Iron Man
「唔好呃我喎！Iron Man 唔係Marvel漫畫咩？佢係變形金剛？」
「我有話佢係變形金剛咩？」
「隻野叫Mega Morph，即係『巨變』，睇個名都知係超級機械人啦！」
「每部Mega Morph由一個超級英雄駕駛，只有特定英雄先可以開動！」
「仲未知咩黎？隨機附送埋一本《Mega Morphs寶典》俾你補補習！」
除左個包裝殘左少少（倉底貨嘛，冇計啦），睇盒都算吸引，
所以黎緊果步好唔鍾意：美國玩具一定要拆爛晒所有紙盒同吸塑，先拎到隻玩具出黎。
過程中牽涉到超多膠紙同鐵絲糾纏，同超長人膠肉搏時間。
未睇隻機械人之前，首先睇睇其他趴屎。唔算太多。
最重要機件power pack，劇情中每部機械人之特殊能力要靠駕駛員解封，
同一概念引入玩具，改頭換面成power pack機關。
未玩，齋睇已經唔開心：
「大佬，手工水口位執番靚少少得唔得呀？」
唔係個鏡頭斜左、唔係攝影技術差，係佢本身長就係噉樣，我都冇計。
即係成品外形已經唔係好，又要長短腳企唔直懶型地樣衰衰噉企，
「Iron man喎！正派喎！」
跟住就到「巨變鐵人」，英文名Iron-Bot。
簡單黎講，Iron Man副盔甲放大Ｎ倍，改少少加少少，就係。
．．．其實好樣衰亦好兒戲。睇睇背面，見唔見到心口有窿透光？
齋到爆個背脊真係。已經開始心灰了。
有駕駛員自然有駕駛倉啦。一打開．．．
「嘩！馬虎到你！」
駕駛員Iron Man「坐」入去，對操作同外觀完全冇影響，叫做冇咁易整唔見個公仔囉。
做戲做全套，噉而家駕駛員坐左入去，Iron-Bot正式解封啟動，就可以開始玩喇喎！
做得超級機械人就梗係要黎打啦，咁大部要黎幫手起樓咩。首先武裝起來。
跟機有兩枝炮，設定係夾上臂扣位，但裝上臂睇落好怪，試試用手拎住，
全部手指獨立姆指仲可以神奇地三百六十度回旋（！），但虎口位細加手指形問題，
完全唔夠力握實枝槍，放上去都跌跌下甚至唔夠力跌埋落地，仲衰過原來個擺法。
power pack裝背後，需要一定暴力先可以裝到上去固定得到，然後經「電線」連接武器。
睇落係過癮架，只係條線太硬，好多時拉到枝炮移位，亦因為扯力大影響可動性，
非必要都唔好裝power pack或者連結武器。
終於等到重點環節：
"Mega-Power Unlock!"
劇情入面話Mega Morph需要用駕駛員之超能力開動，估唔到玩具都引申得到，
power pack上面有個鎖，可以用個公仔背後條「匙」插入去(un)lock，
扮晒解封機械人之戰鬥能力。已經係Mega Morphs較好玩之一樣黎架喇。
「解封」之後，就可以發動武器射擊。原理係推Power Pack個掣，用氣壓推撞針射彈。
唔知係設計問題還是隻兒童向，攻擊力都幾弱雞，如果唔要撞針齋用氣壓可能力度仲夠。
另一個問題係枝炮放上臂，郁隻手時成日頂到心口對翼，好難擺位擺得靚。
多番嘗試後，右手係官方安裝方法，但就算上臂開定個位你扣，兩枝炮都好鬆下，好求祈。
左手掛前臂，似番正常機械人擺法，但真係只可以掛住，不過噉樣仲靚。
講關節又係冇咩好玩，頭只可以點，對腳屈得好少，前臂裝齒輪型關手腕最有彈性，
上面個姿勢已經係我多番研究之後，叫做擺得到而較為似樣的一個了。
講玩，機械人完全唔好玩。
齋玩擺pose就冇癮啦，買佢返黎就係為有得玩有得變嗟，為擺不如買番個原版Iron Man？
玩變形（佢地唔係叫transform，叫morph），先睇睇說明書，望落個樣容易原來變形都唔係簡單喎。
變形機制為機體結構帶黎重大缺憾。變形第一步胸口成個反起。
但為方便變形做到好鬆，平時玩好易一郁全個上半身連雙手一齊反起，冇做固定較為失敗。
而家噉樣收埋個頭反起一半，加埋隻色好似舊式日本超級機械人，
重心擺得好的話，分分鐘整到個"GERWALK mode"出黎，
不過我冇試過，因為已經冇乜信心。
死，好似變番超級機械人，仲好睇過原來Iron Man/Iron-Bot。
上身對紅色機翼係軟膠造，郁得多或者同手／膊頭部件撞時會撞到變形，
太過小朋友向之設計，搞到我好唔鍾意，因為本身設計此等碰撞係無法避免，
即係隻野好快就玩到真係變形非常唔襟。
Iron Man變身型態係Sky-Fighter，變飛機好平常，只係冇諗過真係簡單成噉，
機械人形擰轉伸對翼出黎就叫做變左架飛機。好冇癮喎。
上本身簡單過簡單，反而對腳真正有番變形之樂趣。
由一對腳變成雙噴射器，睇落好少野但都差唔多變足十步。
玩變形金剛（雖然佢唔係）就係為左扭下擰下，由一樣野變成另一樣野嘛，
只係成個機械人得對腳叫做多番野玩下，又邊度夠喉？
「．．．下？變完拿？」
「係呀，變完架喇架！」
呢架就係Iron-Bot第二型態、戰機Sky-Fighter。前面睇落，都唔算太差啦。
武器可以放兩隻手擺機底，又或者放機頭，我選擇機頭，
因為覺得機頭好睇，同夾手始終唔穩。
「對手．．．唉．．．」
的確係機械人加對翼就當戰機，效果非常令人失望，唔止唔靚，直頭係難睇。
機械人部件完全冇隱藏，對手一睇就睇雙腳亦太過明顯，
而且唔收埋之餘又要鬆得離譜，郁一郁擺位就會亂晒又要執過，實在太求祈喇！
唔係因為死貨場有售，平得黎又當玩玩野，平時絕對唔會買囉，
尤其是實物到手，直頭係超乎預期地差。即係我本來都有心理準備過，
始終賣細路多過賣成年玩具迷，只係都冇諗過品質可以咁低、可以設計得咁冇心機嘛。
仲有安慰獎：
「Mega Morphis漫畫！」
每隻玩具會送一本漫畫，而Iron Man已經係第二個系列。
第一個系列夾埋係一個故事，不過只係真正漫畫版之前傳，今個第二波係漫畫版後之再續。
老實講，除左平同過癮，有漫畫送係半個令我落手之原因。跟住當然發現係落左搭啦。唉。
劇情講Iron Man見邪惡威脅日益嚴重，研製出可以變身戰鬥兵器之巨大戰鬥機械人Mega Morphs，
每部Mega Morph度身設計俾一位超級英雄，所以外型同能力會同駕駛員相近，
同每部機械人只可以由超能力相符之專屬駕駛員起動。有一日Venom潛入Iron Man研究所，
利用佢同蜘蛛俠能力相同之特恆偷走蜘蛛俠部Mega Morph，
順便搶埋Iron Man「強大到可以戰勝所有英雄」之新發明，
（漫畫劇情經常發生之荒謬橋段，既然Iron Man咁有錢咁有能力乜都整到出黎，
點解可以發明到咁勁之神兵利器，自己都唔用齋放係度等人搶？）
Iron Man就梗係立即派出自己部Mega Morph迎擊啦。
Iron Man本身好勁絕對勁過Venom，但一上到Mega Morph，成本漫畫一招都未出過，
淨係死出防護罩俾Venom狂打，同救人救火，招都未出Venom已經走左。
搵笨的漫畫。就同隻玩具一樣咁搵笨。
睇到最後，第二波全系列三隻，差Thing未執。不過已經知死，唔會再執了。
當你睇到本漫畫畫功咁細路仔，都知咩事啦。或者我根本唔應該同小朋友爭食。
我承認會買除左貪平，仲因為盒底張相吸引到，只係包裝從來係執到超現實地靚一靚，
開完先知個結構咁兒戲同用料手工咁差，當堂冇晒心機，再睇埋本漫畫，
直頭令到我對全個Mega Morphs系列徹底失望。就係咁劣。
好在本身我目標並唔係Iron Man，而係Venom。我一切希望都交寄托到佢身上。