好易理解點解連戲都未上，《太極》兩部曲已經俾人小到反肚，除左第一集叫《太極1》又話「從零開始」到底叫第零集定第一集第一個印象已經混亂，男主角個樣點睇都係白痴實在做唔到大師完全冇台型冇氣勢（難怪見過的海報同紙牌通通見唔到主角個樣），同埋Angelababy（不過，法官大人，我認罪），加埋出名做導演好多年但差唔多冇套拍得好的馮德倫，仲有自詡「新派武俠片」預告拍到塔倫天奴玩野戲路噉款但當然同主角個樣一樣欠缺大師風範，同歷史上冇幾多套港產／國產非古裝奇幻派動作片成功得到，牌面已經太多位俾人入。不過就噉睇trailer未至於仆硬，相反反而有點期望，因為中國人動作片早成死水，難得有套可能玩得出新意，爛唔晒咪支持一下。

但係話冇擔心過就一定昆你，睇港產片國產片咁多年，往往死得最慘就係開口埋口話自己「新派」果埋（《四大名捕》．．．），馮德倫又正正係「新派」活躍份子之一，或者偏負面心態入場，反而有驚喜。故事預左唔會有突破，「天生武學奇才的白痴仔要學拳保命最後學成變大師」一早俾人拍到變cliche啦，但不得不讚導演導得唔錯，節奏非常明快 － 當劇本根本簡單過簡單同時知道自己賣點只係打戲，仲吹咁多水真係托咩 － 最少個平平無奇劇本一路落去冇乜拖位悶位，需要知道的角色大事細節又交代得夠清楚。換著俾輩份老少少導演去拍，實會有「我係商業但同時我要保全藝術性故事性」之堅持，結果成日拖泥帶水。

「可惜開頭交代主角童年一段默片，獨立黎睇別出心裁，但相信拍果陣都諗唔到早佢地一個月上畫套《消失的子彈》玩同一條橋仲要玩得絕好多，一拍埋《太極1》條默片立即低手晒。」

重點的打戲唔多但精，洪金寶動作設計唔錯夠說服力，你會以為Angelababy真係識打功夫，但由頭睇到尾所謂新派元素其實用得好表面，諗來諗來新得三個地方：一開始聽住metal睇梁小龍耍太極，以為會學鬼佬中式武打片用好多band野做配樂，點知只此一著；跟住steampunk移動城堡，以為會好勁太極掌打爆成部火車頭之類，點知出黎唔知做乜；同得閒無事要彈一大堆文字同浮標解說或者變卡通畫面，真係打機睇動畫噉款，最反傳統就係呢樣（或只有呢樣），不過其實相當多餘甚至畫蛇添足，只有話好在未去到白痴地步。結果套戲死唔晒，不過拍唔成大陸版塔倫天奴《The Man with the Iron Fists》，只去到電影畫面打機化代表作《Scott Pilgrim vs. the World》 層面，但都遠不如。

若談敗因，有四。首先，欠缺強者反派，因為主角為入村學拳係主線霸晒大半篇幅，打機式一抽一對戰之餘角色都屬正派，從頭到尾都搵唔到帶宿敵色彩之鮮明邪派。次之既然冇反派高手同時主題係外敵入侵同仇敵慨，繼而擺脫唔到最大敵人就係外來兵仔的格局。另steampunk火車頭明明可以大有所為，到頭來淪為一個場景而唔係一個對手，壓軸只一班人幾個高手打一小群雜卒，即使攝影武指有心思，都拍唔出作為結局應有之龐大氣勢，亦糟蹋晒一心構思之「新派」設計：既然想講工業革命勢力入侵，同玩奇幻超現實世界觀中國武功對外國機關神兵，但搞一大輪唔係打機械而變返普通武林高手打士兵，噉之前搞咁多野黎做乜？我點解唔隨便睇另一套清末民初武打片，而要睇「新派」的《太極》呢？

最後一個問題當然係「新派」，用時下流行之打機式手法處理畫面自然唔係人人接受，只有話導同演居然唔惹人反感，但整體只徘徊於「ＯＫ啦唔太戇居」線上，差少少就會跌落「嘩好柒呀」境地僅僅過到關，同好慶幸冇拍成3D，雖然好多場面設計擺到明本身想拍立體。或者導演同老細們自己都知自己事，所以第二集拍出黎，完全兩回事。

照計兩部曲籌備同拍攝同時進行，風格相差都幾遠。第一集講主角由零開始去學太極拳，第二集學成英雄崛起同村民一齊對抗想霸村強拆之官府，立即講少好多廢話打多好多，仲好啦真係有人入場為睇你講故仔咩。其實今集好左係延續上集奇幻風設計左個clockpunk反派，但只出一出打少少就玩完，又係浪費晒大好概念，而三個太極高手打清兵洋炮（好在冇洋兵），終於唔只係二三十人圍你，起碼影到好似幾百人叫做有多少少睇頭先，但同第一集一樣咁無奈，百幾人幾十枝火槍都都抽唔贏幾個人，三碌大炮同座城堡一樣又係用黎做佈景。而相信最多人不滿係，第一集賣點在於拍到Angelababy好打得真係大師款，點知第二集基本上打戲冇佢份全部俾晒已成大師但仍白痴的主角，Angelababy的存存，只為俾大家睇佢主動擒仔（叔叔不行了）。

最後膳房對打拍得超好，但睇完又是超級無奈。先重溫少少Matrix第二集：為左同終極大佬鬥Neo去搵大祭師修行，先同保鑣六翼天使鄒兆龍打一大餐（冇錯就係拍完Matrix成為世界一線打星之後拍全城睇完齊介凳果套終極垃圾《全城戒備》俾人恥笑一生果個鄒兆龍），跟住見大祭師開個竅再打大佬Agent Smith。而《太極2》舖排係去到打鄒兆龍，打得好精彩但打完之後話「你已經打爆機喇最後大佬死左喇」，結果冇同真正最後大佬點樣正面交鋒（實際上，同第一集一樣，根本搵唔到乜野「最後大佬」），只同個冇乜關係的高手過完招就話已經為民除害了，好睇一回事，又係一頭霧水WTF的結局。仲未提到洋槍洋炮滅村點知兩套戲完左一個人包括壞人都冇死到的政治正確。

兩集中下集較優，除左打戲篇幅較多同冇出現中國功夫打鬼佬之類，仲比較認真唔低能，畫面風格亦同第一集相當唔同，間唔中玩玩攝影幾徐克feel好似中間加左野《迷魂記》式dolly zoom，偽3D位同打機位亦差唔多全部冇晒，正正經經反而更加順眼。不過，點解一齊拍的兩部曲兩集間風格會變得咁犀利？相信最大原因係第一集已經使晒錢，所以第二集冇錢做特技玩CG。雖然評價唔算好好，但《太極》二部曲其實唔算差，底線係功夫、囡囡、metal、ACG炒埋一碟，居然炒唔晒。不過最驚唔識見「好」就收，雖說二部曲其實之前放過風出黎實際上全個系列係三部曲，而第二集埋尾仲要落好大條伏線，證明絕對唔止兩部曲咁簡單，但點解收得咁埋？應該又係錢事啦，睇兩集場面畫面都慌使得少錢，台前幕後卡士文戲打戲又未至於可以大賣特賣果種，梗係老細想睇定頭兩部收唔收得先決定開唔開最後一集啦，但個伏線搞到好似Bio Hazard就好驚，難得而家想扮打機但唔太白痴，你一話黎緊會太極打怪物打喪屍，就會立即變返低能戲真係全城戒凳架喇，馮大導雖然《太極》可能係你最成功（唯一成功？）之作，但都成為唔到大師，只叫做由白痴升格變返做正常人咋。所以，停啦，唔該。

不過《太極》俾我最大驚喜，莫過於搵左首melodic death metal做主題曲。月頭去影藝睇上集，梁小龍出場時播，覺得好耳熟，歌佬把聲實在易認嘛；月底去新光睇兩部曲連環播，第一集頭播一次、第二集字幕播多次，就認出原來係In Flames《The Mirror's Truth》。記憶中自從《The One》最後一幕正義李連杰八卦掌大破邪惡李連杰五形拳拎左首nu-metal黎做配樂（唔記得Disturbed定邊隊了），冇錯其實好柒但鬼佬鍾意，開左先例從此乜叉「國際性」動作片不論古今中外一打就要播住外國rock/metal band歌。《太極》會揀In Flames黎做主題曲的箇中因由非常想知，唔知係咪馮德倫睇完個MV覺得同佢套戲一樣唔知做乜夾晒所以用呢首？又買license買左幾多錢呢？

另一得著係成世人第一次去新光戲院。睇戲豪華之外另一蒲點係影藝，貪佢就算唔禮拜二平時夜晚睇都只係$50，計埋來回車錢都仲平過旺角地方又就腳，而且必定大把位任你揀之餘畫面音響都唔錯，有時想睇戲又就唔到星期二都會選擇影藝。第二集上時見裝完修重開的新光賣晒廣告話一張飛可以睇晒兩集就去見識下，新裝修果真唔錯，螢幕細左少少但靚到喊，係差在喇叭集中晒前面坐後面的話音響唔夠，冷氣可以更大就更好，同蝕左十蚊。間院同豪華一樣超大禮堂夠坐成千人果隻，分前半$50同後半$40兩個區，但基本上開左場之後亂咁坐都冇人會管你，買平飛都可以走去前面貴飛區坐，反正千人大院實夠位。早知就唔俾多十蚊啦。如果仲有好似今晚一張票兩套戲連環播睇到笑可以必定再奉陪，不過機會都幾微，因為場地正畫面正但新光實在太遠，放工要旺角迫地鐵過黎北角，睇完又要坐一大輪巴士過海，來回最少廿蚊車錢個半鐘，計返成本都幾高。如果當年影藝裝完修都有而家新光咁正咁多特別節目就好了。