好耐之前喇，2004年Marco仲好後生開開心心過日子，不過有日有隻不速之客黎左，送Marco俾我個親戚養開竇西施生左幾隻，出遠門就交其中一隻狗女Yan Yan寄養個幾禮拜。雖然Marco非常隨和任恰都得，但本身好怕狗落街見到細狗仔都調轉頭走，而家仲要同屋一齊住，當時Yan Yan又要得一歲大四圍煩住人特別鍾意黐住Marco去到邊跟到邊，果個禮拜都過得幾慘。

不過，聽聞原來兩隻野有血緣關係的。

Marco本身馴過貓性格唔搞人地時人地亦最好唔好搞佢，基本上係Yan Yan由朝搞佢搞到晚搞到要四圍走避開佢（但大家住同一間屋冇得避真灰），成日黐佢多過黐人可能認得係自己老豆。隻大西施生左幾隻，其實都同阿爸阿媽唔多似，特別Yan Yan面形身形顏色更加完全唔同兩隻大西施狗，因為Marco當時同佢地一齊住又冇絕到育，晏晝屋企人人返晒工時搞出狗命都唔奇，大家都認定左Marco就係Yan Yan老豆。

2009年底Marco走左，之後再冇養狗。上次Yan Yan黎我屋企住係五月，剛剛好七年之後五月又去旅行，今次去日本（「唔驚輻射咩？」「我去旅行只會驚貴！而家唔去日本等幾時！」），狗女又黎佢老豆屋企玩番一個星期了。

個親戚住得遠，拜年都唔會入去果隻，所以七年以黎冇見面，唔知大左定剪左毛定點，成隻睇落唔同晒。

以我對西施之認識，色樣身形都唔似，更加唔似佢屋企另外幾隻，所以話係Marco搞出黎應該冇錯。

同佢老豆好似，鍾意得閒無事猛咁騎騎騎。

但老豆係大家同屋不過你有你我有我自己搞掂自己，而囡囡黐人黐到黐晒線，要你不斷摸佢果隻。

如果唔理佢，就會纏住你手手腳腳係噉奶奶奶奶奶奶．．．

都唔理，就坐你側邊望到實，見到噉款，唔理都唔得啦。

而我最鍾意就係抱佢上大脾陪我一齊上網。

Marco我都會噉樣，不過佢細極始終係迷你牧羊，我唔支力佢郁幾郁都坐或者訓唔穩又要落番地，Yan Yan勝在夠細隻，同平時走黎走去但上左人身立即坐定定唔亂郁。

唔知關唔關大個左事，左邊面硬係要斜埋一邊，眼斜視之餘條利成日伸出黎。

玩一輪就會撻低訓覺。上次黎就話一歲精力充沛由朝玩到晚都未玩夠嗟，今次黎已經八歲踏入中年。當年Marco搬黎我屋企時都係差唔多年紀。

呢樣就同老豆好似喇，由朝訓到晚，每日晏晝差唔多訓足咁多個鐘，八歲叫開始老架喇，玩佢一陣之後等佢自己躝去一二邊訓覺，我唔使煩佢又合皮。有佢老豆風範。

老豆鐘意訓廚房同廁所，貪瓷磚地涼浸浸卦。阿女就鍾意霸廳。

呢張床仔以前Marco訓開，而家變左遺物俾Yan Yan繼承左。

每當訓到咁上下，想你搞佢，就會好誘惑地望住你。

訓到反肚的意思，就係叫你搞搞佢個肚。有時訓訓下覺有人行過，都會自動反肚引你摸佢。真係識享受。

或者天氣熱，訓床焗住唔舒服，每次訓覺訓一陣床就會棄床轉攻地下。

特別鐘意匿入檯底，尤其食飯時間一定縮入去聞腳。檯底夠陰涼乎？

黐人一回事，頭幾日黎到唔見左主人點都掛住，所以經常駐守門口日望夜望。

連訓都要對住門口訓，一聽到出面風吹草動就會起身勁吠。噉先似看門狗嘛，以前Marco見到陌生人，起身望兩望或者會胡多幾野就走左去。

一直吠到出面靜晒。吠得多都支力啦。

前一刻可以吠到唔停，跟住立即撻低訓著。

當佢訓低或訓著時，除非自己想起、有人經過門口、突然好大聲炸醒或者成隻抱起佢，否則任你點搞都唔會起身。

原來主人用開狗袋帶佢出街，因為屋企幾隻狗好少機會落街，多數星期六日至出一次門，機會難得所以放低個袋就會自己匿入去。

平時唔訓覺的話點叫都叫唔停猛咁走，入親狗袋就立即縮埋一舊唔亂郁唔出聲，加點都唔搞都唔肯出番黎，仲好用過狗籠。

不過以前放開Marco慣左俾狗自已行，唔用狗袋用狗帶，只帶個紙袋放水同報紙。但隻野以為個紙袋係狗袋，一見到立即撲入去，結果整爛左個我兩個紙袋。

每晚行一次街，因為好少出街，而家帶佢落街任佢行反而唔慣，唔拉狗帶會唔識行企or坐係度唔知點算。不過落多幾日之後醒水左，就調轉頭要我吊番佢尾了。

多左運動自然要補充體力啦，主人話每日俾兩餐乾糧撈烚雞肉，不過住得開心一回事始終陌生地方，食野只食少少之餘專揀雞肉黎食唔吼乾糧。肯食野已經好好架喇，之前試過一次又係主人去旅行要寄居人地屋企，差唔多成個禮拜只飲水冇食過野，接番時瘦到唔認得佢。

食飽差唔多時間訓覺，就發現大鑊了。隻野鍾意晝伏夜出，朝早同晏晝訓覺你點搞佢都唔醒，夜晚都會訓但訓一陣就起身撩你玩，要人摸佢幾摸先肯繼續訓。喜歡的活動是擒床同擒梳化拍醒你。

所以夜晚不論你上左床訓覺定梳化睇緊電視，身邊經常會失驚無神多左個狗頭，唔想俾人撲或者俾人出聲叫你搞佢，自動自覺啦。

而大鑊係我訓上格床，佢搞唔到我又唔黐屋企其他人，到我訓覺時就會成間屋走黎走去細聲叫大聲吠。

所以佢黎咁多日，我晚晚都要出廳訓梳化，然後一係每半個鐘至一個鐘俾隻野擒上梳化拍醒你，跟住見到有個狗頭同你面貼面，到摸佢幾野先肯訓番低，隔一陣又再黎；一係抱佢一齊訓，但有時會當你冇到訓你身上面但得閒無事起身如履平地。自己揀啦。

而且見唔到你就大鑊，立即四圍走猛咁吠，連去廁所隔住度門都要吠，搞到沖涼屙尿屙尿都要帶埋佢一齊去。朝早返工自然大劑，係嚴重到隔籬屋打電話黎問隻狗吠到成棟大廈都聽到仲猛咁撞門發生咩事，好在屋企有其他人睇住，唔係放工返到去間屋爛鬼晒都似。

夜晚係辛苦的，不過每日放工返到屋企就好開心，聽到開門聲立即飛奔埋黎見人即撲勁奶。

會不斷圍住你跑同跳同猛咁奶奶個唔停。

又好在只會奶手腳，好多狗鍾意奶人塊面，佢又唔會。

同Marco完全唔同，你返屋企老豆肯走埋黎聞一聞已經俾足面，會撲撲你直頭係超級歡迎，我養左佢咁多年都冇乜試過。而家阿女補番數。

住多幾日摸熟環境，大膽左又識嘆左，仲訓床訓地下？直頭跳上梳化嘆世界啦。

比訓地下時更舒服，更難叫佢起身。

遺傳老豆優良血統，父女同樣鍾意搞垃圾桶，好在佢冇Marco咁大隻，未至於成個垃圾桶推低倒晒出黎摷野食。

不過仍然咀刁，新屋企未完全住慣，堅持只食雞肉其他咩都唔肯食，連平時最鍾意的零食都唔受。

七年之前黎到得一歲，細之餘住得一個禮拜冇時間教，黎到新地方住就四圍屙，好揀唔揀鍾意屙客廳，我屋企舖木地板，佢次次都去同一個位屙尿，睇到有幾格地板木紋邊黑左就係佢傑作，好在當時只住一個星期，唔係可能俾狗尿浸到成幅地板黑晒霉晒。而家大個唔會亂屙，不過鍾意去番果個位訓覺，有陣除有感情卦。

大個女，識得認住報紙搵地方屙尿了。只要教得識去邊度屙，養貓養狗冇乜野麻煩。

屋企屙好少通常朝早同深夜各屙一次尿，其餘大小事務夜晚落街一次過搞掂晒。由當初落街唔知做乜到住落知道行街原來好開心，由要拖住行變到自己行，唔會走太快屋企果頭又少人少車，佢又唔鍾意戴狗帶，後來出街唔使整咁多野，拎個袋開門行出去就會自己醒水跟住。

行街你唔跑佢就唔跑慢慢躝，反而好鍾意返屋企時跳樓梯。

起初唔多鍾意行樓梯，見你走左先被迫跟住你行，後來一見樓梯立即跳跳跳仲開心過行街，反而要我追番佢。

晏晝屋企要執野抹地掃地時，會擺佢上檯坐監，個樣好慘。

睇佢幾識嘆。住落開始覺得自己大晒，成日霸住梳化，平時冇乜所謂，但你想坐時．．．

快樂的時間過我特別快，唔覺唔覺就一個星期了。

跟住劉Sir好食好住又日日有得行街，而家要走，好唔捨得。

主人星期一黎接佢走，放工走左班車，點知就因為趕唔到遲左少少而趕唔切送Yan Yan走。呢樣野好唔開心。

搞到好想再養狗。