2008年係歷來最悶甚至 － 請容我噉講，適合形容自己及以外多方面（自行對號入座） － 最失敗一年，上年仲話有得黐住107去冬購節玩加買加睇（即係自己貼錢的廉價勞工，諗番都覺戇居），今年個市差成噉前景又暗淡，黎到聖誕冇乜心機，都係匿埋屋企同舖頭過算。加上經濟不景，今年買同收禮物都少過以前。叫做冇待薄自己啦。

今年第一份新年禮物，早在聖誕個幾月前已經送到。香港黑膠傳奇鴨寮街阿Paul早排搬倉，Rock爺上去幫手執野，搵到大量文物同文獻，例如上面呢本《太極勁Band風暴》，摷到兩本，一本就成為聖誕禮物。見講太極加上書名咁娘就知幾陳年啦，由太極御用填詞人因葵撰文及整輯相片，講番太極七人背後故事再加珍貴幕前幕後生活照。當講香港band主流果班講BEYOND、地下講到頂都係亞龍大，太極技術唔錯歌亦非差，就係冇乜人留意佢地（鄭重聲明：包括我，除左《紅色跑車》真係唔多諗到有咩其他歌，呵呵），難得有此特刊傳世。不過話說回頭，亦只有同太極關係密切人士先會特意為太極寫書，又是一見香港奇灰之例。

另一樣係，本書1990年七月出。至落筆今日，相隔十八年半。中間仲有幾多呢類以香港樂隊為題，甚至為香港音樂單位而寫之好書出過？我讀得書少，諗唔到。有識之士不妨分享。

唔覺唔覺，TRHK已經成為一個本地金屬典籍圖書館。繼有亨利哥早前捐出大量中西metal雜誌，另一善長人翁係史丹朋友（是否姓李？）。08年劉Sir生日時捐出《Underworld》，早前再有大疊《音樂一週》，一份音樂及文化取向皆極多元之本地著名音樂雜誌，冇聽過好正常，因為已經係九十年代頭產物。

「收藏品會包括絕版貨色《Underworld》同《音樂一週》，阿Stan哥仔你已曝露自己年齡了。幾時再有新野同大家分享？呢ｄ文物，應該全部scan番上網。」

公司會計靚女成日屈請食野恰得我多，聖誕自動自覺送番份禮物俾我。

「梗係啦，而家唔送番份禮物補數，
唔怕2009冇免費雪糕免費朱古力免費大餐食咩？」

「咁大份，似乎好正喎！會係乜野黎呢？」

「澳雪。送梳蕉俾我做乜？
好明顯係人地送俾佢ｄ豬頭骨唔要過俾我！
個Two Percent大袋仲吸引過份禮物！」

今個年底一次過掃左唔少碟，有乜野就無謂講啦，我聽ｄ野咁膚淺，講出黎怕俾專家恥笑。上面係其中三隻。兩隻先至正確。WITHIN TEMPTATION我由《Mother Earth》開始識佢地，睇左隻DVD立即極度鍾意，因為音樂屬同類中最突出地下同主流間取得平衡，女聲CD同live兩種唱法而兩種都好聽，隊band live又玩得好，一睇上癮。當年執過《Enter》，但被R先生強詞奪理地搶左，結果買完隻碟變成寶劍贈英雄（阿R先生，我仲贈過唔止一把寶劍俾你的，特登係度講番出黎，就係等你識做回敬劉Sir）。跟住簽埋BMG再Roadrunner，預期之內pop到爆炸、第一隻大label碟《The Silent Force》強差人意，跟住音樂同現場都回勇番，《Black Symphony》搵埋交響樂團玩，相信係佢地最終極一次，即使交響女聲gothic metal唔多係我杯茶，為其歷史性同本身玩live玩得好已經想買，隻孖碟DVD仲要係特別版，兩隻碟夾埋三場live再送無限bonus抵到喊。既然簽得大label、在本地metal界WT已經有TWINS咁紅，我地呢ｄ傻仔同各位緊貼時代的香港metal友爭，又點夠爭呢？所以影完張相諗住俾錢，已經俾人截糊執左。灰。因為好想知真正玩交響樂玩成點，同返唔返到去《Mother Earth》演出水準高峰。

為左隆重其事迎接隻DVD，仲特登執番頭兩隻碟，雖然《Mother Earth》已經出名，真正紅係由《The Silent Force》開始 － 簽埋BMG、連HMV未正式開始怒賣metal時代已經$99隻賣緊喇喎，有幾唔紅先？《Mother Earth》之前兩隻因為仲indie加細公司出，當時已經難搵，俾人搶左我隻《Enter》已經極度唔開心（醒水啦，R先生！），要到BMG同Roadrunner帶紅佢地，頭兩隻碟先至有得再版。歡天喜地地買番屋企聽啦。點知返到屋企先發現，原來唔知幾時兩隻碟我已經有，自己都唔記得。對於買碟成狂症患者此乃普遍現象，已經發生過好多次。

「所以點解要download呢？download就唔會發生呢ｄ意外了。」

預左聖誕節舖頭冇人，一早計劃買隻DVD煲，點知原定之WITHIN TEMPTATION冇貨，改變計劃買死貨GOTTHARD。唔識佢地的朋友，以下係簡單介紹：GOTTHARD係瑞士國寶級hard rock band，音樂似AEROSMITH+BON JOVI，十幾年歷史出左十隻碟都有，《Made in Switzerland》係2006瑞士名城蘇黎世對住幾萬人表演之演唱會DVD。作為八十年代hard rock & hair metal迷，你玩親GUNS N' ROSES呀BON JOVI呀AEROSMITH呀我實鍾意，聽CD已經覺得佢地好正，係估唔到live可以勁咁多倍，兩枝結他加keyboard三個啡晒solo，成班型佬滿場飛，兩個半鐘冇悶場，好耐未睇過呢種大場演唱會喇。除左正場，製作特輯又係好野，你有睇過佢地MV就明，騎騎∼

「似乎買唔到WITHIN TEMPTATION仲好，睇GOTTHARD一定開心過睇WT。又平ｄ喎！」

有本漫畫想買好耐，聖誕佳節俾到個藉口自己動身去買，唔係錢問題，而係每次想訂漫畫都要過海，費時失事車錢又貴。眾多漫畫角色中，我從來唔鍾意超人，除左設計好鬼老土但用足幾十年都唔肯改，仲講到佢太老屈冇乜癮。不過上面個故仔可能因為最唔超人啦，所以我鍾意啦。《Red Son》個名已講到明，故事入面個超人唔係隸屬美國，而係蘇聯國家英雄。單見到作者名Mark Millar已經可以盲目俾錢，佢係當代最成功漫畫家，作品包括早前有戲睇的《Wanted》，創作方向政治化同反傳統，我從來唔係DC大fans更加唔鍾意超人，佢可以一個故仔呃到我落搭係噉追佢作品，就知佢諗野幾咁唔正常了。

「慘呀而家，又要追metal，又要追漫畫。有冇漫畫舖請人呀？唔要日漫呀！」

一個完美的聖誕節，又點少得變形金剛？今個聖誕掃左唔少。真人電影版上左年半，果陣套戲勁到爆加上經濟大好，玩具出到黐Ｑ線咁多，一套戲衍生出之款式可以多過一輯幾十集卡通，最勁單一角色可以有（十）幾個版本俾你選擇，多到我作為大fans都覺得恐怖。其中最終極版本係Leader，包括柯柏文、麥加登同坦克車三部主要／受歡迎機械人，號稱史上最精密、最先進、最難玩變形金剛玩具，初出一隻賣到近五舊水，雖然好吸引，價錢實在太高炒風太過熾熱，忍到而家先出手。梗係執狂派啦，邪派永遠型過正派嘛，同一向唔多鍾意柯柏文（太正義了），麥加登同最大興趣之坦克自然係首要目標。

除左兩隻大野，仲有另類少少的Lego版變形金剛 － 正確黎講係偽Lego，這個稱為BTR的Lego可以砌蠍子Scorponok出黎，雖然戲入面佢只係直昇機的一條靚，查實卡通佢屬於大佬級甚至基地級之巨大機械人。會買除左係Lego，同一向幾鍾意Scorponok邪得黎霸，佢話唔只得個砌字仲真係變到形，見平平地執隻黎玩玩。開頭諗住細細盒，到貨先知原來咁鬼大！

換著平時，我一定唔會噉樣瘋狂掃貨，除左買CD我冇幾可會一次過使千幾蚊買野。紅燈山丘中也哥識得人做孩之寶，內部每月開倉，年底檔期係超筍價平放變形金剛，有佢舖橋搭路，梗係立即入手啦。隻LegoBTR Scorponok大大盒只賣$30，我未見過街有得買，價錢接受到就當買到平貨啦（雖然作為世紀黑仔王，我相信出面應該賣緊$29），而兩隻Leader更加係街坊價過街坊價，即係套戲落左畫成年，而家街價一隻Leader價錢二百至三百之間，我三隻夾埋可以仲平過街價買一隻Leader。就係咁抵玩。原因？落晒單收晒貨之後，先知道原來係賣物籌款，如果早知係做善事，我鐵定會出手更重。

不過買完，幾時玩呢？這是個大問題。雖然買落唔少，但2008年並不能完美結束，就係少左隻大變形金剛。前年2006聖誕加新年有斯比頓星，07聖誕都有尤特龍，上年年底仲出左隻星戰crossover變形金剛，死亡星變身黑武士，可以一次過三隻星球互片，原來今年計劃就係佢，不過可能冷門過頭想買時已經搵唔到，次選是為107所送生日禮物火箭基地開封（話時話，手上三隻大野都係來自107）。只不過今年市道實在太差喇冇乜心情，加上太多野做同寫，冇時間玩咁多，只好作罷。幾時玩？我都想知。我連前年買落果ｄ都未開盒呀頂你。或者到TRHK執左，我先至有時間開始玩番玩具（呵呵）。

而也哥所送非只一份，一送就送三個願望，包括全年度最metal的．．．

就算非metal界中人，好多人都知道劉Sir是多麼熱愛metal，曾經自己搞過賣tee生意的佢（04漫畫節我有幫手撐場架），聖誕節特別手製件tee送俾劉Sir，佢唔識聽metal、唔識任何一隊metal band，對佢黎講最重金屬的，就是重金屬三個字。根據現今香港金屬文化，識一隊band、鍾意一隊band、欣賞一隊band之指標，唔係聽真佢地ｄ歌唔係俾錢買佢地ｄ碟，而係著佢地上身，按此真理，我著住呢件tee，即能成為全香港甚至全世界最metal之人。

「窮一生追尋重金屬最高境界，豈知一個門外漢輕鬆達到，都可謂大智若愚也。」

亦全靠也哥識人賣演唱會飛，平安夜F.I.R.演唱會可以中價飛升級坐貴價位，雖然未至於話有得拎免費飛 － 我做左音樂咁多年，未試過以非工作人員性質睇過一場免費show，都算戇居了。場show係估佢唔到地好睇。

「這是我睇過最滿意主流演唱會。點解冇一場香港演唱會能夠俾到我同一份感動、同一份感覺？點解香港人自己做唔到？」

聖誕假最後一天，大伙按照傳統走左去打邊爐。除左燒過一次野食，我地淨係識打死成世邊爐架啦（傳說中的大家食大家食仲未試過喎！）。終於唔再花園金閣，七刀同學試過油麻地花園酒家，一個掂字，大家就去食了。因為都搞得幾即興（邊次唔係？），網上反應平平，初時都擔心過搞唔成，後來又好野喎一個一個地蒲頭，結果由「應該得三四個」變成九個。今晚係打咁多次邊爐以黎最癲一次。同一晚的教訓，是打邊爐千祈唔好飲Jolly Shandy。度氣谷住好鬼滯。

「睇我地打邊爐打得幾metal！鑊鑊有劉Sir份都癲架啦！」

「劉Sir食到肥肥白白，隔籬阿妹見到不禁留晒口水」

「群得劉Sir，冇個正常。」

「負責影呢張相果位好明顯係Rock爺。」

「打咁多次邊爐，今次最癲＆最開心。」

噉又放完假。今個聖誕有得玩有得食有得拎，仲近半年黎第一次睇show，非常開心。所以又要返番工，好唔開心，嗚嗚。好在返兩日工，又有假放。

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

2009 Brutal New Year

星期三晚直玩到星期日晚，冇幾可試過連搶五日咁開心，返到公司一時間適應唔番。好在冇乜野跟，即係我返番工嗟，其他人唔係丫嘛，外國客月中甚至月頭已經開始放假，而且通常唔放到星期一唔心足，最勁有個澳洲佬十二月上旬未過已經開始放個半月假。唔好話外國啦，我跟開ｄ香港客，都冇幾多唔係放假放到5/1先復工。得我一個咁傻仔。不過老細都知我辛苦體諒我架喇，禮拜二上大陸公司冇皇管，想食就食想訓就訓想玩就玩做乜都得，全日係噉上網聽歌寫野。通常老細出走大家都會食平時冇乜機會食ｄ野，今日揀左台灣野，唔知係ｄ野食唔軌淨？定大家逢叫台灣野飲都鍾意亂咁叫，好似珍珠紅豆冰都夠膽死？結果搞到集體食物中毒，廁所成為午飯後大家輪更幫襯的好地方。

「不過我覺得我中招原因，係前日打邊爐溝Jolly Shandy，多過因為食台灣野。」

又會咁蹺2008年最後一日係我唔使開舖的禮拜三，老細禮拜二返大陸擺明俾我熱定身星期三請假匿足屋企成日。做左好多平時唔會做的無聊野，例如行超級市場。冇錯這曾幾何時是我嗜好，以前細個零用錢唔多，冇乜錢買玩具買野食，唯有周圍行得個睇字。我由畢業出黎做野開始已經係日頭夜晚跑兩份工加踩足七日冇假放，八點幾返工九點幾放工，有鬼時間行街咩。雖然無聊，但今日一時興起，決定落街戇居一下，生活總要噉樣柒下on9下先開心嘛。好日唔行，一行就搵到好野：

卡樂B薯片雖然齋食老本夠賺過世，仍非常勤力耐唔耐出試作型新口味，2006兩隻新味意大利芝士同德國肉腸都超勁正特別後者，不過當時得七仔有試賣，而且賣左半個月就冇晒之後冇再出，果時我應該一個人包起左半間七仔的卡樂B營業額。事隔兩年，出現左新野芝士火鍋味，好比當年意大利芝士舊薯片新包裝，雖然我期待的是德國肉腸，但難得遇到有理冇理掃番幾包返屋企先。冇大手入貨有所保留，係覺得芝士味唔夠，去盡ｄ但未使去到品客噉食粉多過食薯片更加好。

「意大利芝士果鑊，買左勁多一面睇《恐懼鬥室》一面食。今舖芝士火鍋係咪要食住黎睇《力王》？應該會更加好味。」

除左卡樂B，老麥（當奴果隻）俾雞記欺壓左大半年，黑椒漢堡大勝後又沉番，2009年頭再黎麻辣系列。雞扒包同豬柳包冇乜新意，之前黑椒汁沙嗲汁燒汁乜汁物汁都係佢兩隻，食過除左大份味道唔多好（同價錢太搶錢了），冇諗住試，反而今舖麻辣連麥樂雞都玩埋有意思：

麥樂雞出新醬試過無數次，舊雞轉味應該破天荒，有得有失。得係外皮加麻辣之後超級好食。失係麥記話因為而家件雞已經有味，買麻辣麥樂雞唔肯俾醬，想要醬呢一蚊一包。小。靠食極唔停扭扭薯條補救。以前買一盒裝得好少話咁快食晒，今舖唔知乜事ｄ姐姐仔裝到滿瀉慌死你唔夠食噉。個餐非常好食，不過九件雞加薯條加汽水成$28，相等於一個雞記餐，分別在雞記食得飽人。係限期供應呢樣呃到我不斷幫襯。不過麻辣之後又可以收皮返去食雞記，麥記實在太過搶錢，正如麻辣之前出左個手指魚，你有冇食過？知唔知點解報紙頭版日日賣廣告話買一送一？唔買一送一，你肯唔肯俾四蚊食一條手指魚？

到新年正日，有乜節目？都係開舖架啦，劉Sir走得去邊？1/1你有得放假嗟。不過2009第一日TRHK完全唔metal，因為叱吒頒獎禮今年轉左晏晝做，同我開舖一樣三點開始。香港咁多個流行音樂頒獎禮最鍾意叱吒，頒獎舖排同設計最有心思，而且感覺上較公正（我知香港樂壇冇乜可能「公正」架喇，感覺上嗟我話），最重要佢地比其他電（視）台支持實力派、創作人同獨立單位，唔會大公司就一定贏最多獎一定玩晒。睇，當然為等謝安琪啦，有得唱兩首添呀好野，不過拎最佳專輯周博賢上埋台，揀唱《十七度》而唔係《入型入格》，真係噉玩的話，相信謝安琪同Ban Ban仝人可以再見以後各大頒獎禮。最關心梗係女歌手獎，FREEZE拎唔到組合金獎已經心灰意冷（讀到此，請各位默哀七分鐘，再繼續閱讀），謝安琪拎唔拎到女歌手金獎呢？結果係．．．當然冇啦。縱有實力，還是敵不過英皇的邪惡勢力，好在2008年度金曲眾望所歸地由《囍帖街》奪得，即使從佢第一隻碟開始追到而家，好聽一回事仍覺得首歌有點過譽，但有獎拎點都開心的。因為輸左個金獎俾容祖兒，上台第一句就係

「多謝容祖兒！多謝英皇！多謝楊受成唔爭呢ｄ細獎！多謝！」

未講完，陳志雲話個頒獎禮做到六點半仲未完，夠鐘播無線新聞，直播就被迫腰斬了，想睇番呢幕，要到深夜十二點幾重播，即係三點幾先有得睇。灰。其實今次好多部份 － 尤其最好睇之表演部份 － 都係剛開始又或播左一半就去廣告，重播要等到深夜，睇都睇得唔開心。不過叱吒頒獎禮始終好睇同多意外過其他台，最佳男歌手陳奕迅只得銅獎全完估佢唔到，不過見方大同拎金獎，又覺得這是非常正路的叱吒格。好可惜冇關心妍《龐貝21世紀》。全場最好睇係新人獎部份，有MR.有RUBBER BAND有Gem，除左廿幾人同台玩（可惜無線無端端cut入廣告，頂！），仲有新人得獎反應最多野睇，終於成功由地下爬到地上喎，地下真係好辛苦架。睇完呢部份，班新人真係掂，夜晚特登睇埋重播先訓覺。各位新人令我對09年香港流行曲期望同興趣大增。徐浩！

而至於點解話睇完叱吒，其他頒獎禮已經冇晒睇之必要，睇睇2/1無線勁歌頒獎禮啦。比獎門人更廢更膚淺的司儀、出面到冇可能再假的做馬，表現到內容全無深度同可信性可言，能夠令我有興趣睇，只有1) 開場隊band疑似KOLOR 2) 第二個獎已經係謝安琪《囍帖街》跟住 3) 佢之後到關心妍，終於有得聽《龐貝21世紀》。好在以上三項頭半個鐘播晒，睇完頭兩節熄得機。而家無線除左明珠台同部份港台節目，完全冇觀賞價值。所以我地要支持亞視。

2008發生左好多事、見識到太多野，我而家睇pop野，仲開心過、滿足過metal野，難怪大除夕冇去朗豪坊睇Gem、冇去同謝安琪一齊倒數，非常唔開心。話晒2008年，係見證「為何要對香港metal失望」的一年，作為一個業內工作者，對此比任何一個人感受更深矣。

其他，講到自己都悶，反正年年都係果堆。自己睇番1/1/2008啦。

「果句說話、果句祝福，我每年1/1都講，亦講左無數年。但每講一次，我越覺得香港冇乜可能，同香港人只有離其精神越來越遠。」