今次主角叫E-102，代號「Gamma」。屬於Sonic Adventure系列第二波。

因為完全冇期望過，睇完盒面，估佢唔到地多野。
除左隻E-102，仲包埋「浮游碟」，金色環同地台。多喎。

故事係講上面四隻野聯手對抗超音鼠永恆大奸角蛋人博士。三隻動物我都識。
「但你話E-102係部『有良知的機械人』？原來佢唔係邪派？搞Ｘ錯！」

除左超音鼠，仲有兩個系列。特種部隊唔關我事啦，太大路。
另一隻吸引！我係賽車小英雄大fans！要追的話又要追溯返去中學！

一開，好多野。玩之前，先睇睇最顯眼果兩舊野。唔係E-102。係兩張紙。

盒底寫圓形張係貼紙黎。噉點解大大隻Sonic Adventure果張唔係？
買得隻野都係細路（唔包括我），細路梗鍾意玩貼紙，反正唔係貴好多，
整埋佢做貼紙多個贈品，細路仔玩都玩得開心啦！點解唔整？

E-102 "Gamma"，登場。故事中蛋人博士其中一班得力手下，就係E字頭機械人部隊，
外型按佢個蛋樣製作，其中Gamma「良心發現」變節，投靠超音鼠陣營倒戈相向。灰爆。
「唔制！我要做壞人！」

四肢皆為三段設計，外型有點steampunk味，但一條過冇獨立關節。
對腳突出在係逆關節，後面仲有牛仔靴式齒輪，設計夠晒卡通化。

我好鍾意佢手幼腳幼波波身，亦即善良化蛋人博士樣，得意我鍾意。
雖然水口駁線位明顯，但以兒童向同低價位玩具黎講，我會接受。
「尤其是我買個價錢．．．乜都受啦！」

頸後有「浮游碟」，雷達或者偵測器一類野卦，有個窿插落去。
問題係太淺同太闊插得唔實，郁一郁隻野，有過半機會隻碟跟住跌。

除左隻碟，右耳位仲有盞探射燈。
「係？點解我見唔到？」
因為一開已經跌左去唔知邊，得番個窿係度。外插掛件製作甚差。

主力武器（或者唯一兵器）係右手枝炮，附槍托，用途不大但聊勝於無。
衰在槍口封頂。整個窿凸入去像真少少都好丫。慳水慳力到你。

學盒面擺擺個靚pose。開盒時，全身關節硬到轉都轉唔到，最後夾硬用勁暴力去扭，
扭到我都有點兒怕整爛，手腳頭腰先叫做轉得番。可想而知隻野歷史幾耐。

頭同腰可以三百六十度轉，但因為左手前有個「燈牌」頂住，玩唔到上身一百八向後。

對腳唔知點解會向右斜，令到上半身向左傾，好似跳緊舞。擺番個交響樂團指揮款先。

因為對腳斜向，想行或跑用左腳起步先平衡到，必要時要用埋腳後齒輪同埋左手支撐。
用右腳做重心之動作極難穩定。

「超音鼠！你走唔甩架！」

「滑行射擊！受死啦！」

「目標殲滅．任務終了．系統關閉」

隨E-102附送「action figure base」一個，膠製但表面噴漆噴得靚，有少少金屬感覺。

仲送埋超音鼠聖物黃金環乙個，同一條透明膠條俾你篤住個圈扮浮空。夠晒無聊。
除左一個窿位插金環，只得一個突出點。但腳有兩隻喎。點分？

為慶祝終於搵番頭頂盞探射燈，我地請到Gamma上台示範。
兩隻腳板都有窿可以插落去，但只得一點同有個環頂住，仲要插上去完全唔實，
個點其實冇乜大意義。難怪只得一點加咁鬆，設計果個都唔知點俾佢企好。

個環放右，似乎係典型得黎最美觀擺法。我隻野一直維持以上姿勢。

放左的話，除左左手頂住，兩隻腳仲會出晒街。點睇都唔似啦。

後面其實最好，實唔會頂到，加照計咁大個台而個點置後，正確擺法應該如此。
但個環去左後面，Gamma企得正，又遮左個環。都係放右算啦。

但個台可取之處，係平時唔可以用右腳做重心企定，而家靠突出點同地台食住，
終於可以做到平時唔得之動作，跳晒舞都得。

「大踏步神情確威武∼」