好多人成日想知道，
「到底劉Sir一餐食幾多野？」
其實，都唔係好多遮。

就以呢一餐做例子。

前菜：炸薯條兩盒
冇錯，呢個只係開胃頭盤黎架咋。通常頭盤未到lunch已經唔見晒，
因為劉Sir總會借ｄ倚入pantry食下食下，未到lunch time就食鬼晒。
正餐：咖哩煙餐腿蛋飯Ｘ２
實際上，呢一盒飯，唔係一盒飯，係兩盒飯。
按照慣例，一到lunch時間，會計靚女都會自動自覺奉獻佢．．．盒飯之大半俾劉Sir。
呢盒飯，埋葬左兩盒飯兩塊煙肉兩隻蛋三塊餐肉四塊火腿加成碗湯咁多之咖哩汁，
非劉Sir者，食完即死。
甜品：火腿奄列加餐包
亦係另一慣例，一日入面總有ｄ女同事唔食飯盒食茶餐，
「減肥嘛！」
茶餐咁多野食，仲點減肥？
「淨係食碗麵，其他果ｄ野俾晒劉Sir食，咪瘦囉！」
冇錯。所以每日為左幫各位女同事減肥，劉Sir都會食Ｎ個火腿奄列加Ｎ塊方包。
而呢ｄ奄列餐包，通常都會成為下午茶，化身成恐怖的超極高脂芝士奶醬三文治。

近排發現左呢隻超正雪糕，名乎其實雪夾糕，
十件裝特價$17.99，但只會特價先買，原價好似$3X.XX，搵笨。
（「喂，你食都唔知幾錢？」「唔知架！同事負責買我負責食架咋！」）
真係超級正斗。想當年去美國渡假都係食呢ｄ雪糕，但當然美國ｄ雪夾糕high class＆正好多啦！
唔緊要，返到黎都有得食，唔好味，都仲有份親切感！
所以，同事，唔好意思！親切左半個字，成盒野得番張相忝！

此乃劉Sir每日標準午餐食量。
其實，都唔係好多遮。