一早起身一野過刨晒兩集DVD加製作特輯,順便爆多舖Time Crisis(...)再直入戲院睇埋第三集,返工考試都冇咁有心機冇咁落力。上畫後冇耐就去睇,果然係名戲同星期日真係好多人,去到即場買飛,除左頭兩行全場得番兩個位,唔使人陪就有呢個好處就算點多人都好即場搵位都唔難搵到。入到戲院先發現,


「原來我咁大個仔,第一次入戲院睇三級片!」


其實初時唔知道原來有《恐懼鬥室3》,係冇幾耐前睇報紙睇到話外國上畫時好多人睇到暈要call白車先知,第二集冇乜激野唔上畫,但第三集咁具爭議性居然香港有得睇,時代真係唔同左。故事延續第二集,上集個差佬同第一集其中一個主角一樣最後俾人鎖入密室等死,不過佢出現純粹係回顧番第一二集部份冇解之謎,主線係「砌圖」已經去到絕症末期,門徒Amanda接手繼續玩遊戲,沿途捉左個女醫生幫佢做手術,同一時間仲有另一個男人玩「過三關」遊戲。因為「砌圖」換左人,今集殺人風格唔同左暴力好多,諗住會好似外國噉睇到暈低?從頭到尾全場居然反應都冇個,冇人走冇人暈冇女仔尖叫,時代真係唔同左。


順理成章地今集更多肢離破碎同血肉橫飛場面,我地細細個已經打機唔血腥暴力唔玩(Doom!家陣仲專登上網買番隻黎玩的Shadow Warrior!同而家都勁想玩番的Rise of the Triad!),又玩真人快打呢d唔見血唔碎屍唔收手,同睇美國動漫大,戲中場面唔算乜野,但實在多血過頭,雖然我喜好暴力但過份血腥唔太鍾意(好矛盾),亦因為太賣血反而搞衰左,好似中間重點戲「砌圖」開腦,我只覺得著墨過多拖到套戲慢晒,整體亦因為分開女醫生同男主角兩條線一時一邊,進度冇上兩集咁順而拖下拖下。另外《恐懼鬥室》系列有一個問題,就係每集都會重溫或解釋上一/幾集謎團,好似今集講番晒上兩集結局之後發生咩事,睇左之前兩集會覺得好正因為解釋左好多野同內情,但如果你睇左新一集先追舊作會好冇癮,但就算係由頭追到而家都未必係好,因為成日回憶同解畫,第二集只需要講番第一集d野但今次要同時講晒兩集以內同以外,自不然慢上加慢。


同上一集一樣,有d野其實又可以一早估到,例如男主角同女醫生之關係,好在《恐懼鬥室》最強之出人意表結局仍然估佢唔到,加埋三集中今集演員演技最好,慢冇所謂我都好鍾意,最少受呢套多過第二集先啦。最後又特登留左唔少伏線,好似Amanda睇左一封信之後同「砌圖」反面,同病床側邊仲有一餅錄音帶冇播到,另外主角同佢個女困左係「砌圖」基地入面冇/未出黎,要再玩多一個遊戲先救得番佢個女,今次唔肯埋尾動機太明顯,唔似得上兩集一了百了之餘又可以合理地繼續延續落去。即係又要等。


今集插曲再加metal,上網睇番個soundtrack,差唔多首首都係仲要全部出自而家最出名果堆,連MESHUGGAH都搵到,但其實睇戲時你唔會好覺。最後一樣野,好唔滿意:中文名副題叫《死神在齒》。睇完套戲,好想問關齒咩事?除左張海報之外,成套戲根本從未出現過齒呢樣野。個中文名點譯出黎?好明顯係宣傳部果班未睇過套戲見海報係點就求祈作個名俾佢。一個負面宣傳案例。



睇過《恐懼鬥室》,先會知道原來三級片/gore/brutal/horror片都可以咁有教育意義咁有思想咁哲學性,三集都值得睇完再睇,編劇太妙故事有野講有野諗,第三集出DVD的話確要第一時間買番隻支持。三集之中,第一集必定最神聖架喇,咁少角色咁少場景咁少錢可以做到咁大震撼,仲有結局呃盡全世界,編劇功力實在太高。第二集已經講左,拍攝同故事因為口味問題唔太滿意,結局驚喜不足仍然夠巧妙搭救。第三集劇情吸引番但實在太多血,雖屬血腥恐怖片系列,但重點一直係思考人性而血同死只作襯托,意識同氣氛之隱晦性血腥先係吸引力所在,好似第一集一路以來流血場面唔露骨,到最後主角鋸斷自己隻腳立即嚇死晒全世界,呢幕仍然係全系列甚至現代恐怖片最經典,但第三集一開波已經大石斷腳同炸彈碎屍,中間開腦手術再zoom in近距離示範,最後扭斷手腳真係會恐怖到暈,多血多到渲賓奪主視覺成份過重,所以個人結論係三套都值得入戲院睇,特別係入戲院「睇」一定係第三集,只不過影像以外計,第三集冇入戲院睇都唔會後悔。


唯一一樣唔滿意,係同太多英雄動漫一樣,冇為奸角解釋好多野,佢地智力、能力同財力來由好多時唔會講得清楚。故事話「砌圖」係個絕症病人,正職做玩具工廠,試過自殺但死唔去,就專殺放棄自己唔珍惜生命d人。可以話佢只係一個普通阿伯,但單憑一個阿伯,後來加多個Amanda,一個人/兩個人點做到咁多野想像到咁多野、可以起N間殺人遊戲研究所、可以搵到咁多錢、材料同機械做咁多殺人道具、可以搵到地方搞咁多野殺人而唔俾人發現、中拳中刀中槍又唔死、又識做內外科手術、仲要咁醒?最吹脹係一個普通阿伯加多一個普通靚妹,可以知道晒邊個人咩料,幾時去邊度做過乜件事有咩人直接間接有關,即係警察同FBI都查唔到,甚至當事人自己做過做完都唔記得左佢地仲查得番出黎,神成噉真係吹X脹擺明搵戲黎做,亦係全個《Saw》系列我最唔滿意之處。之但係睇落去都唔志在算鬼數,個劇本確係好野喎,即使眼前情況係點,真係跟足「砌圖」阿伯每一句說話每一條規則先可以全身而退之佈置確係絕得無可再絕。神咪神囉睇戲唔好駁戲!駁左的話邊度有戲睇?


可能時興三部曲,《恐懼鬥室》有意無意間三集成為一個完整故事,如果冇睇過之前可能會唔明後來發生d事,例如冇睇第一直接睇第二,單Amanda咩來頭、點解會知道咁多野、點解會幫「砌圖」已經唔清楚,而唔知呢d野睇第二甚至第三集有時會一頭霧水。調番轉諗住睇完第三集先追番開頭,唔好意思,第三集揭曉左上兩集太多野,睇完三先睇一二其實相當冇意思。個一拖三劇本真係絕至絕頂,係有樣野集集都見但查實一路以黎冇乜關係,就係saw。第一集最貼題,主題工具已經係鋸,臨尾高潮亦用鋸帶出,但之後每集只客串一下,第二集最後返到第一集結局間密室出一出場三秒都唔知有冇,第三集繼續第二集結尾即係又係密室入面當然再次見到,結局亦係用鋸殺人,仲要升級做電動版忝,不過真正配番《Saw》呢個名只有第一集,之後兩集鋸純粹象徵式出現,比喻「砌圖」遊戲當中必須要放棄一d野以求生存之哲理,但已同呢種工具於戲中之本意冇乜大關連,所以香港宣傳果班其實有先見,第一集已經改定《恐懼鬥室》呢個更適合二三集之譯名(亦見過《殺人鋸》定《追魂鋸》呢d名,似乎係中台譯名黎?)。


三部曲結局係所有人死晒連「砌圖」都死埋,得番一/兩個人、一個遊戲同幾個未解之謎,但已經講到下一年年上第四集。黎到呢個境地,下一集仲可以講d乜?下集先算,雖然死到噉,但以編劇功力,絕對相信要繼續發展落去唔會有難度。可能最後發現難在唔係劇情,係諗仲有咩創意死法。




Phase 4: Saw IV
(20071028)


「有冇咁快呀?」


第三集播完,已經立即公佈第四集製作中,只係冇諗過拍緊第四集已經有第五六集風聲。


「又黎三部曲?」


真係好快加好多。點樣一plan已經plan到咁後,當第三集已經全部人死晒連大佬都死埋?更加覺得冇得唔入場睇第四集。


《恐懼鬥室》系列定左每年萬聖節檔期上畫,不過香港十月中仲冇乜聲氣,第三集咁賣得反應咁好,冇理由會唔買第四集卦?到差唔多上畫,先終於睇到廣告:


「26/10,港美同步上畫。」


見到廣告時,離上畫一個禮拜唔夠。乜宣傳得咁急/咁遲呀。靜到連(會)上畫都唔知。我去睇上畫後第二日、亦即上畫後第一個禮拜日早場,唔知係早場事定真係過左熱潮 - 中午十二點場都唔算好早丫 - 我坐尾五行,前面全部吉位。完場,全院夾埋五個人唔夠。


因為大部份舊角色已死三部曲圓滿結束,第四集可以視為「砌圖」過身後另一個新開始。


「『砌圖』係照譯英文名Jigsaw。但今集字幕叫佢做『鋸魔』變左做Saw。奇柒。」


假如第三集雙線發展你已經睇到頭暈眼花,第四集仲死,線數多一倍。最初宣傳重點,係比第三集更血腥暴力、更出人意表。一開波已經係接住上集尾,「砌圖」俾男主角殺死,送到警局驗屍,跟住個幾兩個字睇點樣切腦開膛拎內臟出黎。第二幕已經到兩條友玩遊戲點樣互相廝殺求存,當然又係十分多暴力場面加爆晒血。你想睇血?頭三個字滿足晒你。只怕會唔會好似第三集又係顧住玩血搞到劇情唔夠順,尤其今集仲要複雜過上集。第一線係主角黑人特警身邊夥計調查間不斷死,今集到佢俾「砌圖」整;第二線一男一女探員查到「砌圖」除左Amanda仲有第三門徒,以二人跟隨男主角同質問「砌圖」前妻作發展,主要係解釋「砌圖」「成魔之路」;第三線係以前同「砌圖」有合作關係之無良律師,加第二集主角差佬同神秘人質成最後困局。因為「砌圖」已死,而前三集太多謎團同伏線未解,預左會留主要篇幅解畫,上兩集就係差在太在意解,過多時空穿梭拖慢甚至亂,今次既然舊角色冇左七七八八,亦以入場人士已經睇左頭三集作大前提,飛前飛後段落比預期中少,只係多線多角色,初睇都相當混亂唔知幾時係幾時邊個打邊個,加上今集演員演技平淡,冇邊個特別突出好似個個差唔多,唔留心去左半套戲你仍然未認得清邊個角色係咩位置、屬於邊條線邊個時空。


系列重點之遊戲相當出色。第三集陷阱可以話精彩,但頭兩集每個陷阱都有寓意,為每個受害人所作所為作相對投影,但第三集冇左呢個特點,亦即係冇左「砌圖」智慧型殺手一半魅力 - 你可以話因為劇情講有自己一套之Amanda代病重之「砌圖」主持偏離原旨。今集由完全遵從教誨之第三門徒主理,當初為受害人度身訂造之深度殺人再現,或者鏡頭處理感覺冇上集咁激,《恐懼鬥室》始終低調血腥更具吸引力,最鍾意陷阱係兩公婆全身穿釘只能活一個,戲入面講左「砌圖」好迷中國術數,個點脈穿針陣甚中式,希望第時有更多具東方色彩陷阱。另一絕仍然係情形點險峻都好,只要你跟足指示做點危險都唔會有事,但有任何差池即時陷家富貴,即係集集電影下場同大家想睇的結局,你睇恐怖片暴力片血腥片唔係一心期待睇大團圓結局丫嘛梗係想睇人死架啦!只係今集有少少反駁:起初話主角有個半鐘救人,趕唔切就會全部人質死晒,而遊戲叫主角唔好咁執著要救晒所有人,但佢最後一秒趕到,一樣死晒全部人,話其實佢唔趕時間等個半鐘過去,亦即跟從「砌圖」別著緊之教訓,夠鐘班人質自然會得救,而家佢硬係要限時前趕到,反而累死其他人同自己。雖然主題係執著,但前後表達唔同甚至相反,只覺得條友明俾人做,或者睇多次先能夠明白當中道理。


至於劇本,當經過左三集、大奸角都死埋,難免擔心會唔會已經去到「厭」之地步,同覺得發展落去會好夾硬,似乎見舊人死晒新故事新角色任發揮,有意完結舊三部曲將《恐懼鬥室》帶入下一章,借機送舊迎新。透過頭三集餘下角色(主角及其他探員),再帶出首次出現之前妻,解釋到「砌圖」以前係玩具設計家,後來老婆難產加自己絕症變得憤世成魔用遊戲教訓罪人,今集主角因為太有正義感太執著於伸張正義,被困於幾個遊戲中同「砌圖」感同身受,明白佢背後苦衷同憤慨。另一路明示暗示除「砌圖」同Amanda有第三者,只係結局公開第三門徒身份,原來係出場最少果個,因為出鏡時間少加上冇乜交代過背景,只係突然就出現,顯得好多野解釋唔到同唔夠意外感,反而將第三集片尾,「砌圖」收埋最後一餅錄音帶,變成今集片頭加下(幾)集伏線就真係一絕。


因為三部曲已終眾編劇眼光又咁長遠,相信一諗已經係諗好幾集故事而唔只構思一兩集,好多舊原素未有完善利用,例如第三集肥佬殺左「砌圖」先知佢個女同佢一樣被困,以為會講兩個下場係點走唔走得甩,點知肥佬差唔多最後十分鐘至出現加只係行行企企,出鏡唔夠一分鐘得一句對白就俾人做低左。當睇到上集片尾延伸成今集片頭亦即今集片尾亦即往後新一集片頭,卻同中間冇乜連繫,就明今集地位及重要性被壓低,太想藉舊主腦之死,帶出新反派同第二個三步曲,只係過於為往後舖路有點兒忽略顧及當下。噉佈局法,都玩到好大喎。大佬死左得番一個真傳,最後仲要話自己死左個徒弟仲要玩遊戲,咁誇,可以點駁落去?第四五六七門徒?定原先講到唔知佢老公咁邪惡好無辜的前妻先係真正大佬?總之唔係變到做神怪片,「砌圖」返生或者變鬼出返黎就得。


錯綜複雜故事同人物關係,睇晒四集都未必明得晒,只睇當中幾集或最新一集自然更混亂。襯頭三部曲玩完,簡單FAQ作一小結:

第一集故事講乜?」
「神秘殺手『砌圖』用遊戲方式懲治唔珍惜生命同生活世人,全集主線為背妻偷女醫生同私家偵探被困同一密室,室內有兩把鋸、一條屍、一枝槍,『砌圖』以醫生妻女威脅,限時前一係鋸斷自己隻腳,一係殺死私家偵探,先可以保命。」

「醫生最後點?」
「自斷一足之後負傷爬離密室,以其傷勢再加如此激烈之行動斷難難活命。但到今集仍未有明解提到,出左密室之後佢下場係點。」

「私家偵探最後點?」
「俾『砌圖』即係困於密室中等死。第二集補充左Amanda後來潛入將佢殺死。」

第二集故事講乜?」
「一班人被困毒氣屋內,當中包括第一集成為『砌圖』門徒之生還者Amanda,同主角差佬個仔。警察剷到入『砌圖』匿藏地點,要屋內人毒發之前救出佢地。」

「差佬最後點?」
「眼見限時將至,救子心切帶走左『砌圖』,最後回到第一集密室被Amanda鎖於其內,與第一集格局呼應。第三集一開始自行斷腳逃走,糾纏間Amanda留佢路中等死,『砌圖』事後表示係由佢執手尾但冇講點樣。第四集中講第三門徒保住佢條命,成為最終遊戲棋子之一,但始終被第四集主角累死。」

「佢個仔又點?」
「其實一直身處『砌圖』基地夾萬之中,遊戲限時兩個鐘過後夾萬打開,開估閉路電視中之毒氣屋其實係錄影片段,『砌圖』利用差佬逃走並迫佢等死。如果差佬聽佢說話,唔作出任何過火舉動等到時間夠,就可以見番自己個仔。」

第三集故事講乜?」
「『砌圖』已經病入膏肓,派Amanda捉左個女醫生同佢做手術,另一方面主角受害人肥佬面對連串考驗,面對當年自己個仔交通意外中之有關罪人,從中選擇懲罰還是饒恕佢地。」

第三集主角肥佬最後點?」
「Amanda同『砌圖』反目令醫生受傷,肥佬剛好到場,原來佢係醫生個老公,殺完Amanda之後再殺『砌圖』。佢老婆醫生被同『砌圖』生命指數連繫之頸圈發動殺死,最後錄音帶講出佢個女仲被困,搵女期間撞到第四集正搜尋最後兇手之男探員,俾佢誤槍射殺。至於佢個女點就冇提到。」

「第四集故事講乜?」
「『砌圖』死左,但繼續有人佈置殺人遊戲,警察一方面追尋身陷遊戲之老差骨,一方面從各途徑同『砌圖』前妻中搜尋線索查究事實真相。」

「主角點?」
「去到最後一個遊戲,因為魯莽害死左第二集主角,再射死埋遊戲主持人即另一遊戲受害人,死剩最後人質先係真正黑手:第三門徒。主角中槍等死。另一線追查新『砌圖』同新遊戲幕後黑手之男女探員,女中陷阱命危,男如頭先所講,去到第三集結局地點,錯手殺死左肥佬。」

「男偵探跟住點?」
「入到肥佬、女醫生同『砌圖』伏屍間密室,第三門徒出現鎖門,令佢被困其中。但戲中有驗『砌圖』屍之情節,代表密室後來再開,但冇交代到佢下落。」

「Amanda同『砌圖』第三集最後反面,導火線係一封信。封信內容係乜?」
第三集冇講,第四集只話封信係第三門徒手筆。可以從中推論Amanda一路唔知除左佢之外仲有另一個門徒 - 最少睇封信之前唔知 - 只係戲中前半已經有兩位偵探表明有第三人,提出調查中陷阱風格更接近Amanda而非第三門徒追隨之『正宗』。」

第三集結局有簡短一幕,『砌圖』倒一杯蠟落餅錄音帶度,點解?」
「第四集講番,蠟凝結後佢將餅帶吞落肚,到驗屍時於胃中發現,係『砌圖』留言俾第三門徒,提醒佢身處一個遊戲之中,由第三集唔起眼伏筆變成以後序幕,再加暗示到可能『砌圖』仲有其他更多門徒。」

「多集以黎,『砌圖』一個絕症末期阿伯,除左設計到咁多殺人遊戲,仲可以對受害人了解得咁透徹,點解?」
「設計才華同機械製作源於自己於玩具廠之工作經驗,就職時其中一件作品就係作為佢化身之邪惡木偶,只係冇講到多項工程背後人力及財力來源,同冇醫學背景而各科手術咁在行之原因。至於對受害人之認識,第三門徒探員身份可視為一綜合解釋,但要睇埋往後一/兩/幾集先能夠作完全定案。」

「點解仲叫《Saw》?第四集一把鋸都冇出現過!」
「問問導演至知。正如點解集集結局都係鎖門困條友入密室至安樂?」
「第三集唔係喎!」
「所以我鍾意第三集囉!」


對於metal友黎講,《恐懼鬥室》必需要由頭睇到尾,因為勁多插曲係metal野,最精彩自然係片尾,FEAR FACTORY喎!MUDVAYNE喎!多一回事預左主流架喇實係當紅大label band一如好多廿一世紀商業電影,頭幾集選擇indie味較重,今集睇睇band list,大路得多。最驚喜仲係完場一刻:


「X JAPAN《I.V.》!」


從來未迷過X JAPAN,個人音樂歷程完全跳過香港人聽外國音樂「必修科」J-Rock。X JAPAN聽過但唔覺點樣突出冇乜落心聽過,對當X JAPAN神噉拜、Hide死左自己都想死埋一份眾信徒,不以為然。最鍾意,反而係最唔X JAPAN的《Dahlia》(係我唔識聽歌嗟)。Hide死左又唔會搵新人(無可取締之神聖地位),其實對佢地復出有少少疑惑。跟住日本國寶會幫美國電影造片尾,仲要係全球版喎唔單係日版先用喎,更出乎意料。風格近後期種美式hard rock,黎到2007年無可避免有點現代(即係nu nu地core core地)同非常美國,但加番Yoshiki招牌交響襯底同過場,日本味立即出番晒黎,鍾唔鍾意一回事日本仔玩音樂學完人再執一執確有自己一套、得日本先聽到歐洲美國完全冇人學得到之J-style。再者,首歌唔差喎。最絕係交響outro之後駁落《恐懼鬥室》主題曲。單聽呢首歌,佢地復出出碟的話,相信隻新碟我會鍾意及更甚於舊作。




Phase 5: Saw V
(20081123)


唔覺又一年,自《恐懼鬥室3》,每年十月底十一月頭指定節目,就係入戲院睇《Saw》此萬聖節應節電影新一集。今年去到第五集,叫做多?導演話全個《Saw》故事係九部曲,即係今年先過左一半。驚未。


第四集片頭同片尾,係警局幫「砌圖」驗屍時,發現第三集佢臨死封蠟後吞落肚餅錄音帶,第四集公開身份為第三門徒之邪惡探員一播餅帶,先知原來自己成為「砌圖」遊戲玩家。有見及此,梗以為第五集就係講佢玩乜遊戲、睇「砌圖」死左仲可以點樣佈局。睇左先知道,原來吞帶片尾帶出,唔係第五集,而係第六集;第五集目的,係上集介紹新門徒後,用今集將佢出現合理化,時間在第三集結局同第四集為「砌圖」驗屍之間。你都咪話唔吹脹。


主劇情從第三集、正義男探員被第三門徒鎖入「砌圖」手術室開始,原本計劃係全部人死晒,只死剩第三門徒一個,等佢可以掩飾身份同時繼續執行已過身「砌圖」使命。點知男探員命大死唔去仲吊番佢尾轉頭,以免自己真正身份洩漏,正邪探員互相鬥法。全套戲分三條線,包括探員明查暗訪對方幾時點樣成為「砌圖」手下,同一時間第三門徒計劃剷除佢,及整左另一個遊戲測試五個人。簡單黎講,今集係第三門徒洗底故事,為將來進一步補完新「砌圖」角色。聽到,都覺得有點問題,同埋唔夠吸引。


最重要,係透過探員回到多個案發現場,解釋點解警察會成為殺人狂魔入室弟子及繼承人,而時間上拉到去第一集之前:初時俾觀眾感覺,鐵絲網迷官係「砌圖」初期作案陷阱之一,今集講到整迷官時原來已經收左第三門徒、個迷官唔係初期而係「中期」,亦即魔警唔係第三而係第二比Amanda更早,而且第一集殺人密室亦靠佢幫手整,難免感到越拉越遠。但總算講得通。而佢一路查,門徒插贓嫁禍等人以為佢先至係「砌圖」手下再殺左佢,只係當一開始已經講明今集玩無間道,去到結局一山不能藏二虎時,就完全欠缺驚喜。


而《恐懼鬥室》系列重點殺人遊戲,除左例牌開場遊戲示範巨刀斷腰,主要遊戲搵夠五個玩家參與,需要大家合作先可以成功過晒四關,不過冇以前咁血腥,炸彈碎屍同鍘刀斷頭邊夠上幾集扭斷手腳生拆肋骨激呀?最恐怖只得臨尾電鋸斷手放血一個陷阱(拿,今集都有鋸的!),仲要旋轉鏡頭環迴立體聲慘叫慌死你唔驚。但好睇之處在充分表現人類劣根性。已經到左第五集,電影世界中「砌圖」殺人已非新聞,加上講到今次參加者係社會中上流人士總有一定過人智慧,所以通通極度醒水同識得犧牲其他人保護自己,唔會發生觀眾問「點解佢(地)唔XXX」話佢地白痴情況。


同埋今集遊戲好玩在反映各人人格:指示提到唯有「違反本性」先能夠成功,而五個人都係有財力有權勢者,在於佢地「本性」即自私自利,但能克服到此本性世上又有幾人,特別如佢地本身有錢有面平日作威作福我最大一班?可惜在今次遊戲設定失色,唔係視覺效果方面,而係唔配合劇情:以前殺人遊戲針對受害人本身罪行或缺陷設計,今次就冇左呢樣野,雖講求合作性測試眾人內心而且有心思,已失去當初遊戲設計之性格。同最大最嚴重問題,係遊戲同全個主線關係完全唔密切,遊戲去到最後玩完,先開估除用作試驗五人,亦係門徒洗底嫁禍工具之一,但原先想帶來意外之扭轉效力唔夠,全個遊戲可有可無,就算唔加入套戲入面都唔會有任何影響,而家做到除左滿足各位fans「要有殺人遊戲先至叫得做《Saw》」心態,同為左可以夠長拍一套戲而非一集電視劇,完全感受唔到當中重要性。最後生還者有一/兩個,可能佢(地)之後幾集會有關鍵性發展,但此乃後事已與本集無關。


噉套戲整體掂唔掂?我覺得好過上集,對我黎講《Saw》單數集好睇過雙數集,雖然我諗唔會太多人認同,因為結構都幾散,同埋今次可反駁位多過以前。最明顯係全集前提:門徒為斬草除根鞏固自己勢力。原先「砌圖」同第三門徒計劃,係第三集結局(亦即連帶同時間發生之第四集劇情)一切結束後,正反兩派所有人留低佢一個,由佢救出第三集主角肥佬個女,等佢成為英雄從而隱藏真正身份繼續懲罰世人,而另一生還者正義探員第四集結局被佢好型地鎖入手術室。手術室有度逃生暗門,有部錄音機叫佢黎到呢個地步就夠,再走就會死,佢照走跟住俾人伏,結果用一個好絕之方法逃生 - 雖然,一向謹慎之「砌圖」會留下工具佢運用,係一大敗筆。此乃全套戲最大反駁,點佢都只會累死自己:

  1. 如戲中發展,探員唔聽餅帶,之後俾門徒伏再困入陷阱內等死,但又會留低工具俾佢走甩。劇中話探員女拍檔上集中陷阱重傷,昏迷前估到門徒真正身份(雖則唔知點解會估到),而家探員死唔去,自然會釘死佢。
  2. 因為要及時救肥佬個女同警察到緊現場,第三門徒冇可能等探員密室入面餓死,而按餅錄音帶所講,佢肯唔走等落去自然會俾警察發現而生還,亦即個遊戲本身有打算放探員一條生路。只係無端端俾人鎖門,而現場除左佢之外只得第三門徒一個,就算佢之前一無所知,照樣推論得到門徒真正身份。
  3. 話留佢一命係原則的話,所用陷阱係冇得走必死果隻(不顧及如劇中「劇情所需」情節),已經違背左殺人遊戲本身原則,因為佢所作選擇係遊戲開始之前,真正「玩」之部份冇任何選擇或解救機會,此乃「砌圖」所不容。而為大局可以放下「砌圖」信念的話,又何必殺得咁麻煩?要殺探員門徒其實有大把機會,只要佢唔婆媽,例如唔用陷阱就噉一刀或一槍殺左佢扮係肥佬落手就得。反正而家都冇原則可言,噉做何解唔可以?
換言之,「砌圖」同門徒點都係想佢死/要佢死,先能夠完成整個計劃,而如當初計劃真正成功需要全部人死,但又整一個「遊戲」俾探員選擇留(生)定走(死),全盤計劃之前提已經唔能夠成立。有心成大事,就根本唔需要有第五集啦頂你!


上集間場一陣之碎玻璃箱,今集終於用到,原來係最終遊戲工具,但比你想像中戇居。遊戲環境係門徒屋企地庫一間大房,話要保命就唯有藏身碎玻璃箱內,但發展變成肉搏一輪門徒入左箱,死果個當然係正義探員。只係連之前個遊戲普通參賽者都醒水到爆識得睇晒環境機關先行動,主角就顯得非常戇居。佢拎到部錄音機時房門仲未閂,點解唔識得走番出房外先聽,明知留係房入面多一秒就會中招?跟住佢踢左門徒入箱,明知係陷阱都唔立即走佬,而走埋個箱度爆多一輪粗口,一爆完間房就閂門。真係玩遊戲果班仲醒過佢唔會犯呢d老土毛病啦,所以點睇都覺條友抵死唔值得可憐。個箱裝滿碎玻璃,但一d都唔利,兩個人著晒長袖衫褲,頭又有頭髮保護,根本訓入個箱都唔會點受傷,同頭兩集Amanda兩個遊戲一樣,同門徒本身有關之遊戲唔點具殺傷力,搞到個陷阱似佢整俾自己走佬多過用黎試主角,即使仲跟隨得到「唔跟規矩做就死」,已經夾硬左少少。所以仍覺得好睇,大勢已去已明顯:第一集無人能敵,二三去到「唔意外」,四五尤其今集直頭「唔成立」,可想而知幾大件事。


總之一開始殺得乾手淨腳,條友就唔使煩咁多野,亦可以回到真正劇情。今集最重要,其實只交代「砌圖」老婆接手左佢遺物之後大變,但實際係點未有人知,不過中途見到佢會主動搵FBI阿頭投訴被探員跟蹤,而對方巧合係劇情關鍵人物之一,但當時劇情佢所講唔似有發生過,其中似乎暗示到「砌圖」老婆都被影響,甚至同第三門徒有合作關係?之前積落一大堆,好似第三集令Amanda同「砌圖」反面之一封信,第四集結局令第三門徒置身遊戲內之新一餅錄音帶,通通未講。就連第一集斷腳醫生最後下場,集集話解,到今集都未解。最怕佢爛尾唔講晒,雖然今集冇想像中咁顧及解以前d題亦交代得好清楚,始終有前幾集包袱,會唔會搞到唔夠時間解答晒所有野?等下年萬聖節先知。


仲有一樣不滿:氣氛冇以前咁邪咁暗。可能太無間道同講劇情,今次做唔出舊幾集陰森緊張,即使配樂用多左電子同交響減少metal,連片尾都唔用metal歌(懷念FEAR FACTORY同X-JAPAN),入場想睇驚嚇片覺得迫力未夠。另之前冇乜特別留意,拍攝手法刻意用唔同色調區分時空,鬥室空間主色係綠,而現實/回憶係黃,今次相當明顯,再諗番第二集,毒氣屋爆黃而差佬同「砌圖」對峙地點偏綠,其實導演一開始已經幫個故事開估,但當時先第二集自然冇聯想到咁多啦。除左故事同智慧,《恐懼鬥室》成功創作出自己一套光影風格,你話佢食老本食成世加越食越失色都好,有性格我就鍾意。


睇完思考一番,今集唔算拍得好好,但俾我感覺好過上一集,即使上集更貼題同完整,有時唔係拍得好就等於一定鍾意,始終好定壞歸因自己感受。不過作為《Saw》全系列其中一集,就好難過到自己一關;另一條線戲內完全冇重要性、於系列中欠代表性,而且劇本視為一個外傳分開製作會更好,而歸類為正傳之一、九部曲之一,性質、時序都唔夾,就如當年《無間道》應該睇第二集先睇第一,需要說服自己。同我擔心再落去,好難似而家噉仲兜得到,「唔成立」之情況會更常出現。





一路跟隨,發展同水準有高有低,但《恐懼鬥室》系列仍然係年來突出血腥電影,係有目的有道理地殺人,兼殺人於無形假手於他人或受害人自己佈局精妙,同時令你覺得班人死係死有餘辜應有此報,唔係無端端一個嗜血狂徒出黎見人就殺,再加上一份懸疑性、「預測不能之結局」、製作組令人欽佩之長線思維,抵佢成功。


追完《Saw》,第二個目標自然係同樣賣cult賣血之《Cube》