X-Men Origins: Wolverine



講套戲前,唔可以唔講講發行商二十世紀霍士。作為一間商業電影廠牌搵錢搵到盡就預左,不過《Watchmen》時提過佢地點樣又要唔開戲霸住版權,到人地拍時到拍好先告人侵權分人地票房,賤格成噉商業心態實在過火。跟住睇左《龍珠》,我好多年未睇過咁垃圾西片,以為《The Spirit》好廢啦?一片還有一片廢,《The Spirit》起碼仲寫得出,《龍珠》係廢到睇完寫寫下都冇心機寫落去果隻,簡單總結除左真係好X垃圾,我第一次試過可以入場兩個字未夠已經頂唔順想走,同垃圾到睇完唔想講唔想寫果隻,好好彩我只睇豪華廿蚊早場,唔使蝕到喊之餘當支持豪華而非霍士。經此兩役,好應該開始杯葛霍士,不過作為國際大公司,邊有咁影逃離佢地魔爪?開電視入戲院總有大把機會撞到佢地出品,再翻炒《X-Men》拍番套《狼人外傳》出黎,X-Men喎狼人喎,唯有死死地氣入場。


「劉Sir好膚淺架咋,口桀口桀∼」


X-Men系列甚至整個Marvel世界,狼人一直係最受歡迎角色之一,全因時勢造英雄:一個十九世紀變種人長生不老,本身有自癒能力及金鋼不壞之身,加上野獸感官、獸性同手中利爪,係全世界最強白兵兵器,另外表滄桑而帶邪氣,可能係漫畫史上第一個最成功反英雄,當以前漫畫人物黑白分明政治正確時,無端端出個打不死又郁下手就大屠殺搞掂之「好人」,真係好難唔受歡迎。同其他同期反英雄如Punisher一齊玩串,不過當時漫畫尺度及商業考慮好難串到盡,所謂反英雄其實都壞唔晒仍然相當正派,到近十年大家開始嫌漫畫唔夠激,灰色地帶加負面討論越大越好,反英雄等正邪難辨角色自然大行其道地位日重。


睇《X-Men》其實已等於睇《狼人》,雖然係X-Men隊長係Cyclops,三集入面出鏡唔多,最後一集直頭開場直頭冇耐就死左,反而狼人由頭帶到尾當正主角一樣已經知咩事。可能Hugh Jackman做狼人做上癮,《狼人》直頭自己做埋監製,我都係由《X-Men》開始識佢,跟住追番《Van Helsing》同《The Prestige》,先知原來兩套都有佢做,而家仲要自己監製話晒事,可以預期戲中每個鏡頭每個動作每句對白都會型(或造作)到出汁,同其他演員一定唔會型/靚仔得過佢(呵呵)。


既然《X-Men》故事早就定好晒,作為前傳主要關心兩樣野:角色出身同點連去正傳。冇睇過漫畫驚唔識d角色唔緊要,因經過多年加多位作者主理,「官方版」出身每每間唔中有改有加有減,加上電影只得百幾分鐘長必定淺白化,對故事及角色完全陌生都冇問題,而家個講法即1835年出現異變殺左自己親生阿爸,同血緣兄弟劍齒虎闖蕩江湖,美國內戰、兩次世界大戰同越戰全部參加過,不過劍齒虎殺得興起,加後來變種人秘密小隊Team X太過殘暴所以離團隱居,都算盡量跟足原著。不過後來變成用計令佢自願作為Weapon X實驗品正式變身狼人就幾掃興,因為原著中佢係俾Weapon X捉黎強迫做實驗,跟住失憶加幾乎喪失人性,反英雄在悲劇出身進而令所有殺戮合理化及得人共鳴,而家所謂要接受改造原因只因冇左條女,加套戲拍出黎完全唔覺得慘,只有話遷就市場得過份左少少。


近年英雄片開始走番現實路線,《狼人》則繼續《X-Men》種「old-school」式唔使用腦死打,劇情夠簡單過左上面個開頭跟住就係打打打打同鬥大佬,去得勁快,總算清楚交代晒,完全唔識漫畫都會明白,唯獨導演忽略重要一頂:全套戲冇深入講解過乜野係變種人,一開始見到主角伸對爪出黎,跟住兩兄弟打不死,再加各方奇人異士出場,基本上觀眾要自己領悟變種人=超能人,但從何而來同對世局影響冇認真講過,睇黎預左入得場者睇過晒《X-Men》。既屬同一系列又是霍士出版,不幸衰《X-Men》同一樣:嚴重商業化至失去原著氣質。冇錯其實漫畫版本身好pop,不過由實力創作人接手時,X-Men唔止一隊超能戰隊咁簡單,故事仲會借人類同變種人對立作比喻,探討政治、宗教、種族等人文問題,而狼人角色主題在人性與獸性之間,及英雄與反英雄,當然通通輕輕帶過就算,全套戲一如《X-Men》變成《LXG》(又係霍士)式番鬼佬《封神榜》由頭打到尾,相信全線追晒你都完全睇唔出漫畫可以有深度可言。


你唔關心劇情只想睇打打殺殺,又未至於好震撼。《X-Men》第一集小試牛刀唔算太出眾,第二集玩拳腳多,第三集《封神榜》大堆頭,始終身先士卒比唔上後來者,既狼人本身打埋身,今次自然走番第二集種爛仔交路線,所以冇如暴風女神或黑暗鳳凰一出招成個島死晒之類驚天動地特技,更加冇磁力神斷橋開路等嘆為觀止場面,最特除左Emma Frost變鑽石同Cyclops射死光,就係牌王相當無線feel的爆到七彩同跟《Jumper》一模一樣的瞬間轉移。難得之亞洲演員演出Agent Zero,一跳就幾十米高空中連開無數槍落地全部人死晒,《Matrix》之後好似人人開槍都要開到《臥虎藏龍》噉款。


「話時話,而家西洋動作片套套《Matrix》,全因港產片同吳宇森教壞,點解反而香港自己唔會拍呢種現代版《臥虎藏龍》,或者槍戰版《龍虎門》?睇完《狼人》跟住個禮拜日,無線七點《香港獨家》就講香港武打片,當年威到外國人都讚嘆,點解而家...」


至於重頭戲Deadpool,睇過漫畫應該會喊:本來玩轉成個Marvel世界之黐線僱傭兵,仍是普通人時除左同樣用刀完全冇近似之處,未能顯出其過人(on9)之處,最後唔知點解會變成將「全部主要異能pool埋一齊」之超能人,「pop左」之餘根本完全唔關真正Deadpool事,而最灰打狼人一對一明明贏硬,跟住劍齒虎本有世仇點知突然同狼人和好如初聯手做低佢,動作只叫有野睇唔算太特別,《Jumper》如果拍續集加重打戲,應該會同呢場最後大戰一樣,即瞬間移動出一兩招>瞬間移動出一兩招>瞬間移動出一兩招>瞬間移動出一兩招>...其實「Deadpool」要一抽二,只要一直用龍珠式瞬間移動打法可以屈死兩條友,就係抵死在打打下無聊閃走射死光搞到俾人伏,典型漫畫大奸角有得屈機都唔屈的戇居自殺死法,灰。只有話好彩我唔太熟X-Men漫畫,所以其他成員本身係點係乜樣不大清楚,唔係可能喊得仲勁。


對全套戲評價,就同最後一戰感覺一樣:唔算差,但又唔係好,全因一路顧住做到主角最型(冇計,自己做埋監製嘛),其他人發揮被局限,好似Agent Zero唔夠邪惡,前傳關係牌王雖然幾似樣但未有漫畫中咁滄桑咁型,其他角色多數好路人出幾幕出幾招就冇,好過《X-Men》第三集架喇,最少個角色你知佢出場為乜先,而唔會加個人物入去根本冇意思。唔滿意在狼人誕生後第一場打戲,當講到佢打不死咁犀利,走甩左你預Weapon X會派一隊軍隊去捉/殺佢,點知得兩三架車加架直昇機搭多個Agent Zero,大家想睇狼人以一敵百點樣徒手斬爛架坦克,噉先顯得佢勁同天下無敵,區區幾架吉普車直昇機幾支槍算乜架樑?本來狼人好暴力殺到全部人分屍周街血同內臟,呢套戲血都唔多見,又要似《The One》間唔中補個鏡頭俾你睇個人就算中刀中槍其實仲未死,死得最慘果班九成鏡外搞掂,狼人幾時變到咁友善架?上畫時出左隻狼人game,隨便幾幕已經暴力過多血過晒成條電影預告片,起碼你打機時真係可以斬到個人分開幾截成地血先,唔係噉點似狼人呀?


可想而知故事都會純良得多,加上要駁番去正傳《X-Men》,大量位牽強到暈,正如狼人有最少兩個機會可以殺死劍齒虎,第一次差少少時完全唔關事的牌王無厘頭飛出黎救佢,而且講到佢咁唔妥邪惡變種人,反而死打狼人完全唔理真正邪惡的劍齒虎;第二次又係明明殺得死,一句「我有人性」就唔殺 - 呢種場合狼人點會咁有理智呀?最後二人突然忘記世仇齊齊打「Deadpool」更加灰到喊。故事八幾年發生,點樣連番去二十年後正傳呢?有關人物中,Emma Frost同牌王正傳唔見人,Cyclops冇正式見過狼人,Profressor X同樣撞唔到,劍齒虎正傳變到超級野獸化對白都冇句從而想相認都冇得認,而狼人自己失憶,不過失憶過程超戇居:大反派用超級子彈射佢個頭,講到明你聽「射中個頭唔死都失憶」,而佢本身咁想狼人死,居然可以殺佢時唔殺,射到佢訓低加例牌醒番就失憶之後停手,唔索性直頭殺到盡,呢d情節似足八十年代港產片,同九幾荷里活英雄(爛)片。廿一世紀喇而家大佬。唯一新意者,事先張揚超過一個隱藏結局,完場後字幕中間出一段,字幕完再出第二段,據聞一共有六個隱藏片段,單入一次戲院唔會睇得晒。我睇到個亦係最多人講果個William Stryker將軍加狼人去日本,傳聞其他隱藏片段包括劍齒虎、牌王、Deadpool同X學院。係咪有咁多就梗唔知啦,唔通入咁多次戲院睇咩,想知唯有等DVD,不過手法創新時,套戲未至於吸引到想買碟重溫貪bouns。反而上畫前套bootleg版更大興趣。好多人睇過,話因為係製作版未加特技,搞到套戲「好cult」,可惜有幾cult我仍然唔知(這是唔download的報應)。我型住條毛片係電影公司自己放出去,一個新世代宣傳方法:當歌手同樂隊出碟之前可以成隻碟放上網俾人任stream,電影業點解唔可以俾你睇左先初版先?假如套戲本身拍得好,睇未完成版你感受到劇力,自然會入場睇埋完整特技版,就好比從網上stream/mp3跳到CD/黑膠,雖然《狼人》吸引力絕對未達此程度。搞咁多隱藏ending,會唔會就係應對「外洩版」引人入場手法?


其實X-Men同狼人兩個故事/系列,本身可以亦理應拍到好灰好暗,但X-Men削弱晒政治及批判成份變成普通特技動作片,狼人保守繼續舊路亦差不遠,縱有進步未能補救演出及故事各種收歛,冇辦法,掛住二十世紀霍士個名。曾幾何時霍士英雄片大行其道,因為以當時標準計特技夠誇官能娛樂足夠,蝙蝠俠搵左Christopher Nolan,英雄唔一定要正義同最緊要灰暗多內心戲,Marvel都唔執輸,自己間Marvel Studios唔賣版權俾人留番自己拍,製作性質有點近獨立當堂時代感重好多,《Iron Man》講到悶啦,就連冇咁精彩之《變形俠醫》,都好過晒之前多年幾近全部改編Marvel電影,以成年向Marvel Knights名義重新製作之《Punisher》未算好但影像及獨立感覺強烈,比較霍士出品如X-Men、Fantastic Four甚至唔關Marvel事之《LXG》,就明點解Marvel選擇自己拍番唔想俾人改編:而家仲拍得咁八九十年代漫畫式,分分鐘失多過得。好可惜狼人版權在霍士,假如Marvel自己玩番成為第二套Marvel Knights出品,故事角色加暴力場面肯定精彩得多。再加《Watchmen》事件同史上最終極垃圾《龍珠》,搞到而家見到二十世紀霍士個名已經冇晒胃口。


好可惜,商業一回事,《狼人》點都拍得好過《X-Men》,肯定大收之餘跟住實超多續集/外傳,磁力神講到明會拍,Deadpool更加《狼人》上畫唔夠半年已經開始製作,又要睇又要鬧的日子相信仍然漫長。Marvel有三個角色必定要追:Punisher夠黑白分明、Wolverine夠反英雄、Deadpool夠on9。前兩者已經改編,《Punisher》合格有突但《狼人》僅僅過關,擔心緊Deadpool。其實戲中隻「Deadpool」,某程度上唔係真正果個:實驗之前佢俾人叫真名Wade Wilson,所以真正之Deadpool並未正式出現,未睇過有關佢個隱藏結局,但相信要由「能量pool」拉到去漫畫個好武功但超戇居勁白痴傻仔唔難兜。既原版Deadpool整出黎就為搞笑同玩串Marvel自己個世界,你拍戲講到佢正正經經反而冇癮,搞到成套一味死打再攝白痴笑料之B級動作喜劇,先係大家鍾意同想睇到之Deadpool,所以明商業之二十世紀霍士負責拍《Deadpool》,又未必唔係好事。我會支持埋呢一次。唔知會唔會係最後一次?