「Old-School呀！！！」
見到第一件事大叫。我記得第一次見係已經係接近廿年前二年級果陣，
而家仲搵得番，唔使諗都知道又係107果堆倉底貨黎啦！
「拿！107！又幫你清左樣死貨，我等緊你用六變獸報答我！」

當而家乜野玩具都要大大個盒裝俾你，反而好懷念呢種精簡包裝，
背面已經有晒說明書同所有角色資料，拎起手已經可以睇通睇透，
唔似呢個年代乜都要大乜都要多，想睇睇份說明書都要拆晒箱撕晒紙整一大輪。
實而不華已得人心，仲使乜搞咁多野？這就是old-school精神。

拿！仲記得呢幾樣野，先證明到你同劉Sir一樣係屬於八十年代！
先睇睇左上，"Proof of Authenticity"，齋睇個名都知堅料，果代變形金剛玩具標誌就噉睇冇野，
用手指一捽，搏派定狂派立即分曉，一路捽個標誌仲會一路變色！
果時買同玩變形金剛，其中一樣就係為左呢個感熱貼紙！
果時覺得好高科技架，而家亦冇幾多玩具會落咁多呢種心思！
中間個印花有得剪低儲分，但係到而家都唔知道有咩用，反而右邊個"Tech Specs"堅料！

買變形金剛玩具，其中一個樂趣就係呢個"Tech Specs"，有晒每個角色詳盡介紹同能力值，
仲鼓勵各位小朋友剪低收藏，又係old-school玩具精髓，最簡單資源帶出最全面享受！
細細個又點會識英文知講乜丫，同果堆所謂能力值而家睇番都知道係吹水居多啦，
但就係細路仔唔識野先會對呢堆數字好執著，會同其他小朋友就邊隻變形金剛勁議論同舌戰。
未玩齋睇，已經回憶起好多童年之趣事同傻事！再望落少少，
「咦？原來呢套野係1984年日本製造喎！」
文物呀文物到開封今日足足有近廿三年歷史喇！
更難得係，而家仲搵到幾多野唔係中國製造？更加具價值。

老實講，因為個包裝咁精美同有咁多內容，我的確係唔捨得開，但唔開又邊有得玩、邊有得寫落去丫！
就等我幫呢兩部變形金剛逃出二十三年之封印再臨人世！

左邊係Frenzy地震，右邊係Laserbeak鐳射鳥，兩隻錄音帶仲有兩枝炮跟身。
開左之後，開始發現有問題：
「點解兩餅帶個標誌好似唔多同？」
冇錯，入包裝時巧妙地倒轉唔睇真真係睇唔出，但拎番出黎擺番正常錄音帶方向，
就會發現地震果張貼紙係上下倒轉左黎貼，因為要就番變形後機械人個姿勢。
「將就下啦劉Sir，玩具黎咋呢個貼貼紙架咋，唔係真係變形金剛呀！」

細細個玩玩具已經有舖「幕後花絮」癮，鍾意研究玩具背面、底部甚至內部，
呢兩部"Cassettron"，正面係錄音帶，背面又會係點？
都係果句啦，玩具黎遮，唔好預期咁多啦，本身之錄音帶背面變形之後係機械人正面，
地震果邊唔多吸引，但似乎鐳射鳥錄音帶型態背面仲靚過正面喎。
冇計，就係因為咁靚先買，買呢套野真係為左鐳射鳥遮你估係因為地震咩！

首先玩玩地震，第一步係將錄音帶兩邊拉落黎變做對腳。
就噉睇，設計都幾靚喎！可惜．．．

．．．可惜黑色呢邊先至係正面。兩隻手係屈埋左上頭頂度。
幅相影得好搞笑，因為實際上個設計的確好搞笑，個頭係縮埋身入面，
錄音帶果時用自己隻右手頂入去，變形果陣一拉開對手個頭就會自動彈出黎。
即係變機械人果時係幾好玩，但變番做錄音帶果陣齋整番個頭入個身度都整到你想死，
假使死之前你仲未整爛隻野的話。

對腳擰番向前再伸出前腳，扭埋正對手，就完成地震之機械人形態變形。
隻機械人兩寸半左右高，但手腳關節比預期中精細，對腳得硬直一條但可以左右擺幾大角度下，
對手上臂係用錄音帶兩個轆做軸心只可以上下180度郁，全個機械人前臂機動性最高，
直軸旋轉同水平九十度擺位都得，叫做可以玩幾多姿勢。

兩支炮算係地震最多野玩果樣，標準形態係裝背後做空戰型態。
睇卡通同說明書，地震變機械人時個肚有個狂派標誌，點解而家搵唔到？
原來去左背脊度，變錄音帶時張貼紙上下倒轉，
就係等變完形個標誌對番方向。只不過：
「去左後面，都睇唔到，有咩用？」

對炮又可以裝係對手變陸戰型態，只不過過程當中可能需要少少暴力。
就係咁多野玩。但差噉樣野。
「喂！對地震鎚呢？」
中文名叫地震，係因為絕招係對手變鎚打到個地地震，
基本上卡通入面佢每次一出場就出呢招，震裂晒個地下之後就等俾人打。
「地震咋喎！電影版入面建造派合左體之後，點解可以震到佢地散番晒？」
"Tech Specs"有解釋到架！原來佢出招果時仲可以打出200分貝超高頻，擾亂敵人電路令敵機故障。
「拿有根有據架唔係求祈呃你架傻仔！」
咁細部機械人仔，仲點整到隻手變到隻鎚咁威水丫，
拆隻手出黎換又難做得咁細同可能破壞錄音帶變形結構，最後慳番直頭唔整。
呢個係滿足唔到地震fans的美中大不足。

其實講玩，地震真係冇咩好玩，因為郁動得到之部份唔係好多，以下已經係最型／最好玩：

「我係孫唔震！我要變超級撒亞變形金剛！」

「做變形金剛做到悶，我要做矇面超震！變身口令！！！」
「漏奶，咩撚關係，我批要批你個波！」

「仆街！！！」
興奮得滯，仆街，仲要連隻腳都仆斷埋，
自問已經係玩得好小心果隻，但第一次玩，變變下已經變到斷左隻腳出黎。
又唔係特別靚又唔係點好玩法，仲要咁鬼化學，真係連掂都唔多敢掂而家搞到。

相比下，鐳射鳥就好玩同多野玩得多。

狂派標誌因為果面變身之後係鷹身底，同地震一樣睇唔到，
不過鐳射鳥本身係動物型態，變完之後睇唔到個標誌感覺上都較為合理，
而且個設計夠靚，少左個標誌又算係乜丫。
反而變左做隻鷹之後加多個標誌上去先礙眼呀！

鐳射鳥變形易過地震好多，個底兩隻腳扳向上，倒轉之後拉開對翼再拉出個頭，
已經可以話搞掂左個變形，過程中亦唔似地震會有造成潛在損傷之「風險」。

再裝埋兩支鐳射炮，噉就搞掂快靚夾正！難得係手工相當精細，造型又夠簡單，非常吸引。

對腳角度定左，但頭同翼夠補晒，對翼摺合同擺動角度比想像中大得多，
條頸亦可以伸到好長個頭再可以上下郁，全部關節位仲要做到好實淨，
真係各方面都贏晒地震。唉，搞到地震好似好廢噉添。

玩變形同合體玩具，最好玩就梗係去自創「隱藏變形」出黎啦，
能夠玩出自己玩法，先至係玩玩具之最大樂趣。

實在係太化學喇，變形過程成日都覺得會整爛，跟住連隻腳都飛埋出黎，連玩都唔多敢玩，
所以而家隻地震，只好進入呢個隱藏變形Cassettank型態進行永久封印，
直到有朝一日勇者出現打倒魔王，傳說中之地震神先至會復活再臨。

呢個係鐳射鳥由鷹昇級至翼龍之Pterbeak飛龍變形，
呢個翼龍變形因為條頸夠長同個頭角度夠闊先整到，好玩。
再睇睇隻右翼，有玄機架，大大隻字寫俾你睇佢係日本製造架！

傳說古埃及各式神衹之中，有一隻叫萊薩卑卡之鷹頭神，
經過幾代輪迴，二十一世紀萊薩卑卡神轉世成鐳射鳥，
吸收足夠埃及能量之後，就可以喚醒Laserbeak變做神衹之真身Lesa-bica！

當埃及受到外敵入侵，萊薩卑卡鷹頭神就會以其隼目米加粒子砲擊倒敵人，保護埃及子民！

有一條問題，相信好多人都會問：
「乜地震唔係藍色咩？點解個玩具變左紅色？」
其實卡通版當中，音波係有好多隻錄音帶機械人，當中係有兩對人鷹組合，
一對係地震搭鐳射鳥，就好似包裝上面係藍色機械人搭紅色機械鷹，而另一對係紅機械人加黃鷹。
只不過唔知點解玩具係調轉左地震同另一個錄音帶機械人，亦即係想集番齊一對原裝組合，
唯一出路就係買兩套或者搵人交換。又一個商業陰謀。

睇完之後，都會知道鐳射鳥先至係重點，地震只係可有可無，
事實上的確買呢套野可以話只為鐳射鳥而完全放棄地震，始終變形金剛隻隻都變人，
呢隻錄音帶變隻鷹，兩個型態都夠特別，又整得靚同變形簡單，地震先天已經唔夠鬥。
講關節同駁位，以1984年技術黎講算做得幾好架喇，只係貼紙貼得幾差下，
特別係地震，玩左幾次之後已經有貼紙位甩左或者爛左。
「日本人手勢咁差，難怪最終都係要偉大的祖國人民出手，
日本人先得以打救到自家之動漫玩具！
祖國萬歲！！！！！！」

除左地震同鐳射鳥，仲有一個係機械人加機械豹組合，同樣地隻錄音帶機械豹又係超靚。
搵，當然想搵，只不過一諗到，因為隻豹，又要啃多隻同地震一樣的機械人，就灰晒。
「點解唔索性出個一鷹一豹錄音帶機械獸組合？？？好灰呀而家搞到我！！！」