The Last Stand


得閒無事就會上網搵flash game玩,貪選擇多風格變化大同易上手,加上flash engine獨有色調、物件型態、物理計算而成之粗糙,flash game成為得閒無事黎番舖消磨時間止手痕之上佳小品,感覺就好似打得多家用機同落得多機舖搵番部卡片機過番舖癮一樣。茫茫flash game「廠牌」Armor Games為心頭好,出品除左美工靚同系統設定好,仲因為大部份出品都係動作game,完全係唔多鍾意用腦總之夠暴力又夠多血一味死打難打見人就殺的劉Sir杯茶,而且鍾意用打喪屍為題材,講血講暴力自不然唔會少,The Last Stand就係發掘到最鍾意成日煲之一隻。就係因為係一隻傳統過傳統的喪屍動作遊戲。




系統篇

「你係邊個?點解有喪屍?殺晒全部喪屍又點?可以去邊,個世界仲有邊度冇喪屍?」
你唔需要知道,唯一要知,就係有好多喪屍搵你,你見屍就殺守住據點唔好俾喪屍打爛圍牆入到黎就得。就係鍾意喪屍game呢種"no bullshit"態度。每一關分兩個階段,日間分配時間做唔同作戰準備,夜晚就要保住城牆抵擋喪屍活下去,周而復始直到永遠...又唔使永遠,只係守住廿日廿夜遮,會咁鍾意玩就係因為隻game有爆機,唔似好多flash game寫係寫得好但有無限關,敵人一關一關加體力同攻擊力到最後根本係不死,爆機同game over同義,點靚點好玩最到後面都冇癮。講番隻game,打喪屍操作非常簡單,同大部份mouse+keyboard flash action game一樣:W、S、A、D控制角色上下左右行,R上彈space bar替換每關兩種武器其中一樣,mouse瞄準左掣開槍,易學易精絕對player friendly。




備戰篇

每日日頭有十二個鐘,可以作三種調配:修理圍牆、搵武器同搵生還者。修理同生還者數量有直接關係:據點包括自己最多可以有七個人,而每一個人修理一個鐘頭可以補5%,亦即係人數越多修理效率越高,最理想當然係集齊七個人先修理,但去到第十關之後就唔慳得,圍牆唔夠三十無論生還者有幾多都最好先修理一下,因為一關冇三四十係閒事。搵武器時間係累積,到某個鐘數就會搵到新武器,但生還者就係獨立計,一關入面搵到幾多生還者取決於時間搵同剩餘空缺,計算方式唔同,但共通係搜索過程中都有機會損失同伴。有關生還者,需要多花時間研究。
搵到生還者之機會率同所花時間成正比,最少四個鐘頭可以搵到一個,用到六個鐘成功率會達到100%,所以只用四或者五個鐘頭搵唔化算因為可能一個都搵唔到;又推理到用全十二個鐘有機會4+4+4搵到三個,但唔係次次都咁好彩,大多數係5+5搵到兩個,甚至4+6得一個,另外因為無論搵人還是搵槍都有機會死人,所以搵生還者最好最少用十個鐘,先可以避免搵到一個但死一個甚至搵唔到但有人死,假設結果唔係4+6。因為一關就算用盡時間都未必可以一定搵到三個生還者,保守唔想搏的話,可以十個鐘頭搵人剩番兩個鐘搵槍或者修理,結果大多數有兩個生還者,就算有人死都仲有一個,又唔怕會蝕左兩個鐘冇收穫,而搜索新生還者填補空缺亦係同一道理,最好等到死左兩個甚至三個先投資一日去做,去到後期時間寶貴,假如只用四至六個鐘搵一個人而最後搵唔到甚至蝕多個,係非常嚴重之資源浪費。




生還者篇

全隊計埋自己最多可以有七個人,亦即係可以有六個同伴,「出場」次序固定係上前、下前、上後、下後、後下、後上,如果搜索過程中有同伴身亡會循相反次序減少。同伴除左日間修理時影響修理之成效,但更重要係提供戰地火力支援,陣勢分佈平均基本上全個畫面覆蓋晒,睇到都知最重要自然係後上來福獵槍同下後密林兩個,其他人都係得手槍仔去到後面確實唔多夠,呢兩個就幫到大忙特別係來福獵槍,對位好真係可以一槍一隻,因為咁重要編排上死同伴的話佢會係第一個增加難度。生還者會自動攻擊,當喪屍走到距離佢四份三個畫面左右就會不斷開火射死為止,但問題除左火力唔多強之外仲只識得射直線,條喪屍行黎時個頭剛剛好對正槍口就自然係正啦,但後期有喪屍曉擋彈,只識一味直射就變得好戇居,都唔夠班友盡忠職守之職業道德,有時條喪屍已經行到去佢地前面打爛座牆咁滯,但班友工作範圍只包括一條直線,只要條屍高或者低過槍口少少係唔射就唔射吹咩你死你事,睇到真係想一錘打爆個芒捉條友出黎碎屍萬段(呢個情況應該係碎sprite萬pixel)。
當圍牆跌到得番十以下,班生還者就會走人得番你一個,令喪屍更容易打爆座牆埋你身殺你,假使頂得住過到關的話千祈萬祈一定要修理到最少高過十,因為隊友雖然今關脫逃下關都仲會出戰唔會走左去唔見人,但如果下關一開始圍牆唔夠十的話班人就會立即肴底剩低你自己一個捱全關,亦即係死硬可以即時restart。




軍火篇

二十日入面,喪屍攻勢一晚比一晚強,要守得住鎮地除左靠同伴支援,最重要都係自己不斷發掘更強新武器抵擋入侵。搵新武器靠日間分配時間搜索,起初幾樣好容易搵到,但越後期/越強力之火器所需時間相對更長,都講過武器搜索時間係累積計,所以應該盡量投資最多時間於搜尋武器方面,同時盡量減低損毀同傷亡,前者可以靠個人技術,後者就隨機發生玩家控制唔到,去到後期經常搜索更加容易連續幾關都有人死隊員一關比一關少,將時間投資找尋更強新武器還是補充生還者重整隊形需視乎自己情況衡量。
軍火庫展示一共有十件武器,但其實唔止...

Handgun

一開始只得普通手槍一枝,作為最基本裝備自然只算係好過冇。一排十七發,射頭大約八槍可以殺一隻喪屍,夠技術一個彈匣殺到兩隻,只係上彈快同射擊頻率高都不足以彌補攻擊力弱之缺憾。初心者最好盡快搵到密林代替,否則只用手槍打頭幾關已經好辛苦。



Revolver .357

就算開頭唔落力搵武器,第四晚起都會有得用。密林雖然只係第一樣新武器,已經同手槍差別好大,典型左輪裝六發子彈,上彈較慢射擊亦唔密,但攻擊力強兩次headshot搞掂一隻普通喪屍,全中可以一次殺三隻,只遺在命中率差少少,係早期最佳選擇。



UMP 45

第一枝機槍,一梳25發,攻擊力弱全部headshot先可以殺兩隻,只勝在射得密,冇同伴支援較難打。僅適合遊戲初期使用。



Shotgun

主要近距離用,散射角度細遠距離可以打到兩隻喪屍,台型夠晒只係威力冇想像中咁強。上滿彈可以射八發,同其他槍唔同上彈係以彈數獨立計算而唔係成個彈匣計,同空槍時你唔開槍就唔會上彈,唔似其他一射晒就會強制換彈匣,聽落似缺點但實戰中反而變成優勢,就係可以隨時轉用第二種武器,到空檔時換出黎R掣上彈。可惜上彈實在好慢,尤其全部八發射晒之後,從頭上過要等極耐,射一發上一粒又會因為好型之上彈動作浪費大量時間,作為主武器完全唔適合,唔齊七個同伴更加難用,作為次武器近距離截擊效果就好好。但如果你係因為型而堅持要用,都唔係冇辦法,睇落去就會知,呵呵呵∼



Chainsaw

喪屍戲同game必備經典,「彈藥」係汽油每次有九十九,唔係長用可能過埋關都唔使入油。一到手就會成為固定武裝,除左實用某程度上係被迫,雖然係埋身武器要等喪屍走到圍牆前先用到,但攻擊力高仲可以攻擊複數敵人,到後來喪屍數目極多加上速度快時,電鋸就成為重要解圍武器,因為只用槍單係換彈都唔夠時間,而不幸俾喪屍打爆牆而數量多時,唔用電鋸理論上係完全冇機會保得住條命。又一重要用途係枝槍唔夠彈之緊急關頭轉用電鋸,殺晒圍牆前全部喪屍先再換番枝槍出黎上彈,就可以避免班屍衝到去你面前但你上緊彈還擊唔到之空檔死位減少無謂損傷。熟習適時轉用電鋸對付唔同距離敵人同補充彈藥就可以無敵。



Sawn-off Shotgun

古老雙管獵槍樣好普通唔起眼,其實係全隻game第二強武器。截管獵槍合乎現實覆蓋範圍比霰彈槍大,有時大到差唔多四十五度角有點兒誇張,但唔止範圍更大攻擊力仲要更高,勁的話兩發殺三四隻都可以,用法同霰彈槍調番轉企後打遠會更好,最好係走到去最上角落頭瞄準斜下射炸頭。雖然每次只可以裝兩粒彈,上彈時間同密林差唔多長,但攻擊力強加範圍廣,彈量唔多同上彈慢其他槍少少絕對唔係問題,再加上唔會強制上彈之優勢,未搵到隱藏武器之前,截管獵槍搭電鋸係永恆的無雙組合。



Hunting Rifle

適合日本武俠片迷同古龍迷,一招定生死之來福獵槍。只裝一粒彈但射頭一槍死同可以穿一隻喪屍,問題亦係得一粒彈,勁的話一野死一/兩隻,但射唔中頭同射失就大劑,喪屍數目多同同伴唔多直頭死得。過手癮重於實用性。



Uzi

一字記之曰「爽」!烏茲輕機一梳五十發,彈數多攻擊力中上上彈快,瞄住個頭亂啡都夠殺三四隻,散射角度大而命中率較低,但喪屍集中時再加移前移後控制角度掃射就變成優點。去到後半只得兩枝槍有用,就係截管獵槍同烏茲,至於用邊一枝就睇你喜好,前者穩重後者爽快,但論難度烏茲必定較高。



M4A1

美軍名槍,一梳三十發,大約十槍死一隻,唔打headshot基本上冇用,特別出場時已經係喪屍又多又快之後半。用途接近零。



AK47

跟住到蘇俄名槍,無論彈數還是性能同M4A1可以話係一樣,攻擊力或者較高但未能得知,除左個樣唔同有兩個造型你揀之外,我都唔明有乜用處。
或者M4A1同AK47之存在意義,只係為左唔太早俾你得到終極武器...




Barrett

最終隱藏武器,未用齋睇都夠照啦,巴拉特反坦克步槍都出埋黎打喪屍,夠晒誇!一梳十發上彈又快,攻擊力同樣超高無論邊種敵人就算唔射頭都一槍死,都未止!最大破壞力係同來福獵槍一樣具穿透性,但唔係只穿一隻而係無限穿,求祈一槍都死三四隻,對位對得好一槍掃低成行連畫面邊未出鏡果堆都死埋爽到爆!只係判定方面有問題,有時粒彈明明穿過條屍都打唔中,不過用過你就知道,如此少少缺憾完全唔會令你介意!想知乜野係神級境界,一定要用佢!衰在你要投資好多時間先可以搵到:搵到AK47之後最少加多廿六個鐘。




全武器一覽



就所評睇到,早搵到唔一定係廢、遲搵到亦未必係好,講玩就自然係用多幾款唔同武器先夠遊戲性啦,但難度設定限制左真正實用武器之數量,唔係挑戰難度而有心爆機者,只可以選擇電鋸、截管獵槍同巴拉特,機槍系除左烏茲之外直頭弱得令人失望。全場風水位係最上,走到最上對斜下射好易打頭,機槍同霰射用此方法可以達到最大效能。又用邊種武器都好,瞄準時目標後面最好有另一隻喪屍,特別係機槍同命中率較低之武器,機槍彈數多但每發攻擊力弱,要集中射頭先可以短時間內射死喪屍,如果成排彈噉掃法好易射空,經驗未夠控制彈數未到家的話,將兩個喪屍頭連成直線再射,第一隻死左之後就可以直接打到後面果隻,唔怕射失又有效率。另外記得後面有人幫你,唔使成日都搏到盡自己打晒,可以每條屍射幾槍之後留俾隊友搞掂,又或者等扣血扣到咁上下時突入執雞,遊戲後半有效同隊友協調好緊要。
另外headshot有樣要注意。唔使講大家都對喪屍之「生理結構」有一定認識:射頭扣最多、身其次、腳最少。因為喪屍步速唔同,有時打headshot可能後面果隻走左上黎對腳擋住個頭。除左奮勇殺敵,亦要一眼關七。
如果你偶像唔係雙槍雄,電鋸一定唔可以唔用,剛剛開始玩就更加不用不可,因為後半數量之多同速度好易就會帶成班喪屍去到圍牆邊,就算用霰彈都好難清場,唯有攻擊目標數目無限制同持久之電鋸幫到手。謹記皇道:
「熟習適時轉用電鋸對付唔同距離敵人同補充彈藥就可以無敵。」




攻略篇


Day 1


要爆機好簡單,只要保命兩旬就可以,講當然容易啦,但玩落就落搭。遊戲分日夜,一開始會直接進入第一晚開打,第一關喪屍唔算多,有兩種步速一快一慢,難度唔算高但初開始玩可能會力不從心,因為武器只得手槍一枝火力奇弱,經驗未夠可能第一關已經俾人扣幾十。因為喪屍行快還是行慢係隨機,如果符碌撞到多行屍,第一晚 perfect 100過關都可以。唔好彩,好似我試過過關得番五十幾,就可以即時restart。第一關遮!



符碌撞到多行屍,第一晚perfect 100過關都可以


跟住就到抉擇時間:第一日。因為只得自己一個每個鐘頭修理得5%,第一日完全唔應該花時間修理。噉搵武器定搵生還者?假如係初心者,今關可以用全部時間搵槍,噉就可以搵到同手槍差天共地之密林火力大幅提昇,下一關亦更易搵到UMP 45。但建議唔搵武器,而全十二個鐘用黎搵生還者。原因後述。



(又係)Day 1。撞到手神一日可以搵到三個生還者。
夠串的話,第一日搵唔夠三個人又立即restart。第一關遮!


無論係搵人定搵槍,第二晚都會輕鬆得多,雖然喪屍數目多左,亦開始出現體力較高之肥屍,靠密林或者生還者幫拖乜都夠晒。第二日同樣建議繼續搵生還者,如果搵槍已經搵到UMP 45,搵人就全員最少有五人,計落第三晚甚至比第二晚更簡單,唯一挑戰只係開始有喪屍會高速衝上圍牆要盡快解決。相信你好想問:
「點解唔搵槍?」
其實部份武器唔使自己搵,去到某關自然會有喪屍俾你,例如第三關就會有隻差佬喪屍帶住枝密林,佢當然唔識用啦,過左關之後就會由你接收,頭兩關就算唔積極搵槍都完全唔需要擔心,除非你覺得用密林較有信心過關。所以你會見我偏向先搵人再搵槍。仲有理由,因為經喪屍拎槍,過關之後搵武器累積之時間計會跌番去零,除非你拎到槍果一晚(如第三晚)跟住一日(如第三日)累積到之時間亦夠拎到一枝新槍,噉先會當係你自己搵到而唔係喪屍度執,時間計先會繼續累積落去,否則就算你已經有好多個鐘只差一個鐘就搵到都好,判斷為喪屍度接收的話,過關之後所有鐘數取消晒就好浪費。另一個原因係假如先集中搵槍,第三晚就可以有齊UMP 45同密林,但跟住幾關難度開始提高,到時先搵同伴會應付得相當吃力。


到第三日,可能有人會有疑難:
「假如我到第三日都未搵齊所有生還者,應該搵人定搵槍?」
睇情況同你意向。第三關全十二個鐘搵槍就可以搵到密林再加有半行時間計剩;圍牆扣得太多,第三日可以做補給關搵埋剩番所有生還者同修理,過關時一樣可以齊人有槍,但呢個情況其實有缺點,因為最初搜索武器時間計係有一滴/一個鐘,經喪屍拎密林就會取消埋果一格,而UMP 45正正係十三個鐘/一日加一滴先搵得到,亦即係用第三關補結,會令UMP 45遲一關出現,雖然影響唔係好大,因為密林太強了。



此乃補給關案例/失敗案例


第四關開始有喪屍狗,同跑屍一樣高速衝前攻擊,不過體力弱一槍密林即死,攻擊力亦低,滋擾多於傷害性,交俾隊友搞掂更好。正常的話第四晚你(又)係玩晒,因為密林加六個生還者,敵方根本全無招架之力。



七人全員集合 + 密林 = 頭幾關玩晒


覺得太簡單?好正常,因為頭四關其實只係熱身同俾你做好基本準備,第五關先至係真正開始隻game,跑屍同喪屍狗都多,好快牆前就會排滿晒,難度在於正常呢關仲未會拎到霰彈槍,亦即係只有一隻一隻殺。跟住到第六晚...



睇睇下面隻爆頭喪屍拎住枝乜?


但黎到第六關,應該唔使靠喪屍都可以拎到霰彈槍,下一關第七晚有電鋸。因為基本已成,第七日起每日時間管理都係一樣,以搵新武器為大方針,有損員損夠兩個 - 搏的話死夠三個 - 先用一日搵生還者,等夠多生還者必要時先修理,每日如是。



第十一晚,第二個難關開始


去到第十一晚,難度又再突然跳昇,跑屍數量大增,唔用截管獵槍電鋸加組合非常難玩。第十三晚著避彈衣之喪屍SWAT初登場開始麻煩,因為避彈衣保護只有射頭或者射腳先殺到但同伴只識得直射,SWAT行頭擋晒彈後面班喪屍好易就走到埋黎,所見一見有SWAT最好快手搞掂,同用最上線向斜下射絕招。



第十四關起喪屍SWAT成為正選,難度再提高。好在SWAT唔識跑。


跟住喪屍狗唔再出現,因為擋彈之工作已經有SWAT,攻擊力又唔夠,加上後來差唔多隻隻都係跑屍,喪屍狗已經冇存在價值,亦即係跟住會係一番苦戰。第十七晚起喪屍SWAT仲會升級成喪屍軍人戴埋頭盔,只有靠射腳同面積細之面部先可以殺到,難度大增,第十七晚只得一兩隻出都叫做易應付,但十八關起係成連軍人過黎打你,如果未搵到反坦克步槍的話,勝算減50%。



第十八關仲冇反坦克步槍,好易群屍爆牆


好多軍人都會拎住M4A1,但到軍人出場時即係第十七關仲未搵到M4A1,可以話已經同巴拉特無緣。順利的話大約第十七、八晚就會拎到巴拉特,初玩可能十九甚至最後一晚先有,但一搵到,立即係兩個世界,因為就算你全部同伴死晒,一枝巴拉特夠你以一敵萬。
有樣野好戇居:後來咁多軍人,過關之後係成地都係M4A1,即係你自己有唔需要唔係問題,點解班生還者仲係咁戇居唔去執番枝M4A1,係都要用自己枝手槍仔?



每日一字:巴拉特 讀音:玩X晒 解釋:(都係)玩X晒


打軍人一係不斷射頭搏射得中塊面,一係搏命射腳逐少逐少噉扣,但用反坦克步槍係唔係都一野死,瞄住隻腳一槍就搞掂一隻/成行,上關未拎到全畫面都係喪屍,今關拎到之後,都係周街喪屍,不過全部屍趴晒落地下。巴拉特絕對係設定得太強,但當你感受過後半俾電腦狂出屍老屈積落之怨氣,就會明白枝炮有咁勁確係有需要,因為要用黎調整番玩家之心理平衡。



當你可以堅守二十日,第廿一日朝早,軍部就會派人黎救你。
不過你寧願佢地唔救你。殺得性起,都未夠喉。


終於逃出生天。何去何從?
「去番menu從頭玩過囉!」
「咁難玩!成日俾電腦屈,有冇方法屈番電腦轉頭呀?」
「有!睇落去就知!嘿嘿嘿...」




CaseGame Study

以上就係個人攻略流程供大家做個參考,當然大家可以研究出更多不同玩法,我個玩法其實較為保守。再特別紀錄其中三局,進行更深入學術研究。


Game 1: Bad Game

Night 1: Weapons: Handgun | Barricade: 96% | Survivors: 1
Day 1: 12hrs Survivor: 2 (3)
Night 2: Weapons: Handgun | Barricade: 59% | Survivors: 3
Day 2: 12hrs Survivor: 3 (6)
Night 3: Weapons: Handgun | Barricade: 58% | Survivors: 6
Day 3: 2hrs Repair: 42% (100%) | 10hrs Survivor: 1 (7) | Weapon Found : Magnum
Night 4: Weapons: Magnum + Handgun | Barricade: 100% | Survivors: 7
Day 4: 12hrs Weapon: none | Survivor Lost (6)
Night 5: Weapons: Magnum + Handgun | Barricade: 87% | Survivors: 6
Day 5: 12hrs Weapon: UMP 45 | Survivor Lost (5)
Night 6: Weapons: UMP 45 + Magnum | Barricade: 82% | Survivors: 5
Day 6: 12hrs Weapon: Shotgun
Night 7: Weapons: UMP 45 + Shotgun | Barricade: 77% | Survivors: 5
Day 7: 12hrs Weapon: none
Night 8: Weapons: UMP 45 + Shotgun | Barricade: 72% | Survivors: 5
Day 8: 12hrs Weapon: Chainsaw | Survivor Lost (4)
Night 9: Weapons: UMP 45 + Chainsaw | Barricade: 61% | Survivors: 4
Day 9: 12hrs Survivor: 3 (7)
Night 10: Weapons: UMP 45 + Chainsaw | Barricade: 50% | Survivors: 7
Day 10: 1hr Repair: 35% (85%) | 11hrs Weapon: Sawn-off Shotgun | Survivor Lost (6)
Night 11: Weapons: Sawn-off Shotgun + Chainsaw | Barricade: 72% | Survivors: 6
Day 11: 12hrs Weapon: Hunting Rifle | Survivor Lost (5)
Night 12: Weapons: Sawn-off Shotgun + Chainsaw | Barricade: 48% | Survivors: 5
Day 12: 12hrs Weapon: Uzi | Survivor Lost (4)
Night 13: Weapons: Uzi + Chainsaw | Barricade: 20% | Survivors: 4
Day 13: 2hrs Repair 40% (60%) | 10hrs Survivor: 1 (5)
Night 14: Weapons: Uzi + Chainsaw | Barricade: 56% | Survivors: 5
Day 14: 12hrs Weapon: none | Survivor Lost (4)
Night 15: Weapons: Uzi + Chainsaw | Barricade: 42% | Survivors: 4
Day 15: 2hrs Weapon: M4A1 | 10hrs Survivor: 1 (5)
Night 16: Weapons: Uzi + Chainsaw | Barricade: 24% | Survivors: 5
Day 16: 2hrs Repair: 50% (74%) | 10hrs Weapon: none
Night 17: Weapons: Uzi + Chainsaw | Barricade: 53% | Survivors: 5
Day 17: 12hrs Weapon: AK47
Night 18: Weapons: Uzi + Chainsaw | Barricade: 27% | Survivors: 5
Day 18: 1hr Repair: 25% (52%) | 11hrs Weapon: none | Survivor Lost (4)
Night 19: Weapons: Uzi + Chainsaw | Barricade: 0% | Survivors: 4
Day 19: 2hrs Repair: 50% (50%) |  10hrs Weapon: Barrett
Night 20: Weapons: Barrett + Chainsaw | Game Clear

由始至終都相當失敗之一局。第二關已經冇左成半,為修理同集齊隊員浪費左唔少時間,連搵密林都要靠喪屍,到第五關先有UMP 45,跟住持續損員分薄左搵武器之時間落搵人同修理方面。另一失敗係挑戰難度,由第十三晚起改用烏茲放棄霰彈,但事實證明用機槍後來完全唔夠快,就算係烏茲一梳五十發都清唔切場,同相同時間截管獵槍可以殺多一倍以上。搞到往後差唔多每關都要用一至兩個鐘頭修理,好多時十個鐘先搵到一個生還者更戇居,去到第十九晚甚至連牆都爆埋,當圍牆就爆時班同伴走人果陣已經可以換定把電鋸,因為喪屍打爛牆入到黎,用槍打仲夠時間上到一次彈已經好好野,唯有電鋸一野過鋸晒成班先唔使死,雖然「唔使死」之前已經死過唔知幾多次。好在去到最後一關搵得切把巴拉特,唔係得五十牆加三個隊友絕對唔使旨意爆到機,只係去到呢個地步打爆,今舖贏僅屬慘勝。



第十九關都未搵到巴拉特,已經係拎得定把電鋸出黎等爆牆。


喪屍打爛圍牆入到黎捉到你即時game over,畫面全部喪屍搵你條(喪)屍開餐。
「game over之後會點?」
又唔使重頭玩過,由同一晚選武器度再開始遮。
問我就最清楚。因為以上畫面,今舖第十九晚見過不知多少次。



Game 2: Good Game

Night 1: Weapons: Handgun | Barricade: 98% | Survivors: 1
Day 1: 12hrs Survivor: 3 (4)
Night 2: Weapons: Handgun | Barricade: 90% | Survivors: 4
Day 2: 12hrs Survivor: 3 (7)
Night 3: Weapons: Handgun | Barricade: 89% | Survivors: 7
Day 3: 12hrs Weapon: Magnum
Night 4: Weapons: Magnum + Handgun | Barricade: 88% | Survivors: 7
Day 4: 12hrs Weapon: UMP 45
Night 5: Weapons: UMP 45 + Magnum | Barricade: 87% | Survivors: 7
Day 5: 12hrs Weapon: Shotgun | Survivor Lost (6)
Night 6: Weapons: UMP 45 + Shotgun | Barricade: 86% | Survivors: 6
Day 6: 12hrs Weapon: Chainsaw | Survivor Lost (5)
Night 7: Weapons: UMP 45 + Chainsaw | Barricade: 84% | Survivors: 5
Day 7: 12hrs Weapon: none
Night 8: Weapons: UMP 45 + Shotgun | Barricade: 60% | Survivors: 5
Day 8: 12hrs Weapon: Sawn-off Shotgun
Night 9: Weapons: Sawn-off Shotgun + Chainsaw | Barricade: 59% | Survivors: 5
Day 9: 12hrs Weapon: Hunting Rifle
Night 10: Weapons: Sawn-off Shotgun + Chainsaw | Barricade: 46% | Survivors: 5
Day 10: 12hr Weapon: Uzi
Night 11: Weapons: Sawn-off Shotgun + Chainsaw | Barricade: 35% | Survivors: 5
Day 11: 2hrs Repair: 50% (85%) | 10hrs Weapon: M4A1 | Survivor Lost (4)
Night 12: Weapons: Sawn-off Shotgun + Chainsaw | Barricade: 41% | Survivors: 4
Day 12: 12hrs Survivor: 2 (6)
Night 13: Weapons: Sawn-off Shotgun + Chainsaw | Barricade: 21% | Survivors: 6
Day 13: 2hrs Repair 60% (81%) | 10hrs Weapon: none
Night 14: Weapons: Sawn-off Shotgun + Chainsaw | Barricade: 70% | Survivors: 6
Day 14: 12hrs Weapon: AK47 | Survivor Lost (5)
Night 15: Weapons: Sawn-off Shotgun + Chainsaw | Barricade: 61% | Survivors: 5
Day 15: 12hrs Weapon: none
Night 16: Weapons: Sawn-off Shotgun + Chainsaw | Barricade: 23% | Survivors: 5
Day 16: 2hrs Repair: 50% (73%) | 10hrs Weapon: Barrett
Night 17: Weapons: Barrett + Chainsaw | Barricade: 70% | Survivors: 5
Day 17: 12hrs Survivor: 2 (7)
Night 18: Weapons: Barrett + Chainsaw | Barricade: 70% | Survivors: 7
Day 18: 12hrs Repair: 30% (100%)
Night 19: Weapons: Barrett + Chainsaw | Barricade: 100% | Survivors: 7
Day 19:
*****全民休息*****
Night 20: Weapons: Barrett + Chainsaw | Game Clear

第二局順利得多,頭兩日搵晒生還者、第四晚有UMP 45、第五晚霰彈槍、第六晚電鋸、頭幾關維持到圍牆八十以上同只有一兩名損員,完全按照計劃進行,當然第八晚一晚冇左廿四圍牆係失敗左少少。因為今次唔係用烏茲而(識驚地)用番截管獵槍,一路落去都冇乜大礙,係第十一到第十五關狀態唔多穩定影響左時間分配。第十七晚拎到巴拉特算係底線,唯有巴拉特先可以輕鬆面對喪屍軍人,再跟住補充埋圍牆同生還者,第十九日已經乜都滿晒大家可以放番日假。但都只係算得幾好之一舖。應該話最起碼都要玩成噉先叫做似樣。



Game 3: Meta-Perfect

Night 1: Weapons: Handgun | Barricade: 100% | Survivors: 1
Day 1: 12hrs Survivor: 3 (4)
Night 2: Weapons: Handgun | Barricade: 98% | Survivors: 4
Day 2: 12hrs Survivor: 3 (7)
Night 3: Weapons: Handgun | Barricade: 92% | Survivors: 7
Day 3: 12hrs Weapon: Magnum
Night 4: Weapons: Magnum + Handgun | Barricade: 88% | Survivors: 7
Day 4: 12hrs Weapon: UMP 45
Night 5: Weapons: UMP 45 + Magnum | Barricade: 71% | Survivors: 7
Day 5: 12hrs Weapon: Shotgun
Night 6: Weapons: UMP 45 + Shotgun | Barricade: 61% | Survivors: 7
Day 6: 12hrs Weapon: Chainsaw
Night 7: Weapons: UMP 45 + Chainsaw | Barricade: 59% | Survivors: 7
Day 7: 1hr Repair: 35% (94%) | 11hrs Weapon: Sawn-off Shotgun
Night 8: Weapons: Sawn-off Shotgun + Chainsaw | Barricade: 88% | Survivors: 7
Day 8: 12hrs Weapon: Hunting Rifle | Survivor Lost (6)
Night 9: Weapons: Sawn-off Shotgun + Chainsaw | Barricade: 83% | Survivors: 6
Day 9: 12hrs Weapon: Uzi
Night 10: Weapons: Sawn-off Shotgun + Chainsaw | Barricade: 78% | Survivors: 6
Day 10: 12hr Weapon: none
Night 11: Weapons: Sawn-off Shotgun + Chainsaw | Barricade: 63% | Survivors: 6
Day 11: 12hrs Weapon: M4A1 | Survivor Lost (5)
Night 12: Weapons: Sawn-off Shotgun + Chainsaw | Barricade: 52% | Survivors: 5
Day 12: 12hrs Weapon: AK47
Night 13: Weapons: Sawn-off Shotgun + Chainsaw | Barricade: 13% | Survivors: 5
Day 13: 2hrs Repair 50% (63%) | 10hrs Weapon: none | Survivor Lost (4)
Night 14: Weapons: Sawn-off Shotgun + Chainsaw | Barricade: 54% | Survivors: 4
Day 14: 12hrs Weapon: none | Survivor Lost (3)
Night 15: Weapons: Sawn-off Shotgun + Chainsaw | Barricade: 35% | Survivors: 3
Day 15: 6hrs Repair: 65% (100%) | 6hrs Weapon: Barrett | Survivor Lost (2)
Night 16: Weapons: Barrett + Chainsaw | Barricade: 100% | Survivors: 2
Day 16: 12hrs Survivor: 2 (4)
Night 17: Weapons: Barrett + Chainsaw | Barricade: 100% | Survivors: 4
Day 17: 12hrs Survivor: 2 (6)
Night 18: Weapons: Barrett + Chainsaw | Barricade: 100% | Survivors: 6
Day 18: 12hrs Survivor: 1 (7)
Night 19: Weapons: Barrett + Chainsaw | Barricade: 100% | Survivors: 7
Day 19:
*****全民休息*****
Night 20: Weapons: Barrett + Chainsaw | Game Clear

最後一個案例係三舖中最接近完美之一局。頭幾關好似冇上舖玩得咁好,但睇真有樣野超越晒前兩舖:彩數。除左頭兩日搵得齊六個人,第八日先第一次死生還者,第十一日先死第二個,雖然十三至十五關連死三個,但寧願花多少少時間修理都唔搵生還者,最後靠一己之力搏到第十六關拎巴拉特,早左一關連喪屍軍人都未出直頭係虐待番班喪屍轉頭 - 符碌的話,分分鐘第十五關已經可以搵到。跟住幾關班喪屍根本掂都掂唔到圍牆,仲可以慢慢搵番班生還者充實番個排場,第十九日應該係星期日黎,心情愉快噉就爆左機。不過都有少少遺憾,就係最知最後幾日唔搵生還者甚至整死埋剩番果兩個,全部喪屍留晒俾自己枝巴拉特,噉先夠晒喪屍無雙feel!

最後一舖玩得好勁?都算普通野黎咋,所以只係"meta-perfect"。我玩過仲勁。試過頭十關一個同伴都冇死過未?我試過。試過玩成隻game過左頭十關之後完全未修理過圍牆未?我試過。仲有好多野試過。彩數有時比實力更重要、更具影響。



flash game玩得多,但The Last Stand係第一隻我會俾10/10,根本已經超越左業餘製作同flash game之層面,可以將策略遊戲同動作遊戲結合,日間計劃同夜晚之作戰結果,都會對往後關數有直接影響,操作介面同系統設定精簡而有效,遊戲難易度進展同各方面平衡幾近無瑕疵(都有,就係機槍系過弱),而且完整有結局半個幾鐘一舖消磨時間一流,加上畫面以flash引擎黎講相當精細,重拾細細個打8bit 電子遊戲之樂趣,當年電子遊戲就係用最簡單最基礎系統同介面,帶黎最高遊戲性同玩樂享受,The Last Stand完全做到!玩到咁爛咁熟,而家每日仲要玩番一兩舖先止到癮!就係好玩成噉!絕對會令你對flash game重新思量之專業級勁作!

































































Easter Egg

派禮物時間到了。相信好多人初玩都會感到有難度,尤其過左十關之後成班屍喪跑打都打唔切。
「咁難玩!成日俾電腦屈,有冇方法屈番電腦轉頭呀?」
有。其實隻game有個bug。首先你要知道,作戰中escape會入menu暫停,雖然暫停時你唔可以郁同攻擊,但可以用space bar換武器,同埋
暫停時進行中之上彈動作會持續。
暫停時上唔到彈,但假使一用R掣上彈然後立即escape入menu,全部人屍企定,但你會繼續上彈,用呢招就可以cancel上彈時間無限連射,霰彈槍上成十秒鐘彈,用左秘技之後都會變成神兵利器。假如去到後來唔夠抽時,不妨(濫)個bug/秘技恰番電腦轉頭。
我研究到呢個秘技,不過自己冇用過,因為發現果陣已經係玩爛晒隻game的時候了。