段記

Ihsahn新碟《angL》，好多人等左好耐，單EMPEROR同Ihsahn兩個名已經要追啦，聽完EMPEROR，聽埋Ihsahn EMPEROR以外其他project，大喊一聲：
「現代metal中，Ihsahn同Chuck Schuldiner係兩大天才，一個black、一個death。」
上隻碟《The Adversary》擺到明加講到明係完左EMPEROR之後，想玩番自己想玩同鍾意果種metal，亦即'80，超級KING DIAMOND，難怪唔係玩得唔好，但好多人話唔鍾意。
「唔好聽一回事，問題係而家你玩野仲玩咁娘，尤其傳統heavy metal，係唔係都俾人話你玩得唔好先囉，除左thrash。」
第一首歌好《Prometheus》，之後有點兒唔對路－又或者噉先至係對路：
「好OPETH喎！」
冇錯，第二首已經超級OPETH，第三首歌根本就係OPETH。
「因為，根本就係OPETH。」
Ihsahn同Chuck Schuldiner以外第三個metal天才Mikael Akerfeldt都黎埋玩，破天荒首次合作，音樂點聽都係OPETH，不同之處只有多左Ihsahn black聲同Mikael death聲鬥唱，就算話首歌唔係Ihsahn，而係OPETH新碟ｄ歌、調番轉話係Mikael Akerfeldt新歌featuring Ihsahn都呃到人。後半EMPEROR／《Prothemus》番，但比上隻碟更加唔知做乜－雖噉講，上隻實際唔止KING DIAMOND咁簡單，其實好深，假如你真係有深入研究。怕老土、唔新派唔前衛唔可以的朋友，Ihsahn新碟《angL》，執硬。
「話說回頭，好多人以聽新派／前衛／實驗音樂為豪、自居，但到頭來受到新（奇）野，唔肯受舊野、傳統野。型式上係比其他人具前瞻性，但實際上會否同追舊唔追新的一群，同樣只係視野狹窄而不自知？」
如果一定要怪野，除左Ihsahn，ATROX已經玩死你，同FARMAKON。ARCTURUS、DIABOLICAL MASQUERADE同SIGH都返左貨，三隊必聽avantgarde black metal。想要唔知玩乜野的，CHROME HOOF同7000 DYING RATS齋見到個名都知on9到無與倫比啦。
「睇睇貨單點寫就知有幾啦。」
但最重要都係TRINACRIA。ENSLAVED邊個同你講都會話係維京，包括我，但自《Below the Light》起，佢地又點止維京兩個字咁簡單？所以見到有ENSLAVED成員，隊band砌到成jazz band噉，就知冇得走，雖似NEUROSIS/TOOL多過ENSLAVED。
「（曾經潮過的）『jazzcore』YAKUZA如果你鍾意，好應該試埋TRINACRIA；相反亦然。最大劑係，今水貨兩隊都有。」
今次難得地返AT THE GATES接近全線（難得在，ARCH ENEMY同THE HAUNTED都潮完潮晒啦，老細），原因之一係最後隻碟《Slaughter of the Soul》，因為佢先至有SOILWORK、ARCH ENEMY等等等等。好多人話好，我自己唔算太鍾意，毫無疑問係歌寫得好同ｄbeat好正（點解冇一隊瑞典melodic death會比得上AT THE GATES？除左佢地係第一隊，仲因為個beat），但可能對於melodic death一向鍾意death多過melodic，所以搵thrash death較多。不過今次《Slaughter of the Soul》個新版，已經係1995年起去到第十幾個版本，仲要係最最最完美版，有齊原來送晒果ｄbonus track（有SLAYER cover呀大佬已經夠理由買啦），今次送多隻DVD，除左有上個特別版DVD個making of，仲加多一場95年live，即係以前有果ｄ全部有，以前恨都恨唔到果ｄ都有埋，先至收你單碟價。大吸引力到我自己都想執番隻咁吸引，係為左佢地liveｄ舊歌。AT THE GATES鍾意一向唔係近尾成名最出名果ｄ，而係最頭兩隻碟一紅一藍。我係由最後調轉頭聽番去最初，聽過頭兩隻，即時唔多鍾意最後一隻，因為紅藍係玩technical death，似早期IN FLAMES同DARK TRANQUILLITY「真正瑞典melodic death」果種，之後變左玩thrash底melodic death，唔係差，但浪費晒自己高強武藝。我追AT THE GATES，仍然係紅藍碟、「melodic death」之前、「真正哥登堡」的technical death時期。
唔要實驗追番技術，都有好多。首先，
「DECAPITATED全線，返齊。」
death果邊仲有MEMFIS，雖則更近melodic death，興趣大在我聽佢地時，聯想到MASTODON，雖則兩者唔太似。曾一度被hype為「metal界新希望」（冇乜出奇啦，傳媒這家野），唔係人人鍾意因為ｄ野太迷太亂同「唔知似乜」，但成功在真係自此一家，亦冇乜其他band會試做同一樣野，MEMFIS令我有果份感覺，不過純氣氛方面，因為佢地個底唔係sludge/core而係瑞典melodic death，冇MASTODON玩到咁亂，旋律、層次明顯得多。因為對MASTODON一向抱幾大好感，而且MEMFIS唔係學足人而做到新野出黎，係全水貨我最滿意之一，雖然隊band仍然年輕音樂可以再進步，知名度亦十分低，創作方面有野聽同有心，就入黎試試推廣。另外有芬蘭AMORAL第一隻碟《Wound Creation》絕版後再版《Wound Creations》。
「AMORAL《Wound Creation(s)》係我最愛technical death metal碟。」
其他technical/progressive野，英國女聲「extreme progressive metal」TO-MERA到晒兩隻碟，第一隻好飄好「gothic」，新碟技術勁左同恆左好多，期待第三隻。美國近年自己幾睇好之一隊ZERO HOUR，唔覺唔覺出到第五隻碟，亦都到左，美國progressive metal中，DREAM THEATER值得聽的價值真係越低。而CYNIC fretless bass鬼才Sean Malone隻solo，同instrumental版CYNIC/DILLINGER ESCAPE PLAN之CANVAS SOLARIS再度返貨，就係因為有水準。對自己黎講，最有意思一隻係 DYSRHYTHMIA《No Interference》，第二隻碟《Pretest》幾年前入，亦賣足幾年先至賣晒，因為個個買左都話惡啃。
「玩instrumental玩jazz rock玩到入Relapse，已經知咩事啦。」
但第二隻碟聽完，好簡單的三條友，但話佢玩乜都得／都唔得，呢ｄband先至有野聽。難得第一隻碟之前搵極唔到，而家出番仲有歌送，當入俾自己都抵啦。況且，我誠意推介，就如以上講過眾多，相信提及到都係香港冇乜知名度冇乜人識，就係因為音樂得，所以推廣俾多ｄ人識。
「這就是indie label同major label的最大分別。雖然，現在冇人會欣賞這種indie探索精神，因為入到黎只係要邊隊邊隊就夠無需真正新野，又或者本住典型香港人／專家心態，學左知道左偷左師就夠就算，然後可以填字遊戲中稱為『自己發現』，唔需要擁有同支持。」
同埋，又係呼應番方才「受新野是否就係開明同行前過人？」之疑問，《明周》訪問中，都有提過一點：
「．．．諷刺是以前聽的一班仿佛比表演者走在前，在嘆『只顧技術』、『毫無突破』、『未有創新』，到後來樂團樂手進行其他實驗、改善了前衛金屬詬病的過份技術向問題，聽的卻又接受不到『傳統progressive metal』以外真正的前衛。」
所以會發覺，好有趣。有ｄ人以聽新奇野怪雞野前衛野自居。真係俾呢ｄ野佢聽，按理具冒險精神及開明心態，有咁多新事物同真正實驗野前衛野，「大把野玩」。但，不知何解，反應往往係遲疑卻步，最後都係搵番「邊隊band」、「邊個名」。那，又是不是真的聽得前衛（過人）？
「又或，錢作怪？講到錢時，始終要買名牌而非買好聽鍾意聽先能夠心安理得？」
thrash metal少，但精。第一隻ATROPHY，講多無謂。
「假使你話係聽thrash，而見到個封面可以唔立即執甚至全無反應，你應該已經超越左thrash metal甚至metal的層面。」
DEAD SHAPE FIGURE係芬蘭後生band，碟面寫住「Thrash Metal Hails from Finland」同「同CHIMAIRA tour緊」，雖則我好鍾意CHIMAIRA，但難免令人驚又係掛thash名玩metalcore的騙局。雖然都係已經摩登左的thrash metal，但冇乜metalcore feel，亦唔似我一向唔多鍾意之瑞典thrash，不過係調番轉我極迷果種瑞典thrash death（DARKANE！），一開已經立即自己執左隻，你可以話「又係玩果ｄ野」、「冇乜深度」，但今年過左一半，其中一隻聽得最開心，係DEAD SHAPE FIGURE，貪佢夠爽夠簡單。最後一隊FLESH MADE SIN，話係thrash，該話更接近DEATH、POSSESSED等初期，但早期比old-school death更早的death metal，同當其時thrash分界線是否真係咁明顯，咁需要執著？所以我照當佢係thrash聽，頂晒龍death thrash。佢地係荷蘭band，如果你知道荷蘭出過PESTILENCE，而知道PESTILENCE咩料，而知道FLESH MADE SIN同初期PESTILENCE相似，我已經唔需要再講任何野，你自然會明白點解我會鍾意、佢地有幾正。
doom類，雖則唔一定係doom metal。重點係好多人期待已久的DAYLIGHT DIES。
「DAYLIGHT DIES《A Portrait in White》，是為新碟Pre-release Single，限量發行，售價$80！」
除THE FORESHADOWING再返貨，你可以當funeral doom黎聽的NOVEMBERS DOOM又有reissue版，加多隻碟送EP同live，又係單碟價。而家賣metal，真賤。ZATOKREV係一隻有點drone的doom death，近ESOTERIC、FUNERAL ORCHESTRA之類，雖然drone同funeral接近，但香港人的死穴係唔靚唔得，drone比funeral「更funeral」，亦即係冇幾多人接受到，但ZATOKREV算係近doom death多於funeral/drone，唔難聽得入。而GODFLESH我都知係industrial metal，但佢地玩法、industrial加grind/sludge，又有幾唔doom？
「industrial metal中我好沉迷GODFLESH，今水隻《Streetcleaner》係佢地同industrial metal中經典。」
不過自己心水推介，係隻唔關doom事的「doom野」。DARK SUNS唔覺唔覺已經出到第三隻碟《Grave Human Genuine》，話係progressive，但第一隻碟真係玩doom直頭MY DYING BRIDE，第二隻變KATATONIA，今隻直頭同PAIN OF SALVATION、WOLVERINE冇分別－有，DARK SUNS好過而家的佢地。本年度其中一張我最喜愛大碟，DARK SUNS《Grave Human Genuine》。
「如果佢地唔係德國band，點會成唔到名、冇人識冇人聽？」
SPIRITUAL都係。有時聽完美國多到濫的metalcore同北歐某ｄband，再望望東歐果班，好灰。

「CHILDREN OF BODOM新碟、OPETH新碟、邊隊邊隊band新碟，係咪真係咁緊要？係咪真係冇的話唔得？真係冇佢地ｄ碟，直頭等於冇野聽、冇野聽得？」

11/6/2008 WED

Doomsday

12/6/2008 THU

迪士尼樂園小小世界
featuring香港GALLHAMMER

日本GALLHAMMER@：

Encyclopaedia Metallum

MySpace

GALLHAMMER一系列作品，
旺角皆旺商場一樓108
TRHK有售！
（well，日本果隊I mean，sorli）

「如果小小世界係
香港GALLHAMMER的樣
＋
日本GALLHAMMER的歌
我肯定立即仆到去迪士尼樂園
呵呵呵呵」

15/6/2008 SUN

屋企個企缸用左咁多年，無端白事樓下家人話每次我地屋企有人沖涼時會漏水落樓下，搵埋唔知渠務署定唔知咩署黎驗，結果發現真係漏水，搞到要大修。

「照計層層間格一樣，即係我屋企呢個位係沖涼房樓下都應該係，浴室滴水仲要沖涼時先至漏，唔係好大劑咋卦？」
（有冇睇《爆裂刑警》？呵呵）

但樓下家人覺得大，撻埋乜署物署出黎，唔整唔得啦。大修工程幾日前開始，首先成個企缸起晒，個底舖層防水層，乾左之後裝水試漏唔漏，一直重覆到完全唔漏為止，跟住先起得番個缸，估計需時最少一個禮拜。

「大佬，而家先黎搞？早半年天寒地凍，沖少幾日涼冇所謂丫！而家大熱天時日日三十幾度，冇涼沖，好大劑架！」

第一日冇涼沖，好在係星期三，每個星期只得禮拜三夜晚唔使開工，日頭放左工可以直返屋企。我返工土瓜灣返大角咀，每程包埋行路等車分分鐘半個鐘唔使，食飯公司包唔使落街，夾埋身處室外曬太陽時間唔夠一個鐘。全日最辛苦係返到屋企帶埋隻狗落街行個圈，冇太陽唔代表唔熱架條街，隻野又老喎唔肯上樓梯（同佢主人劉Sir一樣咁懶），次次行完街要抱佢行幾層樓梯返屋企。
「我隻狗仲要唔係細狗先死。」

公司冷氣永遠開到超行，我個位仲要對到正風口，即係我隔籬位同事剛剛兩個風位之間角位可以熱到著住背心都有大把汗係噉抹，而我笠埋件褸仍然狂流鼻水，激成噉，想流滴汗都難啦。返屋企放完狗叫做濕少少，不過返到立即開大冷氣，最少自己覺得叫乾淨先，玩簡單沖涼法齋濕水抹身。「沖涼」之前，上番堂Geography先同大家。我屋企浴室，入左門左邊係企缸，對正係洗手盤，右邊係廁所。企缸舖左野唔用得拉埋個幕擋住，打水要靠洗水盤水喉，就係噉拎條毛巾濕水再周身抹，雖然感覺效用不大，夠呃自己覺得乾淨左上得床訓覺先啦。

禮拜四，就慘ｄ。除左星期三晚休息，其餘六晚都要上皆旺打躉，六點收工大角咀行路過亞皆老街，中間三四個字路程人多車多，加上皆旺特色係冬寒夏熱，冷氣有等於冇上到去比條街再熱多幾度，TRHK舖位仲要係全層死角即係焗爐格，坐低唔夠兩個字已經成身濕晒。十點幾收舖返到屋企放埋狗，濕成噉唔沖涼真係死得人。偏偏就係冇得沖。琴晚個簡易沖涼法齋過水「沖」完等於冇沖過，頂唔順，又要冇得洗頭，今晚決定

「唔理咁多沖恆佢！！」

開始沖涼前，先播王菀之隻《首張國語創作同名專輯》，雖然個個都噉叫隻碟，查實官方學名係《Ivana王菀之》。跟住清場，將所有濕水可能會壞會爛物件全部搬開收埋，再拎幾個水盤放滿晒地下。我每日必換一套衫，因為浴室冇門檻，就用條牛仔褲同件band tee塞住門罅先，廢事沖涼時ｄ水沖晒出去老豆老母以為水浸。

防水工序完成，沖涼第一步，洗個頭先。正常的洗頭方法，梗係用花灑照頭淋啦，只係企缸位唔濕得水唔入得去，雖然可以夾硬拉個花灑出黎，但大佬就噉噴水清場時大鑊，最後決定，用個洗手盤洗頭算。

「冇錯。就係塞個頭落洗手盤再開大水喉怒沖。」

屋企洗手盤唔同你飛髮舖見開果ｄ咁大要知道，塞個頭落去已經連轉個彎的空間都唔多夠。我都知超on9。不過唔想開花灑射到周圍濕晒，唯有on9啦。最後on9到自己都頂唔順，洗完頭洗身，決定拉個花灑出黎九鳥啡算數。你搵次試試上黎皆旺坐一晚，就知點解咁有必要。啡一大輪之後，舒服晒，望望地板，好在水盤救番，地板實際唔太濕，未浸到洪水沖出外面。

「實驗證明，牛仔褲吸水能力真係好強架！」

抹完身，將七盤水倒成一盤水，仲夠循環再用沖一次廁所。再拎枝地拖出黎拖番乾塊地，之前清場搬開ｄ野全部歸位，隻《Ivana王菀之》播左一次幾，聽一次差唔多一個鐘，即係今次沖涼連事前事後，夾夾埋埋沖左成個鐘，仲要善後拖完地執番靚個場，又全身濕晒。即係當初就係放工放狗完個人濕晒，先諗住沖個涼乾淨下舒服下，但沖完涼搞一大輪，又係濕番晒。

「沖黎把Ｘ！」

禮拜五，終於唔熱唔曬喇。因為，大家都知，紅雨。收舖去先達門口等巴士，條馬路係水浸浸到上行人路，已經冇巴士都仲有超多人排隊，走去新之城果頭搵第二架巴士，條街浸得仲勁成隻腳板沉晒入水果隻。冇汗出照濕晒成個人，你知劉Sir返工仲要頹到仆街著涼鞋架啦，赤腳澗水返到屋企，污糟到爆一定要沖番個涼。點知返到屋企先發現成間浴室封左，直頭門都鎖埋入唔到去果隻。

「老母你唔早講？」

超灰！點算？我屋企單位間格係長方形（冇錯，很過癮的），浴室要穿過廚房先入到去，而廚房開成排窗口對正對面屋。之但係全屋要打水，廁所之外就得廚房架啦。

「廚房沖涼，邊個夠我柒！」

嚴重黎講唔係沖，又係撥水抹身嗟，重點係對住個／排窗噉玩人體撥水節，先最激。

「居然噉都冇俾人報警話有露體狂性騷擾對面阿婆。」

即係「沖」左，我都唔感受到同沖之前有咩分別、唔覺得自己乾淨。平時返到屋企沖涼，係辛苦左成日又身水身汗，沖完涼舒服訓覺，今晚係淋極水都唔覺得自己乾淨，最後撥水支力到撻得上床訓覺。

星期六，終於細雨番ｄ。但係粗照爆。

「搞錯！上星期六我短週，你就黑雨唔使返！今個禮拜到我長週，琴晚都紅雨啦，點解今朝唔俾埋個黑雨我？小！」

知唔知黑雨有乜好處？首先我唔使返工（當條街已經水浸，分別只在於使唔使返工，而唔係個天有幾大雨。上星期長週的同事唔使澗水返工，點解今個禮拜我要？唔公平！！！）。同埋晏晝唔使見客。有個加拿大客琴日落機，一落就叫今日上酒店見佢，仲要揀晏晝四點鐘頂佢個肺，本身今日放工至開舖之間兩個鐘已經計劃左好多地方要佢，佢再噉搞一搞，變左大角咀＞旺角＞深水土步＞尖沙咀＞銅鑼灣＞再返皆旺，六點先開到舖。分別，當然不大啦。

「全香港識聽metal的metal友，都走晒去睇show啦！」

我冇去，仲坐係TRHK，證明全香港得我一個唔識聽metal，呵呵呵呵。本身今晚節目係上BlackWine band房，但冇涼沖喎大佬頂唔順啦今日仲要走黎走去，收左舖去完返到屋企相信都兩三點，連沖涼都唔知有冇力，都係返屋企算。屋企撞正全部人訓晒覺，忍左咁多日，唔得喇，決定潛入沖涼房。果然剛剛裝修完，好多粉好多塵仲名乎其實膠味濃郁，但個企缸舖番瓷磚，即係用得啦，我當！我份人又唔會咁肆無忌憚的，個花灑開細ｄ志在洗到頭有得沖就夠，話係「唔知會唔會漏水所以唔開咁大」，事實上係廢事太大聲嘈醒人俾人發現。不過就住就住已經好爽。

「連自己屋企沖涼都要沖得咁偷偷摸摸，真折墮。」

終於有得沖番個舒服乾淨涼，禮拜六晚訓都訓得開心ｄ，禮拜日起身已經點幾兩點，無聊一陣又係時候上舖頭。「冇新貨」的日子，係靜ｄ，所以好快收舖返屋企，要剪綵嘛！接照師傅所講，因為要等ｄ防水膠乾，浴室（本應）今晚正式重光，係咪真係唔再漏水樓下唔再投訴唔知（唔會我琴晚沖個涼濕一濕水立即整壞左卦？），總之而家可以名正言順，開到個花灑瀑布咁大、blastbeat咁爆地沖涼。

「播番隻METALLICA沖涼先！」

好舒服。恨左好多日。沖完涼，有ｄ想喊。嗚嗚嗚嗚。

跟住老母話樓下上黎拍門。話知道點解會漏水。

生活中，好耐未發生過呢ｄ無聊野。

16/6/2008 MON

謝安琪最新派台歌
《十七度》

"Disastrous."

「有預感，佢黎緊隻新碟
會係第一張我最失望謝安琪專輯。」

「周博賢，你去左邊？」

17/6/2008 TUE

機會難得。今日公司最大兩位上晒工廠，仲要講到明夜晚先返香港果隻。換言之，我當放假架啦。唔止我，全公司都係，上網睇波睇馬睇股睇乜睇物煲煙煲電話落街想玩乜就玩乜。當然仲有怒食。我今日唔計零食雜碎，食左最少五餐。成班同事買野食買到癲。

「落街篤百幾蚊魚蛋、豆腐花當飯食你試過未？」

五點半大家已經開始開始準備收工，熄電腦執檯去廁所連公司燈同冷氣都熄埋，差少少搭正六點打鐘已經入埋電梯咁激。大佬，一兩年一閏呀呢ｄ時光。

「我公司每次冇皇管，都發晒癲的。不過及得上今日咁癲已經係兩年前。」

各位同事今天心滿意足，訓夠抖夠的有、玩夠賺夠錢的有，但我嫌未夠時間。近來日頭ｄ野做好晒，夜晚相反多野跟到死，好在今日老細噉樣俾日假我，一日清晒，雖然只係部份，仲未跟得足全部：

BlackWine音樂篇之《影子》

18/6/2008 WED

二零零八年六月十八日，雨。今晚放工後冇野做，走左出黃埔幫屋企隻狗拎藥。拎完先七點未夠，咁快返屋企有點無聊，睇報紙見到今晚係陳慧琳演唱會最後一場。

「上去睇睇都好喎！」

跟住，就係無聊地冒雨走上紅館了。唔計迪克牛仔、BEYOND、夏韶聲之類一係不太入主流一係不是歌手，今場先係我第一場正式睇的本地流行演唱會。如單論唱中文都計，你睇劉Sir寫碟評都知佢中文歌素來只聽女歌手，但（近）流行單位反而來來去去男聲，女聲係事隔多年後先搵番「過左氣」的陳慧琳（雖然我睇過謝安琪live，但唱新世紀唔算正式演出卦？），相信最大原因係香港流行曲歌路，真係越黎越．．．不淪不類（我唔想用不知所謂，但曾有過此動機）。論流行曲我仍然嚮往仲係玩band sound的八十年代同九零前半，歌好聽詞有意，自從band sound被disco取締（遺憾，係由陳慧琳開始），之後潮流係乜都加噸弦樂古典，最後係唔係都黑鬼野，歌詞一係灰到仆街一係低Ｂ到喊，你唔怪得咁多香港人選擇聽外國音樂：起碼人地係band、有band先啦大佬。論到音樂感情，有ｄ野的確要真正樂隊樂器先帶得出。你覺得迪克牛仔當年碟都冇出、唱得《原來你什麼都不要》同《愛如潮水》兩首歌，一到香港立即上到紅館開演唱會咁歷史性，無因嘛？

「I love soft rock & power ballad。如果有幸睇到華星時期陳奕迅live，我會死。」

至於選擇睇陳慧琳，香港女歌手中佢仍然係我最鍾意之一。除左佢出道年代，正正係流行曲歌路我最鍾意的band時代，就算之後雷頌德搞到轉型跳舞歌已經再冇「聽」的價值（我唔曉rave的，sorli），之後回歸「慢歌」已遠不及當年，佢聲底同唱功直到今日仲係香港中獨特、冇乜人能及，《星夢情真》係我最愛本地流行曲之一，雖然我冇佢任何一隻碟、雖然我未睇過佢之前任何一場演唱會，都有興趣。但又唔係因為有錢所以豪果隻，只有話有緣，人和之餘仲天時地利，我全個禮拜只得星期三晚一晚自由活動，佢今次演唱會「可能係幾年內最後一次」，永遠最好睇的尾場又咁蹻開著禮拜三，有ｄ野，我覺得係整定的。有趣在咁多年黎，講pop show特別外國band成日睇，但地下show，半年都唔知夠唔夠一場。

「冇計。有幾多indie show，唔係我99%走唔開的星期六日先搞？」

就成就一個metal友，但幾年黎接近冇睇indie show但大量（近）主流演唱會的諷刺了。冇錯我係著band tee睇pop show的金屬叛徒。吹咩。

好在今晚唔算太大雨（「唔算太大雨」＝「條街未水浸」），雨中走到上紅館先七點九左右。傳媒對今次陳慧琳演唱會一致看淡，六月頭話每場連平飛都賣唔晒、又送飛又派飛又減價，因為「上一代」、「過左氣」、「近年冇乜hit歌」、「唔性感冇野睇」（呢樣最無聊），搞到今次演唱會少人睇到加場都加唔到。本來純粹襯熱鬧精神，諗住即場買最平飛算，排隊時前面剛剛有四個姐姐仔，

「唔係卦？滿座？想買兩個連位都冇？」

望望，真係喎，全場四個區賣晒果隻，我係執賣剩冇人要果ｄ二百蚊飛單人位先入得場。再望望周圍，真係超級多人，之前幾晚咩情況唔知道，但今晚票房，點睇都唔似滯銷喎，假設唔係瘋狂派飛？（希望唔會啦，連陳慧琳如此實力派表演派都唔夠叫座力要派飛撐場，香港樂壇真係冇得救了）

「成日話，香港報紙雜誌講ｄ野千祈唔好信。不過有時志在唔信多過信。《一本便Face 》如果齋講真話唔作野，你仲會唔會睇？」

買完飛，仲有時間去多個廁所周圍行。多的除左觀眾，仲有螢光棒銷售商，次次黎紅館都有不過唔太多，今次行到邊度都見到有，而且唔再得師奶阿嬸賣男女老幼乜都搵得到，賣螢光棒睇黎成為左一盤大生意。官方商品梗係唔少得，成日想知本地pop artist可以有乜商品賣，唔通賣tee？有個攤位超勁多人圍實睇都睇唔到，行埋去望望係乜野商品咁歡迎，原來係．．．相。多款加多大細到揀都揀唔晒果隻，不過多極都唔夠圍住果班人多。以為去左信和。

「乜而家原來仲興明星相？我ｄYes卡會唔會有人肯收購？」

或者見出面落雨又多人，八點鐘開始放人入場，門口有人派紀念品一包，收禮入場搵到個位，唔差喎：

諗住即場買會係豬頭骨位近山頂去到角，點知剛剛好斜角對正高度又適中，不過一睇就知點解咁靚都只收$200。開四面台而見得到隊band，即係後台位睇背脊啦。可能好多人介意，我冇所謂，對於一個band友，同一向鍾意睇幕後製作的我黎講，有得揀，我都會揀睇得清楚隊band，多過睇得清楚陳慧琳囉呵呵呵。

或者落雨卦，ｄ人入得好快，就所見入場觀眾由一家大細，到靚仔靚妹，到蒲仔蒲女，到師奶阿嬸，到阿伯阿婆，乜年齡層都有，但當中佔最多、佔左全場一半的，唔係靚仔，而係靚妹蒲女系。所以成日提醒大家，聽metal冇前途，聽pop咪幾好？早日回頭是岸呀施主。我坐果行左邊係一班靚仔，右邊係一班靚妹，坐正佢地中間立即顯得我超齡，好在前面係群近中年男女，後面全行被「疑似識得Mark Lui所以有免費飛入場」師奶群霸佔，平衡番。睇見入場一係一堆堆黎，一係一pair pair黎，全場唯一一個單身男性可能就是我。搭正八點三原定開場時間，仲未開始，隔籬的靚妹們已經開始準備，除左拎出大量汽水零食（好妒忌添），仲有唔少得的螢光棒，然後拎門口派每人一份果包野出黎，原來係吹氣棒，一包兩條俾你吹脹打打打打打打打打拍子用，仲要好大聲架喎原來。

「請饒恕我的無知。收到時我真係唔知咩黎，仲想問佢做乜派個嘔吐袋俾我。」

話晒叫做尾場點都多人捧場，即係我咁無聊唔關事都出現，就預左今晚爆硬場啦。因為全場坐滿加天雨，差唔多遲半個鐘先開場。之前紅館睇過BEYOND同夏韶聲，或者都係band底同重音樂關係只開三面台，今次陳慧琳係我第一次睇紅館四面台騷，始終pop concert同rock concert兩回事，正如你睇METALLICA唔會係想睇佢地跳芭蕾舞卦？先講講場地：我個位望出去左前方係「正面」，歌手同dancer最多時間面對的方向，即係我個位係舞台西南方，而「背面」即係正南係fan club專區，每次Kelly一行近或者對住佢地就會全部衝台，聲勢都幾壯觀架，如果睇佢地舉ｄ牌包括來自大陸Ｎ個地方同新加坡的Kelly fans，有ｄ仲話睇左三場（相信睇足咁多場的唔會冇／唔係少），即係可以唱完一首歌睇佢握手收禮物成個字，就知道fans是多麼的多多麼的重要。

「這是市場學策略。想好似佢地咁享有特權、可以同Kelly近距離接觸？買貴飛＆加入fan club唔該。」

不過首次紅館四面台體驗，印象不算太正面，以前成日聽到人話紅館聲唔多得，今次第一次感受到。可能以前三面台控制聲音較易，今次一開場預左係電子野，一貫港式音效，除左唱同低音之外，其他幾近遮晒同唔清唔楚，好在慢歌時改善好多。

「始終唱歌把聲同個beat先係香港人所要／僅要。音樂，只屬其次。」

流行演唱會賣點係整色整水，即係你睇到而家傳媒報導都知，你唔燒幾百萬搞搞個舞台、冇大班dancer助慶、冇番十幾廿套衫、冇得「有野睇」，都唔好話自己係演唱會－乜演唱會唔係音樂先係重點，幾時變得演重要過唱？遺憾在我從來唔係熱衷演方面，即係今次全場演唱會分開幾部份每部份一個主題，靚係靚、特別係特別、跳舞係勁，唔多打動到我，畢竟我主要聽歌同聽音樂，你睇全場我睇實隊band時間仲多過睇台上就知咩事啦。演唱會因為係玩主題，音樂自然多元化由電子到世界音樂都有，只係我覺得特色夠晒但水準未夠，因為pop呢種騎牆類型（某程度上，pop係冇特定定位的），優點係溝乜都得變化無限，缺點亦係溝乜都得但「pop」之局限仍在，好容易撈ｄ唔撈ｄ兩頭唔到岸，加上流行曲本身短有時發揮得有點片面，唔多夠放同唔多，亦即偏向犯缺點的時候多。全場我最滿意果部份係馬戲團，全個舞台台前台後台上台下玩到足晒，編排心思唔到你唔服，但除此仲因為我最鍾意的陳慧琳金曲幾乎一個環節全部包晒，同馬戲團環節音樂方向係－你已經估到－ soft rock同power ballad。除左我最滿意之外，買貴飛的朋友都係，因為唱《大長今》同《一切很美只因有你》係握手時間，一握就不可收拾架啦你知fans點肯放手，所以《一切很美只因有你》埋尾隊band冇得停一味怒去，結他佬啡solo啡到出晒汗，鼓佬打到幾乎變thrash metal係噉爆cymbal（真係好好笑的睇佢打到）。除左握手，梗係仲有隊咪俾台下觀眾唱啦，好在劉Sir唔係坐最前。唔係？肯定俾佢搶咪怒爆，第一句清聲、第二句black metal、第四句death metal、最後一句高八度heavy metal聲、唱完送多個十六度三十秒碎玻璃高音俾各位家庭觀眾。在場台前幕後，特此鳴謝劉Sir買平飛唔衝台的不殺之恩。

其他環節講睇有時的確唔錯（舞台班底真係超強，睇pop concert都係為睇呢ｄ嗟），但音樂真係要嘆句非我杯茶，全場玩得最開心的時段自然係disco環節，陳慧琳三大跳舞曲《失憶周末》＋《大日子》＋香港九十年代disco熱潮的開端《花花世界》，即係唔理歌詞只講聽其實寫得唔差（雷頌德點都有點斤兩的，無論你點批評佢），但唔係果類人就唔係果類人，感覺唔係好大。其他歌間中有好野，問題係，頭先缺點都提過，有時真係太pop、太台式、太R&B．．．吸引力最大，反而係每個主題中間換場之過場音樂，見到陳慧琳音樂總監預左會係雷頌德，即係成日俾人話抄歌一回事，你聽真ｄ、聽多ｄ佢ｄ野，其實佢係有料到的，即係佢可以成日抄到新野，都要成日聽新野先抄得到啦，聽熟外國歌三百首，唔係一模一樣寫番出黎，點都當中偷到師，開場已經係一段非常暗industrial式電子，跟住有段真係玩到industrial metal款結他開恆埋拆聲黎炸，當然真正台上歌唔會出現呢ｄ野，可惜，因為呢ｄ部份、任佢點玩點發揮都得的部份，先至係全晚最有野聽的時候。

每晚演出請嘉賓已經成為香港演唱會指定環節，今晚係當年四大天王中最紅里安黎。佢出場直頭全場發癲，反應仲激過主角，我後面班師奶一直冇乜反應，到黎明一出場，立即彈起跳晒嗌晒差在未除衫咁激。可能我係仔，所以唔明白箇中，不過佢唱歌其實比你想像中有實力，聽唔聽、鍾唔鍾意佢ｄ歌一回事，你試下唱K點黎唱，就知好多都好難唱、好高音。第一首《越夜越有機》，live點都係唱disco野快歌觀眾（唔包括我）先開心，點解唔唱《眼睛想旅行》，香港經典戇居disco歌？之後合唱《紀念日》，正我非常鍾意呢首歌，但係黎明唱唔出馮德倫果種feel。或者，真係老喇，同佢現場台風差噉ｄ，更加顯得陳慧琳係個極出色live performer，唱歌keep得住全場狀態穩定（希望冇咪嘴），仲好識同台下交流、搞氣氛。唔係有《紀念日》，黎明出場會成為我廁所位，非常老實。唔覺唔覺，《最愛演唱會》呢首擺明收場歌都唱完（填詞果位朋友真夠醒爬），唔少得自然係encore啦。出番黎：

Kelly：「今晚最後一首歌喇喎！你地想聽咩歌呀？」
Lau Sir：「我想聽CANNIBAL CORPSE《Fucked With A Knife》。」
Everybody：「．．．．．．」

當然冇人理劉Sir。唱多一首唔記得左咩歌，又翻炒頭先三首跳舞歌，當然仲有最重要一樣野宣佈，就係演唱會完左之後結婚，又撓攘一輪，相信再搶埋第二日報紙娛樂版頭條，先玩完。睇睇錶，十一點十，玩左三個鐘三個字，抵睇喎。結婚都公開，即係黎緊幾年可能再冇live睇，一眾fans又點會罷休？跟住嗌到陳慧琳再出黎講多次拜拜，完埋場著埋燈仲肯上番台講多陣，我都係第一次見到，心已唔同、唔係一般明星仔歌星仔可比。再跟住落番去，fans繼續歡呼。仲有冇再上多次台？已經唔知喇，fans可能可以曠工走堂睇Kelly，我，要返工，再唔走，尾班車都趕唔到。嗚嗚。一百九十五分鐘，雖然唔係每一分鐘都滿意，總夠令我心滿意足返屋企。

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

最後，又係講講文化。如果你係音樂中人尤其係聽metal，lau-sir.com：

會係你最鍾意睇的網頁，因為全香港、全中華地區甚至全世界，你唔會搵到第二個人好似劉Sir將音樂同生活、社會問題如此crossover，而忍受到篇篇千萬字同講得好中好應甚至踩到自己條尾後，真係有野學到、諗到。
同TRHK一樣，會係你最唔鍾意上、最唔想拉上關係的地方，因為佢講出太多事實，好多香港人自己唔會諗到、睇到，又或諗到、睇到但唔想面對的事實，同令人知道天有幾高、地有幾厚，亦即香港人最唔想知道的種種。

看不到即不存在。不在、不知，方能心安理得。

因為劉Sir係「業內人士」。所以今場show、一場pop show，睇得好感慨。之前提過會場外有個攤位賣相。其實隔籬仲有一檔，不過果檔同賣相差天共地，雖然大家係兩張檯拍埋正正隔籬，但一個人都冇。原因，唔難明白：咪就係賣陳慧琳隻新碟囉。完全無人問津。

「知唔知令我諗起乜？諗起我坐係TRHK呢間香港heavy metal專門店，一星期坐足七日，但有六日半遇到的客人係搵band tee同poster，而唔係音樂、CD。」

好多「聽metal」、「聽地下音樂」、「聽另類野」、「聽外國野」的朋友，經常批評聽中文歌、聽流行歌的靚仔靚妹唔識聽音樂、只係追歌手、追商品。話方說完，自己走入舖頭，只問周邊商品，對音樂一屑不顧。這，代表了．．．？

即係香港靚仔靚妹追星追到極端，唔使點講大家都見識過想像到。從我場中聽到，全個演唱會有六場，唔少靚仔靚妹係睇左超過一場以上，有ｄ真係鍾意（請參考自廣州來睇足三場的瘋狂fans），有ｄ係睇到報紙雜誌話「過氣歌手演唱會門票滯銷」，自發用零用錢同儲蓄買多一兩場飛捧場支持。你可以話佢地噉樣做係無知係癲。但調番轉睇：「聽metal」的朋友，有機會，你會唔會？時光倒流到四年前。2004年TRHK搞六翼天使演唱會。六翼天使係香港史上第二場外來樂隊表演metal show，當年唔似而家有錢大晒用錢撻係噉請band，係一年平均有冇一場外國band metal gig都成問題的時候。初初放出風聲，網上一致支持，個個都話搞得成一定入場、一定黎睇。結果，真係搞到出黎、成到事。係咪真係咁多人？有入場的朋友，都話到你知當年個情況，有幾悲壯。而我，只覺可笑。同期遇著LINKIN PARK黎香港表演，當時個人回應如下。

「有ｄ人（「支持metal」人士）笑LINKIN PARK fans掟成九百幾蚊買張飛去睇偶像，同成日叫人支持香港地下樂團，但係有機會觀摩真正metal樂隊黎香港表演同支持香港地下樂壇，呢ｄ人（「支持metal」人士）反而做唔到佢地睇唔起的LINKIN PARK fans都做到之一樣野：願意付出去親身支持佢地覺得應該同值得支持之樂隊／人。」

呢樣係講緊幾百蚊一張飛的演唱會。而當講到「好想睇」的演唱會，都唔肯俾幾百蚊去買飛入場支持，價錢平三四倍之CD，更加無討論之必要。以上番說話，係四年前講。四年後的今日，仍然講緊，且對當今時局形容絲毫不差。這，又代表了．．．？

同埋，好有趣，今次入場擺到明全場係後生仔女。就同MY CHEMICAL ROMANCE一樣。我睇MY CHEMICAL ROMANCE演唱會間場遇到好多好多好多專家。但黎到陳慧琳演唱會，我一個專家都搵唔到。隨便捉個靚妹問問點解入場，佢會話你聽佢地係「鍾意Kelly」、「支持Kelly」，而從佢地的參與同熱情（香港band show永遠缺乏的兩樣野），你會徹底相信佢地真係因為呢兩個原因而入場。但睇好多外國band本地live i.e. MCR，你問同一條問題，可能對方拋左十幾個書包遊左五六七次海洋公園，都未答得到你，又就算答到你，單憑佢地會場中之行徑同話語，又實在好難說服得到你，佢地真係如所講咁鍾意、咁支持。即係一個人選擇「聽外國野」、「聽band野」、「聽underground野」，係因為鍾意而聽，定因為聽左可以話俾人聽你聽而聽？老實講，就撞到睇Kelly的靚仔靚妹中，我搵唔到幾多個係後者囉。但，去睇gig、睇band show，調番轉，我搵唔到幾多個係前者囉。

陳慧琳唱左幾多年，唔使我講啦，當而家唱到結婚，都諗到好多fans已經由當年的妹妹仔變成姐姐仔甚至師奶。今場show你可以見到大量上年紀人士入場，男女都有。亦睇得出當中唔少真係資深樂迷。現代樂迷的直接回應，係佢地咁多年都係陳慧琳，因為唔接受新事物。噉我地睇睇「接受新事物」的一群。老實講，因為肯接受新事物，先令好多人開始聽band野，但接受完後會追幾耐聽幾耐，係另一個問題。你有上網都知，一隊band「潮」的時期，可能僅得出碟的幾個月／同一年，之後間中有人翻炒又講講，就冇。至於單單一隊band，就算真係好鍾意都好，會聽幾耐、會唔會追？當「潮」的時間，可能仲短過你聽佢地一隻碟的時間？又如而家一隊band你好鍾意、成日提住，之後佢地沉寂兩三年後出番黎玩，你仲會唔會一如以往咁支持佢地、繼續追隨佢地？甚至有冇諗過，果一刻，你仲係咪聽緊呢一種音樂？陳慧琳的fans，可以為左佢死跟死隨十幾年。但見過唔少「聽metal」人士，開始時雄心壯志，但一年甚至半年唔夠，已經「聽晒metal」、「聽到悶」。

「做fans，唔係你諗到咁簡單，係講求精神上、體力上甚至時間上、金錢上的大量付出。陳慧琳的fans做到。身為某隊band fans的你、metal fans的你，又得唔得？」

某程度上，我覺得「fans」方面，以前的J-Rock人士更能做到。雖然唔知點解，自從J-Rock沒落、metal成為新一個潮流，J-Rock成為繼中文歌同pop歌之後，被metal人士歧視的頭號目標。又有趣在，唔少metal人士，係J-Rock出身的。

而我一直講緊，係真正追隨偶像的fans，唔係志在聽完歌唱唱K就玩完果隻。純粹唱K果隻，先有可能一年甚至半年唔夠，已經「唱晒」、「唱到悶」。

所以有樣野，你見我成日講：
「香港metalＫ歌化」
而家香港好多「聽metal」人士對於metal，同MK仔MK妹追Ｋ歌、聽Ｋ歌兩者並排，除左pop果班追黎係為唱、「聽metal」果班追黎係為網上玩填字遊戲，同音樂邊個嘈ｄ邊個唱中文邊個唱英文，兩者間可以話全無分別。又即你可以話香港好多「聽metal」人士，同追Ｋ歌的MK仔MK妹，大家相差相距不遠，雖然前者可以經常大大聲諷刺、睇唔起後者。希望佢地知道自己個情況。

這是陳慧琳Love Fighters演唱會、一場香港歌手演唱會、一場本地流行演唱會、一場擺明為搵錢而唔係為音樂的大function。但你可以從參與者的心態同行為睇到，香港好多MK仔MK女、靚仔靚妹，原來可以比好多串緊佢地的本地「聽metal」人士，更接近metal的精神同宗旨。

難怪，我覺得今場演唱會，真係好好睇。

21/6/2008 SAT

Project Unleashed 2008 by TRHK

Featuring:
SOLIUM XI (Finnish Atmospheric Black Metal)

差唔多每年TRHK都會簽兩三隊band出碟，今年三隊一隊比一隊滿意，雖然我迷技術野多，你會覺得我揀CELEBRANT或者RUDRA多，但反而三隊中最鍾意，係SOLIUM XI呢個「all-star project」（雖然我噉稱呼，相信冇幾多人知道或覺得佢地係star）。話black metal悶的、話black metal冇變化的、話black metal冇solo的，係時候聽聽SOLIUM XI了。
「同埋，上佢地官網Band section睇睇bio，可以癲得咁上腦，更加要簽啦！」
一隊band除左音樂，心態同態度同樣重要。

有樣野可能你又唔知，雖然你上親TRHK都係見劉Sir坐舖面，但簽band出碟呢方面，我只係顧問之一而非最終決策者，所以對於簽番黎之樂隊，我仍然係以普通metal友而非賣metal碟心態同角度去聽，即使你唔相信。我會選擇支持TRHK咁耐，就係因為敢去實驗。第一隊簽番黎的DEATHGUY到而家仲冇一隊外國band似佢地（希望你有聽過，這一隊泰國symphonic melodic black death metal band）。CRYFEMAL係香港根本唔會有人接受到的industrial black noise的experimental black metal（順應香港人唔拋拋書包、唔多字眼多術語唔得的習慣，我都要上網隨俗）。六年黎十幾隊band中，我最自豪係TRHK簽到REQUIEM AETERNUM同SOLIUM XI兩隊。REQUIEM AETERNUM隻碟《Philosopher》藝術到連Earache都唔敢簽，外國評論為「OPETH《Still Life》後最佳progressive death metal作品」。香港人的評論，好簡單：
「好難聽呀！」
雖然（曾經）好多人話想搵band似OPETH，但試過REQUIEM AETERNAM，鍾意或受得到的接近零。因為當你聽過《Philosopher》，你就會發現其實OPETH．．．好pop、好易聽。而香港人唔係要似OPETH的東西，而只係要OPETH，同易聽。

「話我串之前，先聽聽音樂。所言非串，只屬事實。」

至於SOLIUM XI，老實講，TRHK簽到佢地，我都覺得有點意外，因為聽完真係唔明點解仲未有（大）公司簽佢地，正宗北歐black metal撈symphonic同doom，仲有有料到的guitar solo，恆位、邪位、舒服位全部搵得到，技術寫歌同錄音專業到，冇可能之前冇人理佢地喎？

「這就是underground的悲哀。」

以前有人問初聽black metal可以點開始、有咩好介紹，會推介一隻碟有得聽十幾隊經典band的《Firestarter》，跟住係TAAKE《Doedskvad》同閃靈。而家，自然係SOLIUM XI《Litanies Unto Adversary》。除左係TRHK roster我最滿意樂隊之一，亦都係其中一張本年度我最滿意大碟。

「不過，講得好、玩得好係冇意思的。睇佢地一出碟，已經成為$160兩隻之列、只賣八十蚊一隻，仲要呢個已經叫好平的價錢，都預左唔會有太多人買。就知，而家香港地做underground，是多麼的折墮。鬼叫你唔係明星、唔係潮。」

同，一樣好緊要：鬼叫你唔係香港。唔知點解，有個本地現象好得意，一樣野假如香港人樣、有「香港」兩個字加在頭，值多人講、正在「潮緊」，就算唔識、冇聽過、唔係鍾意，好多人會自動自覺俾錢同支持。但相同情況，不包括香港人出的外國野。最簡單，用近來出左碟的EVOCATION做例子。SOLIUM XI同EVOCATION，風格上都可以稱為melodic black，分別在前者偏正宗北歐black metal、後者較重旋律同偏doom/death。大家都係差唔多時期出碟－雖然我今日先講，SOLIUM XI隻碟其實已經到左個幾禮拜，只比EVOCATION遲半個月左右。

「EVOCATION在這裏只是一個市場學例子，與音樂無關。我冇講過佢地玩得唔好或玩得唔及外國band。佢地出碟之後，我不嬲評語係『音樂創出自己style唔係照學外國band，唯寫歌方面不足』。」

SOLIUM XI出左之後，每次有客人入黎問black metal、更多係問EVOCATION，都會推介佢地試試，亦有好多人試完表示「真係得喎！」、「呢隊band勁喎！」但係，連試幾首、讚嘆一輪之後，唔買。因為（只係想）搵EVOCATION，即使自己未聽過佢地玩乜，不過「有人講」、「香港band出碟喎」，咪搵咪買。但調番轉，同一範疇中的一隊芬蘭band，都係同香港有關，就係由香港人label幫佢地出碟，甚至聽完自己都覺得隊band玩得好。但．．．對淵博的香港人黎講，又點，又算乜料？一講到外國band，非明星不可，名又唔係乜乜乜，樣又唔係香港人，玩得好鍾意聽算係ｄ咩？

「香港metal band出show喎！」
「唔識，不過香港metal band，去睇！」
「香港metal band出碟喎！」
「未聽過，不過香港metal band，買碟支持！」
「香港label簽外國metal band出碟喎！」
「．．．唔買啦。」
「隊band係外國band，不過間label係香港人喎！同你試過聽完都覺得佢地玩得好喎！」
「．．．都唔識隊band。」
「噉點解好多你唔識、未聽過歌的香港band，你可以睇佢地ｄshow、買佢地ｄ碟？」
「．．．香港人嘛！」
「噉係咪只講一半話佢地係香港band，而隱瞞香港 label band的全盤事實，你反而會立即買？」
「．．．．．．」

香港band出碟，同香港label幫外國band出碟，兩者都係香港人搞音樂、都係香港人為音樂勞心勞力。但點解香港band無論玩乜玩成點都肯支持同買碟，但唔係本地band即時雙重標準，外國band個名唔係邊個名、自己唔識未聽過、甚至聽完鍾意但個名自己唔識都唔會肯接受，對住香港band時心中果份包容性，去左邊？

這就是underground的悲哀。　又可能，只是香港的悲哀？

p.s. 有樣野，好好笑，亦好諷刺。EVOCATION隻碟係melodic black (death)，但其實佢地以前近black metal，仲要SOLIUM XI style果種。我唔知有幾多搵EVOCATION（而唔肯接受SOLIUM XI）的朋友知道呢樣野。SOLIUM XI玩呢種black metal仲要係玩得好，香港都冇人聽冇人買，假如EVOCATION當年keep住玩black唔如現在melodic化，到出碟都冇轉仲係SOLIUM XI style：
a) 出碟之後會唔會淪落到同SOLIUM XI同一下場呢？
b) 而家搵EVOCATION但唔肯買SOLIUM XI的朋友又仲會唔會買佢地隻碟呢？

p.p.s. 承上情況，可能我掛「EVOCATION舊碟」狗頭推廣SOLIUM XI，銷量可以上升至日賣數十／百隻。有「香港」兩個字庇佑嘛。

「重申多次：EVOCATION在這裏只是一個市場學例子，與音樂無關。我冇講過佢地玩得唔好或玩得唔及外國band。」

p.p.p.s. 在香港，有關香港band，就係講親乜都要咁小心。

22/6/2008 SUN

今晚明珠九三零播《變形俠醫》。應節，講講先。

The Incredible Hulk

24/6/2008 TUE

「直頭要謝主隆恩啦。」

剛剛好七日前上星期二老闆＆老闆娘上工廠，今個禮拜二，又上。

「如果老細逢星期二都上大陸就好。」

又係全公司發癲時間。全日最大娛樂／最重要環節，自然係睇實個風點走，由朝上網上到放工睇到實，即係睇馬睇股都冇咁聚精會神。大家一路跟住個風走，由到三點七八掛三號，到四點幾天文台「不排除清晨掛八號的可能性」，到五點零明報「按照推測，第二朝掛八號風格成數頗高」，全公司已經當正聽朝唔使返工，又撞著我地隔籬個單位開倉，成班同事過去掃貨。成日見佢地個單位有人出出入入，經女同事八卦打聽一下，原來佢地係做飲食批發，專批啤酒汽水俾茶餐廳，雀巢咖啡90蚊一盤24罐，即係三個八左右一罐，我陷家都鍾意飲，旋掃一盤先啦，即係自己唔飲批番出去都仲有賺喎！連出前一丁都有，255蚊三箱90包，不過價錢同超市減價唔差太遠，加上上年聖誕買果箱印尼撈麵仲未食完，發住咁多癲先啦。

「我諗過掃維他奶塞爆屋企雪櫃！$3.75唔使一包375，抵！點解冇雪糕？我要雪夾糕！」

各位客人又好合作今日冇乜電話email，自由活動，大家梗係開心啦。但我又唔夠多時間。七月臨近，你都估到我忙緊乜野：

BlackWine音樂篇之《影子》
7月12日晚上7pm城市大學惠卿劇院舉行
門票已於TRHK公開發售，票價$80
全show三隊band、三個鐘、三part表演！

我唔係幕前，只係幕後。但做幕後比你想像中辛苦極多，同埋按照香港傳統，幕後點出色都好，係唔會有人理的。

「即係你有心玩音樂、做音樂，但係目的之一係想多人講、多人識、有得威有得型，可以話你聽，千祈唔好揀做幕後，在香港(metal)。」

25/6/2008 WED

平時都冇咁早起身。一來緊張啦，

「琴日放工時三號風球，十點幾掛八號喎！點知撐唔撐得到到今朝？」

關乎到使唔使返工喎大佬！二來，出面真係超大雨，落雨落到呢個鐘數已經嘈醒左。即係唔使睇，聽都聽到咁大雨，冇可能唔係八號、冇可能要返工啦。不過，確一確認保險ｄ。唔係睇電視。唔係上網。懶到身都唔想起的我，打電話。梗係唔係打俾同事or老細問咁戇居啦，咁早打電話俾人搏小咩？

「我愛18503。」

這個是天文台查詢熱線，我小學一二三年級最愛電話號碼。細個好慘，電視唔係日日有得睇，遊戲機電腦去人地屋企先有得玩，玩具又唔係多，主要娛樂除左兩點鐘開收音機聽半個鐘《小朋友時間》(oh so cult)，就係玩電話。果時仲係電話號碼六個字、電話用轉盤撥號年代，屋企買左部有揚聲器加音頻撥號的電話，已經係當年高科技產物，做完功課成日開住電話個喇叭，跟住隔一兩分鐘打一次去天文台，聽電話錄音個姐姐仔講而家幾多度、出面天氣點。而家梗係覺得普通得有點兒戇居，但廿幾年前室內無線電話甚至電話待接、三人會議仲未普及，唔使拎起聽筒都聽到電話，好Ｘ神奇架！

「廿幾年冇打過呢個電話喇。我仲記得最開頭，係1803，後來先加個5字。」

打的時候冇乜諗過個電話而家係咪仲用到，話晒隔左廿年。哈，又打得通喎！令我回憶起小學仲係低Ｂ仔一個樂此不疲不斷打的愉快往事，不禁笑左出黎。點知，歡笑好快變成苦笑：

「歡迎致電電訊盈科。」
「WTF？」

以為打錯電話。真係以為打錯。好在經過半分鐘垃圾廣告之後，姐姐終於出聲，真係天文台查詢熱線。

「八號西南烈風訊號現正懸掛，而家立即申請電訊盈科網上行寬頻上網，除左送你NOW TV垃圾免費台半個月任睇，仲可以憑coupon即日換領紅色暴雨警告一個．．．」

澳雪。而家連打電話問天氣都要PCCW特約。乜叉都逃避唔到李氏家族的魔掌。收又收得貴。服務又唔係好。問天氣都要咁多廢話。我發誓而家網上行合約完左，一定唔用必轉第二間，i.e.我的最愛香港寬頻。

好似當年靚仔，每隔半個字打一次，打到六點半鐘仲係西北烈風，太開心，即時彈起身online先。

「真犯賤。返工日子又唔見肯咁早起身。」

我唔係唯一一個。online時已經大半個list綠色。似乎八號風球令全世界比平時早起身。講起八號風球，又要有／無理取鬧一大餐先。話說上年兩次八號風球，第一次出晒名，橫風橫雨但天文台肴底只掛三號唔掛八號，跟住俾全香港特別老豆老母怒小，個風球仲要黎得全無先兆，之前一日風平浪靜到我開大窗訓覺，第二朝一早俾雨撇醒咁誇張，出門口ｄ雨大到好似霧噉睇唔到路，我已經早左半個鐘出門口，都要遲半個鐘到公司，仲要算早返果個。

「人齊之後老細開例會，問點解大家知道今朝會風大雨大，都唔識早ｄ出門口搞到遲晒到？真係想一句粗口飛埋去。」

第二次八號又係灰，正正我生日先黎打風，而且同之前次「三號」完全相反，除左大風雨都唔多滴，反而今個八號先似三號喎。天文台你地點搞架？而灰，唔係在於大家諗好晒玩乜點知打風全部節目取消晒，係打風唔該早ｄ打丫大佬，返到公司食埋飯先打，跟住同全旺角一齊迫車返屋企（諗番都覺得戇居：我大角咀行路返屋企，仲快過等車！）。咁蹻歷史重演，有位同事今日生日，不過佢好彩過我，一起身已經唔使返工。我起身刷完牙洗完面，已經佈好陣計劃好晒今晚點樣由朝早七點玩到夜晚三點，幾難得撞到禮拜三八號風球呀大佬，全個禮拜我得今晚唔使開舖咋，而家突然多左全日假！點知，頂佢個肺。

「落乜撚野波呀屌你？」

十一點幾改掛三號，公司傳出風聲，請各同事兩點返到公司。搞到我好唔妥天文台。擺明係以前俾人小得多，今次計過數揀十一點公佈，靚仔唔使返學家長唔嘈，又唔會得罪全港大老細，但苦了打工的大家。抵天文台成為打工仔公敵。我十二點半出門口，奇觀，個天落雨，頭頂對上一滴都冇冇。點解？因為超大風，吹到ｄ雨接近六十度打橫片埋黎。咁大個人第一次擔遮打橫黎擔。我屋企位置係內街，過對面馬路十幾步就到好近果種，打橫把遮擋雨擋左一輪，聽到對面街好大聲，拎起把遮睇睇，正正我對面十米唔夠，大大條樹枝吹斷左跌落行人路。

「噉都叫三號？天文台，你地做乜撚？」

按照常理，八號波落左之後，兩個鐘內要返到公司，據聞係勞工法例，但我老細仲勁，限你個半鐘返到仲威過勞工署。今次算有人性，返到去係lunch時間，就「特赦」俾兩點返。多謝晒。不過仲有其他原因。老細通知各位同事時，講到明「食埋飯先好返」。而我公司，平日係包lunch的。唔使畫出腸喇卦？其他同事十二點半先起身，我十二點半反而係出門口，就係佢不仁我不義，因為老細冇直接搵過我，只係其他同事MSN順口提提「今日晏晝食埋飯兩點返工」，我直頭扮唔知買埋飯上公司食，食完訓覺兩點起身再問會計靚女claim番錢，仲嘆埋公司冷氣屋企電費都慳埋。跟住正式「返工」，除左近排有幾張單出緊，跟番較迫切ｄ野，全個晏晝擺到明罷工，坐低就係上網、飲飲食食同寫野。仲有MSN。自從八號波變三號波，全日MSN你搵唔到任何一句冇粗口，施同受都係。坐到六點，冇咁大雨不過更大風，我返屋企等車果度屬於有瓦遮頭，企最邊同條馬路有兩三米距離先露天，ｄ風係大到吹到ｄ雨粉成群蝗蟲噉不規則線條地迎面飛到入行人路衝埋黎，睇見都好很驚。把遮要好似拎盾牌噉拎先擋到雨。黐Ｑ線。我知打風係關個天事。不過我唔怪天。我怪天文台。

「點解上年八號風球天氣可以掛三號，三號天又話八號？點解前幾個禮拜六我短週時你地話黑雨，跟住個禮拜六我長週，仲大雨仲水浸過黑雨個星期六，你地只話係紅雨要返工？點解成日亂咁掛波，今次求祈遲多兩個鐘落波，全世界唔使返工大家開心，但次次都得，就係今日我可以放成日假先唔可以掛耐ｄ八號？」

我唔係抹殺天文台功勞，但每逢重大決策，尤其首當其衝影響到我時，往往「失策」。次次都係。多謝天文台，令我今日段記成為劉Sir個網開齋七年、劉Sir個blog開張八個月以黎，最多粗口的一篇段記／blog。

「多撚謝晒天文台。」

26/6/2008 THU

俾個天．．．文台玩，琴日八號風球玩玩下掛陣又唔掛搞到晏晝要返工（頂佢個肺！），今朝一起身又黃紅雨，澗水返到公司，就停雨了。好無奈。襯晒呢套戲。無奈是它的主題，也是目的。

The Happening

27/6/2008 FRI
BlackWine將於27/6今晚
星期五晚上10:00 - 11:00
接受港台Teen Power現場訪問！
按此到Teen Power網頁
錯過亦可之後網上重溫！

28/6/2008 SAT

"Superhero Movie!!!"

中文名譯得好。《超低能特攻隊》。真係超低能。睇見trailer & poster，都估到又係《Scary Movie》班底力作，即係99%非原創，純粹將人地其他戲特別出名果ｄ，東剪一忽西偷一忽，再嚴重戇居化低俗化，串埋就係一套戲，睇戲名都知道係擺明求鬼祈搵笨實之作。但人係犯賤的，一係要超出名超勁，一係要超垃圾超廢，小個個係噉小，但小完都係入場睇佢點戇居法，唔係財路，點會成個系列拍下拍下，十幾年十幾套都有得拍落去？《Scary Movie》頭三集而家睇番仲係笑到仆街，之後四五六集（或者仲有更多？）冇睇，衍生出其他撚化電影耐唔耐出一兩套，好似最近有《Epic Movie》同《Meet the Spartans》，其他人個個睇完話唔好睇，自己冇入場，因為成個《XXX Movie》系列，一係去人地屋企睇VCD成班一齊笑，一係等電視，雖然好睇，但柒到我都頂唔順，說服唔到自己入戲院（呵呵呵）。

噉點解《Superhero Movie》會令我破戒入場？睇見個名你都知點解啦。作為美漫迷同超級英雄迷，終於輪到玩英雄片，trailer又過癮，磅水啦今舖。系列特色係果期興乜就係乜，潮流共鳴感一流，開波冇耐玩i____玩到笑爆咀，跟住YouTube、MySpace、Facebook、Wikipedia都玩埋，同好多近年網上話題、現象，可惜在全套戲主線係玩《蜘蛛俠》，蜘蛛變蜻蜓，預期之內的醜化角色、加大量黃色笑話玩女玩美式幽默。《蜘蛛俠》係正，但畢竟已經係Ｎ年前的事，只玩蜘蛛俠一個，笑料自然好多限制，因為以前賣點係一大班人一齊冒險／撞板，成班人on9先多火花，本住系列傳統，諗住會係雜牌軍戰隊鬥大佬形式，但其他超級英雄出現只係間一間場笑一笑就冇，有戲份角色已經唔多亦太集中主角一個，絕對唔夠喉加浪費晒，以致笑位冇以前咁密集，仲要以往的精警同巧妙冇晒，我覺得係全套戲最失敗地方。或者幕後人馬唔同卦？緊貼時事同潮流係賣點亦係缺點，套戲始終美國人拍，同多時利用對白搞笑，文化唔同，導致好多香港人唔識笑、唔知幾時係要笑的時候，同《Be Kind Rewind》一樣，觀眾反應平淡、笑聲零星碎散，實在欠睇緊笑片的氣氛－其實《XXX Movie》宗旨咪就係「swede」，可能因此大家都衰！反而觀眾笑得最多，係中文字幕。套戲2B級，但勁多你一睇就聯想到係粗口同不雅字眼可以直接出街，嘩好激喎而家ｄ戲，好似我睇三級字幕都未有咁露骨意識未有咁強喎。而佢話套戲、呢ｄ字幕，只係2B。

「難怪而家ｄ靚仔，咁難教。」

對於《Scary Movie》頭三集，我係滿意過滿意，今次拉埋superhero黎玩，大大提升我入場的興趣，但估唔到我第一次入場為呢個系列捧場，結果相當失望，笑料唔到肉之餘，太雜亂無章喇。更大個失望，係睇完trailer覺得正，但入場睇，好似套戲實際上同trailer兩回事。完左出字幕，一輪字間一輪片，出左三輪精華片段，話係NG片段，倒不如話係未出街片段，當中好多比正場更好笑。點解會留番最後先播，正場反而冇野睇？同埋，

「點解trailerｄ片段，九成都係用呢ｄ片尾NG？自知正場唔係拍得好？」

唉。有ｄ想喊。當年《Scary Movie》風采去左邊？早知等電視好過，睇電視台字幕組夠唔夠薑好似譯到噉款已經夠過癮。

「我已經係爛片迷，好少可睇完戲，會覺得『早知唔入場』。早知唔揀《Superhero Movie》。」

玩完Superhero，官方話黎緊會有《Disaster Movie》。係？睇睇trailer先．．．

BlackWine音樂篇之《影子》
7月12日晚上7pm城市大學惠卿劇院舉行
門票已於TRHK公開發售，票價$80
全show三隊band、三個鐘、三part表演！