自從買左MastaMic隻《流行反擊戰》，每次寫到或講到香港地做音樂，有一句我實會提；

「細個學音樂讚你有天份，大個做音樂話你冇錢搵。」

明明老豆老母最鍾意迫你細細個開始學Ｎ種樂器，好喇到你真係學完好有興趣有心想以音樂作為事業，老豆老母就會鬧你唔實際，非常矛盾。所以睇《Searching for Sugar Man》非常感慨，因為佢就係講一個歌手明明有才華加可以影響另一個國家文化發展，偏偏因為社會現實同商業規則，最後追夢唔成仲消失無蹤，咪即係世利風氣趕絕夢想的香港獨立樂界日日都見的平常事囉，就連戲名中文譯名都要借用「巨聲」（雖然個節目大家都知，尋夢只是包裝，內定才是王道，再次證明香港多麼現實），可能中文名起得好，就算套戲點睇都唔似一般香港人會有興趣，我睇果場都爆左一半以上，雖然可能好多人真係因為「巨聲」兩個字以為係無記種歌唱比賽節目而入場，我附近有幾個睇左半套唔夠已經開始訓。

唔知你會唔會好似我，入場前諗住會係套民歌版《Anvil: The Story of Anvil》，因為性質好似，不過《Searching for Sugar Man》有兩個大分別。Sixto Rodriguez唱歌非常好聽填詞詞鋒銳利，戲入面一眾幕後高手個個話佢係新一代Bob Dylan，呢樣真係冇煲水，根本就係一個歌詞有氣質之餘仲要聲靚識唱歌的Bob Dylan，而且外型性格都非常討好。人物本身好多塑材可以用，但係重心唔放主角身上，就連主角都要到好後來先出場，而講到佢對另一個國家發展之影響：七幾年頭出道出左兩隻碟，美國本土紅唔起，其中一隻碟銷量只得六隻（如果你睇左套戲，可能會同我一樣諗法，或者「賣得六隻」只係唱片公司高層唔想分版稅俾歌手而編造之煙幕，唔好唔記得當時係種族歧視非常強烈之六七十年代，而主角係個拉丁裔墨西哥人），跟住其中一隻流傳左去由獨裁政權同種族主義統治之南非，令當時年青人發現原來世界上有呢種音樂、原來人可以對社會對建制有咁多唔同想法唔一定要服從，結果「紅過貓王」兩隻碟成為南非新世代革命歌集，令當地地下藝術界同延伸之社運文化急速發展，為全國帶來一番新氣象。其實都幾傳奇，邊個諗到一個歌手只賣得幾隻碟，可以影響到大西洋另一邊一個落後國家發生咁大變革？《Searching for Sugar Man》可能係捷克樂隊The Plastic People of the Universe之外，你第二個聽到由搖滾帶頭引發之革命故事。

另一非常特別，係套戲冇戲味。當主角明明能夠成為新一代天王巨星，點知出左兩隻碟都可以完全冇人知甚至冇人有興趣理，然後「台上自焚」「鬱鬱而終」，已經劇情豐富到大把戲可以做，但就偏偏唔渲染，就算後來主角真身出現時，都完全冇煽情冇濫用。我欣賞導演處理得咁平淡，就算《The Story of Anvil》同樣以寫實做賣點，中間講到佢地五十幾歲再錄新碟時，由發生好多爭執跟住大家傾偈和好如初，都未免太假太過戲劇性（對我黎講係全套戲一個敗筆，所以我只可以俾9.9分）。《Searching for Sugar Man》你可以放心，即使去到後半佢二十年之後第一次踏足南非，全場萬幾二萬人一齊唱一齊歡呼，都唔會感到有半分造作，任何野都拍到好似一個普通人日常生活一樣，其實因為主角本身就係噉樣。四十年前'60末'70初歌唱事業未正式開始已經告終，佢冇怨天尤人，馬死落地行，自己讀完大學拎到個哲學學位，都會放下第段做苦力做地盤做清潔，要到三十年之後九十年代末先終於成為巨星，都唔會點樣特別去講去炫耀，表演完返到屋企繼續做苦工，唱歌同打工賺到錢唔會揮霍，而分俾家人、幫朋友、捐去做善事。這，就是真正的大隱隱於市，同埋真正的搖滾精神：生為藍領，一生藍領，死也藍領。

呢點《The Story of Anvil》都有提到，同代樂隊Bon Jovi、Scorpions、Whitesnakes隊隊變晒國際巨星，唯獨Anvil兩個人仲係隱世巨聲要去做工廠做跟車，問返佢地老細，會覺得佢地特別，因為做野從來比好多人更專注更落力，但唔知道原來最特別係以前咁威水。所以邊個話學音樂玩音樂一定冇用冇前途？有陣時得著唔一定係藝術知識同技感本身，而係本身門文化其他帶到俾你之身心發展，我身邊做野最落力、工作態度最好、待人處事最正面一班，好多都band仔band女黎，正因你有理想，先會為圓夢想而有動機去努力工作，就如之前訪問怒人時，佢都講過搖滾就是藍領，藍領就係要工作，總要一直有野做，先可以磨練到自己意志避免頹廢，會覺得生活夠實在。

假使你係夾band或熱愛音樂，《尋找隱世巨聲 Searching for Sugar Man》一定唔可以錯過，除左導演出色，歌非常好聽，教識你美國同南非歷史，同令你對底特律認識除左Robocop之外再加多個Rodriguez，而將其中故事投影香港獨立文化界，真係會睇到你非常感觸，因為香港真係再搵唔到夢想，「巨聲」都只可以靠關係而唔係實力做到，而睇完套戲，可能會令你重燃心中拋開一切再次追逐舊日夢想團火。所以會分享堂前燕呢篇《我的志願》，我仲要戲套上畫之時撞正失業，所以睇完套戲、讀完篇文再看自己，更是感嘆萬分。雖然投身indie界已有十年，但叫我去追夢老實我亦冇咁大勇氣，自問冇離開左本行，就算冒險唔成都有足夠積蓄學歷資歷重頭黎過之把握，簡單黎講即係我冇輸得起的本錢。同埋，當你同屋企人一齊住時，好多野都要顧全全屋企先可以做，我唔直接答你，我用例子答你：早排有個9A狀元唔要高薪厚職而去做巴士司機上埋報紙頭版，我老豆果日買左份報紙之後拎住張頭條當正係你老母噉屌，由朝到尾屌足成日。

人地有9A加屋企人支持，所以鍾意做咩工都可以，做唔掂或做到唔開心咪返轉頭囉9A要做返份高人工有幾難呀？可惜我兩年公開試唔好話A連C都冇幾多條囉，仲要屋企人擺到明唔會支持你做好多野（冇錯，我老豆老母正正就係MastaMic講果種），黎緊做音樂，我都只打算同以往一樣只以兼職方式去做，只係我唔敢我輸唔起，唔代表其他人唔得，希望有心的你睇完《Searching for Sugar Man》同堂前燕《我的志願》之後，會敢豁出去做自己想做之事。