Project: Watchmen





Phase 1:
Who Watches The Watchmen?



作為香港人,冇幾多個唔係飲日本奶大,不論購物還是娛樂,大半不離日本品牌,加上亞洲人總對自己亞洲文化較受落,即使美國係全球一大商業國,文化產物在港一直唔及日本甚至韓國受歡迎。不過日本野睇左好多年,越睇越覺得有問題,商業味過重、過份包裝、死唔斷氣、萌...要數,可以繼續數落去,簡單總結正面不足以彌補弊端,主因忽略美國佬極度睇重之橫面發展。導致開始欣賞美國漫畫,就算同樣擺明商業,最少製作更全面更嚴謹,好多創作受經營手法令人跌錢都跌得心服口服。當中最極致是《Watchmen》。個名聽得多,直到真正睇左,先感嘆到何解被一致推崇為史上最神聖漫畫,甚至已經超越左漫畫成為真正藝術。


漫畫出版年份已是1986年相當久遠,當時漫畫仍被視為市井娛樂,直到八十年代後半先出現轉變,歸功於兩個人:Frank Miller,漫畫《Sin City》同《300》被改編成電影即時街知巷聞,風格非常黑色,另一人係作品充滿文藝性、帶濃厚心理學及政治色彩之Alan Moore,英國人身份作品亦較異色,好似回到維多利亞年代歷奇之《The League of Extraordinary Gentlemen》,同反政府意識強烈之《V for Vendetta》。1986至1988間,每人創作左兩部鉅著,Frank Miller先作《The Dark Knight Returns》講蝙蝠俠年老退休後東山再起,再寫蝙蝠俠出身《Year One》,加埋Alan Mooer用小丑做主角講佢瘋狂內心之《The Killing Joke》,之前蝙蝠俠衰起上黎可以好低能,佢兩個用前無古人手法顛覆角色,噉樣搞一搞,蝙蝠俠正式成為黑夜騎士同最重要漫畫角色。加埋《Watchmen》,首創從現實同負面角度剖析正義英雄,可視為八十年代漫畫四大名著,自此漫畫作者唔再視漫畫為一種俗套娛樂媒體,改為嚴肅探討各種人性同現實問題,開創要幾暗得幾暗之漫畫新時代,令漫畫書從「公仔書」昇華至一種被認真看待之藝術媒體,睇漫畫一班唔再係細路,廿幾三歲大人更加熱衷。雖然三本蝙蝠俠漫畫影響極大,包括啟發大受歡迎之《Batman Begins》同《Dark Knight Returns》,除最沉重之《Dark Knight Returns》外,另外兩本唔太識欣賞,四大名著中真正一接觸立即迷上、睇過翻尋味一睇再睇,是唯一全原創作品《Watchmen》。


未睇故事,單講媒體格式,已經作出好大突破,美術部門兩大主管Dave Gibbons同John Higgins居功至偉。早期漫畫因為追求娛樂性,畫功分鏡經常浮誇,《Watchmen》一反常態地平實,固定一版均分九格,有需要先會將幾格合拼成一大格,組織維持工整唔會過於譁眾取寵,又有效突出所有特別場面。再一反漫畫鍾意用鮮色傳統,色調偏沉偏紅,人物設計成熟,加重故事時空內末世感覺。最與別不同,係放棄常用之漫畫畫面手法。首先唔加聲效詞,美國佬好興郁下手十幾廿個字母擬聲,有時玩過火變得白痴,勁在連風位都唔落,所有動作場面單靠畫功同角色帶出動感迫力。又睇開美國漫畫都知,因為故事歷史長遠加上人物網廣闊,每每一個角色出場,都要用大量旁白或自白交代角色背景,仲有佢同其他人、當時情節有乜關係,往往成版都係波波同字,又特別鍾意做左一樣野,當事人或身邊人要再講一次或想一次,等讀者清楚知道頭先做過咩動作、目的係乜,有時搞到好累贅,仲好似當讀者白痴睇唔明。所以睇《Watchmen》時,睇得好舒服、好流暢。


書中一頁


角色枝節眾多,劇情中只用到適量旁白,絕對不足以提供全部所需資料,所以全書十二章,除大結局外每章最後加入仿真參考資料,好似故事內提及到之書籍內容、報章、學術報告等,利用附加部份補充番故事每個角色同個別部份,而且製作勁認真每每整足七八版,第一次睇《Watchmen》用左十二晚先睇晒,主劇情部份唔會花太長時間,篇篇幾千字之附件先花時間,唔睇附件都會睇得明個故事,但細節位同每個角色背景,唯有睇埋附件先能夠充分理解,至投入得到故事個世界當中。


《Under the Hood》:退休英雄自傳


比好多人前衛,係將漫畫媒體發揮到最盡。唔同文學只得文字,亦唔似電影只得單向飛快影像,漫畫書用文字加插圖講故事,既然係噉每寸空間用到足,每一格畫得非常仔細,好多唔留心未必發現到之部份同劇情環環相扣,例如某一格中角落頭出現過一張報紙,個標題原來有重要性,好多時要從畫面細節得知時事政局。又有時早期某個過鏡人物,原來若干章後有幾份演幾場戲,到後來揭番轉頭原來十幾版前有呼應,大量標誌如笑面、血漬同時鐘三個主題更加經常有意無意出現,最絕有時用景物配搭砌出,同樣唔留心唔會立即認到,原來畫面中畫者想帶出係其中之一。除故事外美術令《Watchmen》異常襟睇,每一次重頭開始都會有新發現。


編劇亦令讀者一面睇一面拍案叫絕。全本漫畫勁多角色,唔少部份只得配角/路人演出,雖非重要角色冇左佢地又唔得,並非只得班主角玩晒。流行幾條線同時發展,普遍兩段劇情每段一格輪流進行,絕於好多時其中一線旁白、內心剖白,會同另一邊畫面出奇地夾,甚至一個人講緊一樣野、描述另一個人,同另邊廂所完全兩回事、大家全無相干,將佢番說話套落另一副畫中,又似別有所指,加上結果一係好應景一係好諷刺,就連自白內心戲,全章得一個人從頭講到尾,說話同畫面之相配合唔會睇到悶。服晒作者編劇同創作對白之心思。後半迎合結局步伐,加入另一種多線發展,一個情景或一格內兩三組唔同人同時各自做野講野,越近結局前夕人數同密集程度不斷向上,帶出另一種緊湊,不過未及用到局中局咁強:去到中段,有個靚仔長駐報紙檔睇海盜漫畫《Tales of the Black Freighter》,每當佢出場本漫畫會做另一劇情線,漫畫中對白成為固定旁白,差唔多每一段漫畫對白,又或調番轉現實中某人對話,正好非常完美描述緊或諷刺緊另者。就好似寫好本來個故事後,再按每格劇情作另一個故仔出黎,獨立睇勁精彩,拍埋原來劇情又緊貼發展一齊去到最後高峰結局,簡直天才之舉。


局中有局


沉色配合非常成熟畫風,加上構圖分鏡極具藝術性,正統得唔應該叫漫畫,叫圖集就差唔多,爆發新風潮graphic novel,具小說味道同深度型式又不同於小說,《Watchmen》正是充份利用漫畫媒體各範疇之最佳例。讚嘆多番,仲係揭緊本書咋喎。都未認真睇本書。





Phase 2: The End Is Nigh



盡量貼近現實,故事世界同我地成長之二十世紀相差無幾,最大分別英雄真實存在。1938年,即現實中超人正式誕生一年,出現一個暴力街頭判官,被稱為Hooded Justice。



雖則只係一個幪面俠客,並無任何超能力,Hooded Justice啟發左大量跟隨者。到1939年,Captain Metropolis覺得集中資源比分散打擊罪案有效,號召所有正義之士組成Minutemen。



不過Minutemen淪為公關單位多於治安組織,加上大量內部問題,十年後解散。中間經過一段英雄各自行動真空期,值得一提所有英雄只係普通人,靠體能、智慧及科技伸張正義,最「超級」之處只得奇裝異服,所以故事中普遍稱呼係匿容遊俠(costumed/masked adventures)同義警(vigilante),而唔用超級英雄(superhero),直至Minutemen解散再十年,先出現真正超級英雄。



例牌地科學實驗出意外,博士被儀器原子分解,用幾個月重組自己,可以長生不老、控制分子、創造物質、看破時間、穿越空間。換言之,成為神。




"God exists, and he's American."


美國政府將佢命名為Dr. Manhattan,根據史實,世界大戰時原子彈計劃叫Manhattan Project(多謝《X-Files》),代號曼克頓博士喻意佢係美國新一代終極武器。全世界只得Dr. Manhattan真正擁有超能力,係唯一一個超級英雄,從而令《Watchmen》開始遠離現實:利用超科學大能,世界科技一年間突飛猛進,對國際政治影響更大、同我地世界最大差異,係Dr. Mahattan及其他英雄插手,令美軍打贏越戰,跟住制止水門事件發生,尼克遜做左二十年總統。



全漫畫偏深色、紅色,唯獨佢一個淺藍,超凡脫俗而神聖。


見到美國可以輕易化解核武、毀滅一切,蘇聯抗衡方法只有擴充大殺傷力武器儲備,令冷戰升溫,末日鐘加快運作。理論可以帶黎世界和平同文明進步之神靈降世,到頭來令國家關係更壞,社會動盪不安加劇。



有見及此,Captain Metropolis召集包括Dr. Manhattan之新一代英雄,想延續Minutemen精神叫大家組成Crimebusters,再次共同打擊罪惡。出席會議各人,亦係往後劇情主要角色:



除左Captain Metropolis,Comedian係唯一同時參與Minutemen同Crimebusters之元老級英雄。身為Minutemen一份子時是全隊最年輕成員,之後成為國家英雄,參與越戰、政府秘密行動,例如強烈暗示因為佢先至冇發生水門事件。雖稱為英雄,行事手法心狠手辣,完全視品格道德如無物,比壞人更邪惡。



Hooded Justice出現時,啟發左個年青警察成為Nite Owl,佢退休之後,一個後生仔上門要求承繼Nite Owl之名。此君本身修讀機械工程同鳥類學,自小已視Nite Owl為偶像,因為家族傳下大筆遺產,就用資金同科技知識,將自己變成新一代Nite Owl,充滿蝙蝠俠影子。



另一相似角色係Ozymandias。原是富家子同天才,十七歲父母雙亡,不過選擇將用之不盡家財全數捐出,自己踏上偶像亞歷山大長征路途,重溫古時偉大帝皇戰功偉績,到達亞歷山大葬身之所,覺得受到感召,決定以法老王Ozymandias之名化身英雄,被稱為「世上最智者」。



當Minutemen解散,英雌Silk Spectre懷緬冒險歲月,訓練自己個女成為接班人,Crimebusters聚會第二代Silk Spectre首次出場。不過本身唔想做英雄,只為順應母命自應酬成事,另Minutemen時代,第一代Silk Spectre曾有被Comedian企圖侵犯之不光彩歷史,令後來Silk Spectre二世及Comedian二人關係惡化。



最後一位Rorschach,係全故事中心人物之一,可視為主角中之主角。悲劇童年加上遇到太多社會不公,決心做英雄懲治壞人,不過成長過程導致成為極端右翼份子。做製衣工作時得到Dr. Manhattan開發之特別布料,兩層膠膜中間夾住黑色同白色墨水,會隨住溫度及壓力不斷流動成對稱圖案,但永遠黑白分明唔會混和成灰色,Rorschach用黎做頭套,正好配合只有黑同白永冇中間地帶之思想。擁有過人體能及智能身兼偵探之職,有意無意被塑造成半個superhero。早於Crimebusters前已經同Nite Owl合作,每次出動都會寫低行動紀錄,屬劇情重要一部份。



出發點正面,不過剛成立Crimebusters已經即時解散。Comedian參與過無數黑廂行動,世界更在核戰前夕社會嚴重不安,單靠幾人之力救得幾多?又點改變得到世界末日一觸即發之重大危機?Comedian一番說話,令聚會不歡而散。



最少個聚會令幾位英雄再度合作,確實提昇執行任務效率,不過凡事有兩面,因為世上只得一個超能人而佢已投身正派,當普通罪犯俾各位英雄捉晒,警察可以做d乜?加上本身社會已經不安,丟失飯碗警察帶動群眾上街反英雄主義。



1977年,大規模反義警示威迫使政府通過制裁義警法Keene Act,昔日對社會帶來貢獻之自發治安人士,通通被列為非法執法者。



Keene Act政府宣傳片


各路英雄只好自找他路。Keene Act通過兩年前,Ozymandias已經公開自己身份退出義警界,利用天才智慧成立企業進軍商界;Silk Spectre同Nite Owl選擇退休,Rorschach則視Keene Act如無物繼續執行暴戾私法,餘下Dr. Manhattan同Comedian兩個獲政府認可,繼續以英雄身份在明在暗行動。1985年Comedian寓所中被殺,《Watchmen》正式開始。



Comedian一死,即引來Rorschach調查,總結出「滅絕英雄」理論,有人想將舊時活躍之義警逐個收拾,就通知其他同伴,不過冇人相信。當日對退隱未有繼續維護正義心存悔意之Nite Owl覺得佢胡思亂想,遭冷淡對待。



搵智者Ozymandias商討,已投身商界之佢從理性角度分析,覺得Comedian年黎幫政府做過咁多唔見得光地下活動,因而被美國政敵暗殺唔出奇,甚至感到Comedian死不足惜。同樣,此等見解不為Rorschach認同,更指佢為錢放棄英雄生涯方為可恥。



最後成為一對之Dr. Manhattan同Silk Spectre只話佢長期逃避拘捕同「有罪即殺」執法下神經失常,一番推論冇人當真過。而Comedian之死,令久別多年英雄們回想起當年往事,不同場合中再次碰面細思過去。



調查去到Comedian其中一個前敵人住所,揭發Comedian死前,曾經深夜走到佢屋企歇斯底里,似乎掌握不可告人秘密。



另一邊廂,Dr. Manhattan開始與世隔絕。由細到大都係其他人幫佢做決定,由最初阿爸想佢繼承錶匠衣砵,跟住原子彈結束世界大戰之後一日要佢讀原子科學,重回人世被政府催迫成美國新一代終極武器同正義英雄,通通非全依自己意願,加上成為Dr. Manhattan後身具看破時光異能,過去現在未來對佢黎講全部已經註定加同時發生,進一步對身邊人甚至人類文明整體冷淡,只顧投入科學研究,身上唯一文明特徵衣著,亦從最初遮掩全身慢慢減少,最後直頭完全唔著衫,可想而知已經唔識得點樣同正常人溝通。一次參加電視直播答問大會,被暗示年黎同佢有接觸過之大部份人都患上癌症,受唔住傳媒追問失去常性,決定從此離開地球。



當Dr. Manhattan選擇放逐自己放棄人類,美國首當其衝失去領導世界之戰略優勢,蘇聯見勢立即開始侵略計劃,世界大戰一觸即發。



原先美國國防計劃,係即使蘇聯向美國發射全部核武,Dr. Manhattan仍可以攔截最少過半數彈頭,但而家冇左佢,加上俄羅斯多年黎不斷發展核武抗衡,假如有一日蘇聯真係決定對美動武,美國根本毫無招架之力。



與此同時,Dr. Manhattan去到火星,回首自己一生,細思自己存在之意義。



在佢好整以閒時,地球局勢相反,達到史無前例咁緊張,人心惶惶導致百姓作出大量不正常舉動,命案數字直線上升。Silk Spectre失去Dr. Manhattan轉投Nite Owl懷抱;Ozymandias遭企圖暗殺;Rorschach錯墜圈套,即使謀略智慧過人,最終逃唔過警方追捕,潛行多年終於落網。



獄中心理醫生嘗試治療Rorschach,糾正非黑即白極端思想。Rorschach表白自己遭遇:一次調查一宗六歲細路女綁架案,發現綁匪知道綁錯人後,將個細路女肢解再餵狗。自己童年不愉快經歷影響,令佢明白到對罪犯唔可以手軟,之前未試過殺人因為相信法律自有定奪,呢單案成為Rorschach生涯轉捩點,從遊俠成為街頭劊子手。內心深不見底之灰暗,到頭來調番轉影響左心理醫生心智。



Nite Owl同Silk Spectre想借重溫英雄歲月尋求慰藉,全幅裝備夜間出動巡邏,點知撞到火燭,成為重出江湖第一單戰績。



重抬英雄身份,再細心觀察,Nite Owl開始相信Rorschach提出之滅絕英雄論,計劃越獄救佢出黎一齊調查。



不過即使佢唔插手,Rorschach早已襯因佢而入獄之同囚搵佢復仇時伺機逃脫。三人回到本部,Nite Owl同Rorschach收拾裝備即時離開避過警方追捕,Silk Spectre則重遇Dr. Manhattan,跟佢上到火星。



最大原因,係Dr. Manhattan早已預見到該時刻Silk Spectre想見到佢、需要佢幫忙,因為佢同時存在於所有時間之時空型態,睇得到將來會發生乜事,但事實早定改變唔到,佢只係按照「命運」前往接走Silk Spectre。Silk Spectre自然用盡一齊方法說服Dr. Manhattan返地球化解危機,但改變唔到佢放棄人類之心,直到Silk Spectre從頭到尾回憶自己一生,先醒悟到自己身世:雖然自己阿媽即第一代Silk Spectre曾遭不軌而對Comedian心存大恨,但到尾原來曾經兩情相悅...



一對完全冇可能發展之男女,最後居然會行埋,令Dr. Manhattan對人類改觀,答應重返地球。Nite Owl同Rorschach亦調查到,原來整個滅絕英雄計劃幕後黑手,正正是Ozymandias,最佳拍檔再現江湖,起程到佢南極行宮揪出此幕後黑手。



二人到Ozymandias抵達基地,對方體格反應智力通通達到人類生理最頂峰,輕鬆以一敵二後,Ozymandias同佢地講番點解會設下重大陰謀。二十年前Crimebusters一開始已結束,唯一一次聚會雖然與會其他人對於Comedian言行舉止不盡苟同,Ozymandias反而覺得一言驚醒夢中人。全個世界的確面臨緊無法逆轉之厄運,單幾個人捉捉賊,根本無助拯救世界,Comedian之所以會為自己起呢個稱號,正因佢一早已睇穿全世界每個國家各懷鬼胎,終有一日會共同滅亡,並點醒左Ozymandias。



沉思熟慮,呢位天下最智者想出一個長遠計劃,將世界從淪陷邊緣中拯救,打造自己心目中之烏托邦。首先利用遊俠背景同聰明頭腦開拓商機籌集資金,再以製作電影為名招攬不同範疇之科學家同藝術家齊集荒島,用基因學製造出一隻真正怪物,之後將一干人等滅口。利用未完全開發之傳送科技,佢將隻怪物傳送到紐約,因為科技未完善,傳送會製造強烈衝擊波,除左殺死範圍內所有人,再令隻怪物用盡生命力將巨大恐懼意識傳送到更遠地區,最終導致半個紐約過百萬人死亡。剛巧Comedian某次秘密行動發現左個島得知個計劃,即使邪惡如佢都承受唔到,為防有日洩密,就由Comedian開始,將所有知情及有機會發現真相之人逐個清除。正當二人想阻止計劃進行,得到之回應,係件事早已發生左。



零時零分,即發生半個鐘後,Dr. Manhattan同Silk Spectre回到紐約,眼前只有血腥之景。故事中幾部全部配角、二線人物,一場意外死清光。



縱使Dr. Manhattan早可看破時間,故事發生之時期佢一直睇唔清預計唔到將來會發生咁多事,感應到有人利用科技擾亂超感官,導致通天如佢都預防唔到咁多詭計,而干擾源頭正是南極。所有人終於再次齊集,但彼此聯手仍然不敵,因為Ozymandias已經鍛鍊到可以空手接子彈之超人境界,全世界除Dr. Manhattan外佢就係最危險人物。正當Dr. Mahnattan決定認真了決佢時,傳來世界各國放下敵意與成見,聯手對抗「外星侵略者」之新聞消息。



和平終於重臨世界。其他人同意保密以維持世界難得之現狀,除左黑白分明信念根深柢固之Rorschach,佢決定返紐約揭破此天大秘密。



結局係Dr. Manhattan為保世界繼續和平發展,只好親手殺死Rorschach,即使自己重拾對人類對生命之興趣,仍決定離開地球、離開銀河系,到另一個星河創造生命,繼續研究當中奧秘。Ozymandias問佢係咪成功左,做得正確?全知全能的曼克頓博士只提到,世上冇一件事會真正完全結束。即使Rorschach人已死,精神仍在。



我已經好簡單噉講出全個故事。廿一世紀人士睇番故事唔太出眾唔多新奇,但好多野要睇晒本漫畫至領略得到,好似反傳統得令人歡喜,係去番常人角度理解英雄,例如有個英雄因為型到爆的披風俾野纏實被殺,寸好多漫畫家設計英雄時不切實際;特別性傾向經常被帶出討論,特別指出英雄群中常見男女同性戀者及虐待狂、被虐狂,會噉樣講英雄簡直斗膽犯眾。而家呢種討論同自諷漫畫間已經普通過普通,但要諗番,《Watchmen》係1986年作喎,佢之前未有人試過咁夠薑咁出面,而家d人都係因為呢部鉅著先開始/敢去探討喎。可惜唔熟美國歷史、唔係美國人,唔係可能會更加明白作者想表達之政治思想,因為隱約睇到有點反列根。章節流程大體係一章講故事、一章講人物回憶同內心戲噉交替去,接近每個主要角色都有一章俾佢solo盡情發揮講出心底話,帶出之心理同哲理值得細味,特別Dr. Manhattan火星獨白一章,用佢獨特之無定向時間觀撰寫,睇過先感受到當中震撼,當然Rorschach自白同樣唔可以錯過。而到最後,Ozymandias到底是正還是邪?每個角色有非常多層次你慢慢研究。自己一個精彩夾埋故事更正的《Tales of the Black Freighter》呢?同睇畫、睇大量不斷呼應之圖像 - 上面咁多圖畫質頗差,皆因之scan的關係,真正拎上手揭,畫質顏色優質好多,可比喻為CD同MP3之別。書名叫《Watchmen》,但其實冇一個人或角色真正叫做Watchmen,純粹係個概念喻作監護者,係英雄,係政府,係Rorschach,定係Ozymandias?又who watches the watchmen?漫畫之主方向正是此:一切只是概念,表面係個懸疑英雄故事,當中奇多思維哲理,要從廣闊概念角度吸入先領悟得多,咁文藝咁玩心理又咁多意識,經得起時間考驗、能成漫畫壇中曠世經典,正因深,套戲上畫之前,我剛剛睇左第四次。自己本係上畫大半年前去美國出差果陣順手買,計番一百六十港紙,據聞上畫前夕香港地價錢炒近高一倍。好在我係未潮時買。亦好老實講,套戲落畫之後,就算減價一半都未必有人買。因為根本唔係漫畫書。太深,太另類。



「咁快講左個結局出黎,我入場睇果陣咪冇癮?」

「冇乜打緊,導演講到電影版會有新結局。知道漫畫版結局,入場先會知有幾大改變。」


上畫正日,先分享原著。既本漫畫都睇左四次,我諗套戲最少睇過兩次先會落筆寫寫。




Phase 3: Watchmen



想先講講戲名。其實香港片商改中文戲名屬中華地區最優秀,要文藝意境可以食字玩野抵死亦得,唔似台灣經常怪相,更加好過永遠老土到爆的大陸無限倍。唯一一樣唔鍾意,又係典型本地心態:死追潮流,果期興乜就不斷抽水,不論夾唔夾好與壞,時尚最重要追到爛為止。搞到有時明明好戲因改壞名衰晒,如《The Prestige》好改唔改改個名做《死亡魔法》,擺到明食《死亡筆記》水尾,格調當堂低幾個檔次,難為導演係新《蝙蝠俠》系列大導Christopher Nolan;又或根本唔貼題,《Max Payne》明明唔關魔間事都要《魔間煞星》一番,結果畫都上唔到(當然,仲有其他原因)。08年英雄片當道,今期流行「奇俠」,自從《Iron Man》譯成《鐵甲奇俠》,跟住連寸英雄片係唔係都奇俠一番,好似《The Spirit》叫《幽靈奇俠》,《Watchmen》叫《保衛奇俠》,就連跟住《怪人二十面相傳》都要大大隻字「奇俠現身」,爭蝙蝠俠未蝙蝠奇俠齊齊癲。我明好多時英文名翻譯中文極困難,正如《Iron Man》冇可能直譯《鐵人》就算,你估香港係大陸或者台灣咩?《Watchmen》更加唔知應該點譯,《保衛奇俠》普通起碼叫貼題,不過有陣時唔好死跟潮流,加番少少創意得唔得?特別《Watchmen》本身靠逆潮流贏得今時今日地位?


「外國版海報先夾漫畫份氣質。」


決定睇唔睇一套戲,除左題材包裝,正常人第一件事梗睇邊個做。放心,一粒星都冇,我相信冇幾多個演員睇套戲之前你會識,唯一最多人知係「Visionary Director」Zack Snyder。出名卻拍得少戲,仲要全部非原創作品:第一套重拍喪屍經典《Dawn of the Dead》,好睇;跟住改編Frank Miller《300》,我入戲院睇左兩次添(題外話:如果《The Spirit》搵佢(一齊)拍而唔係Frank Miller自己搞掂,可能唔使死)。生涯第三套電影,已經揹上改編史上最經典漫畫重擔,擅長拍改編作都大想頭得滯,再留心其中一個「宣傳重點」,《Watchmen》被喻為史上最冇可能拍成電影漫畫,《300》原著唔算深加動作為主能夠改得好,但導演經驗尚淺,加上睇左漫畫入場一班要求套戲唔可以商業,同《Dawn of the Dead》方向相反。好在導演講到明套戲一定唔會pop,完全版可以長四個鐘 - 上畫當然冇可能播足啦,只得近一百六十幾分鐘,睇埋預告片完全唔再擔心,直到上年為止,《Wanted》俄羅斯版trailer係我最愛電影預告片,可惜《Watchmen》出現太早搞到佢威唔到幾耐,單個trailer已經夠晒visionary。套戲又點呢?自己唔太識睇戲,抽抽其他朋友同觀眾水算:


「咪好似睇《Speed Racer》噉囉。」

「好暴力呀!」

「好亂,唔知講緊乜。」

「好撚悶呀!」


上網睇其他人點評啖氣都慳番,單就散場撞到最少兩堆人/MK仔大大聲爆最後一句出黎,就知套戲鐵定俾香港人剷到飛起。為大家帶來《The Machine Girl》《伊波拉病毒》軒爺,提供比較中肯同比劉Sir有文化的評價:


「睇《Watchmen》,用金屬樂迷角度想像之,就像一個Bon Jovi樂迷,接觸Ulver第三隻大碟所受的狂亂衝擊;用動漫愛好者角度理解之,等於一直浸淫於高達、三一萬能俠、鐵甲萬能俠的世界,突然面對Eva出現極端震撼;用港產片角度分析之,猶如一心想睇刀來劍往之金庸武打電影,卻發現那是《東邪西毒》(這個到肉的比喻出自一位網友)。」


你要再學術再專業再哲理的評論,梗係唔睇劉Sir啦,請鑑賞專業電影研究員Horace Chan之論文《That's the Real Practical Joke》,睇完,你已經唔需要再理劉Sir了,第時睇戲可以直接搬竇過Horace哥地頭。或者我地需要多謝Christopher Nolan,全靠佢套《The Dark Knight》,令世人接受到英雄片唔一定要有超人、唔一定要打打殺殺、多番少少文戲講講人物現實同心理,加長過兩個半鐘冇問題。不過受得到《The Dark Knight》唔等於欣賞得到《Watchmen》,唔好唔記得為遷就上畫剪走左半個幾鐘,仲要一拍就三級,心諗蝙蝠俠已經好強、到頂,見「年度最重要英雄片」招搖而入場等睇另一套蝙蝠俠,就真係BON JOVI迷遇上black metal咁大震撼,不一定因超凡,兩個半鐘睇極唔明套戲想做乜而震(怒)(遺)憾成數更大。


既原著故事已經咁完整,畫中分鏡亦同電影無異,技術上要改編成電影絕對冇困難,難在編劇,十二期漫畫近四百頁內容,大量具重要性不能輕易刪減之二線人物,俾三個鐘你都冇可能講得晒。但講到忠於原著,我諗冇第二套改編電影及得上,單故事年代維持1985年,唔跟隨重拍電影潮流與時並進至廿一世紀,我已經覺得導演好夠薑,當然景觀同科技總會接近現代,但廿一世紀仲講蘇聯講共產主義講冷戰講核子危機?《Iron Man》都由打越戰更新成打恐怖份子啦。再加片頭一個Bob Dylan MV時光飛逝四十年講晒1939到1985間大事,俾大家認識第一代英雄Minutemen之餘,帶出佢地點樣令故事世界同我地現實出現差別,好似世界大戰結束Silhouette攬住個護士黎咀(意義唔止張相,仲關乎當年同性戀禁忌)、普普文化毛澤東肖像變左Crimebusters、Comedian暗殺甘迺迪唔單得幾句暗示而做到出面,全部廿幾年前發生,美國新一代入場都未必感受得到,更何況海外市場,如從來唔關心世界政局之香港?單曼克頓博士點解會叫Dr. Manhattan、個名點樣「震懾敵人」,已經冇多少人明。難得片商肯俾佢拍到咁脫節。


至於故事,睇左漫畫,基本上等同於睇晒套戲,忠於原著到史無前例。同時取悅舊迷與新觀眾是改編電影最大難關,九幾年大把戲除左人名同人樣其他根本跟原著無關,死晒,廿一世紀醒水改少少盡量忠於原著但又加入時代感,《蝙蝠俠》《Iron Man》是兩大模範,《Watchmen》已上神檯,你改又死唔改又死,Zack Snyder選擇直頭唔改,跟原版跟足到好黐線。入場時我已經睇左本漫畫五次,全書對白上晒腦,睇果陣感覺好怪,所有對白直接引用原著,由傾佛偈到平常飲茶傾偈、從最鉅到最細,大半對白根本冇改過,有時呢幕冇左一句,原來搬左去另一幕度用。既對白已如此,故事進展預期之內接近原本,睇左漫畫八成時間預計到下一幕有關乜野、邊個出現、講乜對白,就算部份橋段次序或人物有改動,大體仍同原著異常接近。其他人可能覺得冇問題,我型住自己好似睇緊莎士比亞:做歌劇就係原著點寫,無論經歷幾多版本都不會過於離宗,觀眾亦唔希望有乜大改變,原著個角色幾時點樣講你照稿做戲就最好。但拍戲仲一模一樣逐句重複,而唔係每個角色按各自風格演戲,當正做歌劇噉經典重演,就難免太過刻意,角色本身被既定對話內容限制發揮,畫面設計及劇本同樣受制。個人覺得導演為順應漫畫群眾要求,及免冒犯原著神聖地位,作風過份保守。我要求多一點原創性。


要淺化故事加顧慮全長,劇情作出一定修改及濃縮是必然,部份改動無傷大雅,例如雞蛋關係調轉左,漫畫中Hooded Justice出現令後世忠奸兩方整色整水,電影解釋皆因幪面大盜肆虐,犯案時冇人睇到樣捉到都入唔到罪,正派開始還以其色化身幪面義警,利用私法彌補法律漏洞。原版Captain Metropolis想成立Crimebusters重出江湖,亦變成Ozymandias號召眾人組成Watchmen,變相冇左Crimebusters - 呢點覺得造作過頭。其實叫Crimebusters點解唔得?嫌個名太娘,本身故事世界觀已經唔係現代,冇咩所謂。唯一解釋為方便新入場觀眾,仲有應酬專家。你知道好多人最鍾意骨頭裏挑雞蛋,睇唔明或者唔鍾意總話導演同演員出問題,佢地唔會理原作者想法「Watchmen」只係個概念而非實體,只會大大聲問


「喂!點解冇個人叫Watchmen架?改呢個名呃鬼呀?」


相同原因及媒體規格問題,漫畫好多野唔會即時公開,通常你感覺到有問題又未想通,到後期自然恍然大悟,電影唔少橋段初期已洩露太多線索或自白式揭曉晒,易明左,相對削減懸疑魅力。著名之不同劇情、場景互相呼應唔多,Rorschach日誌玩過少少,加Dr. Manhattan電視訪問時後巷大戰,其餘時間唔多應景對白,最主要上畫版完全放棄《Tales of the Black Freighter》,連帶相關二線人物出鏡時間減至近零,浪費神來之筆,反而300見到最少兩次,冇錯導演擺明hard sell自己。有意將Ozymandias塑造成同性戀者,片頭睇佢去YMCA搵VILLAGE PEOPLE,到尾段爆佢部電腦仲好笑,加又陰又陽造型、演技,一定係存心玩野,因為原著咁嚴肅唔特別提及或畫出腸,電影落少少笑位無可厚非,漫畫中唯一帶點輕微輕鬆成份係劫獄時Rorschach「人有三急」,Nite Owl探討番英雄服飾之實際性,戲入面反而放棄呢段漫畫罕見幽默位。一向鍾意呢類細緻舖排,唔講到白俾你留心觀察再細想去明白想帶出意思進而笑出聲,但《Watchmen》場內普遍笑位,包括Nite Owl第一次同Silk Spectre搞點知搞唔到,仲有Dr. Manhattan唔著衫周圍走。呢d至係香港人/普通人會關心會留意的「幽默」。


咁多人睇完大鬧特鬧,正是缺乏而家英雄片仍需保留之商業元素,如動作、幽默及豔情,《Watchmen》想批判題材太多,年代感已脫離現在,就算不顧一切投入各種哲學、政治及內心反思,難免要作一定取捨,如同性戀除玩玩Ozymandias已唔涉及,可惜為簡化與遷就時間而犧牲Rorschach獄中見心理醫生,漫畫用足一整章去講,二人及該章屬全漫畫最重要部份之一,戲中同一段唔算短時間,相比已經是非常之輕輕帶過,同樣Nite Owl及Silk Spectre二人關係,點解屋企入面搞唔到,一上到飛船立即搞掂?Silk Spectre知道自己身世後,點解佢同Dr. Manhattan會咁大反應?前提舖排欠妥善、蘊釀未足、過份簡化,唔止表達未算如意,討論亦唔夠深入。我更嫌氣氛差少少,未能創造一個核戰前人心惶惶之緊張意境,更加感受唔到Keene Act對世界及各英雄有何深遠影響,睇戲過程中,有點「入唔到戲」。


電影版特別創作全新結局最受爭議。當地位如此崇高、fans連你改少少劇情都唔批准,仲連結局都改咁夠膽死?睇前絕對感到擔憂,喜出望外卻有得有失。唔再偽造外星人襲地球,而講到Ozymandias同Dr. Manhattan聯手開發無限免費能源,透過解決能源危機令世界和平,不過趕佢上火星後,「曼克頓反應爐」被用作大殺傷力武器毀滅不同國家主要城市,令全部強國以為Dr. Mahnattan返黎復仇,聯手對抗全人類共同敵人。電影追求保存八十年代感覺,新結局算「最摩登」一項,所以鍾意個新結局,除唔會令套戲脫節,再加深Dr. Manhattan角色象徵意義。世人思想往往存在弔詭,覺得只要有一股強大力量,就可以平定所有紛爭帶黎世界和平,但事實永遠係制衡對方反動力必與之成正比,「維和」力量越強,人類越接近末日,故事中蘇聯為抗衡「帝國主義神兵」,共囤積51,000枚核彈頭。兩個結局如出一轍,都係用人類能力不能克服之外來力量團結各國,第一個念頭梗係來自外星之侵略者,不過細想一番,《X-Files》九十年代初先拍,講講外星人已經講到大家咁震撼,《Watchmen》再早半個十年以上,外星人條橋的確新奇無比,但家陣廿一世紀,中間廿幾年有乜野未有人試過諗過,仲講外星人咁老土?反而新結局扮到掌握神力之救世主失控成滅世者,能加強Dr. Manhattan從文明希望變成世界大戰導火線之諷刺性,跟住選擇離開地球去其他銀河系創造生命決定更見合理。


喻意依舊簡單,犧牲小部份人拯救全體,鐵定大把人特別「學者」級評論員勁小,最常提出之論點有「點解一定要犧牲部份人,叫嘈交果幾邊大家傾掂數唔打咪得囉!」講之前小之前,睇或諗清楚未?而家唔係兩公婆拗撬床頭打交床尾和搞掂,強國競爭再涉及龐大軍力,局勢只有日趨嚴峻,結局往往不離開戰或其中一方崩潰,永遠唔會突然間大家和解唔打解除武裝,你有51,000粒核彈時,人地同你傾叫你為世界和平唔好爭城掠地,你會唔會理佢?換言之一係你死一係我死,再唔係全部人攬住一齊死總之寧可我負天下人,唯一變數是升溫速度之快慢,同最後死幾多個。覺得美蘇冷戰太過遙遠,廿一世紀又何嘗不存在軍備危機及政治鬥爭?再加上其他全球性非政治無形威脅如環保問題,而家地球其實同《Watchmen》世界一樣危在旦夕甚至更危,冇人覺得,只因歌舞昇平人人投入物質娛樂謝絕思考,真心去想都心知肚明普羅大眾之力做唔到任何改變當見唔到算,掌權者更冇可能為顧及大局放棄自身利益,只有越爭越激烈同置他人生死於不顧。可以大大聲講「唔應該」,皆因未切身甚至明知但冇心去理,齋講梗幾大聲都得啦尤其是香港人,假如突然間新聞報導講,只要全球聽日死五百萬人,世界上所有大殺傷力武器即時消失,或者立即解決全球暖化溫室效應,分分鐘鬧緊戲入面「犧牲百萬人救億萬人罪大惡極」一班(專家),會第一時間拍手掌支持,當然有份一齊死時另計。就如BRUTAL TRUTH提倡,我認同extreme conditions demand extreme responses。這是brutal truth。


不過為達成新結局,前提修訂反而唔合理。Ozymandias提出全球局勢緊張,Dr. Manhattan對蘇聯造成壓力非主因,實際上各國是為爭奪資源而戰,既然Dr. Manhattan能夠控制物質粒子,有乜野唔夠叫佢直接創造就可以,例如漫畫中佢大量生產鋰,令電力發動交通得以普及化(第一代Nite Owl退休後開車房,招牌寫住「精修過時型號」,是有源由的),加上其他發明及科技發展,環境及能源已非重大危機 - 最少在美國境內如是。戲中甚至講到佢上月球幫太空人影相,既然如此大能,點會救唔到能源危機?即使真係開發唔到新能源/無限能源,唔夠石油甚至任何資源,直接叫佢用空氣合成就得,何來不足?美國政府咁威,唔係噉都諗唔到丫嘛?超科學創世者存在,世界仲依賴「舊世代」化石燃料同核能,更導致打仗收場,似乎唔夠說服力喎!又其實原著漫畫都冇探討過,虛幻烏托邦美滿泡影可以維持幾耐?各國鬥爭不絕全因貪念,為商業利益或領地或民族榮譽,又或如戲中所講為資源,皆出於一個貪字。用超過凡人之共同敵人「鎮壓」世界,短期內的確可以停止國際間糾紛,但過左三年、五年風平浪靜,共同敵人等極唔見,強國領導們自會再萌侵略其他國家之心。按照電影版假設,如開發出無限能源,是否能令世人無爭?相信你都知答案係否定,自己擁有無限,都要吞併埋其他人之無限又或奪取另種利益先會心足,飽暖思淫慾是人性,亦是政治,Ozymandias各個大計全屬暫時治標,並未可徹底根治。即使營造到大團圓,我始終覺得Ozymandias計劃到頭來 - 或是幾年後 - 必定失敗,不論Rorschach紀錄全盤陰謀本日誌有否被公開導致東窗事發。


故事冇問題,拍又拍得好唔好?《300》大量鏡頭照搬漫畫可以拍得好睇,不過《Watchmen》接近全文戲,連平時行步路傾餐偈都跟足原畫,好在導演未至於要完全複製番漫畫每格,影像有自己一套風格,我相當喜歡用色同構圖,拍得出漫畫種暗調,最顯功力梗係動作場面,通通Zack Snyder化。即係點?《300》有個長鏡,利用突然拉近、加快、放慢帶出暴力美,已成為Zack Snyder攝影風格招牌,《Watchmen》相比較為簡單,成班英雄只玩拳腳,設計上唔算好勁,部份鏡頭甚至睇得出演員手腳有點雞,簡單拳來腳往動感不俗,衰有時亂過頭,同《Matrix》後新世代動作片必需要玩慢動作,冇錯間中落幾個型到爆,但太多好似救火一段都要慢一慢鏡轉身,就有點過頭。為睇英雄打壞人而入場,我諗只得幾場之打戲應該都夠,本來只得Ozymandias同Rorschach體能接近真正超級英雄,戲入面有理冇理係英雄即變超人,一拳一腳打到飛開七八尺、一跳十幾米遠,內勁深厚輕功了得差在未出舞空術同龜波氣功,好似睇《功夫》,最後極地寒宮三英對決,根本就係神鵰俠侶對火雲邪神啦!擺明視「英雄只是凡人」設定如無物,次次打親誇到爆,唔見血都打到你斷手斷腳先收手,Silk Spectre加Nite Owl深夜後巷大戰流氓黨,成班人不得好死殺到黐晒線,漫畫入面打都冇咁激。Silk Spectre見人就打不論正邪,郁下手就殺人殺完再面不改容加嫌殺得唔夠癮,睇到好爽呀,全部人除左擺明無敵的Ozymandias最強就係佢,不過出手咁狠辣仲邪惡過Comedian同Rorschach(諷刺地,佢兩個行事最暴戾,戲中卻甚少發揮),你話係英雄?


「女人,果然惹不得呀!」


仲有Dr. Manhattan指一指立即爆屍腸血橫街呢?相信好多人以為套戲咁激,電影公司又講到「電影版為保留原著漫畫暴力血腥黑暗面而拍成三級」,漫畫版實無不及啦?剛剛相反,漫畫逆傳統之一就係講英雄但打鬥規模細篇幅又短,多血但露骨之破骨斷肢爆屍不常見。套戲兩個半鐘都唔打實悶死人,又要顧票房,動作部份被迫如此放大,最激除左Dr. Manhattan炸屍,係監獄暴動Rorschach仇家搵上門電鋸鋸手係噉噴血,信我,漫畫中同一節拍埋套戲,要碎料十幾倍。我反而嫌最後曼克頓反應爐炸城唔夠喉,用番漫畫做比喻,固定九格分鏡,突然黎個四格甚至六格即時突出晒,但戲中特技俾人感覺得兩格起三格止欠缺迫力,炸城一分鐘唔夠玩完,爆得未夠清楚又唔夠氣勢,爆果陣玩「Zack Snyder攝影」,又或事後補幾個空景影廢墟,立即震撼得多。講到全世界幾個主要城市包括香港炸晒,淨係影紐約冇其他,我想睇香港點死呀!我都知難整,1985年香港地點樣有排做資料搜集同整CG,整到出黎,可能又係典型鬼佬視野,成個維港帆船...好老實講,單計劇情套戲根本入唔到三級,禁播鏡頭成為賣點,至於「普通版」2B同IMAX足本三級版差幾遠?先睇2B,又斷手斷腳又爆屍又扑野,Dr. Manhattan唔著衫四圍走,色情血腥暴力通通齊備有多冇少,仲要係噉講粗口,噉都叫2B?自己三級制第二級再細分後,未睇過咁激之二級戲!立即回想起《伊波拉病毒》年代二級戲已激過而家所謂三級多多聲的美好歲月!


2B已經激成噉,三級咪好鬼正?IMAX三級版只長多幾分鐘,主要補番床戲片段,打同血部份除監倉電鋸斷手剪左一段,基本上冇改動過2B已經睇得晒。嘩,我睇時全院爆滿,院內勁多一家大細齊人排排坐,兩個半鐘又長加悶,再加勁多超激鏡頭,老豆老母肯定小到發癲。又要多謝電影公司唯利是圖心態。典型香港人入場睇英雄片,梗諗住打到九彩加送幾十億特技(但諷刺地,真係打到爆玩特技玩到喊時,佢又會話你冇故事冇劇情,典型香港人本性呀),換言之英雄片=特技動作片。近年電影開始朝真實同另類進發,但宣傳往往掩飾照樣包裝成普通商業片,例如《Tropic Thunder》係笑片?《The Spirit》係動作片?好多時d人睇完一套戲話唔好睇,未必係套戲差(《The Spirit》另計,真係好廢...),有時全因電影公司刻意誤導。香港人熟悉本地市場,點會唔知套戲咩料,根本唔適合香港人睇,上畫盞俾香港人/專家小?志在食第一個星期頭浸嗟同水魚嗟。我極度同情帶晒囝囝囡囡入場的各位老豆老母,睇完套戲,佢地肯定灰過戲中所有角色加埋。諗住有得睇成班超人打到七彩?《龍珠》闔家歡N倍。又或者等《狼人》。千祈唔好掂《Watchmen》。你 - 特別家長 - 會喊。《Watchmen》絕對是一套唔pop的英雄片。


用同樣「唔pop」之《蝙蝠俠》比較...是沒有必要的。兩套戲根本比較唔到。我承認整體黎講,《The Dark Knight》成功好多,之一,係兩套戲差唔多長,最少你睇蝙蝠俠時唔會望住個幾鐘仍然得句「你地做緊乜」先。皆因Zack Snyder敢於去得再盡。何謂?就如《The Dark Knight》中我最鍾意之炸船一段,俾Zack Snyder接手的話,唔會政治正確地兩條船都冇事,最少死一條船走唔甩。《Watchmen》就係敢於做呢種冇多少主流導演夠膽做。可以一粒星都唔用已經好野啦,照計咁大套戲搵名演員做絕對冇難度,成本問題卦,我一個都唔識,好在不嬲對演技要求高於名氣外表,反而你搵出名明星做往往被觀眾先入為主定型仲危,單Comedian加做到成個神經質版Punisher之Rorschach兩個已經充滿驚喜,人物切合廿一世紀新設計又靚,係Silk Spectre一代唔夠老演得唔好,個款點睇都係水性陽花自動送上門果種,經佢演一演,原來之伏線即時冇野好伏。


「難怪要稱呼Zack Snyder為『Visionary Director』吹到咁大。個導演已經係全電影最明星果位,公關部唔谷佢,谷得邊個?」


英雄片動作片市場從來係後生仔女,配樂不離最潮rock/metal,《Watchmen》trailer已經SMASHING PUMPKINS加MUSE,好在套戲講到明配樂插曲又會跟番漫畫,是另一「唔pop」,當然睇原著一班老餅居多亦是原因。漫畫每章最後會引用名人、名著或名曲作結語,電影再擴闊清一色用晒當代經典,Dr. Manhattan出戰越南玩超人主題曲先過癮,諗落噉先正確,唔同1985年播STATIC-X咩?相信全因政治及反戰意識,搖滾詩人Bob Dylan成為常客,除漫畫中提及兩首《Desolation Row》同《All Along the Watchtower》(首歌係Bob Dylan,但你點聽都覺得應該係Jimi Hendrix,要講又是另一個故事),連片頭都選《The Times They Are a-Changin'》究極貼題生色不少。敗筆在於片尾,點解要搵MY CHEMICAL ROMANCE cover《Desolation Row》?結他solo玩美國國歌算是新意,但聽左木結他民歌原版,再聽MCR...衰片尾未能貫徹始終。


「一定要現代樂隊的話,點解唔索性搵『thrash metal界Bob Dylan』MEGADETH?」


已非常優秀,亦擁有值得一睇再睇之耐久性(睇左兩次,我仲未嫌悶/夠!),唯尚存不足、未達個人全部要求,又可從音樂方面講出為何。事前抱有無限期望,全因預告片暗淡沉重,影像次要,全靠SMASHING PUMPKINS《The Beginning is the End is the Beginning》。原版《The End is the Beginning is the End》隊band正從alternative rock進入電子,首歌industrial rock款,《Batman & Robin》拎黎用(絕對吸引過套戲本身),跟住樂隊整多個remix版《The Beginning is the End is the Beginning》(我唔想再打呢首歌兩個名...),直頭變darkwave電子,可以話remix先係「正確版本」,《Watchmen》trailer能夠doom過任何一套英雄片,首歌最大功勞。「Visionary Director」拍得好,連頗行貨的打戲都因有格而收貨,差少少在達唔到trailer個效果,要拍到咁灰先至叫係大家心目中之《Watchmen》嘛。好在仲好doom先,冇變到新trailer MUSE歇斯迷離唔夾套戲種路線。


算唔算近幾年最滿意改編呢?雖然《The Dark Knight》好難唔成為2008年度電影,時間耐左,反而鍾意《Wanted》多過蝙蝠俠、覺得襟睇d,除因娛樂性夠未至於由頭灰到尾(始終,劉Sir是個膚淺的商業電影迷),東歐導演手法的確其他地方/荷里活搵唔到,套戲氣氛同影像仍是獨特加一流,唯一接近只有《Watchmen》,如每年只睇一套改編作,08揀《Wanted》,09自然揀《Watchmen》。兩者方針非常迴異,前者選擇徹底改頭換面,甚至同原來故事完全無關,但改得好先吹佢唔脹。後者調轉,多一事不如少一事,劇情發展角色對白越近原作越好,加擺明唔肯pop冇卡士三級三個鐘長夠令大把人卻步,一定超越唔到《The Dark Knight》 - 我知好多人包括我好想《Watchmen》做到,既早已唔妥協又咁另類,加上過份忠於原著,而家只能成為一齣帶瑕疵之另類主流電影。跟到好足未必一定壞事,換著俾第二個導演,分分鐘又變成同人唔同故仔之不幸個案,有興趣可按此拜讀二十年前(1989)第一個《Watchmen》電影劇本,我幾鍾意新結局,不過劇本大大個漏洞,角色性格同氣氛又完全偏離漫畫,變成一套普通超級英雄電影。相信由Zack Snyder以外任何一個導演負責,套戲下場不離此樣,可能而家噉按足原本拍係最佳選擇,畢竟真係太難改編,除非拍成連續劇,或者分開兩/三部曲電影,甚至直頭創作另一個全新故事,單一集電影好難包括晒所有情節及討論。將來《Watchmen》歷史評價如何難講,可能被視為經典,應該唔會俾人叫做勁片、猛片,有冇可能係cult片、廢片、爛片?我諗係奇片。唔係奇俠個奇,而係奇怪個奇。冇睇過幾多戲似佢。08同09兩套W字頭漫畫改編電影,都成功在夠奇。


已成為個人2009最重要電影,我心目中本年度唯一能與其「匹敵」,或者得番同是再振'80精神之《The Wrestler》。係我絕對承認只要逢同八十年代有關我必定會俾大量印象分,特別1986年。一開始已講,「四大名著」由1986年開始,《Watchmen》同年誕生,更是重金屬盛勢最輝煌年份之一,你數數就知:主流,BON JOVI出《Slippery When Wet》,pop metal永恆經典,大行其道之thrash metal仲大鑊,我的最愛DARK ANGEL出《Darkness Descends》,四大鞭METALLICA出《Master of Puppets》、MEGADETH出《Peace Sells...But Who's Buying?》、SLAYER出《Reign in Blood》,歐洲都有DESTRUCTION《Eternal Destruction》同KREATOR《Pleasure to Kill》兩大德國thrash經典,MORBID ANGEL又造好真正第一隻碟《Abominations of Desolation》,更多殿堂級extreme metal樂隊如DEATH同年錄好demo,87年正式踏上征途。唔好以為音樂/重金屬同漫畫冇關係,當時漫畫抨擊時局人性意味越來越強烈,正好同metal意識發展一樣,其實好多兩個範疇中之藝術家/工作者,都會從對方身上取得靈感,大家發展相輔相成:《Watchmen》種心理同政治批判,咪就同八十年代中期起thrash metal歌詞一樣?難怪《Wanted》會用1986年作為世界歷史發展轉捩點,愛爾蘭thrash/crossover樂隊GAMA BOMB 2008年大作《Citizen Brain》(個人2008年度最重要專輯),唱好metal時特別對1986年歌功頌德一番。所以我仍然覺得拍八十年代加咁metal要cover Bob Dylan,你冇理由搵MCR都唔搵MEGADETH。1986,除漫畫也是metal最光輝/最黑暗一年。


"All hail 1986."



...仲未講晒。時興維基百科,埋尾都要學學野整番個「Further Reading」再抽多抽水先:



即使電影本身意圖不跟隨電影工業主流,任你點一心一意全盤心思投入藝術,始終身在局內好難完全置身事外,遊戲規則或鬆或緊一直存在唯有遵從。所以第一秒到最後一秒,你居然搵唔到作者Alan Moore個名出現過。佢出名作品都俾人改編過,《The League of Extraordinary Gentlemen》我接受,但同漫畫之差距及得上魚翅同粉絲中間,《V for Vendetta》睇完漫畫直頭唔敢睇番套戲,就係怕又差咁遠。見自己作品一上銀幕冇晒文藝氣息得番荷里活商業,仲有《Watchmen》最先個劇本睇到笑,好難怪條友有錢收都唔要,講到明自己個名唔可以出現《Watchmen》電影之中,反正佢寸得起,尊敬佢夠骨氣。不過經此一役,我怕主流電影中,難再有另一套《Watchmen》出現。