唔知做過ｄ乜，今年已經過左六分一。積埋好多鱔稿，一鑊過出，等我可以放番幾日假先。

想搵pop野，有：

想要metal野，都有。可以睇：

7/12上畫，等足成季，終於有得睇喇 － 算好架喇，初時我諗住復活節至有野睇架。要將107社長段唔知乜叉超麻煩高清錄影轉番正常人睇得到的格式，廢事失事耗費人力物力一番是原因之一，自己懶是原因之二（or更大／最大原因．．．）。條片得兩個字唔夠，拍攝當日用左個半鐘，又事前收到亞視方面草擬之問題後，訪問前夕（當日放工前）寫好一大篇答案，即訪問全文其實係咁多咁長，當然真正對鏡頭講時同出街時要精簡同短好多，況且對象係對metal全無認識之普羅大眾，講到咁深冇意思，寫到出黎、錄得低，到頭來導演咪又係剪鬼晒留番最簡單（即佢睇得明）果ｄ出街？

「我都知文中有好多野過於簡單，甚至可能有點偏差，寫俾新人睇，將就下啦，始終劉Sir唔係專家嘛。」

從來亞視會有節目講metal，總同張大導或多或少有著關係，本身負責《慧珊時尚坊》，跟住《文化潮流》，四年黎兩鑊都要搞番劑講metal至心足，亦兩鑊都係一講完metal即收皮，《Metal時尚坊》一出街令個節目由十點半搬到去十一點幾，《文化潮流》甚至自己出左idea定左節目大綱，跟住張大導俾人調左部門去做體育，唔止呢集節目冇份做，就連之前搞show已經連攝影隊都搵埋，結果自己黎唔到睇，吹脹。亞視咁多節目製作人當中，唯佢一個metal，相信今次會係劉Sir最後一次亮相亞視／電視。亦因劉Sir出晒名係世紀黑仔王，相信佢上左鏡，亞視命不久矣好快執得了。你睇佢集《文化潮流》出左街之後，亞視發生幾多風雨？

當年有人睇完《Metal時尚坊》send email同打電話去亞視問metal，張大導再轉介過黎TRHK，仲要阿叔輩多，有個大陸做野睇電視睇到，返到香港特登走上黎買碟。而家？諗都唔使諗，節目八點半出街同亞視拍絕對大影響啦，但相信即使黃金時間有得睇，而家一樣唔會有多少迴響。同《Metal時尚坊》只隔四年，已經出現MySpace YouTube等等無數專家成材工具，家陣上一上網變專家，仲需要靠睇區區節目？即使睇完有興趣，上網兜個圈，乜都識晒，唔識都唔敢話自己唔係識晒。而且，聽為乜先？出發點是？正如《D.M.C.》有幾多人真係會認真搵(death) metal聽？在香港metal世代，四年已可隔足幾代，有ｄ野，大家心照。爛屍金屬網曾經是本地聽metal者聖經，好多人先從佢個網學乜野係metal/extreme metal，先至開始搵metal聽。而家調番轉，一開波上forum睇「近排聽乜」、「有乜新metal歌好聽」之類topic，照單執藥搞掂，甚至唔需要知道聽緊係乜、乜野metal即是甚麼。out左矣。所以你好耐冇見過劉Sir郁下手兩三千字的碟評。最近一篇，是謝安琪《Binary》，對上一篇＆最近一篇metal碟評，已經係一年前以上。因為劉Sir的碟評在現今香港，已經再無任何存在及實用意義，雖則台灣同大陸人睇見佢ｄ碟評仍相當受落。今次個節目同篇稿，唯一成就，可能係喚醒左朱慧珊心中的重金屬之火（還有呂晶晶！）。（呵）

另問左張大導，原來節目中講到中樂加重金屬時落左08年大中華樂隊大賽戳麻表演片段，真係佢主意黎！我都奇怪除左佢之外，亞視仲有邊個人會有此想頭同熱心？近年亞視的確嘗試做多ｄ音樂，好似08年底起以「熱撐」為名買左好多演唱會，又有簡短過場節目加旁述介紹最新外國MV，可惜細台限制太大。張大導多年黎一直向佢班老頂爭取，想搞番個音樂頻道，而家又高清又數碼，想申請一條數碼頻道講音樂，《文化潮流》只乃一個pilot，佢諗到好多橋，從唔同角度睇metal、再由metal角度睇其他音樂，勁多論點及觀點都係之前冇聽過，始終作為傳媒中人，有關思維觸覺要較地我一般人敏銳廣闊得多，好似佢一早諗好點樣完整將中樂同重金屬進行異同比較，可以有好多野研究到出黎。問題係亞視本身已經冇人睇，仲要係數碼頻道做，加搞metal咁偏，點搞？而且商業機構做決策先睇回報，唔係唔想搞，之前大中華樂隊大賽報紙都賣過，收視率得一點，係全年最低收視節目之一。老細見搞音樂搞band sound噉收場，仲邊敢再搞？跟住經濟大仆直亞視再發生咁多事，佢仲未俾人炒已經算好彩，唔使旨意再搞到乜新野出黎。劉Sir同metal，今舖《文化潮流》，將成亞視絕響。

「相當可惜，因為張大導好多從華人及中華文化角度出發研究heavy metal之構想，都屬前無古人。或者要搵次同佢傾傾，大家度度有冇其他project可以搞搞先。」

亦可以聽，真真正正「聽metal」：

其實唔太關R7HK事，不過諗唔到放邊，性質最相近，就當做R7HK特備節目。

「我都等緊第柒話復台作呀。」

好耐之前Rock爺已經將節目分開上下半兩部上市（仲有謎之內章，不過相信必遭永恆封印無法重見天日），但Rock爺換blog速度拍得住佢換畫（希望我噉樣形容「俾女飛」夠隱誨）咁快，一個blog用兩三個月就「悶」而改blog，舊link晨早死左，就將兩部合璧一次過擺上R7HK保存。個訪問係佢主意，錄音放上網係佢主意，但結果發現，靠佢都係冇Ｘ用，靠自己最實際。呢舖係其中一舖metal水吹得最愉快，同最有意思，亦相信除非二人再聚首，好難有「更好」出現。但當然，聽黎為笑，多過為認識metal，你想學metal野、身為專家想偷料，直接上Rock爺個blog好過，佢個blog係香港難得真正投入metal文化之點滴精華，特別作為專家的朋友更加要去睇，因為唔止音樂，連rock友metal友的生活精神，同metal周邊文化如文學、電影，一應俱全，入去打個轉，出番黎大把料你上forum撻其他人。最重要係，通常我地呢ｄ寫blog同真正研究者，往往只顧自己地頭寫作而不問世事，本地forum更加絕少涉足，你偷左師出去大大聲撻人拋書包，當事人我地唔會知道，冇人會追究或出面質詢番你嘛，呵呵∼

「敢講我地兩個成就之一，係在一向缺乏本地原創，主要從大陸同台灣網頁、論壇轉載文章的本地論壇中，屬於『值得參考及轉載』之文學區之列，同時有價值到大陸同台灣會轉載番轉頭。不過好難講Rock爺幾時又換畫，有偷襯手。」

本身，仲有貨。不過支力喇。加上太多。煲住4eiva Undagraond先啦。呢水貨都話「冇好野」、「冇野聽」，就我都冇計了。

《Watchmen》香港上畫正日寫左原著漫畫，上畫後第二日去睇，收舖去睇禮拜六晚尾場，我坐最後一行，前面除左頭三行全院滿座。想睇，怕難買飛？放心，我諗過左上畫後第一個禮拜六日，你任何時候買飛都好容易要搵到靚位。我份人冇乜文化，唔太識睇戲又懶，抽抽幾位朋友的水算。

如果你本身冇追開美國野、唔睇美國漫畫，屬於典型東洋ACG追隨者（相信佔在座90%以上），千祈千祈千祈千祈千祈唔好睇《Watchmen》。否則你只會同坐我前幾行班MK仔反應一樣，

「屌！套戲好撚悶呀！」

《Watchmen》絕對是一套唔pop的英雄片。典型香港人入場睇英雄片，梗諗住打到九彩加送幾十億特技（但諷刺地，真係打到爆玩特技玩到喊時，佢又會話你冇故事冇劇情，典型香港人本性呀）。《Watchmen》，係一套英雄片？故事入面你搵唔到（超級）英雄，甚至冇反派，再加打勁少而講足兩個幾鐘，大條道理再剪接繁複，又要拉埋美國歷史，仲回歸八十年代，老實講我未見過有人夠薑噉樣拍／有大片商夠膽噉樣投資落英雄片法。個故事其實唔難明，冇睇過原著都白得晒，不過太多人物太多子線太多文戲，又唔多動作，仲要冇卡士，老實講，我直頭覺得呢套戲香港唔應該上畫，同本漫畫一樣，絕非凡俗人士明白欣賞得到。如果《蝙蝠俠》都頂唔順，又或諗住《Watchmen》會勁過佢，都唔需要入場。兩套戲根本比較唔到。但我承認整體黎講，《The Dark Knight》成功好多 － 之一，係兩套戲差唔多長，但最少你睇蝙蝠俠時唔會望住個幾鐘仍然得一句「你地做緊乜」先。

同《Tropic Thunder》、《The Spirit》一樣，個個睇完話爛，唔一定因為套戲爛，有時全因電影公司刻意誤導。香港人熟悉本地市場，點會唔知套戲咩料，會唔知根本唔適合香港人睇，上畫盞聽俾香港人／專家小？志在食第一個星期頭浸嗟。所以宣傳到套戲係英雄動作特技猛片，大家入場先知俾電影公司昆左。重申一次，《Watchmen》冇英雄、冇奸角、加只得一個接近冇出過手的超能人、同冇乜打戲，你諗住有得睇成班超人打到七彩？《龍珠》絕對更加適合你。又或者等《狼人》。本身諗住襯禮拜日早場睇埋《龍珠》夠平，不過《Watchmen》尾場睇完已經一點半，返到屋企支力起唔到身，可惜，因為《龍珠》一定多好多野講。《Watchmen》暫時只得咁少，因為唔太滿意，同我點都會睇多一次，始終得IMax上三級足版，應該唔差好遠（普通院2B版已經黐線地激，戇居的），但一套戲我有心想睇我最少會入戲院睇兩次，《Doom》同《AVP》兩集已經玩過啦，雖然爛。等我入IMax睇埋第二次先正式開始寫。而家，開始第五次睇本漫畫。

至於Project: Watchmen Phase 1 & 2，我唔覺寫得點好，過到自己關，再呃得到路過的傻仔甲乙丙以為「呢條友有料到喎」，滿足唔上唔玩forum又想一嘗網上專家虛榮的白痴心態就算。所以你有興趣介紹呢個blog或者呢篇文俾其他人，我是無任歡迎的，

「口桀口桀∼」

近來城中最hit話題，係《星期日檔案之港男．港女》。錯過左上YouTube上forum搵好容易，因為兩星期夾埋短短一個鐘節目，迴響可能係《星期Ｘ檔案》有史以黎最大，正正講中香港人最敏感話題之一。《星期Ｘ檔案》一向係無記新聞節目台柱，仲要玩港仔港女，我冇要求一定要抨擊香港物質女性先係拍得好，只要中肯同全面就夠，結果比預期中差好多，即使錯過都冇乜大損失。最大過失係製作組出發點已經錯左。睇番《港男．港女》兩部曲之前幾個禮拜檔案主題舖排，再加兩集節目中，兩個性別組幾近一面倒只包括低收入男性及高收入女性，製作組自己有意無意間已按照民間意識為兩性定型，再加只講出現象而冇討論成因，變得非常片面。

一邊廂，港女光明正大地認自己係港女、大大聲奢侈消費加男人俾晒錢冇問題；另邊廂，搵黎一班典型社會中下層電車男呻可憐，同陶傑（全無驚喜的）講講港男之灰，帶出香港地女權抬頭、男性積弱，基本上只附和左而家本地社會對此現象之普遍心態，綜合一個「大家想睇到」的結論（港男繼續串港女自視過高、港女繼續話港仔唔長進，提供新場地俾兩方開戰），不過接近冇探討過成因。節目之潛意識，係一切皆因香港男性不思進取，問題在於香港可以俾男性發揮幾多呢？讀小學時課文已經講，香港經濟以金融同服務行業為主，而邊種人最易進入呢兩個行業呢？自不然係女，唔需要任何學術研究，你睇睇日常生活問問自己就知，無論男性定女性，面對女性總會舒服同輕鬆過面對男性，更多工種更加或公開或不成文只請女唔請男，又或女性晉升機會亦往往比男性大，相信好多人已見識過唔少；男性較容易選擇、「被迫」去做工種，往往屬於低收入體力勞動類。當香港回歸連工業都搬上大陸，本土再加倚重服務業，男性比女性更難覓得好工發圍：你係老細請人做公關，又或調升做對外主任，一男一女，大家學歷、工作表現、溝通能力相若，二人外表亦非唔見得人果種，會揀邊個先？正因經濟型態不健康發展，男性相當極端地分佈於社會最頂同最底，女性則集中於中間偏上層，加上「女人靠男人天公地道、男人食軟飯罪大惡極」等傳統觀念，非因機緣或各種客觀因素之助，香港男性唔能夠及早上到社會上流，好容易俾人／港女睇死一世。好多生計問題，香港女性／港女根本唔需要面對。你問除一除衫就月入十萬的靚模甲乙丙明唔明？

再因香港商業都會性質，港定唔港、電唔電車，到頭來都係用商業價值界定。唔難發現，同「港」有關事物，往往係高消費奢侈品同潮流產物，簡單黎講呃女人錢的一切；「電車」類則屬於時間消費類娛樂品，好似電子遊戲、漫畫。又係小學讀常識都有得讀，「香港社會步伐急促」，最緊要一買到一用完立即有成效，加上市儈風氣乜都講回報，所以時裝同化妝品永遠成行成市，著時風光加萬人敬仰，著完可能賣得番出去保值甚至賺錢，自然全市追隨。香港已商業勢利到一個地步，做／買一樣野賺到錢同使得起錢，加到手立即用得著／晒到命先至值得追求同尊重，如非潮流又或冇商業價值，花長時間投入後只得內在得著，例如文化藝術，只會遭受蔑視。結果搞到潮流都有分高檔低檔，使得起錢買就係高檔就係正途，平野、「窮人先買／睇玩」就係低檔電車男玩意，再進一步演變至即使唔係真正電車男，純粹係追求簡約樸素都有罪，身上面冇件靚野、冇番件名牌行出街會俾人笑。為脫離港仔、電車男行列，冇女的，唯有花錢包裝自己；有女的，自己裝身之餘又要送名牌以顯自己「唔電車」。社會病態風氣，現已加劇到一面倒對男性不公，正如以前男人成日話女人用LV點點點，而家行街唔止女人，連通街男人都用LV附和一番；見到男仔打PS3打PSP、睇漫畫睇動畫就立即話佢係電車男，相反女仔打Wii打NDS、睇漫畫睇台劇睇日劇睇韓劇，點解又冇人話佢地係腐女、宅女之類？又真係醉心於文化藝術之男性，對住一般香港女性時，話題可以係乜野？你同佢地講文學、講電影，唔知你講乜；問你鍾唔鍾意Gucci、睇唔睇《流星花園》？答否的話，回應可能就是「冇見識」、「港仔」、「電車男」。要講，港仔港女可以探討至極廣泛極深入，個節目只按照大眾所想拍出黎，即使搵埋陶傑，都冇講過以上任何成因／「重點」，只曲線講結果，所以我非常失望。

同一個專題，唔少政經雜誌做得更好，例如《壹週刊》好耐之前，有兩期專題正正補完今次《星期日檔案》之不足，一次係訪問本地中至高收入男性，從社會中上層角度講你聽香港女性點樣甚囂塵上；另一則主角係幾位姿色港女，訪問內容可以睇到，物質同拜金確實佔香港女性心中一大部份。但當然，將香港男女衝突描寫到極致，冇得走架喇，實係佢：

「謝安琪《Binary》入面首《入型入格》，聽完立即感同身受啦。」

本來預備好一篇鱔稿今日出街（劉Sir越來越懶了），不過一切讓路，因為前排《勁歌》睇左謝安琪新single，加上五月開演唱會，近排返工勁多野做，都偷一偷懶上網睇睇，原來謝安琪正正今日2009年3月19日星期四出新碟《Yelling》。好在我惰性發作。事實證明返工真係唔應該咁勤力。放工第一件事衝去CD舖買番隻$88，買時收銀姐姐問要唔要海報，見到個封面興趣盡失（《Speed Racer》？隻班馬係咪班馬線噉解？），送《K sus2》張海報我就會要（果時買碟冇要到，後悔呀！），加上個包裝玩到《G.E.M.》噉成本digibook，點知ｄ紙勁薄料極雞開都唔敢大大力，當堂冇晒胃口。聽新碟前，重溫點睇我上隻碟：

我對《Binary》唔算好失望，但憂心忡忡。《Yelling》名同封面都唔知點，最大鑊上隻碟08年七月底出，嚴格黎講隔左唔夠一年就出新碟，經營得咁pop，好怕佢蹈好多流行歌手行得快死得快條路。好在一播隻碟，搞掂。鬧上隻碟pop過頭的朋友，《跟我走這世界》加《獅子山下》的《吶喊》編曲氣勢一流，感動到喊：

「我們想聽的謝安琪、周博賢回來了！」

《字裡行奸》玩nu-metal玩rap，錄音難得地恆、結他solo出奇地正、十分黃貫中的一首。歌詞？睇個名都知想講乜／串乜啦，典型周博賢手筆，梗串爆。

《直角等於三角形》個名夠晒progressive（十分AARNI哈哈哈），funk jazz音樂夠輕鬆，同大家講講做人生活何必常鑽牛角尖、過度執著、追追逐逐？放鬆下啦香港人。適合眾網上專家收聽。

一直到第四首，Cousin Fung+周博賢繼《鍾無豔》再獻《祝英台》，我無話可說了。這是第一首派台歌。我當聽緊楊千嬅cover。會冇咁傷心。玩五聲是特色，但講悅耳，還是大路穩陣的《鍾無豔》，但不論如何，都係聽到灰。謝安琪點解要搞到噉？

所以，聽埋第二首派台《年度之歌》，四平八穩平淡流行曲，只有話好感大過《祝英台》，主因黃偉文填詞。不過唱得好硬，中間ad-lib又有唔達標。但作為演唱會前專輯，同《吶喊》一樣，這種曲、這種詞有其重要價值。相信屬於越浸越好聽果種，所以會花再多時間投入。

苦左兩首，重見光明，再次搭上Seasons Lee的《紅衣天使》，專業評述，是「李嘉強用上法式electro-funk的跳舞音樂，歌詞描寫第一身面對傷者的急救人員，每日爭分奪秒以平常人的身體承受血肉橫飛的心理狀態。亦側寫了醉駕，以及為生計而長時間駕駛導致傷亡的人。」唔專業評述：pop版《亡命之途》。玩得好、旋律靚、唱得正，不過掛住Seasons Lee個名，我嫌唔夠迷唔夠飄，比起《K sus2》個《亡命之途》凌晨版，《紅衣天使》保守好多。

《方玲霞》玩《Monica》，《The First Day》首《臭伉儷》鍾唔鍾意？鍾意就得，超正synth pop retro-disco到爆，聽到好鬼開心，加埋歌詞講追電視劇，細個時邊個未試過？八十年代無敵無雙。

《我最喜愛的歌》係《我歌故我在》新一集，簡單folk rock感覺舒暢，歌詞繼續歌者心聲，亦唱番高音了，不過音越高聲越薄，音準又差左少少．．．同《年度之歌》一樣，創作路向較普通，需要花長時間俾機會佢。

《Binary》首《十字架》粵完再國一雞兩味，新碟又點少得？《歡送會》一聽就認得出，《囍帖街》橫掃2008，唔幫佢整番個國語版點得？可惜廣東話版好聽得多。回到謝安琪第一隻碟《Kay One》，《我歌故我在》都有雙語版，不過一中一英仲要兩個版唔同編曲，各自配合所屬語言，《喪婆》更提供快版doom版兩個選擇。而家冇乜可能再發生。

最後一首《開卷快樂》，好熟，因為出自第一隻碟。隻碟唔係精選，點解又擺番首歌入去？今隻碟有「下集」《字裡行奸》嘛。老實講，隻碟得八首半新歌，無端端放《開卷快樂》入去，似為夾硬整長隻碟。

我係fans，都唔多撐得落《Binary》，強可以好強如《入型入格》同《港女的幸福星期日》，但全碟水準只屬中等，加上《十七度》加《十優生》兩個污點，聽完唔多滿意之餘對新碟睇淡，好在《Yelling》除左碟名、包裝、得八首新歌同《祝英台》四樣（嚴格的話，《年度之歌》係第五樣），信心返晒黎。多謝周博賢創作加填詞，多番電歌band歌快歌減少慢歌K歌，謝安琪應該係噉，噉先合乎老迷們的渴求，最難得仍能為大家帶來驚喜，尤其以佢而家已經完全進入主流之定位，好開心唱片公司肯俾周博賢噉樣發揮，雖然好難重拾《Kay One》同《K sus2》份自由奔放，風格上的確主流化左，起碼舊樂迷接受到同聽得高興，有冇心去做音樂，我地係聽得出的，今次旋律同編曲明顯比上隻碟落多左好多心機，即使派台兩首都係。反而唱開始遇危機。換氣聲比以前明顯、咬字較硬、高音唔夠力、部份歌音未夠準，抵死在理應主打之慢歌現疲態，快歌卻極具水準 － 《拉闊變奏廳》時有呢個狀態咪好囉。隻碟氣氛較正面活躍，相信為配合黎緊演唱會而作，聽左隻碟，相信場show一定會好精彩，除唱仍有所保留。最開心半年製作意外地完全唔行貨，相反「製作經年」之《Binary》，唱片公司投機心完全無遮無掩。希望下隻碟發揮空間仍然可以有咁大／更大。

番外篇：買完隻碟，聽左一次，已經奔走相告（冇走，打電話嗟），係噉同人講隻新碟掂快ｄ買。回應甲，是

「我晏晝已經上網用三秒鐘download左隻新碟啦！乜你咁慢架！」

故事教訓我們，唔download俾錢買音樂的人，果然都是白痴仔。聽香港歌算好了，起碼隻碟出左先至有得download。聽外國野、聽metal？你買碟果陣人地已經聽左個幾兩個月、「聽到悶」，先至笑得勁。好在我膚淺。

靜左好多日，因為近排多應酬，禮拜二公司食飯，星期三紅燈山丘中聚會，禮拜四TRHK《復仇三部曲》電影版罪，禮拜五公司再食。公司一星期連食兩餐咁多，皆因有兩個同事走，生意唔好公司又多事幹，上年經理已經密謀走人，拖下拖下到今年拎埋雙糧先正式遞信，有個同事又無聊跟佢一齊走，幾個禮拜前唔見左人，因為經理級要三個月時間通知，交低埋手尾今日先last day。禮拜二老細請食飯歡送，既然老細在場有乜好玩，所以琴晚幾位老同事特登再出黎食多餐。我永遠準時放工，再同經理飛的，六點三已經去到目的地女人街瀧澤，其他人仲有半個幾鐘先到，兩條友有理冇理係噉點野食先，雖然我不嬲唔多食日本菜生冷野免問，齋食串燒＆炸雞軟骨、炸豆腐同炸薯餅三樣都夠，我個位全晚長期被以上幾樣野包圍，再送加一大碟豬軟骨同肥牛煲一個。（去到邊都係無限肥牛打邊爐．．．）

「除左坐得個半鐘同$148一位之外，呢間野真係唔錯。下次大家可以一試。不過確實貴左少少。」

食得個半鐘俾人趕出門後，大家企街企左成個鐘（全因幾位煙民要叉叉電），食多個甜品至散band。今日先知道原來我間公司好多野玩。呢位經理絕對係老臣子，講歷史我公司開左十五年都有（其實唔止，如果連開廠前日子都計的話），佢做左九年，破晒公司紀錄。想當年佢剛入黎做係沙士之前，當時極度好景，全公司基本上只靠一兩個大客，一個客落一張單幾千萬美金夠全廠千幾人年頭做到年尾唔停，外國又多水魚，基本上有客問價求祈講個價錢差唔多一定有單做，利錢高一張單可以賺三成甚至五成，有時多生意到連有客問野老細加老闆娘都唔志在懶理，公司可以成個星期冇幾多個鐘頭見到佢地兩個。既然唔使做公司都賺大錢又冇皇管，成班人自然日日返工當玩，鼠落街行街玩食野大把人，坐公司打機睇書睇小說睇VCD已算安份守己，最激一次，成班人圍埋睇鹹片，仲要清一色女同事。

「成日以為我地而家返工已經好頹。估唔到以前班同事先真正叫做返工返到癲。」

激成噉，結果老細出手怒插，市道咁好班人都唔多志在份工，你插我，我咪走囉，第二度搵唔番呢份人工咩？果時係全公司走人走得最勁果陣，跟住沙士大仆直冇晒生意，沙士完左大陸工廠惡性競爭開始唔掂，加上上網搵供應商越來越容易，往日水魚全部醒晒水知道俾老細昆左唔返轉頭，跟住一年比一年衰，兩老長駐公司睇實盤生意，往日光景不再。唔知係公司風水問題，定世紀黑仔王劉Sir入左去做關係，公司某幾個位寧舍邪，坐果ｄ位ｄ人一係做一陣就走，一係做野甚至個人好有問題，所以公司堆人唔係做左最少四五年，就係做得一年都冇，相當極端。素來不問世事，今日聽其他人講番，先知原來一直以黎好多人 － 特別女同事 － 大把秘史。

「近得劉Sir，果然冇個正常。」

問問經理，過埋今個禮拜有乜打算？差唔多年紀退休，而家經濟咁差想搵第二份工都未必咁快搵到，放番幾個月假先。公司有個非常戇居的規定，就係唔可以放長假，定義係長過三日（包括禮拜六日），換言之除非紅假，否則唔使旨意可以一次連放四五日假期，申請都唔批你，就算批都日日打電話叫你跟野同連線返公司部電腦做野，放假等於冇假放。難得而家有長假又平，經理諗住去旅行幾個星期先，真係搵唔到野做，大不了返大陸住，上面難捱起碼叫平過香港，同始終仲有好多大陸公司鍾意請香港人。講到我都想跟佢一齊放番個長假。實在太多野做。四月擺展覽必忙；五月，仲死。

「好想放假呀。」