段記

30/6/2008 MON

別了家駒十五載
舊日的足跡紀念展覽

「生命不在乎得到甚麼，而在乎做過甚麼。」
黃家駒　1962.6.10 - 1993.6.30

1/7/2008 TUE

七月一日，有乜意思？

係香港回歸，唔覺唔覺就十一年。大家都會記得呢一日，因為我們的黑暗歲月，始於十一年前的這一天。

因此，七月一日，成為每年遊行的日子。身邊唔少人參與，但唔包括我。一來我懶。二來政治冷感。三來，一早對香港同香港人心淡。這是本地metal界一些「所謂樂迷」教曉我的。

我只重視，七月一日令我可以放番日假，雖然放假的日子都係要返工，三點開舖開到十點。

同，七年前的今天，劉Sir個網正式開張。有關劉Sir的出身、個網的源頭，懶講了，摷番前年即係五週年的一大篇，交差給大家算。

「中六其中一份功課係整網頁，當時教電腦個阿sir對我態度唔認真，一向唔認真的劉Sir自然更加唔認真，當年交功課個網頁叫無聊齋，內容顧名思義地無聊到爆。段記就係由果時開始。交左『功課』之後（雖然無聊，結果反而好高分，可能唔認真的阿sir鍾意唔認真的無聊野），個網繼續搞落去，第一代無聊齋同段記維持左幾耐已經唔記得。之後上到教院Year 1，文繼續寫，但冇乜諗過開番個網，後來身邊開始多人搞網頁（先行者係朗奴迪寶亞獅子山莊同也哥Ring of the Kings），2001年7月1日無聊齋再度開齋，但真係計的話，整個歷史可以包括埋之前中六七兩年。第二代無聊齋其中一個目的係紀錄以前紅燈山丘中事跡，睇番以前有幾癲／真係幾癲，最傳奇當然係丁舉人（你而家、咁耐以黎睇到之所有野，都係由丁舉人開始），同冥報，可惜紅燈山丘中文曲星戰隊（由一部文曲星字典機引發的一個cult）各散東西後冥報已經停版，宏軟財團到而家仲未上到線／市。至於劉Sir個網到2005中左右先正名，自從越寫越多又寫埋碟評，無聊齋已經流傳到海外，見好多大陸同胞鍾意叫呢度做劉Sir個網，又申請到lau-sir.com呢個domain，果時悶悶地就小畫家畫個logo出黎，無聊齋正式變成劉Sir個網，劉Sir個網logo到今時今日仲有好多人話『見到就想打七你』，亦都有人話『鍾意無聊齋多ｄ，因為個名，同埋首詞。』由第一代無聊齋 i.am/moliunese 到第二代無聊齋到劉Sir個網 lau-sir.com 、由劉義到劉Sir，唔計非完全認真對待的第一代，劉Sir個網噉就持續經營左七年，段記亦由1/7/2001寫到今日，中間除左幾次停頓之外，真係開幾多年寫足咁多年－ well，近期因為忙加懶，間斷係增加左的我承認。」

「其實整個網黎做乜我都唔知，只知道第一日開始，一日寫到，都要／會寫落去，由最開頭輯舊文、加新文同開始段記，之後越黎越多無聊野、段記越寫越多，再後來加埋音樂寫埋碟評，到而家劉Sir個網已經變成一個好多人問『到底你個係咩網頁』的唔知算咩網頁。寫左咁多年、寫左咁多字，查實我都唔知到底寫黎做乜，或者一路維持住呢個網，係俾個地方自己思考，每日發生左咩事、見到ｄ咩野、到而家聽左一隻碟，都可以諗一大輪，之後再寫餐飽。點解劉Sir可以諗到咁多野、諗野諗得咁快？當你除左訓覺果時無時無刻都係同時間諗緊幾樣野，長年累月之後，有乜野諗唔到？」

「劉Sir個網可能係收錄字數最多之中文個人網頁，或者有一日甚至會成為持續更新最長時間、經營最耐之中文個人網頁。就係因為一個無聊人唔知做緊乜、唔知點解要做、漫無目的之堅持。劉Sir個網仲會繼續多幾耐？一如以往，唔會理亦都懶理，只知道我會繼續唔知點解地寫落去，同過去七／九年一樣。或者到一日真係決定唔再寫落去果時，從到頭尾睇番自己呢幾年第一日到最後一日做過ｄ乜，會覺得
「我居然會寫無聊齋／劉Sir個網／段記寫左咁多年，真係非常之（呢格留番果一日填）。」

你可能會問：「點解用前年篇野，唔搵上年六週年？」因為上年今日顧住打《The Last Stand》，打到唔記得左回事，呵呵～

2/7/2008 WED

劉Sir個網七週年誌慶
之
黑椒漢堡s

4/7/2008 FRI

Wanted

5/7/2008 SAT

Project Unleashed 2008 By TRHK/TMHK
Featuring BlackWine (Hong Kong Progressive Metal)

TRHK香港樂隊廠牌Trinity Music Hong Kong
TMHK於2008年6月正式成立
首部發行作．BlackWine《影子》
已於TRHK及全城公開發售！

有關BlackWine、《影子》、TMHK詳細請見
Project Unleashed 2008
歡迎有意加盟本地樂隊聯絡TMHK！

BlackWine音樂篇之《影子》
7月12日晚上7pm城市大學惠卿劇院舉行
門票已於TRHK公開發售，票價$80
全show三隊band、三個鐘、三part表演！

Bonus Track:
香港sludge doom樂隊DISCOMBOBULATION
首張自資大碟《Roman's Melancholla》
亦已於TRHK公開發售！
詳情及試聽見樂隊網頁
http://www.myspace.com/discombobulationhk

6/7/2008 SUN

lau-sir.com資優生獎勵計劃

7/7/2008 MON

「柒月柒喇喎！又話有新一集R7HK？」

我都知。話咁快就到呢日。不過真係好多野忙。單單BlackWine出碟同場show已經大把野搞啦。

「提一提：今個禮拜六晚城大BlackWine演唱會，TRHK仝人奉旨睇show，當日TRHK門市部休息一天！」

過埋今個禮拜六，希望會得閒番少少（場show唔太關我事的，跟住賣碟先多野搞）。仲未有機會坐低傾傾R7HK風雲再起點樣搞法。

「話時話，流浪兄，幾時會／會唔會就第6.5 話正式回答？你唔答，冇野玩落去喎！」

8/7/2008 TUE

「本週節目：青島之旅。」

．．．不過最後唔成團，唔好意思。公司今年寧捨多展覽，我今年除左五月過美國拉斯維加斯出差渡假，本來今個禮拜仲要過青島擺另一個展，今日上機，夜晚落機上酒店，聽日起場，跟住禮拜四擺到禮拜日，星期日晚機返香港，星期一朝早返工（冇錯老闆永遠是這麼精明使盡你先心息）。好在近排多單跟緊，今個月已經兩張單交貨走左去實死，加上老細經過美國一役見識到劉Sir的頹，佢都頂唔順，

「今次我去青島，你唔好跟住黎！」

好野。就可以繼續留低office發癲食野玩野上網了。同，最重要，走左就睇唔到：

「12/7星期六晚城大BlackWine《影子》演唱會！」
當日TRHK唔開舖，敬請留意！

9/7/2008 WED

Hancock

12/7/2008 SAT

BlackWine演唱會及專輯討論專區

20/7/2008 SUN

「有冇見過人用三萬字寫一場show？」

S.H.A.D.O.W.
BlackWine音樂篇之《影子》

而家寫作進度，奇慢。場show完左成個禮拜先至有野睇（當然，自己犯賤爆咁多字又係抵死的）。前晚睇完Mind Your Head，超好睇，係2008最佳local band show之一，不過，又要等番起碼一個星期先有野睇，我相信。

22/7/2008 TUE

黑椒反擊戰
之
青檸黑椒雞翼
(special featuring: BlackWine@Don'Touch!)

23/7/2008 WED

市長召集：hardcore大食會
（行動代號：Circle Eat）

奉長沙灣承運　市長召曰
貳零零捌年捌月拾日星期日劉Sir誕
晚上柒時旺角皆旺商場108號TRHK英雄會
召集齊開大食會　行動代號Circle Eat
有意者　請早報名：

http://forum.lau-sir.com/viewthread.php?tid=2375&extra=page%3D1

搞番個hardcore大食會，皆因太耐未聯誼過，想搵個機會可以新舊版友出黎同柒一番。選擇大食會，係因為乜function都試過，唯獨未試過如此戇居，但難度在於野食。你整？我唔識。我識食。所以，最戇居，係出席者請同時帶備食物。

同時需要義工炊事員。市長已表示會親自下廚整番幾味派對小食e.g.菠蘿腸仔，望會有更多蟻民跟隨市長樹立的榜樣，為大家炮製佳餚。

唔識整野食者，都希望可以買野食上黎，當然係有意義的食物，即係買包餅買筒糖上黎就盞聽。總之，務求做到大家有份參與，加出現人士全部有得玩有得食。

有意者，請發言報名，謹記：

報名者即出席者，請自行帶備食物與眾同享。當天生日的劉Sir想食好多野。我鍾意食煙肉腸。

這是非常hardcore事在必行之活動，如已報名勿放飛機！以免到時分贓唔勻民怨沸騰！

係超戇居。不過事在必行。
因為我們都是Hardcore的！

Let's Circle Eat!

24/7/2008 THU

呢三日係頭半年精華地在。三日內，兩張單驗三次貨再見兩個客。琴日驗貨，公司做到死，對得多大陸的朋友就會知點解，永遠越近起單越大劑。今日另一張單，個客黎埋工廠睇貨，即係我要上埋廠冇得走。最好野係佢上去睇一回事，今個禮拜突然有個客walk-in話星期五上工廠，即係連續上兩日，英明的老細決定叫我今晚訓工廠，等聽朝一起身就可以見客，再慳埋來回香港交通費。

「真係多謝晒老細。」

今次個客勁，係上年五月美國奧蘭多擺展覽時撞到，傾左成年終於落單，跟住五月拉斯維加斯再全公司大粒野（近十個人）過黎同我地全公司會面（兩個人．．．），過多兩個半月，下星期終於出貨。通常外國人買貨，出貨會搵公證行驗貨，不過呢個客唔算大公司，所以驗貨呢家野自己搞掂。所以又有機會見到令我諗起魁男果個阿叔。四十幾歲仲矮過我，不過身型完全唔合比例，去到美國我完全唔似美國人，不過佢拍埋我度，我似美國人多過佢。佢行程緊湊，先去越南再去上海，琴晚香港落機，今朝一早就上我工廠驗貨。搞到我要七點出太子佢酒店搵佢，再一齊上老細車。香港到工廠車程兩個鐘，魁男叔叔又鬼咁健談，有個半鐘大家傾美國總統選舉。政治野我從來唔多識，我連原來希拉莉同奧巴瑪之外仲有第三個候選人都唔知，都係老細同佢吹水，我只係旁邊扮識野。就係靠果一句，中五英文miss教會考oral時必定要用的無敵金句，幫我會考英文oral拎左個C返黎的一句：

"Yes, I agree with you!"

好在講美國總統佢自己都講到支力，最後半個鐘終於有覺好訓，上工廠我全靠搭車時訓覺充電架唔係完全頂唔順，六點幾起身呀大佬平時我冇八點九唔起身架！十點鐘到工廠，距離食飯時間只有兩個鐘，帶佢遊工廠已經可以玩唔止咁短時間，不過今晚我係唔係都註定要留工廠訓覺，平時ｄ客敢玩咁耐搞到我六點前返唔切公司肯定怒小（暗地裏，你知劉Sir唔夠薑的），反正我冇得走，佢玩耐左最後驗唔晒貨要黎多日就係佢問題了，呵呵。

「難得我冇得返香港都可以串番人地轉頭呀！」

未入正題已經十二點幾，排場問題老細拉左成班高層同個客一齊去食飯，為免嚇親個鬼佬，今次唔係隨便工廠附近搵條村仔求祈大排檔搞掂，正正經經上餐廳食，我咁多年黎第一次有呢份福氣，因為一向唔係大排檔就係工廠阿姐煮飯搞掂（雖然阿姐煮飯超好味）。間餐廳有中有西，恨左好耐喇我絕對唔會客氣，即時鋸番個扒先，唔係平架四十五蚊人民幣仲要冇湯送冇甜品冇餐飲，連配菜都係超廢薯條冇條只得仲衰過珍珍出品的極迷你洋蔥圈三個（無論味餡口感都唔似洋蔥圈，但形狀上我只能作此聯想），最灰係連塊扒甚至黑椒汁都唔得，大佬香港第尾鋸個lunch扒平你少少量多幾倍仲要好平勁多，好失望呀呢間餐廳，唔怪得老細以前唔黎，原來係為我好。不過睇其他幾位平時食工廠飯，今日黎到開公數立即個個鋸扒，原來唔係得我一個厚面皮，明顯恨左好耐，所以唔多好食個個都食得最開心。唯一一個唔係叫西餐只得個客，叫左個竹筒飯，冇幾，「食左四十幾年西餐」，乜都食滯。

「返到香港我帶你去次第尾，你就知乜野叫做正！」

工廠呢邊同美國衰同一樣野，就係地方好隔涉，有時想食好ｄ要走到隔籬村甚至隔籬鎮，今個晏晝工廠出黎餐廳食野一程車要飛半個幾鐘，食完返到工廠兩點幾。終於開始此行目的驗貨。大家戴晒手套好似法證先鋒噉驗。人地大公司出貨，簡單驗貨都一次抽總數5%，但佢得自己一個加上求祈，人地驗5%，佢驗五隻搞掂。仲要係唔多知乜事就黎驗，雖然佢都係間公司老細之一，但負責呢件貨果位係另一個老細，而果個老細兩個禮拜前已經開始放假，放假前完全冇交代到任何野，見佢臨放假前冇咩表示，就當件貨搞掂，黎到望望冇問題就得，連搞掂之後幾時確實送貨俾佢地都未定。就係咁求祈。美國公司懶起上黎，真係可以懶到你唔信。人地老細平時一個禮拜返工返四日咋。我搵工時遇過間美資公司，香港分部返四日半，仲要星期一晏晝唔使做係下午茶會大家聯誼，可惜入唔到去做。所以我愛美國。

起初擔心會唔會搞好耐，點知出乎所有人（包括魁男叔叔自己）意料，一個鐘唔使睇晒三點都未夠。超早。早到本身我要留低工廠訓覺聽朝見客都唔使，早ｄ返香港睇睇部電腦覆覆email好過。冇計，驗完貨雖然簡單，都有份報告出黎要交番俾個客，只係工廠大陸同事，係寫中文的；外國人，係睇英文的；即翻譯的工作，係我的。六點幾返到公司清清大量email後，仲要今日驗貨細節同份報告寫番晒做英文掟過美國。知道劉Sir值錢在那裏了嗎？不過呢樣都唔係最灰。臨走前，大陸老細走過黎截住架車：

「咁早走？廠長今晚諗住帶你去淋足架！十五蚊咋！」
「正定邪先？」
「乜野叫正足？」

灰。好灰。寧願今晚留係工廠，大把野玩。況且，仲有下集。

25/7/2008 FRI

琴晚錯過淋（邪）足，非常唔開心，更慘琴晚返到香港對住部電腦做一大輪野之後，今朝都係要六點幾起身出尖沙咀搭船上工廠。唯一分別係，今日必定即日來回，唔似琴日執衫執文件執行李執到拉隻篋過關囉。不過亦因為琴晚唔使過夜，成篋野拉番落黎香港。

「早知，琴晚賴死唔走淋埋個邪足佢。」

出尖沙咀架巴士搭左廿幾年，總站係尖沙咀碼頭。點知就係今日要出碼頭，佢車頭大大隻字寫住「不入碼頭」。冇所謂，我中港城上船，唔入碼頭都唔係好大問題。但我冇估計過不入碼頭，等於連碼頭附近都唔入，總站搬早左幾個站去到尖東。尖東同中港城係大對角黎喎。仲要咁早起身未夠精神，躝到過去冇左四個字，大佬好在我今日夠早出門口，唔係黎到唔係搭船，係送船。

平時搭船都係買完飛之後食番個KFC早餐，無敵18號薯蓉+通粉+超正炒蛋+好食雞扒+奶茶=$23.5，好食又食得飽抵過麥記食早餐，點知今朝比九巴陰左野，食唔切唯有買上船食，順便拎多份《頭條日報》。一向唔會貪呢ｄ小便宜，不過今日要船上食早餐，為消磨時間就拎份睇睇，中港城個櫃檯有兩棟，一棟我拎時已經係尾二一份（當時係七點半），另一棟成個人咁高完全冇人拎過。原來，果棟都係免費，不過係英文報。我已經睇夠講夠英文了，陣間對住客又要講，滯喇，膚淺ｄ睇中文算呵呵。暑假就係暑假，平時條船冇幾可滿，即場買飛一定有加買完任何坐，今日我黎到已經買剩最後幾張，因為幾隊旅行團一張上大陸，嘈到死。好在我慣左聽住歌訓覺。

「有冇見過人坐船開遮擋太陽？」

而家船公司同海關服務都好左。以前上船你話上就上，唔會有人睇你飛、唔會有人查你有冇上錯船，甚至問佢係唔係都未必答得到你，大陸嘛。所以上年去古鎮搞到我搭錯左船去珠海。可能俾劉Sir網上唱衰識死，而家你上船經過親的職員都會睇睇你張飛先俾你行，以防有第二個劉Sir出現。又落船過中國境，以前要寫張疫病檢測表，即係「近來有冇頭暈身興」、「有冇掂過禽鳥」之類的白痴問題，大家都知道身在中國你剔親「是／有」就仆硬街，所以根本冇人會講事實，我試過個人資料亂咁填都過到骨（收果條友根本望都唔會望就收鬼晒ｄ表，就算有事，之後又點查得番係邊個？），又一祖國浪費人力資源而零效率謬政。所以而家入境唔使填表，而搵左部探熱機，行過天花鏡頭會超高速自動掃瞄鏡頭內全部人體溫，畫面顯示係全部經過人頭部都會閃一個十字，勁有槍game feel，行過通通被headshot。

出碼頭有廠長親自出車接送，因為太多人落船，去到工廠已經十點幾，而個客十點未夠已經到左。即時超高速帶佢行工廠個圈快手搞掂。我鍾意呢ｄ唔拖泥帶水話咁快搞掂又冇咩手尾跟之好客。完左剛剛好十二點，然後同大陸老細同廠長們食飯。不過食完未走得。本來今日只係見佢一個客，點知琴晚我同魁男叔叔玩緊時，有條友手痕打個電話去香港公司話今日walk-in上黎。搞到我要晏晝留低見埋佢先走得。最激係，佢十二點幾落船，就順便黎工廠黐飯食。我同廠長食完一餐飯，阿姐知我上工廠斬左成隻雞，佢黎到時，再陪佢食多餐，阿姐再炒勁大碟炒麵過我。飽到pk。

「好在平時我係公司對住各位女同事，已經訓練有素。」

今日真係開心，對住兩個客都冇乜特別野要搞，而且大家爽手個零鐘搞掂，三點幾開完會，準備去碼頭趕四點船走人。飛車過去三四個字，如無意外一定趕得切，但意外呢，永遠圍繞世紀黑仔王劉Sir。晏晝呢個客香港黎，主要係我自己見佢帶佢周圍走，就係臨走時行開左，俾大陸老細見到個客，佢唔識英文但個客香港人即係講中文，就捉左佢傾左Ｎ咁耐。大陸領導級人士有個嗜好，就係超超超超超長氣，而內容往往樣辦戲到爆香港人聽到想笑果隻，一開戲就唔會收口，試過有次個客黎工廠坐左兩個半鐘，但真正睇貨傾生意九個字內完成，其餘時間係老細solo。個客仲要趕下場，幾乎聽佢吹水聽到唔耐煩想反面到出面，而果次係我唯一亦係最後一次見到個客。老細三點三開始講，講到三點七個半字仲未放人，連廠長都開始擔心，因為趕唔上四點船，下班船六點，唔搭船搭巴士要坐三個鐘車，點都死。個客又好野喎有耐性同老細有講有笑，以往ｄ客通常由佢自己吹餐飽的。最後係我忍唔住開口話我地趕唔切搭船先甩到身。

「唔使開舖咩大佬！」

我趕返皆旺，個客要趕返公司，大定立即跳上廠長時速百二米飛車，剛剛好趕到買到飛一齊返香港。已經賣剩頭等位，$165。

「抵喎！今朝香港搭船黎，普通等都收一百六十五！而家同一個價錢有得坐頭等！」
「但你今朝俾港紙，而家係人民幣。我琴日唱人民幣，六百蚊港紙先兌得五百蚊人民幣。」
「．．．好在入公司數。」

搭咁多次船都未試過坐頭等。但唔明有乜分別。頭等即係上上層，除左只有大約五十個位同兩間客房，地方唔係闊落，連服務員／囡囡都冇個（信我，雖然只係船務，有ｄ真係好靚的），唔明同普通等相差幾多，除左價錢？而我上到船時，全個上層已經接近坐滿晒人，原來坐普通等上到船可以加錢升頭等，問題係賣飛果班有自己賣，船上升級果班有自己升，結果只坐得五十幾人的上層，居然有七八十人爭位，連我俾足錢買飛都冇位坐。跟住果招先高章：船長立即開船，跟住部長們先調停，安排頭等飛坐好後，再同俾錢升級果班友講頭等冇晒位，唔落番樓下普通等就冇得坐。超強。本來有個家族十幾個人俾錢升頭等包左間客房，但上到船後因為「有幹部要用房」所以趕左佢地落樓下，有個師奶單挑兩個部長嘈到成船都聽到，勁過聽metal。原來頭等飛貴左的十幾廿蚊，就係為買呢樣野。

「死，今朝先話完船公司服務好左。」

通常上到船都會即訓，反而今趟船冇訓到，一來有個metal師奶啦，同埋船上面播戲，有得睇《龍鳳鬥》，劉德華加鄭秀文一向唔太識睇，不過呢套戲兩個都晒足演技，而且編劇同敘事功力極高，難得撞親都會重溫的港產片。值得一提係《龍鳳鬥》導演係杜琪峰。難怪唔係我睇開題材同卡士，我都咁鍾意。睇完訓多半個零鐘，六點一埋岸，名正言順唔使返公司啦。而返到香港的最大驚喜呢．．．

「謝安琪今日出新碟？」

旋買。metal碟而家都冇乜心追，我的最愛Devin Townsend上年隻新碟我而家仲未買到，都未有動機認真去搵，而謝安琪係現在罕有一有新作我會立即即日專登走出去俾錢買碟都制的artist。隻碟叫《Binary》（封面上面英文名旁邊個抽象文字後來先睇得出，原來係「二元」．．．），等左好耐，亦擔心左好耐，冇幾多歌手同創作人群埋大label，仲可以保留到自己風格，同可以堅持自己條路。今晚TRHK唔准播metal，全晚怒聽謝安琪新碟。感想？

「．．．．．．」

《十七度》已經聽到我想喊。照買，因為謝安琪，同《港女的幸福星期日》。睇見歌名都知係典型黃偉文諷格。無敵，是《入型入格》，音樂同歌詞都係香港流行曲近年罕見之突破。點解呢首，反而唔係叫《港女的幸福星期日》？應到仆街同笑到仆街喎。同，這才是周博賢。如果夠薑派台派《入型入格》，我就真正會尊重環球。

有少少覺得唔需要咁急買，等佢出新版再新版幾次後貪埋ｄ小便宜贈品好過。連聽三次（《入型入格》笑足三次），我已經諗到隻碟碟評點寫，crossover埋《3/8》，包保你唔會搵到第二個人從相同角度出發。我有心機郁手的話。

26/7/2008 SAT

開心。老細今日又走左。近期老細們都幾多機會上大陸，不過這不是好事，代表著而家公司生意奇差、工廠好多問題，好在我地呢ｄ好膚淺的，將來會點殺到埋身先算，我只知道今日好多野食。

「你知我公司一冇皇管，全間公司幾癲架啦，尤其食。」

返到公司，先叫個餐蛋治，同會計靚女一人一件。

跟住有個同事身痕加口痕，落街買左成盒燒賣加山竹牛肉上黎。

隔籬位船務師奶，佢老公買左好多貴價野俾佢，包括Godiva朱古力（讀「哥-di-啡」），同唔知邊間買的超正朱古力蛋糕。佢老公的唔關我事；但佢老公俾左佢的，即係我的。

朱古力蛋糕都食埋，整多罐咖啡。早前去隔籬茶餐廳批發倉執左勁多咖啡，清完一盤再掃，近來又勁迷卡夫出一隻朱古力餅，好似Oreo餅點咖啡食（即係掟塊餅入口再整啖咖啡，人口攪勻．．．），一罐咖啡可以送兩包六塊餅，超好食。

因為老細唔係公司，午飯時間都提早一個鐘，要早ｄ訓覺嘛大佬支力呀。因為老細係公司時食黎食去都係同一間，每次佢地走晒我地都好開心，因為食乜都得，今日叫台灣野食，整左個紅燒牛腩米，可能我見識少，未試過食麵個湯底可以係蕃薯糖水咁抵死。各位女同事的慷慨捐獻，夾夾埋埋食左兩碗米粉，再加多杯珍珠胚芽。胚芽近期潮嘛。我問茶餐廳，普通飯餐餐飲轉胚芽可力，加五蚊呀黐Ｑ線！除左個麵，仲有大量小食，包括劉Sir的最愛哈哈笑薯圈，仲有台式炸餃子，不過我食唔出台式同中式有咩分別。多到食唔晒留番下午茶。

三點幾同事又身痕，再落樓執左大盒炸魚蛋加豆腐花上黎。加埋晏晝食剩ｄ薯圈同餃子，仲飽過lunch碗米粉。食完諗住甩身，電話響：原來係經理，今日佢要同老細一齊上工廠，不過佢上去係見客，三點幾返到香港，途經魚蛋檔，又買左一袋上黎，仲要比頭先同事果盒更大盒，兼送炸雲吞。食埋，連彎個腰都有難度。夜晚都唔使食。

「似乎真係要做做運動。」

除左食，今日節目仲有狂聽謝安琪新碟《Binary》，隻碟長半個鐘多少少，公司時十次都有，上到舖頭再聽，出左碟唔夠一個禮拜，已經聽左五十次以上。

「相信好快會追過BlackWine《影子》的>200次。」

初時聽確唔太開心，因為進入新藝寶／環球後，大路化痕跡實在明顯，不過不斷地聽入左去，最行貨幾首派台pop歌／K歌未如理想，整體仍算滿意，只係唔及以前咁驚豔係事實，放的比以前更放（電的三首），但周博賢俾我感覺係大體上有所保留。暫時仲係覺得，歌詞比音樂吸引。

「《入型入格》，無能敵。雖然唔因謝安琪，係首歌事。」

相信唔大機會如兩年前《K sus2》可以超過metal成為我全年最愛作品，但絕對會同關心妍《最愛Jade.i》兩者間取一成2008年度最佳中文專輯，假如下半年中文碟再冇其他大驚喜。

29/7/2008 TUE

近來一係突然成棚野做迫埋身，一係乜事都冇頹爆，嚴重影響寫作心情及進度，睇完show，隔左幾日先寫：

Zip Zap Saturday Night

死，好似兩個禮拜前Mind Your Head都未寫。可能要再等多排，因為場show，大把野講。唔係場show。係咪後、show外。

30/7/2008 WED

眾香港觀眾期待已久的《盜墓迷城3》聽日上畫，最大賣點梗係李連杰做秦始皇啦。不過第一個禮拜爭唔爭到飛入場都成問題，反正要等，不如睇佢套舊作《最後一強》熱定身先。唔係拍得好，反而李連杰作品中呢套我喜好度較高。

The One

TMHK出品．BlackWine新碟《影子》
已於全港各大唱片店公開發售！
詳見Project Unleashed 2008