但幫襯過107都知道，鑊鑊幫襯佢都大大鑊架啦。
呢兩隻恐龍派，都未開，已經有問題：

「喂！107！做乜咁細隻？」
咪係囉！唔好呃我細路仔喎！
當年我冇擁有過，唔代表我唔知道隻野有幾大！
「唔識野就係唔識野！呢隻野叫World's Smallest Transformer，
中文名係『極小變形』，講到咁明梗係細隻啦！」

今次兩隻分別係暴龍鋼鎖同埋三角龍火炭（「有冇沙田同紅磡架？」），
鋼鎖係隊長Commander，而火炭係Flamethrower，負責噴火。（．．．）
盒背有角色能力值，恐龍係力量型角色，所以力量一定係10，
亦因為係複製史前生物智力通常得2至5，鋼鎖出奇地有7，隊長係威過人架喇吹咩。
就噉睇圖，呢個極小變形版真係同原版冇乜分別喎造得好靚。

個盒兩邊仲有經典場面重演，俾你睇／昆你隻野外觀同埋可動性同電視見到一模一樣。
只係，有一句：
"TV Accurate Size And Colors"
「喂！同電視一樣咁高咁大，應該俾成棟樓咁大隻我先至係喎！
貨不對辦呀107回水！」

臨開之前，睇埋個盒底先，連個盒都睇足六面夠晒抵玩。
又有問題。因為有"small parts"所以不適合三歲以下小童玩，但玩具適合年齡係．．．15歲。
得閒不妨留意下，美國野有好多呢類搞笑謬誤。
「咦？原來恐龍派總舵座落盧押道咋喎！
咁近，搵次踩上去掃埋另外三隻都好！」

一打開，嘩好多野呀！條龍加配件仲有貼紙當然唔少得，
加埋彩印角色卡同埋說明書一份。
「咦？隻野日文包裝，點解份說明書係全英文？」
同埋，盒底講果個跟埋"Secret WST Dinobot"的"missle launchers"，去左邊？

舊時變形金剛玩具每隻都會送角色卡一張，除左隻玩具本身最有收藏價值就係呢張卡，
正面係角色彩照，背面就係細個最鍾意睇之大亂鬥場面，仲有埋Tech Spec添。
覺唔覺有野唔妥？冇錯，點解會多左張鋼鎖卡？噢，一唔覺意，俾我抽到隻特別版添！
107：「傻仔！其實盒盒都有兩張卡，係你隻火炭少左張咋白痴仔！」

首先玩玩火炭。個頭非常靚，有個鐵冠加用透明膠料做頭同尾，
但亦係衰在成個頭透明冇左對眼，如果對眼油番藍色或者有貼紙會更好，
係我都知可以自己補油畫番，劉Sir技術殊差嘛體諒一下佢啦。

龍身夠多細節花紋，金屬位亦多，未貼貼紙都見得人，
即係除左對眼之外，講睇全條龍都非常好睇。

但睇係一回事，三角龍本身係四腳爬行，所以玩起上黎冇咩好玩。
前腳只可以前後轉，後腳有兩段關節，但為變形用居多恐龍型態係冇乜用處；
頭亦冇得郁冇得擰，只有對角可以水平擺、下顎可以開下閂下個口噉囉。
查實對腳擺動角度都幾大架，問題係．．．

．．．個身郁唔到。你會唔會擺到隻野噉款？呢個「超龍」型態？
（好似超人特攻隊添，呵呵）

至於見證呢個傳說中之「極小變形」有幾小，特別情商音波條靚黑豹同場比較。
拍埋，極小版火炭同本身已經細之錄音帶機械獸差唔多size，大約四寸半長兩半高左右。
不過，四寸半長，查實都唔係點「極小」喎！

跟住變身做機械人，龍形幾靚都好，唔變番次點可以叫做變形金剛？
基本上隻隻恐龍變身，第一、二步一定係噉樣，背部打開昇起。
細個果時噉樣打開之後，就會當左果對係翼，話條龍而家識得飛，好好笑架以前諗野。

跟住，勁呀！對腳縮起，齋靠前腳同條尾頂起全身，
恐龍都識玩瑜珈呀！

拉出對腳再扭番轉向前企直，差唔多搞掂喇已經，好容易，除左一樣野：條尾。
變形前龍尾條軸位於對腳前面，但變機械人時要將條軸抽到去對腳後面拉條尾去背後，
初初玩未掌握到竅門，條尾好易俾對腳擋住，整極都過唔到，
整整下就會冇耐性，冇耐性就會惱羞成怒，怒怒下就會用暴力。
好在呢隻野都幾硬淨，承受左我幾次暴力都仲係冇損冇爛，抵讚。
但係唔太鍾意條尾拖地，自己玩時多數屈埋上背脊。

拉埋龍頭下顎落心口，火炭機械人型態已經變晒，裝埋配件就禮成。
可能係忠於原著為名節省成本為實啦，仍然冇改進到當年機械人玩具常見毛病：手。
果時機械人好少會連拳頭，變完形先另上就產生一個大問題，呢類配件永遠係最易唔見，
尤其是呢個極小變形版個拳頭仲細過粒米，一唔小心跌落地下已經搵唔番。

裝好晒野拳頭武裝就可以貼埋貼紙，十幾張貼紙唔係多亦唔係花好多時間就貼晒，
只係咁細隻貼位已經好細，唔用工具好似尖咀鉗輔助好易整爛，我已經中左Ｎ次招啦。你會問：
「點解工廠唔叫工人貼埋？噉咪唔使咁煩囉！」
一來（懶係）等你可以玩多樣野同多番信心啦，成日鬧工廠班工人貼貼紙貼得樣衰！
二來咁鬼死難貼，就算熟手技工貼一隻可能都要個幾兩個字，工廠老細點會咁好死噉蝕人工費俾你丫！

雖然做恐龍時靚爆，但變左機械人之後．．．確係有少少一劈野feel，
冇咩貼紙修飾之餘顏色對比唔靚亦唔細緻好粗糙，即係復刻我明，都可以復得好少少嘛。
對腳可以前後擺同屈少少膝，對手亦可以上下郁，但問題又係對手，
呢類舊機械人拳頭得個窿俾你塞武器就預左，都唔該整大個窿少少丫絕對要用暴力先裝到落去，
同埋，你都見到啦，把劍係好抵死地要打橫拎的．．．

火炭之戰場崗位就係，講過，就係負責噴火，
雖然呢，睇過變形金剛都知道，火呢家野，其實隻隻恐龍都識得噴架．．．
「話時話，做乜佢噴火噴得咁柒？」
「我唔識用PhotoShop嘛！」

最後特別鳴謝契爺捐贈櫃桶底摷番出黎之文物變形金剛卡相贈！
其中一張就係呢隻「火炎戰士」火炭！全張卡成段日文，我只識睇呢四個字！
新舊拍埋，時代及科技進步立見，但似乎舊版呢個變形金剛卡系統可以用黎玩遊戲。

跟住就到恐龍派大佬鋼鎖喇，亦係好多人心目中博派主角之一。
首先睇睇佢個暴龍樣．．．

「．．．灰得滯喎！頂唔順，貼番貼紙先！」

「噉就好好多！」
以為火炭有十幾張貼紙好多？鋼鎖要再多十幾，齋貼恐龍都貼左三四個字，呢part都夠你玩。

貼完真係完全唔同晒架，因為鋼鎖變恐龍時最主要係靠貼紙裝飾，
唔似火炭，鋼鎖得條頸係透明膠，但正在手爪腳爪同尾都係鐵做好有質感，
可惜對手係敗筆，一隻過肘位冇關節，只可以定點三百六十度轉，
擺pose有所限制，但無損其高可玩性。

對手／前腳冇得郁，反而後腳關節同整體重心平衡做得好，
雖然卡通入面鋼鎖變完龍都係直企係度（其實噉樣反而唔真實），但你想扮到真暴龍噉行／企法，
玩具一樣可以做到，唔會話個身放平之後前半身太重跌低。

甚至再低都可以。難得後腳關節同長度可以容許成個身前彎到呢個幅度。
所以對手冇得屈，玩耐左之後你已經唔會再理，因為條龍實在太好玩喇！

「仲有個口呢！」
冇錯，做得暴龍，又點可以冇番個血盤大口呀！
個頭可以上下郁（冇得左右郁都算啦製作質素已經非常高），下顎亦可以拉到好低，
可以整卡通入面鋼鎖成日做呢個招牌兇人樣。
個口真係可以開到好大架！越玩越開心，唔小心．．．

「大劑！！！」
成個頭甩埋添！好似變魔術噉款。
不過呢個係變形一部份遮唔需要肴底。

再同火炭一樣打開背部，恐龍派變形指定動作。
跟住先至係戲肉，鋼鎖之變形牽涉好多動作同部件，複雜過火炭。

就噉睇張相你唔會知發生咩事，其實暴龍條腰已經移左上去成為機械人之心口，
呢個係其中一個戲肉黎亦係最估唔到之變形部份，可惜相片所限表達唔到。

跟住黎到背後，呢個角度睇成隻異形噉。要繼續變形，就夠解開其中一個lock：暴龍尾。
唔好睇小佢，呢個係全隻玩具最精細部件，需要熟習一下先至摸到技巧去唔整爛地開。
同樣地，經過唔用腦齋用力的劉Sir手都居然冇任何損毀依然運作正常，
證明呢隻玩具製作質素奇高。

兩張相之間其實已經過左好多步，對尾開完之後摺埋落對腳再扭番正，
後腳前掌拉後彈出拳頭成為機械人雙手，最後其實個頭都有野玩架，
就係要將個頭推前先至正式完成變形。
睇相絕對領略唔到箇中多重樂趣，單係變形已經可以令你好滿足。
搞掂就順手貼埋貼紙啦，恐龍已經難貼，機械人仲難因為仲細好多，
好似我噉徒手貼，嘩真係貼到想死呀仲要貼到一舊舊噉好鬼死灰。
呢個係一個現代版「工欲善其事，必先利其器」寓言故事。

大功告成。靚過山炭多多聲，多貼紙裝飾，活動副度又大，
最緊要係把劍唔使打橫拎先，雖然把劍柄太粗，都係要用暴力夾硬塞入拳頭個窿度。

但極唔鍾意一樣野：個頭真係細得過份完全唔合比例，
次次見到好似肌肉萎縮個頭，實在心灰，隊長黎架大佬。
另一個問題係個心口，呢個部份本身係恐龍條腰，但移左上黎之後冇位定住扣住，好鬆好易跌。

我最鍾意鋼鎖就係本身對手連埋拳頭，只係同恐龍時一樣對手又係有少少問題。
本身做恐龍腳果陣可以郁動好多，但變機械人對爪縮左上手肘，反而頂住左個關節位，
搞到前臂唔郁得太多接近無角度可言，一大動作武器就會俾對爪整跌彈出黎。

另一滿意鋼鎖高於火炭之處係條尾。非常唔鍾意火炭變完形之後，
成條尾照擺出黎拖住地收唔埋，頂籠屈上去背脊但始終樣衰，
鋼鎖條尾收埋對腳兩邊，唔似好多機械人前面超靚但一擰轉後面旋收。

呢個故事教訓大家，係想做，就要做主角，唔好做咖哩啡，
睇下，大家都係恐龍派，但好明顯鋼鎖之用料同開發投資都好過火炭，
呢個世界係好現實的，主角同配角的待遇，係分得好清楚的。

「鋼鎖！而家我好唔妥你！我斬！！！」
鏘！幾勁！曉閃光添呀！劉Sir都識用PhotoShop，你仲未識？堪旋摺啦！
「識用PhotoShop，噉點解火炭噴火果陣唔用？」
「．．．佢噴完火我先至學識嘛！」

鋼鎖人龍都咁靚，但火炭變機械人之後幾失望，
但其實有咩所謂？睇晒電視加電影版，都鮮見恐龍派會以機械人型態落場同狂派打，
只有同自己友吹水or同狂派互小果陣時先會變機械人，就知道
「你鍾意恐龍派，都係因為個恐龍樣遮！」
呢個亦係「極小變形」之真諦：變左機械人之後，反而冇咁多野玩，亦冇恐龍咁得人歡心，
所以極少變形。

「餓龍覓食！」
一套五隻，而家差雷龍、劍龍同三角龍，呢三隻又要留待下回分解。
下回，即係幾時？考起喎！我都要問問專家：
「107，即係幾時？」

．．．佢都答唔到你，因為佢自己都玩緊，
玩緊佢套超專業「影玩具必備攝影套裝」。
「劉Sir你噉樣叫做影相？你同我收皮啦！」

鋼鎖@107部$1X,XXX專業相機。
「107！影到好黑仔喎隻鋼鎖！」
「唔係黑仔！係專業！」
「．．．噉我都係繼續膚淺算！」

機械人都有肚餓的時候。話說某日鋼鎖逛街見到Hybrid Style柯柏文跌左個博派心臟（！），
好醜都係一餐（．．．），食左先算。
「嘩！107！你影到隻鋼鎖好似食狗糧噉！有冇搞錯！」

「拿！噉先似樣嘛！」
仍然好黑仔，不過噉先似係影變形金剛相嘛！愚子堪教！

「係咪好靚呢！有冇興趣執番部專業相機玩下呀？都係皮幾野遮！」
「都係算Ｘ數啦！皮幾野，夠我執晒全線變形金剛喇！」