段記

4/1/2010 MON

而家好似一年過得比一年快。好多野未做／未做好，2010年就到。2009絕對係我成世人其中最doom一年。人人都知metal佔左劉Sir生命好大部份，獨立界付出七年後決定抽身離開，可見對本地metal界睇得幾灰幾化。或者走得合時，跟住遇著老豆老人病心臟有事，隻狗共處七年後走左，送佢走果晚燒衣時老母跌斷左隻手而家仲打緊石膏，然後我病足成個十二月。單2009下半年已經doom無可doom，屋企咁多事發生，連帶呢度地頭都荒廢左。踏入2010，新年快樂之類我從來唔識講，每年新年，我永遠係同一句：

祝大家新一年

講得出　做得到

當然，在香港，能做得到者比若干更罕有，所以先每年都恭祝各位，雖則過來人經驗，做得到者唔會高尚高班過人，只會俾其他人笑。上幾個月精神壓力沉重，加打Diablo燒左好多好多時間，基本上全個十二月冇乜出過街，月底兩個長假都係御宅渡日。要開始執番筆了。希望上年咁多場show，今（半）年內全部回顧晒，及寫番多些少影評同樂評，而其實2009睇多左書，寫作亦想拉到去文學方面，又想寫寫漫畫。同想開始《2009 Retrophrenia》。但，首先要完滿結束《2008 Retrophrenia》。

「希望我都能夠講得出做得到。」

坐言起行，2010年開年作，是：

5/1/2010 TUE

從《跟我走》到《載我走》：
一名謝安琪hardcore fan淺談
2009壓軸之作《Slowness》

以下是劉Sir幕後真情對話與花絮。音樂基本上上面評論已經講晒，反而想講多ｄ「裡」一點的同題外話。其實2010開年作本身唔係謝安琪新碟，兩個月前已經準備左一篇難得夾久違的metal碟評，不過隻新碟聽落發覺好多野寫，加上正路計劃隻碟會作為年度回顧《2009 Retrophrenia》頭炮，但當連《2008 Retrophrenia》都去向不明，以免出街無望，不如先用《Slowness》開年。我諗呢隻碟其中一樣最值得講係正式聽碟之前：我敢講我係全香港metal界（呢樣絕對唔難），甚至全香港其中一個最早開始追加最大謝安琪fans，你睇我為佢投入過幾多時間精神以及文字自然明白。而作為買碟唔download的（前）音樂界工作者、作為謝安琪大fans，《Slowness》是冇幾可會先試聽後睇定至買碟的一次。獨立音樂界打滾多年心態，令我明白同相信好多，其中一樣就係一個人一隊樂隊我係鍾意我係支持，出新碟唔係衰到真係過唔到自己關，都會俾錢買隻。當謝安琪簽入環球新藝寶，已經預左總有一日會出事－「出事」唔係《鍾無豔》或《十七度》咁碎料，而係會有隻碟由頭pop到尾。雖然《Binary》已經充滿危機感，《Yelling》總算回勇，但半年幾又新碟《Slowness》點都擔心，睇見封面更加牙煙，初時睇唔止認唔出係謝安琪，甚至以為全幅CG畫黎，心諗邊個歌手咁過癮會畫畫做封面？後來知道係佢新碟封面，就知道大鑊了。從以前唱《姿色份子》到今日做姿色份子（冇計，日日出function見報，唔想唱片公司都要你噉包裝法），好懷念《死亡筆記》拋蘋果的《K sus2》。

大鑊到，之前咁多隻碟除左精選《3/8》，我全部係盲目地歌都未聽過已經出碟即買，向來唔太鍾意事前詳細試聽之餘想保留驚喜，上兩隻聽得出有事，新碟睇埋封面唔肴底都唔得啦，已經好壓制好壓制自己千祈唔好好奇，不過就係出碟之前果日不經意聽到網上出左街其中一首，灰左，反正都係試埋另外兩首，完全冇驚喜甚至之個心灰晒咁滯，亦令我第一次對於謝安琪會抱觀望態度唔係新碟一見街即買。隻碟出左要試自然更加容易，就算似我呢種唔download人士，網上仍有大量（半）合法途徑俾你聽晒成隻碟，可以上本地或大陸stream網，更簡單YouTube都有得你逐首歌搵黎聽，所以想聽唔係難，你肯花時間同唔嫌麻煩就可以。冇錯你會話乾脆直接成隻download落黎咪仲簡單仲慳時間仲方便？正如你上Yahoo打謝安琪三個字加個碟名，超過九成網頁都係「直接下載」、「音樂分享」（諷刺係你連睇十幾版都唔會搵到幾多個網唔係叫你下載，而真係講隻碟玩成點），隨便click個立即成隻碟齊晒，仲使乜好似我咁戇居上YouTube一首首播咁蠢？除因原則問題，仲有當你download晒成隻碟，無論（講到）隻碟幾值得買自己點樣支持，到最後你根本唔會買幾近必然。上各大forum睇就知，大量「支持地下音樂」的網友，每星期甚至每日download不知幾何，每隻碟都係「試聽」，「試聽完好聽我會買番隻碟」，但到頭來有幾多人真係有買過「試聽完好聽」ｄ碟？可能一隻都冇，又或肯買都只有買最出名最多人講，即係到頭來話自己聽地下音樂但到頭來都係冇支持過。所以今隻新碟買我一定會買，始終謝安琪我實支持，但上幾隻碟已經受過多次教訓：每次隻碟出左一兩個月就有新版送歌送DVD，雖然新碟已經有埋DVD大大盒，我始終型住會再有第二版，倒不如等過年逗埋利是，到時有新版又好冇新版又好先買都未遲。雖則劉Sir咁黑仔，就算有新版，應該都三月頭至會出。

「自然，人人覺得做賊覺得奉旨享福是對的時候，你仲做苦行僧，就等同於撩人笑九你咁戇九。是時候重溫一下經典的《鏽色幽默》了。　」

香港歷史及地理所致，整個華人地區好多特別現象唯此地獨有，正如香港人成日笑大陸，其實自己笑之餘跟住人地黎做，但從來只跟一半即只學衰野卻唔會學好野，但自己做之餘又要笑內地同胞點衰，又或借他人之片面為自己全盤思想行為合理化。好似我聽過有人無限download唔買碟，論點係「大陸人都係噉download唔買碟啦」，但當然唔會提到無論佢點「窮」法都有錢過download唔買碟的大陸人（當然，香港人的錢係用黎玩用黎蒲用黎買名牌，用黎支持音樂實屬不當），另近所有香港人係為自己滿足而download，但大陸甚至台灣調轉好多人係為人群服務而download，想知分別好簡單：大陸或台灣熱心網民download一隻碟，聽完可以寫番一篇文章幫你做導聽甚至音樂研究，香港地最熱心果班，卻只會得forum或者Facebook「近排我聽乜野」、「我搵到隊正野」、「我介紹隊正band你聽」，冇錯差唔多全個大陸都download，但我反而會接受甚至欣賞，除顧及地方因素，仲有對音樂份認真心態。你可以話我認同大陸人「將功補過」所以內地人download可以合理化－當然，我係指熱心一班，樹大有枯枝，如香港人式潮童亦非少。呢個「網上權利、義務與責任」課題其實我早已思考過寫成一篇文章－又其實，好多題目我文章化之已有基礎構思－但一如往常，香港地寫黎有乜用？你睇番上面所講香港人心態就知，講晒出黎都唔會有改變、唔會有意思，香港人未至於白痴到盡未蠢得晒，好多野其實睇得出自己心知，不過就算明都扮唔知，可令自己更易生存同得到更多利益。加上呢度唔係講metal，係講pop野，所以再唔停就收唔到。

回到謝安琪新碟。我諗講左咁多咁耐，你都估到劉Sir對《Slowness》十分唔滿意，謝安琪同周博賢從來勁在一隻碟可以首首歌唔同歌路，當然寫歌寫得好是無能敵如《Kay One》，高不成低不就如《Binary》就會好歌唔夠多兩頭唔到岸。我鍾意《Yelling》就係佢多元化得黎水準夠平均，當《Slowness》出左甚至僅僅試聽出前三首，就知呢隻碟已經冇晒當初吸引到人的一切，又唔係唔好聽，你當主打格的頭三首歌唔存在由第四首開始，隻碟其實唔算差。《衣帽間》是正的，某程度上因為全隻碟得佢叫快歌，同歌詞較有意思，不過首歌其實好陳慧琳。英師傅聽完佢自己隻碟加睇過佢現場唔算好識欣賞，缺點在太舊式未夠創新，但佢作《藝妓回憶錄》同《最後晚餐》兩首真係唔錯喎，特別前者十分王菲，最重要謝安琪唱歌仲肯試新野嘛，以前玩粗聲粗氣玩怪腔，今隻碟大路唱法都去試唔同聲唱，爭番唔少分數，而且每張謝安琪唱片總搵有首歌似周博賢徘徊獨立與主流間心感兩難繼而憑歌寄意，今次明顯係《藝妓回憶錄》，自己為音樂界出過力，箇中道理及苦水絕對感同身受。Seasons Lee得《賴床》一首夠晒，佢而家好似幫人寫過仲強過幫自己。而屈記首廣告歌原來有album版《身體髮膚》，而且好掂。最metal（．．．），就梗係CityBeat劉諾生首《替你高興》。你問甚麼是CityBeat城市節拍？一隊外藉人士唱中文歌的陳年「white rock」樂隊，為應此背景，周博賢手詞亦襯晒非常地white，不過讀真歌詞，潛台詞是「你有絕症噉就死左，你就好啦，唔使再對住呢個仆街世界」，其實好(doom) metal，原來係white doom pop黎。當中又有一重諷刺：作為一支香港樂隊，你上本地網搵唔到多少資料，反而海外維基百科總舵會有佢地簡介。可見香港人音樂態度有幾－套用回上面香港與內地下載問題討論之用語－熱心。實際上飛左頭三首，我對隻碟印象唔太負面，負累在於謝安琪三個字，隻碟任何一首歌交俾其他任何一個香港女歌手唱，都比由謝安琪唱合情合理，我逐首研究Ｎ次後所得印象，《Slowness》係果種冇乜邊首特別突出，但不斷重播又唔會話悶想佢停的ambient專輯，太過簡單，我成日覺得隻碟為趕年底出而搞到噉。尤其周博賢今次填晒全隻碟歌詞卻每首歌都有若干雷頌德／甄健強式古怪文筆，技術層面輸左思考層面亦接近冇晒社會性、思考性、資訊性話題，感動位冇晒奇峰位冇晒內容表面化，同音樂一樣好淡好淡。所以我成日覺得隻碟為趕年底出而搞到噉。唔好話為搵錢。從metal角度詮釋（．．．），可能係OPETH症候群：

「《Deliverance》聽到爛、death metal玩到悶，整番隻progressive rock《Damnation》中和一下，唔錯丫！」

如果下隻碟仲係全慢歌，我真係唔知點算，慢得黎冇晒想聽的技術位至慘，生完仔爆完肺之後，新作中已經搵唔到《3/8》、《後窗知己》、《我歌故我在》呢類「technical pop」，即使舊歌《我歌故我在》而家live都有點危危乎，《後窗知己》好似直頭冇玩了。我最怕黎緊越來越多慢歌，遲下佢演唱會變到好似陳慧琳演唱會噉，入唔入場睇都要諗諗－當然，到頭來又係會照俾錢買飛。或者我真係同時代脫節了。正如《囍帖街》好多人話好拎幾萬個獎，我卻從來唔覺有大家所講咁天高，不論曲詞之前幾隻碟絕對不乏更佳作品，何解《囍帖街》你至留意？同類例子是官恩娜：其實已經出左兩三隻碟，之前出極唱極你唔理，何解《超級巨聲》幾句先話佢勁立即潮晒？唔係歌事、唔係實力事，邊個能利用媒體或得媒體之助，邊個就贏。追開加業內如我好易睇得出事實所在，同入大label的確好好好重要。年頭的「《Deliverance》」《Yelling》冇一首咁街知巷聞，坊間反應亦唔太正面，好正常因為走番初期偏獨立路線，拉官恩娜落水解話，佢而家俾人捧到咁高一回事，唱番《地平線》都未必個個話好聽啦。《Slowness》走最穩陣路線，我諗迴響應該會好得多。但我真係唔識欣賞。所以往年謝安琪出親碟基本上可以立即成為我年度大碟，今年《Yelling》只叫做有機會，《Slowness》連競爭之實力都冇，好簡單你搵王菀之隻《On Wings of Time》出黎，唔使成隻碟比，單聽聽你一開以為播錯碟的老上海《她扔了根火柴》、低能但抵死的《低科技之歌》、有首歌可以cult到叫《粒糖有毒》（放心，音樂同歌名一樣黐Ｑ線），你就知《Slowness》要爭年度最佳大碟或次一級年度最佳中文大碟，唔好話同人鬥，根本未入流。何解二人差唔多時期出道，大家同樣以玩轉香港樂壇上路，王菀之到今時今日仲可以越玩越黐線每次出碟仍能夠有新突破，當初以突破一切規範成名之謝安琪／周博賢反倒回到規範之中？

唔搵王菀之，單拎評論中提到之《Uni-Power》比較，都贏成條街。回想多年前2005 Roadrunner發起呢種「intra-crossover」整左隻《Roadrunner United》，連Nuclear Blast同Century Media都癲埋一份玩label群星亂入創作，估唔到呢股metal風會吹到黎香港樂壇（．．．）。初時我對隻碟全無期望，掛住「正能量」乜乜物物諗住又係抽水呃錢之作，點知唔只得個包裝大到喊歌都出乎意料地高水準，基本上除左拎黎做教育電視主題曲都嫌白痴的《人人英雄》（2009其中一首我最厭惡中文歌，簡直低Ｘ能）、基到爆炸的《義不容情》（我認同張敬軒唱功無敵，但佢個人實在比power metal還要基）同就番譚詠麟而娘到喊的《相愛維命》（唔係有陳慧琳，呢首歌會同《人人英雄》下場一樣必飛），全碟不論曲詞還是唱都冇乜好彈，我份人咁懷古《汽水樽蓋》食到應，而睇破本地獨立音樂界自然非常受落有MR.又講download的《未卜先知》。大家同樣飛三首（《Uni-Power》係四首：《人人英雄》仲有個死之不足惜的bouns track國語版），但《Uni-Power》點聽都滿足過《Slowness》，兩隻碟都玩主題，如果可以揀，寧可佢選擇其實好on9的正能量放棄所謂「緩慢」，同陳慧琳首《文字流淚》根本就係典型謝安琪啦，而我會想佢唱《汽水樽蓋》，多過唱自己新碟入面是但一首，其他好多歌歌詞就更加比《Slowness》的周博賢更周博賢。

「點解？？？」

有幾首好歌（「好」只是相對而言），唱進步左又實驗左（單講CD，唔好同我講佢live乜乜物物，睇過佢初出道仲唱緊商場果陣點樣勁到癲，都知入大label接多左job加生仔爆肺影響有幾大），卻不足彌補眾多缺失，即使當隻碟從未出過，我都完全唔會覺得有損失。按進度，暑假檔期左右應該又會有新碟。求神拜佛《Slowness》只係《Damnation》。同唔好隔一陣又多一隻，我理想中之好歌手，全年主力製作一隻碟已經好足夠。係，我都知香港好難，你睇TWINS一年出碟數量，已經多過晒謝安琪咁多年夾埋就知啦．．．

題外話：見近排無聊開始執番Facebook，自己覺得值得的文章，都會嘗試放上Facebook流傳紀錄，可算是懶人劉Sir的破天荒嘗試。不過下一次會出咩文，甚至仲有冇下一次，自己都唔敢講定。太多project在手。

7/1/2010 THU

This is Metal之
單車奇俠勇鬥電單車黨
a.k.a.「這就是正義！」

我老豆係完全唔睇香港電視台果種人。所以佢唔出街的夜晚，屋企部電視一係播NOW睇波或財經，一係長開有線，由以前五六十蚊個月仲要完全冇廣告睇戲一take過開始，睇到而家廣告拍得住無線咁多一個月仲收兩舊幾水，係好叉貴但咁多年慣左，加本地製作即無線睇都晒氣，唯有繼續科水。不過兩舊水其實好值，齋體育台夠佢睇足成日，National Geographic同電影台亦得，再唔係新聞台日日播足廿四個鐘，不過最好睇其實係大陸電視台。唔需要講劇集，唔計娘到爆或太風土果ｄ，內地劇尺度闊得多題材可以好敏感好激，「仆街」同「陷家Ｘ」之類「輕粗口」甚至出到街唔使剪（無線同亞視以前都得（我講緊最少十五年前．．．）），喜劇又真係舊時港產劇港產片式搞笑唔係自以為好好笑實際得編劇自己一個識笑，以前香港人笑大陸ｄ野老土，大陸電視劇跟住香港走，而家調轉頭超越番，因為香港咁多年黎冇進步過甚至一直退步，越睇越唔明點解如今港產劇可以比以前的大陸劇仲要低能、點解無線仲可以拍咁多垃圾片出黎，寧願佢同亞視一樣早日收皮唔好拍劇外購好過。唔想煲劇，睇新聞節目啦，大陸日日都咁多奇案奇聞，當笑聞可以笑足你成晚。下面係近來其中一單我最喜愛新聞：

「條友好很metal呀！！！」

其實已經係舊聞，事發上年2009聖誕前，不過果排多假個人懶散，過埋年而家先回顧番。來龍去脈是這樣：有個女人俾兩個賊搶左手袋，有個單車男聽到，見兩個賊架電單車埋近身，立即落車將自己架單車飛埋去，當堂掟到兩個賊仆晒街，單車男行埋去時，見兩個賊起身立即著草（失敗也！初時我以為佢行埋去係想打柒兩個賊！），好在公安及時趕到，好似捉到其中一個，單車男就執番個手袋俾女事主，之後無名英雄地消失，連自己架單車掟爆左都算數。電視台查到英雄出處，去佢做野度搵佢，不過單車男拒絕接受訪問－驚俾人笑佢俾兩個賊嚇走，又幫手捉到賊兼掟爛架單車但冇獎金冇獎品，所以唔肯上鏡卦？雖然條友飛完車見兩個賊追佢旋肴底而唔係同佢兩個打過令人失望（．．．），仍足夠令單車男成為2009最metal人物之一。

單野知得咁仔細，因為我唔係睇上面條片，我普通話咁屎點會聽得明呀！而係經有線睇珠江台《新聞在線》。個節目好比大陸版《今日睇真Ｄ》，特色是單單新聞都係「突發猛料」，加每次收到料「在線記者」都會「立即趕到現場」（雖則趕路期間往往用左幾個鐘甚至隔日，趕到已經咩事都冇），最重要講廣東話我明發生緊咩事嘛，而且主持們異常投入，悲情位痛心疾首，激動時亢奮莫名，一段簡單新聞講到廣播劇咁感動人心，呢份演技同投入香港地莫講資訊節目主持－我只諗到《今日睇真Ｄ》歐錦棠夠鬥－連正式演員做戲都及唔上佢地呀。再者大眾化時事新聞節目本地都冇剩多少，就算有e.g.《東張西望》好多已經變成廣告雜誌，與民生關係比以前疏離。香港地過左《今日睇真Ｄ》時代已經再冇任何一個同類節目特別無線製作及得上（而家唔知完左未，大陸曾經有過個節目叫《今日睇Ｄ乜》，真cult）（再一例證說明大陸好多野其實食香港水跟風，但而家先駒香港反而自行收皮無心與內地競爭，是抵死的）。

唔比內容、唔比表達，再次一層，單比人，都贏香港／無線。其實無謂多講，你睇香港男性仲有幾多個唔係北望神州就知根本無比較必要，大陸咁多電視台競爭大，加上地大物博人才諸多，上得鏡總有番咁上下，而《新聞在線》位女主播雲菲，原來以前係私影妹黎，大陸同香港贏左Ｎ個model比賽之後入廣州電視台做節目主持，香港好鍾意幫人起別名叫「乜乜版乜乜」，大家都讀書時做model出黎社會做主播，你咪叫佢廣州曾美華囉呵呵。

「幾時都話做女易搵食易發達過做仔架啦。」

日睇夜睇，覺得祖國實在強大，全世界冇幾多個國家會成日出現如此metal的新聞，而且做完Punisher人人包括傳媒讚你做得好叫你繼續努力，所以我愛強國，在一個以暴易暴是正義的社會，生活比荷里活電影更緊張刺激更精彩。搞到好想返去敬仰一番添。

10/1/2010 SUN

「你覺得一個冇文化市井metal友，
識唔識得睇香港少年鋼琴家黃家正
傳奇紀錄片《音樂人生》？」

12/1/2010 TUE

上年年底休養多時，踏進新一年活躍番，開始回復勤聽歌、勤睇戲、勤寫作的生活，近來仲勤睇書。以前積落唔少漫畫同書－真係得字冇圖果種書，劉Sir份人咁頹，會拎落買落咁多真係要用腦睇的書，自己都唔多信。過左年底忙到碌地時間，距離第二個新年仲有一個月，中間一段中空，我回復到九點幾返到公司開完機已經放得工的渡假生活，好多同事襯機銷埋上年放剩ｄ假，今日晏晝全公司得四條友咁大把。唔係想留定假月底新年放，呢兩日又有客要見，我都想射埋一份波呀。

反正多時間開始活動，新年第一次消費買番聖誕同新年禮物俾自己加行行街先。今年一開始有兩套戲我非常大興趣，我不嬲鍾意睇懶真實的手提機片，前年係《Cloverfield》開年，跟住有《[REC] 八十分鐘死亡直播》，今年終於出續集，同期仲有號稱「史上最驚嚇電影」之《午夜靈異錄像》，《Avatar》想睇IMax版相信過埋年先有機會，成個月都夠晒戲睇，今個星期《八十分鐘死亡續播》，下星期《午夜靈異錄像》，再跟住個禮拜，睇埋白告度撻番黎的「《八十分鐘死亡直播》前傳」《15 Minutes死亡直播》（呵呵）。

「唔係講笑，心思思，真係好想睇王晶搭劉華的『山寨版《Iron Man》』《未來警察》。一定cult過所謂『王晶第一套cult片』《旺角監獄》！」

正式的聖誕加新年禮物是這一份，1992年的《鐵甲威龍對未來戰士》，作者係Frank Miller，即係冇佢就唔會有而家的蝙蝠俠、唔會有《Batman Begins》＆《The Dark Knight》，自己代表作有《Sin City》同《三百伕》果位名漫畫家，《RVT》時仍處於佢高峰期（咩叫低潮？睇畫漫畫畫到覺得自己識得拍戲的《幽靈奇俠》，立即知咩叫廢無可廢），可能因為佢出名之Marvel同DC一線角色作品係噉玩心理係噉灰爆，自己創作又多數睇戲（我相信《三百伕》套戲同原著漫畫分別接近零），《RVT》非常巧妙地將兩大經典八十年代電影機械人兩個不同世界二合為一crossover，雖然佢作太多呢套幾近冇乜知名度，個人而言係最佳Frank Miller作品加美漫遺珠經典。

全個故事四期完夠簡短，美漫向來唔鍾意儲單行本專攻合訂本，但本野差唔多廿年前出仲要細label（well，不論以前還是而家，其實電影同玩具以外，有幾多人會留意鐵甲威龍同未來戰士？），本合訂本一早絕版，搵香港已經冇幾多間的美漫舖幫手都訂唔到，網上搵一係唔夠人必一係郵費很貴，近排無聊手痕上網見撞到有人放全套單行本價錢亦合理，免錯失良機先執為快（雖我覺得，老實講，又會有幾多人爭，當得我一個人必時？）。除左好睇，仲有舊時漫畫的有得睇有得玩：

「我的最愛ED-209！」

而家除左明玩野的幽默路線漫畫，仲整呢ｄ紙板公仔俾人笑啦。不過我好受架呵呵。老實講，追美國漫畫是好支力的一回事，唔同日本漫畫獨立作品營運，美漫企業化經營令公司全部主要角色生活於同一個世界，十幾條線間大把互動換言之有時一睇唔止要睇一本而要睇幾本，再加無數平行宇宙同空想外傳，有心追分分鐘一個禮拜買落，仲多本過蠱惑仔漫畫高峰期全港最旺時所有夾埋。加上每隔一排就會黎個牽涉全公司所有人物之大事件，想知道晒整個故事來龍去脈所有枝節要跟足幾個月睇百幾本，未講錢時間都襟計啦，當你三個字睇一本（算快了，美漫咁多字仲要查字典），都要睇廿幾個鐘至完工。DC人設到今時今日仲係得個笑字（一個角色黎到廿一世紀仲可以用番六七十年代個設計，點頂？），心理同哲理亦冇處理得咁好，咁多年都係追Marvel，不過強項始終是細規模故事，論玩晒全世界大單野都係DC做得較好，可能因為DC好多主角級人馬設定得太神級e.g.超人，平時冇乜癮但全世界打到七彩時就好玩得多。DC向來唔太鍾意Green Lantern因為覺得用氣整武器構思好白痴，即係你做孫悟空有一百萬億能量鬥氣，元氣彈炸到對手屍都冇埋，反而用氣整枝手槍仔出黎射人咁戇居，但而家Green Lantern差唔多成為DC命脈，兩年前打晒成個宇宙的《Sinestro Corps War》出乎意料地震撼（或者因為一直對Green Lantern印象太負面），《Batman R.I.P.》後而家到「DC Zombies」的《Blackest Night》，玩喪屍興趣自然比《Sinestro Corps War》更大，但仲未出完加太多唯有放埋一邊，同硬覺得純粹出個大event順便整個超自然理由俾Bruce Wayne復活，始終冇佢點叫得蝙蝠俠？反觀Marvel可能《Civil War》打得勁又有政治意識，仲連美國隊長都殺埋義無反顧（《Civil War》相信是美漫史上其中一個最成功event，《Wanted》Mark Millar喎），跟住放逐Hulk到另一個星球成《Planet Hulk》同樣感人，點知回歸地球復仇之《World War Hulk》美術加故事同《Planet Hulk》相比簡直一個天堂一個地獄，《Secret Invasion》玩外星人秘密侵略地球已經唔太夠迫力，反派借勢上位掌權令整個美國正邪對換之《Dark Reign》某程度上唔算一個event，已經幫整個Marvel世界建立一個全新宇宙觀，我非常欣賞Marvel好夠薑拎自己幾十年招牌噉樣較飛，但因為《Dark Reign》環境性重於事件性，每條線都鬆散冇晒方向，幾個月以黎而家唔知到底佢想點，近排已經唔係太想兩間label主線，反而留意多番一向喜愛之小品同中短篇，因為主線創作不論作者想點發揮總有個大方向，獨立故事規範細得多想點樣突破點樣顛覆都可以常有驚喜，而且自己一個故事就算冇足夠前提認知都唔會睇到一頭霧水。另一原因睇晒全集唔需要花太多時間，亦較容易買同儲。

「其實好懷念漫畫送紙板公仔的時代。內容想法意思都較簡單。」

所以睇《爆漫》。日本漫畫好耐冇留意，新作中《D.M.C.》仲會追，只因metal之名，有要求實際上睇完頭兩期可以放棄。更得人心是《爆漫》。除左有《死亡筆記》班底坐鎮，而家冇幾多日本漫畫仲搵得到《The Wrestler》份男子氣慨，單為其中一句，已經明白要睇：

「男人有男人的志向，女人不會明白的。」

當日本萌風當道，連帶永遠崇日的香港靚仔靚妹基過power metal、灰過emo，《爆漫》之存在價值不止於藝術上，更具文化意識層面意義。

「不過有樣野，真真正正灰過emo：買左最新第五期之後，先發現原來我冇買到第四期，而旺角區我知道之漫畫舖全部得1235，就係第四期搵極唔見有。黎緊又多個藉口行街了。」

退休之後好耐未上過皆旺。TRHK客串派報僮暨香港娛樂界與模界代表Bee哥，定期幫我走勻香港九龍各大主要免費雜誌派發點，舖頭積埋積埋一大袋，反正等睇《[REC]2》攝時間上去拎埋先。重點是上面兩本。新一期《re:spect》同《Pandaa》有謝安琪做封面，就算正文冇乜野講都照拎架啦！實際上，的確冇乜好睇，雖叫訪問內容比唱片公司出碟時出街份新聞稿多唔出多少，部份詞句用字甚至照搬改都懶。驚喜欠奉，某程度上幾近所有本地流行歌手訪問皆是，就同兩本雜誌封面一樣，唱片公司俾得出乜，到頭來你就接收得到乜，冇多冇少。冇計，音樂內容在本地流行曲中又佔多少比重？

「硬銷時間：劉Sir所撰之從《跟我走》到《載我走》：一名謝安琪hardcore fan淺談2009壓軸之作《Slowness》，都唔差架，我覺得，口桀口桀～」

摷書時搵到袋入面有袋野，原來係劉Sir收檔後接手幫佢睇舖的靚女Olivia姐姐有好野。除左公司會計靚女之外，2009年唯一一份人地送的聖誕／新年禮物。

個名夠晒型，Demon in the Dark，點睇都heavy metal啦。係乜黎？請睇睇拆禮物後，劉Sir同Olivia姐姐一番對話：

「喂！你送舊芝士俾我呀？」

「唔係芝士黎架！」

「我都知架喇！」

「係呀！唔係芝士，係番鹼黎架！你點知呀？」

「食左之後。」

「．．．．．．」

最後，上左去旺電佛爺度撻野。中五畢業之後，冇書讀的佛爺開始投身IT界，入旺電110 Digital做full-time part-time，我讀緊書時佢剛入去話係做兼職（但除左呢份工冇其他野做），中學上到大學都係兼職，我大學畢業出黎做幾年野仲係兼職，做到五十蚊個鐘仲要一星期只返五日sales工你見過未？都算兼職之神了。不過full-time part-time生涯終於結束，今日上到去，剛剛好遇到佢間舖last day，老細送野上倉得佛爺一個執緊野。香港地乜野都年年加價，尤其租加得最勁，佢做緊旺電個舖位細過你間睡房都要六萬幾個月，賣電腦野幾十蚊幾百蚊一件，計埋人工燈油火蠟點維皮呀？就決定收檔了，老細搬上樓做砌機，做左咁耐總跟住架啦。一間公司做十幾年都算犀利，想當年讀書起已經成日走上去混吉同呃折頭，而家見到佢十幾年地頭閂門大吉，一個時代結束了，不勝唏噓。呢份唏噓我係發自內地心明白架。見佢執舖留低好多代理商耐唔耐進貢的贈品，最實用係呢個TP-Link水壺，差唔多身邊所有人裝親無線router都係用佢牌子，出router出到出水壺就真係第一次見，見多到擺滿成個櫃，立即笠番個先啦。我個袋唔夠位咋。唔係肯定有幾多撻幾多呀。

反思一番，近幾個月頹左好多，冇以前update得咁密之餘，亦好耐未試過噉樣純粹無聊地享受生活了。經過上年年底全家人人有事狗都死埋咁多問題（「灰過emo」呵呵），今年要玩多ｄ至得。

15/1/2010 FRI

史上最Ｑ的廿蚊紙

「某日食飯俾錢，打開銀包拎出黎俾人彈番轉頭，先睇到原來張廿蚊咁玩野。我唔知道創作人係邊個同張野幾時落到我手，不過我應該會係佢最後一個主人。」

17/1/2010 SUN

通勝指點卦，近兩個月紅事一次過殺埋黎，十六號剛剛星期六到Queenie擺酒，朝早文化中心行完禮，距離夜晚去飲仲有七八個鐘，打算連睇兩套戲，不過之前走左去文化中心睇免費音樂會先。朝早文化中心大堂有香港中樂團玩「standards」，即部份成員上台夾大家耳熟能詳的中文流行歌，好唔好見人見志，我睇極都覺得似佢地想綵排但搵唔到場就搵個大堂頂住先咁唔似正式表演。與其係噉，不如講番一個月前另一單囍事後的另一場香港中樂團音樂會：

香港中樂團呈獻：動畫世界

21/1/2010 THU

一個香港教育界棄徒幫一位
現職香港小學科中文教師製作的課堂工作紙
a.k.a.
「全靠一條劉蛇，有人請劉Sir食串燒大餐。」

「玩法好簡單，用之前個詞語最後一個字做頭，創作一個無別字、無揩音及完整通順的二至四字詞，一直從蛇頭作到蛇尾。Play when you are bored.」

話說Sam少教緊間剛考晒試有成個禮拜空堂，佢改卷果陣要俾野學生做，班靚仔唔肯做作業連看圖作文都唔制，要諗ｄ活動消磨時間得黎班學生肯乖乖地自己玩唔阻住佢，就諗到呢個「史上最長的貪食蛇」遊戲出黎。不過諗到一回事，條友唔識點整，就搵左劉Sir幫忙／笨。教院時期作為八三三兩條友的功課輸入員（year 1時三條友得我一個叫識打中文，兩條友做功課可以齋用手寫，到交功課果時靠我一個人幫佢地打番晒入電腦，一日閒閒地打萬幾個中文字，本身拆字都未太識的我經過下學期最後半個月即成中文打字高手），更加是皇者之PowerPointer當年玩office玩到幫我拉左幾份part-time番黎，區區將一個idea整成張工作紙有幾難？睇落好似好簡單，要執靚條蛇同排版，仲有幾次做做下Sam少突然改要求一時話要大格一時話要細格搞到要大改，從頭到尾花左我兩個鐘時間先做好。

結果點？首先，非常受學生歡迎，平時你叫ｄ學生寫句句子長少少寫多個字都唔願，而家叫佢接龍餵蛇，玩到唔肯停手仲係噉問Sam Sirｄ字點寫，幾時都話遊戲教學是皇道。次者，以此功勞，劉Sir R到（or屈到）Sam少請左食一頓豐富的串燒大餐（冇一餐，包左一半底噉嗟，幾孤寒！）。同發現，原來我好有TA命，你睇而家ｄ先生幾樣衰，自己教書都唔識點整習作，難為Sam少本身仲係修電腦出身，淪落要搵個已經脫離左教育界多年的「阿Sir」幫拖。第時轉工返去學校做TA應該大把人爭住要。或者繼續freelance接外判教材project，一張工作紙賺一餐串燒，幾好賺，以Sam少之電腦功力，我相信將來仲有大把免費飯局。

「響應環保，劉Sir連print俾大家都懶，請各位同學按上圖放大再自行列印工作紙，聽日交功課。塞得飽條蛇又最有創意果位同學，可得民建聯蛇宴入場券乙張。」

25/1/2010 MON

「日前劉Sir為各位同學製作的消磨時間習作『史上最長的貪食蛇』，一番心血，反應冷淡。well，我又冇乜點，其實不嬲我都預左大家當劉Sir冇到，呵呵～」

「我反而驚訝在，真係有人會交功課！」

「甘仔同學以貪食蛇綜合劉Sir失敗一生，證明同學的無聊程度拍得住劉Sir －作者我整左張工作紙出黎自己都未玩過。請大家為佢拍掌。」（話時話，阿甘兄中文修養十分高，好多詞彙我都唔識解甚至唔識寫）（所以你明點解劉Sir上網寫左十幾年都只識得我手寫我口啦）

「因為全世界只得一個參賽者，甘仔同學即時自動勝出成為冠軍。至於獎品，因為我冇預過有人真係會騷劉Sir，所以從來冇準備過。（．．．）唔緊要，假使五區公投真正起動，實有大把民建聯買票蛇宴，到時刮番張補數囉，騎騎～」

26/1/2010 TUE

「前幾日同大家做中文科益智工作紙，玩完，就梗係要讀書啦。今日考試。考英文。」

「全卷六版限時七十五分鐘，體諒各位同學英文水平偏低，今堂只搵份中一試卷俾大家。」

「我冇呃你。呢份真係而家香港中學一年班第一次英文科考試試卷。同事個女考完試俾份卷佢睇，佢諗住同個女一齊做一次，點知越做越唔對路。」

「跟住拎份卷搵劉Sir。唔好話佢啦，我都做到怕。第一版講英文詩。我好似讀到中學畢業都冇學過。第二版最底True or False，ｄ問題似學能測試多過英文，最抵死True 同False之外俾多個Not Given你。問你死未。第三版Part D，叫你睇番Part A答問題，最後一條寫住HOT，知唔知點解？你識答就會明點解咁HOT。第五版填充題，俾個字頭你叫你寫個單字，信我，好多字你中三可能都未學，而且我答得晒全部（答得晒唔等於答得正確呀），反而例題果條唔識．．．中一咋喎。份卷格式點睇都似會考卷。程度亦肯定最少跳兩級。而且，好多問題似玩你邏輯推理同臨場執生多過英文知識。」

「所以，有同學（真係咁無聊）做完份卷的話，唔使交，劉Sir做完自己都唔敢睇番怕會唔合格，點同你改？聽同事講，考試結果全班『正常分數』係七八十分，而且呢份卷已經叫做容易，『深處未算深』。」

「中學第一次考英文已經咁黐線。升到上去點算？我果個年代，中三甚至中五校內英文試都冇咁難呀。而家ｄ靚仔靚妹咁唔鍾意讀書，我好明白同諒解的。」

31/1/2010 SUN

我唔係果種成日上YouTube果種人，多數人地有野send黎睇至上，或焚一輪機想靜靜，或Diablo打到支力要抖抖時其中一個選擇。可能做果行厭果行我又從來唔追潮流，上YouTube我好少睇音樂野，反而鍾意睇人地拍低自己屋企ｄ動物點樣玩，睇人地屋企ｄ貓貓狗狗打交，睇人地屋企大狗生左成竇狗仔躝黎躝去，可以睇足成晚。同埋搵無聊笑野睇。呢條片，絕對無能敵。

「我睇過最最最最最最最好笑video。」

幾年前唔記得邊個send俾我，第一次睇已經笑到好似入面兩條友噉笑到喊，近排撞番仍然好似第一次睇咁爆笑，睇無限次笑足無限次鑊鑊笑爆咀。其實如果獨立睇model仆街條片唔係非常好笑，可能睇過一次「嘿」幾聲就算數唔記得左，而家永垂不朽全靠兩個黐Ｑ線主播。就噉睇已經超級好笑，如果想知成件事係點，都得：

件事發生於一次真正直播新聞報導，主播包括光頭佬、黑鬼同肥婆，黑鬼報導一單有關catwalk新聞，講有個model因為設計師整到對鞋太高，搞到佢行catwalk時連仆兩次街，第一次播model震晒腳仆街時忍唔住笑出聲，跟住光頭佬同黑鬼兩個笑到癲晒收唔到，

"That was uncool. That's embarrassing. This is at least the second time HAHAHAHAHAHAHAHAHAHA"

全場得肥婆一個未有失控，想制止情況惡化落去：

"You try walking on those shoes!"

黑鬼笑到唔得閒理佢，光頭佬仲有心情回應

"Hey! First of all BABY, I've got enough meat on me that it's all right!!"

到條片一分鐘左右，光頭佬開始想解圍，點知

「我地想為頭先道兼－」

「睇住睇住睇住哈哈哈哈哈哈哈哈哈哈哈哈哈哈！」

結果一宗本來唔算非常搞笑或特別新聞，經兩條友非常邪惡的笑聲同精警對白，加埋擺明玩野係噉重播的監製，model仆街的簡單事故立時畫龍點晴成YouTube經典，每得閒無事同身邊冇人時就會重播再重播睇極唔悶。附送omake乙個，另一單監製玩野玩死主播的搞笑新聞報導：

「點解香港冇得睇呢ｄ新聞報導？」

「呢段我都好鬼鍾意。唔知香港新聞live發生呢ｄ事會點？」

香港新聞報導為顧及「專業形象」從來正經過正經，自吳晃榮同阿叔一別，本地電視新聞鮮有樂趣，後繼者嘗試搞笑但差很遠，有線想走輕鬆路線又過於造作。意外笑料上YouTube搵到唔少，但你有冇見過本地新聞報導會如斯台前幕後蓄意加肆無忌憚地玩野？如果model仆街單野係香港發生，可能台前所有人加幕後成條crew事發後即晚俾人炒晒。

「單單睇新聞咁簡單，已經明白香港生活點解咁苦悶。」

2/2/2010 TUE

近日大熱新聞有二。獨立音樂界的，首選連報紙都有講Hidden Agenda因為工廠大廈「活化」被業主迫遷。不過呢單野我冇乜特別野講。作為升斗市民，一如普羅大眾政治冷感，唯一明白係所謂「活化」只同西九一樣，扶持民生為名官商勾結俾有錢佬業主地產商炒樓炒地為實，炒完港島同商業地段，過海黎九龍同待再發展舊區繼續炒，佢地越黎越有錢我地越黎越貧困，就同身在香港窮人含撚一樣明顯過明顯，有乜好講／有乜需要講？

站在香港獨立音樂界工作者立場的話．．．換著以前，可能會就此業主迫遷坐地起價待沽題目大造文章一番，不過在冇可能有盈利甚至正經營運之逆境中落場出錢出力六七年，而其他人只作型式上參與即表示自己已付出幾近全盤，所見所聞及得著當然完全兩回事：新一代可以一方面高呼「我地一齊支持獨立音樂、地下樂隊」，同時又因要追求獨立精神相對之物質享樂主義使晒錢，吃喝玩樂購物媾女之後「冇錢呀」而唔肯俾多幾個錢支持獨立（非常老實，Hidden Agenda暫休大件事一回事，假如今場要俾錢買飛加冇得拍膊頭，你估仲有幾多人現身支持？）（同，物質主義、拜金主義、世利社會是現今獨立樂隊間普遍詞題，但唔知有幾多隊高歌同時行為態度能與自己音樂一致，而非口是心非自相矛盾？），加上自己唔做冇份時可以大大聲鬧人踩人，到自己一做一參加就視自己站於頂峰立即要個個服佢欣賞佢尊敬佢。某程度上現今indie band、indie fans與搞手（部份，非全部）心態已同柴娃娃無異，全因一個大公司隱性推波助瀾，以及上網任下載同資訊太過氾濫太易得到，潮流效應加免費資源先得以令一個本來已鬆散之群體得以繼續維持落去，但亦只限於型式上，參與成員內涵熱心有多少，大家心知肚明。所以，好老實講，我真係唔識同而家一代理喻。我早已對本地indie界睇到好化。Hidden Agenda執笠，就留待各位有份參與的新一代forum同facebook慢慢憤恨一番。

另一單，而家相比下反而更切身，就係馬頭圍lum樓。你咁大個人，有冇遇到呢種新聞？見識少，我第一次聽見。當堂感到驚世駭俗。（係，我都知道呢個字唔係噉用，不過，是但啦，你知劉Sir中文幾差架啦，同呢個形容詞睇落夠gimmick嘛，騎騎～）

「多謝大家關心。今舖lum樓慘劇，劉Sir同佢一家安然無恙。」

（承上聞，：以往唔少天災人禍甚至社會大事，香港indie界都會迅速發起義演支援，唔知今次有冇？）

星期五26/1事發時返工時間，知道單野唔係返緊工吞pop上網睇到（雖則，呢樣野我成日做），而係出左街的老細打電話返公司講俾大家聽，因為突然lum樓馬路封晒大塞車，佢架車前無去路後更加唔使講，結果塞左幾個鐘至返到公司。好多朋友都知劉Sir住馬頭圍，所以今場意外發生之後好多人問，但其實我屋企同現場相距一段路程。土瓜灣係個細區，由頭行到尾唔使半個鐘，而我屋企位置係宋皇臺、馬頭圍村果邊，基本上去到九龍城同土瓜灣邊界，雖然叫馬頭圍村，但所處大街叫馬頭涌道，而馬頭圍道係土瓜灣另一條主要大街大約係土瓜灣區中部，由我屋企行去現場大約三個字路程。唔好問我，住左廿幾年，都唔知點解馬頭圍村同馬頭圍道會隔咁遠。

「唔止劉Sir冇事，就連廣視都係！香港唱片業死裏逃生的大吉之兆呀！」

「花絮之一，可能係五樓（卦）。近街牆邊有幅畫，正野黎。睇唔清楚？請是是但但的無記新聞幫幫手．．．」

「oh yeah。一切盡在不言中啦。」

睇完新聞，仲有報紙睇。意外後，抽水王陶傑幫《蘋果》寫左篇專欄文章，如其名的《大災難》。懶睇的話，只需要知道一樣：lum樓時有個女人走難時，遇到位鳳姐問發生咩事，個女人冇理自己衝落樓，鳳姐走唔切，就避唔開了。陶翁曰，該婦未有提點鳳姐一同避難，全因其對性工作者心存成見，導致佢有「不屑一談」與「死不足惜」之想進而決定唔提佢也，從中可見香港社會的「深層次矛盾」。我唔知你點睇陶傑，呢篇文只令我覺得佢好柒好柒，因為連最簡單邏輯都不符。

住得如斯舊唐樓者，冇乜可能係大富大貴之家，縱非鳳姐之流，亦不離社會低下層月入得幾千交完租食完飯已經冇乜錢剩果種人，大家鬥灰可能唔差得幾多，當中矛盾可以有幾深層次？再者，香港地你聽過幾多次發生lum樓？你見我用過「驚世駭俗」形容就知，就算住幾十年危樓住過世果班，可能到死都唔會遇到呢種意外，而且唔好話lum樓啦，火燭之類意外，都唔係人人成日、成世有機會遇到啦，你估做戲咩大佬。一時間突如其來加咁嚴重，你覺得有幾多人識得反應？唔關鳳姐唔鳳姐事，就算鳳姐換成偉人陶傑，都唔代表路過個女人100%會答佢，根本係時勢危急問題，正常人梗顧住自己走佬保命，唔俾人真係驚真係緊張真係慌唔知點算好只識得一味走所以冇應到甚至聽唔到？呢種精神狀態同行動先係最正常。冇錯一般人總對性工作者有一定成見，但而家棟樓lum緊行慢一步都冇命，會唔會咁得閒生死悠關之際仲認真去諗，套用「深層次矛盾」理論去思考一個人值唔值得去救先繼續走難？陶傑覺得會。我當堂冇晒野講。只希望佢遇上相同情況真會如自己所言做事。

冇錯陶傑係死極都拗得番生，同樣亦可以點生都講得成死果種天才，一樣野能夠探討得好深入好獨到，但正因終極牆頭草同自己永遠以對的，好多時邊個出得起錢就幫邊個講好說話，甚至為自己名利乜都講得出需要推翻最基本common sense甚至扭曲事實都在所不計。講，特別事後孔明，從來容易過做，我相信換著佢在場，佢都未必能夠保持冷靜去應變同叫人走，分分鐘走得最快果個係佢添。但假如女人換成陶傑，佢照樣唔答個鳳姐走左去，又一定唔會屌鳩自己，而會話

「天崩地裂可能下一秒降臨，面對如此十萬火急場面，不是警察、不是消防員，作為普通人一個，又有何勇氣多待一刻？生命寶貴，應爭取每分每秒，畢竟人有能耐、形勢險峻，非所有事都能做好，逃難過程中未有對其他鄰舍施以援手，相信沒有人會不原諒。」

信我。就係咁抵屌。所以佢係勁、佢係識好多野、佢文采過人，但我從來唔多妥佢，冇態度冇堅定立場同唔識得去尊重去欣賞，任你點叻點勁點有錢都係收皮。

4/2/2010 THU

「大佬Stan，我對你唔住！」

人人都知劉Sir頹到出血，有時自己寫野寫完就算proofread都懶（所以你好容易搵到劉Sirｄ文有錯字錯句式錯文法），各位的回應都留到最無聊最得閒時先望望，留言板就更加冇幾可會睇啦，因為我根本冇預過有人會留言哈哈哈。直到呢幾日返工上網都上到悶，無聊亂click開左個留言板，先知道

「原來《音樂人生》之後，大佬Stan有留言贈慶！」

有鑑太耐加好有緣先開一次留言板，我張篇留言轉載番黎呢度，方便番自己可以順便回應埋，因為我寫網咁多年都係用非常原始的HTML一粒粒字母一個個code打出黎（此乃迫於無奈的hardcore，我實在太懶學用網頁整software，加以往經驗學過N次都係失敗，結果只有繼續文字建網）（你明點解劉Sir整網頁整左十幾年都係得白底黑字搵多幅圖都難啦），重新排版之餘，編碼問題有ｄ字亦需要「劉Sir個網/Blog化」：

「感激劉蛇稱小弟為友人(I take it as a compliment indeed)。自己認識Anvil，是留學加拿大期間，看Much Music電視訪問Mr. Sebastian Bach，佢話受 Anvil 影響，然後自己落二手唱片店，買左《Metal On Metal》的大碟．．．已經二十幾年前的事．．．當日電視播的Anvil video就是《Metal On Metal》by Anvil @Japan....Yeah... 就是您看套戲開始時侯，播放那一條MV．．．套片令我想翻好多以前同現在的事．．．片中好多片段放諸四海都通用，例如訪問佢地老婆（其實類似看法，何嘗不是出現在香港）．．．最後Anvil 出席日本演唱會，縱然知道有舖排，但仍然很感動（可能由於實驗吉他手David Torn配樂．．．證明您論點，不同音樂範疇，但最終要表達情感是同一件事）．．．片中訪問所見，現任及前任樂隊成員各人藝術造詣有一定修為（鼓佬個人修養同我地本地『劉老師』層次相若），選擇以Metal 為表達方式（或者認清自己方向的『指南針』），令自己感受良多．．．有關《音樂人生》中有一段，係KJ 教妹妹拉cello，最初佢教妹妹如何取悅評判，當妹妹技巧去到果個層次，佢話返佢妹妹聽，妹妹應該為自己拉，不是為任何人而拉，男主角這種教法令我印象非常深刻．．．」

「不如搵日辦場 Anvil 播放會啦（如果可以）！！！」

首先，梗需要介紹一下Stan哥啦，作為TRHK常客之一，卻相信除左劉Sir之外，經常上皆旺蒲的朋友都未必知道，因為大隱隱於市，而隱於市果班往往先係最有料到果班。例子有以前多次提及的另一TRHK常客梁生，一個band tee都冇件的阿叔，卻是全香港最熟悉最投入black metal之真正專家，你想量化，佢屋企有過二千隻碟全部black metal，當中九成係純黑白封面、你連個名都未識讀、或太不知名或思想太極進上網都未必搵得到多少資料果種，未計其他black metal有關書籍；你想質化，佢返工、陪阿嫂同睇波之外，就係聽black metal同睇black metal文獻、研究黑金屬歷史文化。不過佢唔會上網同任何人講。佢MSN同Facebook account唔係black_metal_hk@notmail.com －佢落後到連呢兩樣野都未曉用。但我相信冇一個人敢話佢唔識野。解釋，《K.M.C.9 之 Jennifer Batten》已有：

「而家仲有幾多香港人願意為聽完唔可以同其他人講『我識我知我乜乜乜』之音樂投資時間心機？」

時間大家都係得咁多，點樣（善）用成就最大分別，所以你見而家上網上forum上Facebook，討論分享風氣似盛，但真正成班人坐埋開到口傾果陣，音樂藝術歷史研討同你講得頭頭是道，往往係與世隔絕平時最少出聲／唔出聲果班，相反網上最高調人士，反而可能一句都插唔到咀。Stan哥就係唔出聲族群當中高手中之高手。因為自己八頭先出世，事後好多野只得聽聞，所以有點羨慕，文中已經唔覺意地透露左自己年齡（呵呵），體驗過八十年代metal當道的黃金歲月同Dark Entry時代，又有機會出國留學，工作關係仲有機會接觸藝術史料（辛苦唔辛苦係另一回事喇），如果你覺得劉Sir好識聽音樂好明白metal（well，我絕對相信冇乜人會噉諗囉，連我自己都唔覺啦）（「要先接受無限，才能面對有限」），Stan哥係係我其中一個啟蒙同師傅，係劉老師的老師，你就知佢個「呢」有幾高了。當年我仲獲賜寶好多八尾九頭本地音樂雜誌架，到今時今日仍然正中香港band界時局下懷的V-TURBO訪問只是一角，當年MCB訪問香港thrash metal傳奇AZYLUM等先係不可不傳之重要紀錄。我仲研究緊點樣將堆歷史scan番上網。

睇完《音樂人生》，的確要睇埋《The Story of Anvil》先完滿（跟住可能要睇埋《The Wrestler》）。我都諗過搞番次電影版罪，不過而家冇左皆旺竇口，想搵次選都難，七刀暑假可能美國歸來，或者到時屈到佢屋企搞番晚。其實有思考過，辦一場較認真的公開放映，搵到個地方可以播到碟又坐得多人，志同道合一齊睇，睇完大家傾，畢竟我地一輩（呵呵）冇幾多似阿Stan大佬你經歷過見證過咁多風浪。好多野，既無文記，只有口傳，而香港metal界別此類formal性質的文化交流活動更難求。不過，冇場地，有乜構思都冇用。

「另一個想搞理由：話晒隻碟係你借我，我點都要搵次出黎還你架喇，加上你仲有好多野係我度的，呵呵！」

7/2/2010 SUN

近來好多show，單個幾禮拜前一月底，同一晚已經有兩場大show：蒲吧有all-star撞到爆core gig搵埋無線黎拍，但我興趣反在最唔撞的GriN同VELVETTE VENDETTA，同無記點樣拍band show、拍完點剪、咩節目出街。想唔使錢又有著數一樣有，觀塘Hidden Agenda迫遷暫休音樂會，一連兩日幾十隊band晏晝焚到夜晚，最重要咁多野睇咁著數居然一蚊都唔收你，事後連報紙都有報導等各位參與完仲可以憤慨一番，絕對適合「我梗係支持地下音樂啦」但「咩料呀你要我俾錢買碟買歌唔係卦」新一代。不過最想睇，其實係再倒數兩晚M1 MR.+朱凌凌，前者而家都未睇過現場後者同樣只得久仰其名，同有MR.落埋bar搞喎，你上Facebook睇睇，囡囡勁多呀！但年關前公司多野搞，返大陸團年飯OT屋企又多野，平日難就禮拜六唔長週都唔想出街，得個望字再緣再會。

今個禮拜輪到MUSE。佢地五隻碟，印象分走勢Ｖ形，即《Absolution》不論外間評價有幾高我卻覺得平淡，而新碟《The Resistance》古典電子兩邊同時進一步實驗聽得出新意思，加上上次黎香港冇去到，更加想睇今場。點知紅燈山丘中聚會，又撞正同一晚舉行。以前一係開舖一係撞show一係撞飯局一係撞屋企一係撞公司，各位中學同學約親十次有九次放飛機，今晚只有放棄MUSE俾面出席。好難得大家離開中學咁多年，到今日仲可以每次吹雞都有十幾人出黎，意外之處除左今餐好食（問邊味最好食，其他人可能揀最貴果ｄ例如鮑魚，賤開的劉Sir諗都唔使諗就會答你係全餐最cheap果味頭盤酥炸豆腐，呵呵），食完飯仲走左去唱K。

「．．．你地好似幾個禮拜前先唱完咋喎？咁即興又黎過？」

事前完全冇預過今晚會去唱K，仲要唱通常。同各位紅燈山丘中人唱，好似最少四年前發生，仲要返去以前蒲點之一九龍城，大家不住回憶。當年卡拉OK仍處四權鼎立（除左加州紅同Neway，仲有幾多人記得另外兩家係乜？），我地最鍾意的兩個label係前衛同創藝，兩間都係歌多又夠舊而且平到喊，以平民價錢豪華享受同大牌子對撼，得益者當然係我地消費者。果陣九龍城廣場未開Neway，我地係去天橋近富豪果頭間前衛，有幾年試過年三十晚唱通宵唱完一齊落茶樓飲早茶，一早入場唱到間野收工都冇人趕先百二有找，而家邊度搵到丫唱夜場起碼百五，仲要未必俾你通頂分分鐘一夠鐘就熄機趕客啦。九龍城之外尖沙咀創藝先係另一蒲點，位處金馬倫道嘉拿芬廣場地庫，而家仲係全港最好玩機舖之一金星一上樓就到，中六七成班人去果頭補CC蔡econ（不過間補習社叫乜名已經唔記得了），創藝同補習社只差半條街唔夠，好多時假期去補習之前大家一齊唱K，甚至試過出到尖咀突然想唱K結果走堂算，唱到悶下又可以上金星打番舖。夏令時間同考試日子最開心，夏令放一點幾，大家出去包間房當食飯同你平時食茶餐廳差唔多價錢，最平果陣試過十五蚊，唔唱的朋友齋當去食飯做功課都心滿意足大佬包埋車錢可能都平過正式食番餐喎。嫌仲未夠平八蚊下午茶啦，平兩三倍但待遇一樣照俾野飲野食加唱足成個晏晝，中七考mock同等A-Level果排大家更常去唱，大佬呢個價錢你邊度搵呀電費都唔止啦！而且鍾意創藝認真整野食，水準比而家任何一間K房好，叫個吉列豬扒意，塊豬扒可以成半個碟咁大加炸得好好食，唔似而家ｄK房當你入去真係只唱歌唔志在野飲野食點質素求祈整俾你算又少又唔好味。難怪中學畢業之後創藝就收左皮了，八蚊下午茶原來係執笠價。除左價廉物美，永遠愛戴創藝仲有其他娛樂因素：對張德豪呢個名有冇印象？佢係創藝老細個仔，當年谷到好恆架，《黑客》好似賣埋電視廣告添，唔識唔緊要信我未聽過好過聽過，亦因咁柒當年成班人好鍾意點黎唱。果陣門口有易拉架谷佢，創藝臨執笠各位員工已經唔需要俾面了，幫佢個易拉架題字「樂壇廢柴」成為一時佳話，可惜而家易拉架ｄ相就同《黑客》個MV一樣，幾近失傳想搵都唔知點搵了。另支持創藝仲因夠indie，有好多英文歌同band歌唱仲要原版，而家邊度搵得到BON JOVI《Livin' on a Prayer》原裝MV呀？最多俾個沙灘水著女MV加低能MIDI，唱都唱得冇癮啦。就算係出名本地歌手，唔少舊歌同稀有live版本都隨創藝與前衛之消失而失傳了。唉。

而家唱K大棚人難就時間價錢又貴，冇以前咁常搞，我對上次係前排公司食團年飯老細拉隊去唱K，對住同事特別老細又點玩得放？

「你知劉Sir唱K幾黐線架啦！佢識正正經經唱歌既咩！」

少左唱又唔見左好多陳年飲歌，而家去唱K唔知點入手，玩係好好玩好似今晚對番大班人真係非常開心癲足成晚，但論唱只感到陌生，唯一可取是黃秋生《地足否搖滾》，當年創藝都冇得唱（呵呵），但其實最想搵番係周潤發《飛沙風中轉》，當中涉及紅燈山丘中一個江湖故事。越諗越多野想寫番添，直到今時今日，紅燈山丘中之流傳紀錄好似只餘開山經典《丁舉人》，大家去唱K亦似乎已經唔多為娛樂，而是為一齊追尋過去成班同學放學後、考完試、走晒堂上創藝盡興的美好時光。

「亦是時候籌備下一場trhK了。」

8/2/2010 MON

有見唔寫又寫的Rock爺久休復出，顧住打Diablo的我俾佢教壞，打算寫番多ｄmetal野。Rock爺黑膠玩到電影，係香港其中一個對金屬文化最有研究人士，學識廣博拍得住老鬼一輩，我咁耐冇寫metal，正正經經寫一定唔夠佢黎（加唔夠Facebook各位日日分享的朋友），所以只敢翻炒一則近來發生的歐洲metal界新聞。有關Eurovision。

簡單黎講，Eurovision係全歐洲一齊玩的超級巨聲，每個國家派一位代表爭奪全歐流行音樂冠軍，咁多地方參與風格當然包羅萬有，當然你預左十個有九個一定係情歌、古典、oldies穩打穩紮保守派，但間唔中都有奇人異士冒險突出，重金屬強國之一芬蘭更是後浪推前浪噉黎。NIGHTWISH香港紅爆（曾經，現已潮完，退位EPICA同WITHIN TEMPTATION了），但冇乜人知道佢地第三隻《Wishmaster》之前用過《Sleepwalker》參賽，不過改成不淪不類電子版，結果地區第二名收場。過幾年就犀利了，cosplay怪獸的LORDI參賽，對我黎講係笑聞多過新聞，詳情請睇番2006年5月26日《蘋果日報》國際版，不過對事不對人，你玩metal加出頭就會支持，扮鬼扮馬玩hard rock玩到幫芬蘭第一次贏Eurovision，玩到本來自己國家幾萬人話要撻埋國家憲法批鬥佢地結果做左國家英雄，總有一點安慰，同睇到人性的虛偽。一波未停一波又起，LORDI大贏Eurovision之後一年又出左個Ari Koivunen，本身係超級heavy metal迷唱K都要唱metal，跟住參加《Finnish Idol》，人地唱pop歌時佢cover DEEP PURPLE、IRON MAIDEN、SCORPIONS甚至SONATA ARCTICA之類，評判唔睇好不過全靠觀眾投票過關斬將，最後眾望所歸勝出成為芬蘭第一個流行歌唱比賽大熱勝出metal友又成一個傳奇。芬蘭威得耐喇，今次到另一強國挪威。

2010年Eurovision，挪威區選拔賽出現一個你估都估唔到的名字：KEEP OF KALESSIN。你冇搞錯，真係挪威玩epic black metal果隊KEEP OF KALESSIN。挪威新一代黑金中出色一隊，連MAYHEM歌佬同SATYRICON都有幫過佢地錄音出碟，可想而知佢地ｄ野有幾激：

"This is KEEP OF KALESSIN."

好激喎。當你玩首謝霆鋒已經全場最嘈時，噉樣參加Eurovision？原來黎緊2010新碟入面拎左首新歌《The Dragontower》，縮短再改改玩到似芬蘭battle metal果班，夠pop了，仲要入到圍。比賽分準決賽、決賽同總決賽三輪，不如睇睇佢地玩果場參賽陣容係點：

就係咁抵死。我不禁爆左句黐Ｑ線。8/1/10舉行之準決賽，七個參賽單位中有兩個會可以出線進入決賽，賽果係點？

"This is Eurovision history.”

入得圍都好，人地個個玩pop佢地嘈爆，排第七出場情有可原，點知最後出場加壓軸出線簡直型到要加笑爆咀。入到圍除左隊band本身有料到，好可能主辦單位都想加入新元素衝擊一下個比賽，但我始終型住俾佢地上台、選佢地入圍、排佢地壓軸，而家仲要出埋線入決賽，總存在一點製造噱頭之政治與商業投機。但，理鬼佢，我已經笑到停唔到了。嘈怨巴閉heavy metal仲要唔係全清聲唱都贏到個流行比賽喎。（以免被專家針對，我會好政治正確地不再提及black metal的了，最多咪extreme epic metal囉）

到6/2/2010即上星期六全國選拔決賽，八個入圍單位先淘汰四個，同晚總決賽綜合現場評判同觀眾電話投票決定勝出者。第一輪同樣最嘈的metal壓軸出場，又俾佢贏到！！！有冇可能再創奇蹟？唔好意思，如果真係有你先至驚：總決賽中只拎到第三／尾二，關鍵在評分機制。評判評分KEEP OF KALESSIN排第二，而且分數只比第一位低少少真正一線之差，單計現場甚至有可能反敗為勝，可惜敗在電話投票。老實講，即使metal叫歐洲做流行音樂一部份、玩得夠pop的樂隊出碟仲上到歐洲各國流行榜（芬蘭最傳奇：試過grindcore band出碟都上榜！有邊個地方夠佢癲？），但繁盛一回事，始終只算流行音樂一部份，大主流仍然係慢歌情歌跳舞歌，就算全挪威所有metal友都投俾佢，人數依然遠不及其他，佢地又未如LORDI去到咁盡歌曲老少咸宜又大玩包裝，所以電話投票票數，佢地同第一名可以差成倍咁多，平均分數只得第三。制度所限，相信好難再有metal band贏得到全國大賽架喇，不過好滿足，就如準決賽女司儀所講，佢地已經創造左Eurovision歷史：

「挪威終於有metal band試過入圍喇！仲要係extreme metal！」（但其實我更想知首歌未刪改原版係點，會唔會都係咁pop，新碟會唔會直頭脫離epic black變晒(pop) battle metal？就要等出碟了）

完？未。北歐金屬向來由芬蘭、瑞典、挪威三國鼎立，既其他兩國風光過，瑞典又點可以執輸？地區選拔賽已經公佈左，6/3/10有國寶級progressive metal樂隊PAIN OF SALVATION用新歌《Road Salt》參賽。其實PAIN記慢歌首首都無敵，一早就應該參賽啦，出《Oblivion Ocean》或者《Morning on Earth》已經贏硬，仲要玩《12:5》版－《Morning on Earth》直頭有三個版任君選擇。照計冇限參賽一定要寫新歌，為順便谷新碟卦？可惜就算佢地出到線，都冇機會出現Metal on Metal的大戰場面。其實我成日諗，三強國咁多power metal同gothic metal勁band，真係求祈捉隊一線出黎都唔會冇機會入選，點解Eurovision咁多年都冇乜樂隊？希望有朝一日可以目睹北歐重金屬三國無雙之盛勢。

10/2/2010 WED

2009 The Skull Collectors World Tour後，
Hibria特別製作一個live MV同大家講句 "Thank you fans!"

各位家庭觀眾可在2:34-2:44幫上面位柒頭點相，點中冇獎