退休之後、斷腳之前，因為終於唔使睇舖有番星期六日假放，除左重要事或者長週，近兩年以黎禮拜六日真係好少特登出街，兩日出晒更少。今次係罕見中之罕見。之前一晚比平時更早訓、朝早比返工更早起身，因為要趕歡樂早場。
「返工都冇咁勤力。」（．．．．．．）
一日入戲院睇兩場戲好似都冇試過，而家一黎就三套，仲要三間唔同院。起身飛出新世紀，十一點九睇《天間叛徒》。呢套真係睇親都小稱為爛中之爛，點解仲想睇？天使長為保護人類落凡間對抗天使大軍，故事已經metal到爆。再睇睇張poster：
點睇都係metal碟封面啦？雖則以前一望會諗到瑞典melodic death或者歐洲progressive/power metal，而家只能夠同emocore、metalcore一類「新一代melodeath」拉得上關係，真灰。就同套戲一樣。trailer其實唔差，套戲感覺似《殺出個黎明》撈《索女．喪屍．機關槍》，弊在戲路唔係亂黎發癲玩野，想拍到好認真、講正常人無端端面對世界末日會點，唔夠深入又花太多無謂時間，動作場面其實好，就係太多無必要心理戲拖到套戲勁長勁慢，我寧願佢學頭先講果兩套噉由頭打到尾算，唔好講宗教講人性講內心咁麻煩，反正都做唔到。特登早起身捧場，我好少可試過睇戲時咁眼訓幾乎瞌著。單靠幾場我覺得滿意的打戲，同張metal到爆的海報，是救唔番的。
本來冇第二場，不過晏晝有幾個鐘頭吉左，原先留番星期日廿蚊早場的《Iron Man 2》，反正就到時間睇埋。因為好少上外國猛片，我完全冇諗過豪華會上，而家有得睇梗支持啦，The Two Greatest Men of the Month齊集，即令本來就死的豪華一舖翻生，呢個禮拜晚晚放工經過，大堂都爆晒企到出街，而且晚晚發生並非偶然。禮拜六晏晝兩點八飛，我早半個幾鐘去買飛，諗都唔使諗三四十人條隊排到出街，加埋等入場的觀眾們行入大堂都有困難，跟隊尾幾分鐘決定放棄，好在去雞記買定個餐，走過隔籬公園坐低食埋兩點半先行番過去買飛都未遲。連買飛都要排兩次隊邊度試過？平日豪華一場戲人數都唔夠今個晏晝條隊咁多人啦大佬。對左豪華四五年第一次見佢似番間戲院呀，同香港執剩細戲院之後，已經冇多少呢種開場完場成條街企滿人「大家一齊上戲院睇戲」盛況同感覺喇，懷念也。另一懷念是兩三年前仲用緊手寫飛超級old-school，近幾年可能真係好景左如今日，售票處已經進步左用電腦印飛喇，又少一個歷史痕跡。
如數今年最期待電影，《Iron Man 2》必是其中之一，第一集實在拍得太好喇，要為歷史上最佳（Marvel）漫畫改編電影拍續集一定唔簡單，我冇預過會差咁遠嗟。上集成功之處唔止於技同動作（雖我希望可以打更多同打更誇），而係角色建立同演出都夠真實感同人性化，步伐控制得好亦將美國漫畫三大重點突出場面、幽默同精警對白完全發揮，個人覺得比《Dark Knight Returns》更加成功，雖則近年最得我心改編電影可能係《Wanted》，即使原著同電影根本係兩個完全獨立及不同之故事與世界觀，應算是原創電影（可能因為噉先咁滿意卦，呵呵）。隔左兩年嗟，點解差唔多乜野精警都冇晒？搞到Tony Stark做野激進過上集，又交代得唔夠清楚同深入點樣影響到佢變成噉，結果一切改變只令佢成個傻仔噉，故事太多段落枝節好拖，打戲好過上集但勁少，基本上得兩場War Machine出場又唔夠，最後大佬死得尤其on9超級反高潮。最唔明當初官方公佈劇情同trailer唔少片段，戲入面根本冇用過。何解？就連配樂都係：
初公開，非常開心，上集理所當然用《Iron Man》，今次主題話係AC/DC，隻soundtrack封面已經無敵啦，同作為AC/DC第一隻正式精選碟，絕對買得過 － 我買左佢地咁多碟，買都只當為買封面呵呵。不過冇想像中咁多歌或用得咁好，所以有點失望，同既然今集有Whiplash，搵主題曲有幾難？METALLICA首《Whiplash》呢？WHIPLASH呢？其實我都想睇多次，因為豪華螢幕夠大卻永遠唔夠音響，成套戲接近冇聲，平時講野細聲到唔使旨意睇得清楚一定要靠睇字幕，播AC/DC同打都爆得冇癮，我已經坐前三分一，唔知坐後半果ｄ點算？諗過朗豪坊或新世紀重溫多次，不過故事實在失望。需要再考慮一下。
「只希望唔會係Marvel Studios最後一套值得睇。黎緊三套美國隊長、Thor同Avengers，老實講，我通通冇乜期望，特別美國隊長。不如拍番套《War Machine》算啦，太型喇。」
原先諗住豪華直落兩場睇晒兩個men。不過葉問無端端成為八三三聚會，另外兩條友唔多想睇豪華（似乎得劉Sir一個懂得欣賞old-school風味），旺角區五六點場又賣晒飛，只好過油麻地電影中心。《葉問》上時我冇入戲院睇，可能因為同期太多甄子丹或洪金寶或吳京打戲，諗住又係普通野黎，到好多人睇完話唔睇唔得時已經冇得睇了，唔憂仲有有線，幾個月前可以成個禮拜每晚十一點鐘播一次「打足七晚」（有線，你地唔係冇貨到噉丫嘛？），睇第二集之前一晚又播，完整睇過最少四次，未計其他轉台撞到之類。難怪《葉問》做到年度電影，中國武術加民族精神贏硬，就如《十月圍城》。其實第一集劇本已經唔點突出，全靠導得好唔拖唔悶，今次合理就算冇乜所謂，現代美國英雄片式英雄發現骨氣唔可以當飯食＞生活迫人＞同大師傅化敵為友＞點知大師傅俾外國人打死左＞咪幫佢報仇囉，根本就係《Rocky》加《霍元甲》。可惜同《Iron Man》一樣，一到續集冇晒最初成功重要元素，故事時快時慢又鬆，好多地方應長或深入點知後來甩晒完全唔跟進，為打而冇左回事可說十分可惜，因為民族大義是《葉問》電影不可或缺一環，而家只餘中國武術。打戲多左之餘打得好，鬥洪金寶精彩過《殺破狼》段搏擊，同今次主角唔再由頭屈機到尾，上集得最後大佬打中佢幾招仲要只係掂一掂咁大把講到佢太強，而家打大佬會中下大招先似番樣有番戲劇性。對於睇戲從來最重要打打殺殺的膚淺劉Sir黎講，拍得唔好，但足夠了，不過冇上集斷手斷腳標晒血咁唔夠開心，懷念打十個日本仔果種暴力法。應該冇第三集喇卦？上集打完日本仔，今集打鬼佬，下集可以打乜？摩登葉問打泰拳？
第二朝又晨早起身出發，傾呢個「Wackipedia」計劃，跟住走出尖沙咀。今日晏晝文化中心香港中樂團有免費show，反正呢兩日都要出街順便去睇，中間有三個鐘，見咁耐未無聊出街行，今日兜左大半個尖沙咀。美麗華原來有Iron Man展覽，部1:1 War Machine一流，想影張相但點解咁鬼多人，大把全家大細圍住係噉影，點睇Iron Man都唔係陷家歡電影喎！隻野叫War Machine好邪惡架喎各位老豆老母！跟住走左落玩具反斗城，我真係好鍾意電影版War Machine，頭先影唔到相，俾我買隻公仔好嘛？點解咁大間反斗城有幾十款Iron Man賣，但一隻War Machine都冇？真係咁邪惡？跟住去Hong Kong Records，有意外發現：
行極都未夠四點，文化中心坐低睇左差唔多成個鐘書，有ｄ唔對路。按照官方訊息，今日四點鐘文化中心外面廣場有中樂團表演香港十八區主題曲，我一直坐等到四點半，文化中心入面外面仍然一粒聲都冇。灰。想睇場show嗟，又要玩我？枉我特登出黎呀唉，返到屋企睇睇隻腳，好番冇耐噉出去行左成日，隻腳又腫晒。噉搞法唔知幾時先好得番晒。
5．16
太多投票理由
獨欠理由不投
2010年真係不利metal。到底發生咩事？只過左半年唔夠，繼Pete Steele之後，連Dio都走埋。更加難相信，因為Pete Steele生活真正sex & drugs & rock & roll，會走某程度上預期之內，但係Dio矮你差唔多成尺（佢好似唔高過五尺四），差唔多七十歲早達搖滾界退休高齡，仲係全metal界最好中氣果個、現場唱功同台風勝過後生佢四五十年果班，就算半年前傳出胃癌仍然可以好精神好健康噉面對所有人，黎緊HEAVEN & HELL仲話堅持會tour唔取消。心諗樂觀戰勝癌症，近幾日網上有傳佢過身，跟住又有人反駁全屬流言，以為玩野啦唔會真係卦？點知16/5證實左，就係。
知道Dio因為DEEP PURPLE，果陣迷Richie Blackmore，跟住佢自然去到RAINBOW，但一聽RAINBOW就發覺唔使繼續追Richie Blackmore，事實亦證明RAINBOW成功全因Dio。雖然佢同英國金屬新浪潮唔多拉得上關係，在我而言對NWOBHM甚至往後power metal有非常重大影響，英國當打樂隊大方向玩歌劇式高音，Dio一樣唱到超高音，但賣點係襯晒佢歐洲中古氣氛歌路隻英雄式沙聲，正如Yngwie Malmsteen話，RAINBOW首《Stargazer》係第一首正式epic metal，當時英國新浪都未成型，過多幾年聽IRON MAIDEN，甚至十年後HELLOWEEN，種史詩氣勢根本就係出自佢。而且唔止於唱同作，冇乜歌手玩live會玩得比佢更好更有氣氛，身為意大利人但矮過亞洲人可以咁喪邊個估到？同唔好唔記得heavy metal手勢都係因佢而起，將意大利風俗變成重金屬象徵是個傳奇。仲有史上最型英文名，我會睇《JoJo奇妙冒險》都因為佢，初時唔知咩事，睇完先知原來個作者係tribute metal、tribute佢；唔好笑我，出黎做野需要幫自己改英文名時，有諗過叫Dio架。
Pete Steele同Dio，係其中兩個對我影響最大、最重要人物，幾個月間兩個一齊走，相當震撼。可能你唔知「dio」解「神」。佢根本就係heavy metal真人化，更加是大眾眼中heavy metal/true metal之神。而家，終於真正成為Dio。
無端端走左去唱K。紅燈山丘中今年節目殊多，差唔多每個月實唱一次K，今舖係校花放大假，順便「療情傷」？定還是因為大家成日多謝的張小姐聽日生日，可以呃香檳呃蛋糕？有得唱就得啦。兩樣野講：首先奉勸各位，千祈萬祈唔好去新世紀廣場頂樓間Neway。歌唔齊唔緊要。加幾十蚊食自助餐，超少款加超唔掂仲超少，但冇得揀情況下局你食，每次有新野出都會大班人衝出黎，唔夠半個字成盤野唔見晒，好似睇大陸人食自助餐。唱過一次，夠晒，當買個教訓。Neway只有兩間真係值得幫襯：大角咀新九龍，因為有任飲房又大；一係Neway City，舊歌多之餘自助餐多野揀過去酒店食咁滯。當然，回憶才是美好的。
再講講K歌。每次唱K，實有三分一場係陳奕迅，自從入左英皇搭上唔知去左邊的陳輝揚我已經放棄追佢（即係'2000頭），K房睇人地唱先對佢而家新歌有番多些少認識。其中探花兄推薦一首，興趣益大：
佢開始唱國語歌好多年前我已經停左聽佢，所以《愛的距離》感到好新奇，除左覺得佢入左英皇之後冇左華聲時期份音樂性同深度，絕大部份新歌好悶、過於千篇一律（唔止佢，基本上99%英皇歌、英皇歌手都係），而家出番黎仲要唱國語歌可聽性高出不少。成首歌長五分半鐘，K歌當道下邊有咁易搵到歌有咁長呀？我從來認為流行曲理應最短四分鐘長先夠時間做好編曲。同最緊要：嗌。係我好膚淺的，假使唔係臨尾死嗌爛嗌，對我黎講呢首可能只係「一首較好的Eason歌」，而家嗌幾野，立即人人記得你先、我仆到黎聽先。不如睇睇幾位相信來自台灣的YouTube用戶對《愛的距離》現場版的感想：
「雖然我很喜歡他，華語歌壇我只喜歡少數一兩人，但是他這首歌的高難度，唱差了也是事實．．．不懂一堆人為什麼一味叫好？看著他去傷自己喉嚨很好嗎？」
「也不是逼迫啦＝＝ Eason早在99年的廣東歌就有這種唱法，有很多歌在CD version不是這樣，他在演唱會情緒一high起來也會吼一 下，例如《時代曲》、《我的快樂時代》、《擁抱這分鐘》、《反高潮》、《阿士匹靈》．．．所在我個人是超喜歡他的演唱會，還有很多歌我也覺得演唱會版本比較正！！」
「本來吼這種唱腔是起源於金屬類型音樂（搭訕者曰：「這不是來自heavy metal，是來自hard rock的」）其中重金屬是Eason以前提及過最不喜歡聽的音樂類型 」（睇黎佢一早摻透「聽metal冇前途」的禪機，抵佢紅）
「但沒辦法了啦，這類型華語歌有可能會在後幾年成為市場的焦點或佔部份比重啊，為了符合市場，連香港現代主流歌手，實力在前衛的Eason也被迫要唱一支有吼腔成份的歌，全都因台灣信樂團，弄現在有很多主流華語歌都帶有吼的成份．．．」
首先不得不讚的是，單就一首普通流行曲，幾個人湊埋都可以傾到咁多野，縱觀全個香港網絡，都難搵到多少人有同等音樂認識同討論能耐，人地YouTube求祈吹吹水都超班過晒香港地咁多forum接近所有人喇，唉。
有人話「Aerosmith style」，根本就係AEROSMITH啦，或者大家對普通歌已經聽到夠晒，近年台前幕後都嘗試玩激ｄ，呢種「Aerosmith style」就成為新寵之一，當信樂團都俾人話「模仿AEROSMITH」而大家又受時，就證明嗌有一定市場價值。不如先上上歷史堂：雖則好多人話係信樂團發揚光大，其中一個起點是「抄《I Don't Want to Miss a Thing》」（雖則唔似）的《海闊天空》（唔係BEYOND cover來的），但大家已經遺忘、當年一嗌就嗌到上紅館的迪克牛仔先係教父，冇一首歌經佢嗌完會好唔過原版，加大家回味無窮，當然佢唔係只識得嗌，而把聲本身加改編風格一流都係原因；而呢種嗌法唔止metal同hard rock，再之前元祖classic rock，甚至更早期黑人唱blues唱soul都會。（你知點解成日咁多人唔妥劉Sir啦．．．）同而家新一代後生band發展到為嗌而嗌唔同，最初／「rock」嗌，係為左做到對比同拉高氣氛，唔會第一段chrous同第二三四次一樣到尾都冇大變化，直接用另一種唱法改變最簡單直接，如而家extreme metal、core band嗌到盡都要加番清聲一樣道理，只不過大家思向相逆，當然亦為留定位現場可以娛賓，你知對好多普通歌迷黎講，演唱會只要個歌手一扯高音一勁嗌，台下妹妹仔就會瘋狂尖叫。最重要係，我地聽開band sound一班早對此見怪不怪，有幾多妹妹仔聽得多外國歌識AEROSMITH？好簡單就能做到一樣「新潮流」出黎，妹妹仔們、粉絲們又會覺得你唱歌勁，何樂而不為先？
"This is the 'Screamo Maiden Hypothesis'."
除左《愛的距離》，仲有一首歌好深印象。而家先知，原來容祖兒都有歌我會鍾意。
間接聽左容祖兒十幾年，老實講聽得出佢識唱歌，就係唔鍾意，一來當一個歌手進入英皇，音樂會即時被嚴重平庸化，又請再對比華聲與英皇兩個時期陳奕迅，華聲好歌數之不盡，一入英皇，老實講我幾乎一首歌識得都數唔出。冇相干，本地流行樂迷從來冇要求，換言之平庸即是中庸，唔突出剛剛好先能夠掌握市場。另一聽唔落原因，佢唱歌抖氣聲實在太大，每當提到香港歌手最大缺點換氣，我第一時間實用容祖兒做例子，因為換氣換到哮喘噉款實在係表表者 － 到而家仲未明白，咁多英皇人話跟羅文學過唱歌，但個個學完連最基本運氣都做唔好，甚至冇幾多個真係識得唱歌。《赤地雪》呢個版算隱藏得較好，加上旋律編曲本身有吸引之處，始終香港幕後一班實際上有料到者非少，可惜冇空間發揮，可能十首歌先有一首 － 或者排到隻碟最後幾個位果首 － 可以俾佢地噉玩法，「平庸／中庸」嘛，去唱K聽新歌，十首歌入面九首旋律、編曲同拍子一樣，歌曲本身同幾首歌一齊比較，都係冇對比、冇起伏，而《赤地雪》對我黎講做得到第十首，即難得好聽的pop歌／K歌，查番先知原來2006年出，即係見字四年前之事，難怪．．．可惜呢首可能係我唯一鍾意容祖兒歌，我肯俾80分，而一首容祖兒歌我會俾80分係好高，假如臨尾副歌佢或者後面加個和音嗌到九彩，可以加多十分，好可惜四年前G.E.M.未出道呢套唔流行。想滿分？都可以，需要的工作是信樂團化，或稱「Aerosmith stylization」，最後一節chrous加keyboard勁交響、結他power chord怒爆、歌手唔唱改為勁嗌，不知幾好我肯定好似聽AEROSMITH咁high。而家，只是首較為好一點的普通K歌。
「．．．都係走番去聽metal算罷啦。K歌對我黎講都係太深奧。」
去年六四期間推出紀念特輯的文學雜誌《字花》，首次遭藝術發展局削減資助。《字花》眾編輯發起聯署運動，抗議藝發局評審制度黑箱作業，評審員欠缺水平。藝發局文學組主席寒山碧曾任政協委員，藝術支援委員會主席鍾樹根是民建聯中央委員會成員。《字花》編輯表示，沒有充份證據顯示雜誌受到政治打壓，但藝發局有需要公開澄清。
題為〈齊來聯署支持字花，改變藝發局評審機制〉的公開信，獲數百人聯署，包括梁文道、李歐梵、黃英琦及陳雲等。創刊四年的《字花》每年均獲得藝發局資助，由首年的35萬元逐步增至去年的60萬元。
《字花》今年申請100萬元資助，結果只獲批50萬元，是首次被削減。《字花》遂發起聯署運動，抗議藝發局的資助評審制度。編輯鄧小樺指出，藝發局審批文學雜誌，討論過程不公開，評分也不公開，評審的意義於是變得非常空洞，無論雜誌受不受資助，都無法參照評審意見來作改善。
鄧小樺憶述，《字花》一眾編輯約見評審小組成員時，得出令他們很驚訝的答案：「其中一個評審話，佢話藝術好主觀，佢地每一個人都好主觀，但係加起上來就變成客觀。」又有評審說：「你地唔好彩，抽到評審唔鍾意你，可能下年唔係咁。」
以雙月刊形式出版的《字花》，主要讀者是年輕人，雖是文學雜誌，但有不少內容涉及社會議題。去年六四期間，《字花》推出了〈走，走到1989〉特集；又曾以7.1遊行為主題，社會民主意識強烈。鄧小樺說，講六四的一期，《字花》在內地網站看不到。
藝發局的評審架構內，有不少左派人士。藝術支援委員會主席是鍾樹根，民建聯中央委員會成員。藝發局文學組主席是寒山碧，曾任政協委員。鄧小樺說：「我地有諗過，《字花》削資係唔係同我地敏感內容有關，但係我地搵唔到充份證據，希望藝發局出來澄清，畀公眾一個說法。」
藝發局回覆本報稱，當局本年度共收到11份雜誌申請，結果有5份文學雜誌獲批，《字花》是其中一份。評審小組是因應該局可供調撥的資源及各申請之間的競爭情況而作出上述決定。發言人稱，評審小組認同《字花》的成績，申請團體的運作亦日趨成熟，值得繼續支持，惟由於資源有限，只能維持以雙月刊形式支持該雜誌。
香港地，專家同老奉，確是避之不盡。音樂／metal一早講到唔想再講啦做果行厭果行。聽番影相的朋友講，照計冇乜好寸好鬥的攝影，論壇一樣大把以為自己乜都識晒的專家存在。既然係咁，更加大眾化、更容易晒命的電影，自不然。
被戈竹尸撚比，大概明白RSS後，開始周圍走睇野，冇計劉Sir份人真係懶到你唔會相信，平時我上網唯一會做係搵Flash game打（．．．），寧願打多十隻廢game，都唔願開一個網站摷新聞 － 我連自己個forum都唔會上啦，何況其他網？就連Facebook都唔係自己用，一早俾左個login同事等佢地自己Restaurant City到爆，個account基本上唔多關自己事。RSS方便在登記左個網之後，一有新野會即時通知，開個reader盡知最新天下事，連我咁懶咁唔願意接受新事物都受落，收皮已久後接收番各門各派最新消息。而家本地業餘電影評論網中，講剷片係超班過超班表表者，難得是有料到外專攻全城睇淡的港產片，到而家整左RSS，近排先開始認真睇睇。只可惜初到貴境，就話黎緊會「暫休」了。又成為一個香港地有心認真對待一門藝術，特別普羅大眾層面藝術時，只有越快令自己收皮的例子。
有篇文好值得睇，同港產片無關，是年度大事電影節《大都會》復修版亞洲區首映，雖則我層次未夠高，仍覺值得睇，因為一套戲令你明白晒近幾十年科幻電影發展因由。不過好睇還好睇，演後問答部份，自己在場都感到尷尬，欲知何事，請講剷片。老實講，多位提問中，大多的確問非應問，因為答案一早場刊搵到晒，又或問黎俾人笑，得閒的話可以睇埋下面堆留言，想話你知果位Daydreamer同我只隔幾個身位，聽到扮唔到外國結果港式到爆結果十分樣衰的英文已心知不妙，一開口就強調自己有去德國睇修復版全球首映，就知唔使聽埋落去甚至明白今個Q&A環節可以不理走得。其他發問大多可以挑剔。老實講，就我參與過之的藝術節目問答環節中，九成提問的確如講剷片所言「影衰香港」，今次唔係唯一可笑。回到音樂：記得好多年前睇Billy Sheehan clinic（冷知識：Billy Sheehan係全世界其中一個最高水準、教授技巧最佳低音結他手），有位女士問：
「四線bass你彈得咁熟，我想問你如果彈六線bass手勢應該點呀？」
全場自不哄動，正常人都係彈四線，香港搵人彈六線唔係咁易，而家仲要個囡囡彈，聽到你都覺堅啦。只不過事實為何又不需明言。Billy Sheehan只拎起枝六線簡單示範回應：
「咪同彈四線一樣囉。彈幾多條線都係手指公轉位，冇野特別！」
語氣中帶點輕蔑，因為明眼人都知所問何事。為學野？定為觀眾份譁然？香港人普遍認為一步真係可以登天，例如識一套戲院睇唔到的較獨立電影，就覺得自己勁過晒全香港所有人、自己係首屈一指專家，問題當一面對有料或專業人士，如負責答問之業內工作者或原作者等，仍覺得自己好高好勁，就名乎其實影衰香港。《大都會》當晚其實有唔少外國人舉手，主辦單位只揀香港人問問題，當時覺得不公，事後諗番可能好事黎，因為一搵個外國人發問，分分鐘高下立見場內「無辜」香港人當堂被殃及池魚樣衰埋一份。所以香港各式問答同clinic，出席完個袋多左幾錢係其次，睇台上嘉賓點樣直線或曲線玩自以為是香港人更加值得。
即係如果唔去果類場合就可以眼不見為淨冇所謂，灰在講剷片網站戥腳包括呢類專家，故事發展可想而知。結合香港獨立音樂界工作多年經驗，個人結論是在專家當道的香港，嘗試辦個互動平台專講一門藝術或文化的話，長遠發展落去常見結果有兩個：夠深度的話，專家想搭嗲都搭唔到，自然會慢慢靜落去得番CD-ROM撐場，維唔維持得到落去，只有睇主持心機；假使程度同範疇偏平民，預料得到會引來大量專家，好容易越變越白痴或者越變越商業，詳見絕大部份forum，極端例子可能係台灣前衛金屬誌論壇，由全中華地區最專業metal forum之一，商業單位入侵變質成半個廣告網頁，最後主持人自己都頂唔順成個前金網關門大吉算數廢事眼冤，即係連風氣比香港好出多倍的台灣都要步香港論壇後塵，更加唔使講本地早已連值得一看之討論文章都難。講剷片好在主講港產片，對專家吸引力有限，如果真係整個電影界中西講晒，基本上唯有唔理八成留言，即係你有你吹我有我寫，至可以繼續落去。
除專家橫行，香港地搞網站搞論壇難頂，係太多如文中提及的「老奉」們。上網根本乜都有，就算本身要俾錢肯花時間總搵到方法免費拎到著數，對於網上一切大部份人早已視之為必然、奉旨。加上香港人本身已經計較到盡加寧可我負天下人行先，要我參與？得。
首先，唔好要我付出、唔好要我蝕底，既然係你發起做一樣野，付出同蝕底果個應該係你，我只會作精神上附和，冇理由要我同你一齊蝕一齊捱。
你做得好，我唔會讚，因為做得好係應該；但有乜我唔妥我實小。你做咁多野都冇錢收甚至要貼錢做，大家應該諒解，期望唔應該太高？蝕底都肯做，即係唔志在做黎有冇著數啦，既然係噉，點可以話我唔為你付出先，甚至唔應該要求其他人付出或著想添啦你咁偉大。
就算我真係唔識野、我明知自己唔識野，你都唔可以話我係唔識野，甚至我講完野你唔應我都唔得，因為你話我有乜錯，你係寸；你唔應我，你係寸；我寸？我唔係寸，我係識野過你。
如果你做野講野有乜我唔順超，你就仆街喇我仲唔唱衰你整死你？當然，就算冇野得罪我，唔代表我會支持我照樣會唱衰你，睇人人唔做反而你肯做，就梗係有機心想搵人著數啦，點會無端白事冇著數冇錢賺都出黎做咁好死呀！
．．．換言之，無論你點做點講，總有野俾人講你插你，香港地藝術崛唔起，獨立界同個別人士一路冇乜人成功做得出非常輝煌成績出黎，的確好難怪，當本身做藝術文化已經難同需要大量時間金錢，而一有少少成績甚至一開始就俾人睇死摧殘踩到盡時。由好耐之前同個台灣行家傾「後前金」及blog世代興起對台灣網絡討論及知識態度帶黎之影響，到自香港metal界退下休來，到近來再提《音樂人生》，到睇完薩頂頂演唱會後有感，雖場合及角度不同，咁多年都係重覆圍繞呢種「半山做藝術」心態，亦即「老奉」。所以非常明白網主為何會有此番感慨，六月打後會點唔知道，不過既有固定人流如我呢種懶人都開始定期瀏覽，同現階段認真講野人士較多，出完聲可以減少專家同老奉們蒲頭當然更好，既非追求人流或排名之商業平台，討論留言寧願貴精不貴多啦。
「總之，希望唔會又一個優質網站，因為香港文化同專家收檔。我已經領教過太多。」
之前一晚冇去到睇林曉培，可能係好事。其實好想睇，之前九展表演十分精彩，唱live勁又成隊band同佢一齊癲，仲有我見過最強pop session結他佬，知佢再黎香港，雖然大場變酒吧，一樣興致勃勃，更重要有PERI M嘛，只睇過一次仲要帶病上陣只唱兩首，明白點解咁多人讚又贏比賽冠軍，老實講我為睇PERI M多過林曉培。不過日頭剛搵完醫生覆診又要搞隻腳，仲要我去完醫院返緊屋企程路開始橫風橫雨足全日搞到唔想出街（我屋企果頭嗟，尖沙咀可能好好陽光），就收皮了。當然，仲有另一個原因：
「搞錯！做乜冇鬍鬚女做opening？係咪怕人地以為佢先係headliner？」
酒吧show即係冇點幾鐘唔會完，兩三點先返到屋企，第二朝實起唔切身一點鐘飛到出太子第尾，而家乜都唔做起身都已經差唔多十二點啦。七刀同學遠赴美國維京音樂學院修練（唔好問我點解維京學院位於美國而唔係挪威），不過每隔幾個月就返香港一次，其實同過去渡假冇乜大分別。話咁快，又返黎香港放暑假。自不然又要吹吹雞啦。
畢竟第尾是TRHK御食堂之一，自從冇再睇舖，好似冇再黎過食，上次食可能成年前仲睇緊舖有聚餐。第一個出現反而係圍內最早消失的Ant哥，之前一晚MSN見到順便提提，點知真係蒲頭，應該超過一年冇見過面喇。開頭諗住冇乜人可能得六七個，點知人頭雙倍連鬍鬚女都出現，十幾條友霸兩圍檯玩到傻。自從皆旺唔見左劉Sir，大家冇左固定竇口缺乏足夠理由出黎發癲，少左見面、少左活動。第時應該借ｄ倚搞多ｄ。即係，七刀同學，唔該你每一個月或半個月返黎香港一次唔該。
食完仲有兩個幾鐘，要等TRHK開門嘛！以前得人地等我開舖，而家風水輪流轉喇反而我想入而不得其門而入幾折墮。好在總有地方消磨時間，大家走上金雞間機舖，聽聞幾年第一次入黎，原來旺角除左新之城同新寶仲有咁大間機舖，不過禮拜日晏晝幾淡下，可能好快又會縮或收。一場黎到，當然要打番舖講左成年的Razing Storm，初出時六蚊舖都俾人幾袋一蚊霸機，而家三蚊舖唔使爭，原來幾難玩，不過三蚊一舖即出去搵兩蚊局亦唔太難的話，反正七刀返左黎，可以搵次星期六日成班白痴仔機舖一日遊大玩特玩。
五點幾，終於開舖喇，其他人當然冇我咁無聊各自散水，我上舖前仲要受Oli姐所託做埋外賣仔，以前人地做、人地幫我做ｄ野，今日全部自己做番晒。食ｄ野都刁鑽過人，指定要朗豪坊對面棟大廈入面個熟食中心間翠苑，應該好出名因為超多人排，我等左半個幾鐘先走得人，但的確好食吹佢唔漲抵佢發達的。好日唔上皆旺，何解今日專誠走上黎，為左做外賣仔咁簡單？當然唔係啦：
「閃靈黎香港咁大件事，仲要有招魂合唱團做opening （而家先知EVOCATION有中文名），為metal定為睇Doris都要買飛支持啦下嘩！」（如果我話我純粹因為音樂入場而對Doris興趣不大，會俾幾多人笑？）
「同，傳說原來是真的！TRHK暑期大清貨，而家賣緊五隻五折，即係買三送三咁滯！」
本來諗住上黎陪Oli姐食個飯買埋飛就返歸打機算，點知唔覺意坐左成晚，可能因為Oli姐太好傾，音樂、政治、香港人、無聊野，乜叉都可以同你講一餐。同原來佢都有好多野想做，而家手頭上有兩個大project度緊，希望可以半年內甚至暑假內開始進行，今晚同Oli傾左一晚，又多一個「金屬大發現」。夠晒無聊。所以我有興趣。同埋，
「Heavy Metal Baby咁抵死都俾你諗得出，阿Oli姐你真係唔親身落場做馬伕（定馬婦？）都唔得啦！」
即係我覺得自己已經食好叉多野，十點收舖，Oli姐嗌肚餓又走左去食野，中間檔玩具舖個肥妹聽到又黐埋黎，一齊走左去許留山。以前開舖時同肥妹即我地叫老闆做朝偉哥果檔好熟大家成日走黎走去玩，冇睇舖之後仲有MSN吹水，今晚先知俾業主趕，做埋今個月就要搬喇，應該會搬落地庫。除左搵Oli姐傾大計，六月又多個藉口上皆旺了。離開左差唔多成年，肥妹講番先知道一年間皆旺發生左乜野事，唔好睇呢度得幾家賣玩具好簡單，自從五六年前好市果陣全層租滿晒，一樓就開始冇人安寧 － 唔係講緊劉Sir嘈到大家冇覺好訓呀。嘈交嘈到有兩檔搬落地庫，跟住都唔係好得好多，連唔係賣玩具唔關事的線面同我地TRHK都出過事你話幾無謂。所以唔睇舖好處之一就係避開音樂以外好多野。皆旺，除左metal之外，單各大商戶間的政治鬥爭同勾心鬥角，又可以寫一大篇。
十一點幾食完都有無聊野。齊齊行番去皆旺果頭搭車，後面有把女聲話
「我係咪好肥呀？」
以為係肥妹同Oli同肥妹傾偈，點知擰轉頭，佢兩個都笑緊，原來係再後面有個囡囡講緊電話：
「我次次照鏡都覺得自己好肥呀！點算呀？」
大家已經笑爆咀了。最緊要係，果條女其實唔係肥的。
「on9！噉你唔照鏡咪得囉！」
可能條女都知道我地笑九緊佢，跟住半個字拎住部電話好細聲講又或唔講野。好玩。噉就玩左一日了。幾時再出去玩先？有難度，琴日醫生叫我早就應該唔好行路唔好出街，坐屋企慢慢抖先好得番，而家就係成日好似噉走黎走去，隻腳實有手尾。所以，算，返屋企繼續打機好過．．．
近來都幾多大新聞。最大一單，唔使講啦，聽晚維園VIIV（其實照寫都冇所謂，反正我個網／blog大陸一早ban左（我都唔知點解，可能太柒影響百姓心智發展，呵呵），亦唔怕俾人秋後算帳，不過上年開始興VIIV，我地又玩開\m/，咪VIIV囉）。band界同樣有大新聞，理所當然地我會寫Trent Reznor單野（可能得我覺得「大」嗟），點知寫寫下電視播新聞，原來鳩山由紀夫收左皮。從來對政治冇乜興趣特別日本，會留意，因為個鳩字。（．．．）話咁快玩完，扮悼念佢抽抽水，講番兩個故事，有關小時候的兩個阿sir。
我諗鳩山由紀夫上台之後，雖則佢個人已經十分戇鳩，都唔夠香港各大小傳媒叫佢做溝山由紀夫。當堂大把人寸爆，就如曾特首近來叫大家起錨俾人窒讀起撈其實超錯一樣。老實講，鳩讀門九早就人所共知，如果唔讀門九就讀九，但點都唔會讀溝。當然，如果電視台同收音機開口埋口鳩鳩聲，仲唔俾老豆老母們屌鳩？就創出全世界獨一無二的港派新中文了。換著以前噉讀，會俾先生屌的。話說中六有個中史阿sir非常強調：
「關關追鳩，在河之舟。記得鳩呢個字唔係讀溝，係讀鳩。」
然後帶領各位同學鳩鳩聲齊齊讀，因為同撚手小菜個撚字一樣屬尋常民間字，根本唔需要大驚小怪。只係香港人就係對呢類字眼過份敏感，特別近幾年。再回到更早，小學果陣。五年級學期尾，讀過小學都知考完下學期大考最開心，唔使上堂每日返學校就係成班玩，如果先生改晒卷做晒野得閒，會同同學們吹吹水迎接暑假。全校最好個阿sir教我班數學同健教（冇錯，係健教，多麼old-school），好鍾意同學生傾偈一齊玩，有次唔記得傾開乜，內容唔相干，重點係佢對住成班講：
「其實仆街唔算係粗口，只係一個較粗俗既俗語。」
一個小學先生。對住差唔多四十個五年級學生。毫不避忌地講仆街兩個字。仲要教大家仆街唔係粗口。仲要，我間學校屬於校風非常純樸果種，小狗懶擦鞋我到中學先知咩一回事，個阿sir講句仆街，可能係我讀小學果六年唯一聽過的「粗口」。但成班同學唔會覺得好大件事好嚴重要同阿爸阿媽講要搵主任搵校長投訴之類。當時家長同學生要比而家開明得多，或者同年代有關：我小學畢業即係仆街跟住果年1993，教育署先頒令取消體罰，當老豆老母去學校同先生講「你記得幫我打仔教好佢」，變成掂親個細路都俾家長上門投訴「你做乜打我個仔」，可視為從'80後時代進入'90後時代一個分水嶺，可從《拚命戰羊》理解八零後與九零後生活與生存態度之別。
我好慶幸遇過呢兩個阿sir，因為而家讀緊書一代，老豆老母郁ｄ就投訴先生學校乜乜乜，根本冇可能接受到真正全人教育。全人教育代表你唔止要學正面，仲要對反面、偏門有一定認識，正如粗口，你會唔會用另一回事，但出到黎社會現實一定要識。現今所謂全人教育卻想做到個人全白，覺得一點黑先係人才、先配做社會棟樑，分分鐘你朝早教學生「關關追鳩個鳩係讀鳩唔係讀溝」，放學已經有家長搵校長「搞錯你地阿sir教我個仔講粗口鳩明明係讀溝佢識唔識中文架教壞晒我個仔」。更加唔使旨意會再有阿sir會同大家講解「仆街唔係粗口只係俗語」了。結果搞到新一代個個變白痴仔，教果班又教到灰晒。
粗口呢家野，曾幾何時電視劇角色照講可也，不論無線還是亞視。而家拍戲有中文粗口，就算套戲完全冇色情冇暴力只得廣東粗口，都可以話你三級，但反智地英文粗口fuck爆shit爆反而冇事二級冇問題。不過當戲入面一句粗口都唔可以有時，成街咁多人講粗口，你落街市行三個字ｄ粗口多過晒你睇成年港產片，老豆老母們同政府官員們又唔覺得有問題。無記劇可以係噉除衫、報紙檔求祈一本普通雜誌封面可以勁過鹹書、而家報紙風月版反而比娛樂版更有道德更正經，但容忍唔到新聞報導正正經經讀鳩山由紀夫。好在佢落左台，家長們、官員們同傳媒管理層們，可以放心。可惜成個香港社會、成個'90後／'00後新生代柒晒加柒到冇得救的問題，冇同鳩山由紀夫一齊消失。
「與其面對當今灰盡，緬懷過去好過啦。假如六四當晚你唔去維園，冇街出屋企又有有線的話，夜晚七點半鐘有線電影台播《拚命戰羊》。讓你明白新一代有幾沒落的教育電視節目。」
The Beginning & The End：
從Trent Reznor談到《How to Destroy Angels》
唔係今日屋企食飯睇唔到METAL SAFARI，就趕唔切6/6國際SLAYER日講講隻碟。作為NINE INCH NAILS超大fans（可能係我第一隊買齊全線的(metal) band），需之前幾隻碟唔算太好，睇過一次live亦唔算超精彩畢竟過左高峰收左火，始終係影響我最大樂隊之一，《Hurt》仍是最佳慢歌、《Wish》仍是最佳快歌、《The Downward Spiral》仍是最佳專輯。失驚無神話NIN唔玩（當然係吹水），再話咁快就話同老婆搞左隊新band，仲要更高速就整好隻碟，而08年唔再簽唱片公司自己玩開始，佢每次寫親歌出親碟都會擺上網任人download（就如《K.M.C.10》文中所提，點解個個講樂隊新世代銷售方式，永遠只識講RADIOHEAD？）（同，我都明白，想好似佢地噉鍾意點玩就點玩，都要去到佢地神台級咁高地位咁有本錢先做得到。新band出身於一個「你做音樂就應該預自己唔可以靠音樂搵到食只係為興趣為理想去做」風氣社會，邊有可能ｄ人肯download完真係買番隻碟？），1/6第一件事，當然係立即上佢地個網download隻EP聽聽。其實冇諗過咁快寫，最後都係幾日內趕起佢，除左情意結，仲因為當順便寫稿。《re:spect》之後，而家幫緊冇乜人知道的《Mugazine》做外稿（我條命就係幫手寫親果ｄ一係唔出名，一係好快執，呵呵），雖則用之前《K.M.C.》存貨都夠玩半年，既撞到就順便寫埋佢，係我第一篇為《Mugazine》原創的新稿。就當之前幫《re:spect》寫一樣，有個故定期限，可以迫自己寫番多ｄ文。
其實本來篇文好短，只講《How to Destroy Angels》，不過寫落自然收唔到手，當中好多內容，其實來自《2008 Retrophrenia》冇（未？）出街的NIN《The Slip》回顧，不過相信成個project唔會有機會完成題材又適合，就而家撮出黎用，黎緊再多舊band出新碟，特別係2008有出過碟的話，會有更多機會俾舊文出街。講到寫新稿，How to Destroy Angels其實唔係首選，之前已經有兩個題目想寫，Peter Steele走左是寫TYPE O NEGATIVE回顧大好時機，不過懶（．．．），隔左咁耐「唔潮」就廢事了，同樣Dio一樣想寫不過又係太遲，同呢類主題肯定大把人寫。反而，我想寫\m/。而家已經人人都做。但好似未有人用中文寫過metal手勢歷史背景。我亦諗番起好耐以前一個廣告，雖然唔關事，內容正正同metal手勢有關。其實好多野外國野好多時從香港角度睇，可以發掘大量過癮野，斷腳訓醫院果陣，都有個計劃，講一個英國漫畫家點樣同香港流行曲拉上關係。當然，好多野想寫。邊有咁多時間？
VIIV一星期了，當晚我冇去集會，放工返到屋企開電視，無聊轉左去國際台，撞到《時事脈搏》。初時以為亞視製作，睇落唔似喎因為立場相當反左，原來港台節目黎，我一向鍾意睇港台時事節目，唔怪得睇得咁開心。撞正六四當晚播，主題係乜唔使講，除外仲有其他專題，好似小數民族與傳媒，同最最最重要的「起錨／超錯」。方針與幽默皆別於中文時事節目，我十分推薦大家睇。
你可以當介乎於《議事論事》種正經同《頭條新聞》種玩野中間，黃金時段節目始終鍾意玩諷刺，中文時事節目大多用馬龍（麻麻）或尊子（造極）式放大醜化，冇計香港人要求乜都娛樂化，你試下《頭條新聞》唔再玩寸玩歌，仲得番幾多人睇？英文台就唔同。鬼佬都鍾意娛樂性，但唔一定要整個或大半個做到娛樂節目噉先肯睇，得以保留一定思考性同深度，再者外國人比較欣賞智慧型笑話，即係唔需要由頭（硬）笑到落尾加見晒腸，應該唔聲唔聲玩一兩野，睇完諗完不得不讚佢玩得絕，亦即《荃加福綠壽》之類反智節目的究極相反。
節目中最精彩，一定係最後一節講「起錨／超錯」。可以搵個外籍公關，對政府整個政改宣傳計劃、高官落區宣傳做評論，講到出口「根本成個構思錯晒」、「你叫人起錨代表乜」、「唔係大聲講就有用」、「講完人地唔係一定支持你」，我冇見過幾多中文時事節目夠膽花咁長篇幅批評到咁出面。比較中英時事節目大家觀點同出發問，就點解中國成日俾外國人笑，因為外國人眼中中國人唔識做政治，落區做show做到我地香港人自己都頂唔順時，外國人直頭睇到笑添啦。西人唔識中文，未必明白兩者同其他雙字詞變種之巧妙，一樣玩得到，將非常文革式的「起錨」口號同納粹黨集會怒嗌「希特拉」拉埋一齊，香港人對西方歷史缺乏認知，睇完未必理解得到當中含意笑得咁大聲。玩得最應景，係片尾。「起錨」兩個字，鬼佬唔知點解，不過佢地識得一首歌，一樣嗌「起naau」。
同大量當年經典一樣，你未必識得隊band或首歌個名，但聽到chrous或者intro，一定會記得曾幾何時聽過。首歌叫《Don't Dream It's Over》，識得個名都未必知道原唱樂隊叫CROWDED HOUSE，澳洲出身係原因之一，你自己數數識得幾多隊澳洲band／幾多個澳洲歌手，SAVAGE GARDEN同AC/DC之外。除左玩「起錨」食字，選呢首歌仲因歌詞：
There is freedom within, there is freedom without
Try to catch the deluge in a paper cup
There's a battle ahead, many battles are lost
But you'll never see the end of the road
While you're traveling with me
Hey now, hey now
Don't dream it's over
Hey now, hey now
When the world comes in
They come, they come
To build a wall between us
We know they won't win
Now I'm towing my car, there's a hole in the roof
My possessions are causing me suspicion but there's no proof
In the paper today, tales of war and of waste
But you turn right over to the TV page
Hey now, hey now
Don't dream it's over
Hey now, hey now
When the world comes in
They come, they come
To build a wall between us
We know they won't win
Now I'm walking again to the beat of a drum
And I'm counting the steps to the door of your heart
Only shadows ahead, barely clearing the roof
Get to know the feeling of liberation and release
Hey now, hey now
Don't dream it's over
Hey now, hey now
When the world comes in
They come, they come
To build a wall between us
We know they won't win
Well, don't let them win
Hey now, hey now
Don't let them win
Don't let them win, yeah
典型八十年代藍領歌詞，doom中帶著勵志，更加似寫緊而家香港人同政府／中央政治對抗處境，撞正「起錨」潮爆、六四正日揀呢首歌做片尾，可說是別有用心，尤其播歌時畫面影住六四晚會燭光。《Don't Dream It's Over》絕對可以用黎做現今香港反政改反迫害社會主題曲，可惜香港人永遠唔留意英文歌歌詞，抗爭歌曲到頭來只得《抗戰二十年》，否則上街一齊唱「hey now, don't let them win, we know they won't win」，都幾epic。而且，有得唱好唱喇，按當今中央甚至特區政府標準，此乃反動，大陸一早判得你死罪。港府接管港台之後，唔使旨意睇得到呢種時事節目、聽得到呢ｄ歌。
「襯仲有機會，逢星期五晚七點，記得開電視睇轉國際台睇《時事脈搏》。」
今日走左去考公務員綜合試。每年政府都會搞一次（卦），中五以上就可以免費報考，成績可以用黎申報部份公務員職位，多數係高到你唔使爭果ｄ，老實講冇乜用。點解會考？上一次考起碼四年前應該更早，見反正唔使錢，年少無知想搏搏入官門打工，冇乜蝕底咪去考囉，考三份卷中文、英文同一份「能力傾向」即係學能測驗式邏輯推理，當年因為冇帶齊文具入試場肥左最後一份，反正跟住都做唔到公務員寄極信都收皮面試都未試過，同考試成績只有效三年，就廢鬼事理了。
近年見市道咁差，政府俾人鬧得多開多左公職位，又留意番。最重要而家改左制，綜合試成績由三年改為永久，唔使三年又三年係噉repeat。合格到就算都做唔到公務員當履歷寫多樣野都好，又免費報考多次，雖然非常辛苦，一點半考到七點三，六個鐘仲灰過會考呀大佬。
制度改變除成績有效期唔同，而家仲加多份基本法，有趣在另外三份卷有等級，唯獨基本法一份冇合格同唔合格只有高分定唔高分。有個舊同學入左海關做，問佢份卷考乜？
「幾個字做十幾條MC，全部揀最正常最接近常識果個答案就得，而且唔會肥佬，你考到點低分都冇事，因為 招聘果陣只會睇另外三份卷，都唔知考黎做乜！」
大家都知個基本法試只係政府做俾中央睇「回歸之後我地有盡過本份」的門面功夫。原來三份考過一次所以對程度有大概認知，比A-Level難多少少啦，好耐未讀過書考過試但完全冇諗過準備，當年我會考同A-Level都未做過past paper連一條都未望過，更何況而家？連上官網做做例題都懶。唯一叫做有得溫，反而係最冇用果份《基本法》。既然網上有得睇晒全文，無聊咪睇睇囉，反正本身都幾有興趣想知《基本法》點樣搞到咁多野出黎。用個metal例子：好多（香港）人好多年前成日話自己black metal要反基督反宗教乜乜物物，但實際上有幾多個真係有睇過聖經、有理解過耶教耶撚有乜好乜唔好、點解要反？到頭來咪柒晒囉，所以而家唔再black metal而emo了。要知道近年時局為何總離不開爭議《基本法》，自己睇一次最好。
第二條：全國人民代表大會授權香港特別行政區依照本法的規定實行高度自治，享有行政管理權、立法權、獨立的司法權和終審權。
第四條：香港特別行政區依法保障香港特別行政區居民和其他人的權利和自由。
第五條：香港特別行政區不實行社會主義制度和政策，保持原有的資本主義制度和生活方式，五十年不變。
一開波已經三條收左皮。難怪香港已死。
第十七條：香港特別行政區享有立法權。
香港特別行政區的立法機關制定的法律須報全國人民代表大會常務委員會備案。備案不影響該法律的生效。
全國人民代表大會常務委員會在徵詢其所屬的香港特別行政區基本法委員會後，如認為香港特別行政區立法機關制定的任何法律不符合本法關於中央管理的事務及中央和香港特別行政區的關係的條款，可將有關法律發回，但不作修改。經全國人民代表大會常務委員會發回的法律立即失效。該法律的失效，除香港特別行政區的法律另有規定外，無溯及力。
享有立法權，但中央唔滿意可以駁回。即係冇啦。
第十八條：全國人民代表大會常務委員會決定宣佈戰爭狀態或因香港特別行政區內發生香港特別行政區政府不能控制的危及國家統一或安全的動亂而決定香港特別行政區進入緊急狀態，中央人民政府可發佈命令將有關全國性法律在香港特別行政區實施。
唔知中央政府幾時會用到呢條？
第十九條：香港特別行政區享有獨立的司法權和終審權。
大家都知道唔係啦。當人大釋法，當中央代表中聯辦同香港政黨議論政改，已經破左。
第二十三條：香港特別行政區應自行立法禁止任何叛國、分裂國家、煽動叛亂、顛覆中央人民政府及竊取國家機密的行為，禁止外國的政治性組織或團體在香港特別行政區進行政治活動，禁止香港特別行政區的政治性組織或團體與外國的政治性組織或團體建立聯繫。
這就是廿三條了。文字上，是乜都講得通的典型大陸式老屈。
第二十五條：香港居民在法律面前一律平等。
我地只知道、只睇到，法律面前，窮人含撚。
第二十六條：香港特別行政區永久性居民依法享有選舉權和被選舉權。
你有冇得投票選功能組別？
第二十七條：香港居民享有言論、新聞、出版的自由，結社、集會、遊行、示威的自由，組織和參加工會、罷工的權利和自由。
哈哈
第二十八條：香港居民的人身自由不受侵犯。香港居民不受任意或非法逮捕、拘留、監禁。禁止任意或非法搜查居民的身體、剝奪或限制居民的人身自由。禁止對居民施行酷刑、任意或非法剝奪居民的生命。
哈哈哈哈
第二十九條：香港居民的住宅和其他房屋不受侵犯。禁止任意或非法搜查、侵入居民的住宅和其他房屋。
哈哈哈哈哈哈
第三十條：香港居民的通訊自由和通訊秘密受法律的保護。除因公共安全和追查刑事犯罪的需要，由有關機關依照法律程序對通訊進行檢查外，任何部門或個人不得以任何理由侵犯居民的通訊自由和通訊秘密。
請同各大被上門掃場網台講。
第三十一條：香港居民有在香港特別行政區境內遷徙的自由，有移居其他國家和地區的自由。香港居民有旅行和出入境的自由。有效旅行證件的持有人，除非受到法律制止，可自由離開香港特別行政區，無需特別批准。
噉點解咁多人出入境有問題、會冇回鄉證呢？
第三十四條：香港居民有進行學術研究、文學藝術創作和其他文化活動的自由。
所以政府咪話紀念六四係「娛樂活動」囉。
第三十五條：香港居民有權對行政部門和行政人員的行為向法院提起訴訟。
老實講我真係唔覺。告得入甚至檢控得到任何一個非泛民公職人員請話我知。
第四十五條：香港特別行政區行政長官在當地通過選舉或協商產生，由中央人民政府任命。
行政長官的產生辦法根據香港特別行政區的實際情況和循序漸進的原則而規定，最終達至由一個有廣泛代表性的提名委員會按民主程序提名後普選產生的目標。
「循序漸進」可圈可點。如此含糊，政府鍾意點定點拖都可以。
第四十九條：香港特別行政區行政長官如認為立法會通過的法案不符合香港特別行政區的整體利益，可在三個月內將法案發回立法會重議，立法會如以不少於全體議員三分之二多數再次通過原案，行政長官必須在一個月內簽署公佈或按本法第五十條的規定處理。
第五十條：香港特別行政區行政長官如拒絕簽署立法會再次通過的法案或立法會拒絕通過政府提出的財政預算案或其他重要法案，經協商仍不能取得一致意見，行政長官可解散立法會。
我相信特首非全民選出、功能組別仍然存在，呢兩條到世界末日都唔會用得著。
第六十八條：香港特別行政區立法會由選舉產生。
立法會的產生辦法根據香港特別行政區的實際情況和循序漸進的原則而規定，最終達至全部議員由普選產生的目標。
立法會產生的具體辦法和法案、議案的表決程序由附件二《香港特別行政區立法會的產生辦法和表決程序》規定。
附件二：香港特別行政區立法會的產生辦法和表決程序
香港特別行政區立法會議員每屆60人，第三屆立法會的組成如下：
功能團體選舉的議員 30人
分區直接選舉的議員 30人
立法會議員個人提出的議案、法案和對政府法案的修正案均須分別經功能團體選舉產生的議員和分區直接選舉、選舉委員會選舉產生的議員兩部分出席會議議員各過半數通過。
2007年以後香港特別行政區立法會的產生辦法和法案、議案的表決程序，如需對本附件的規定進行修改，須經立法會全體議員三分之二多數通過，行政長官同意，並報全國人民代表大會常務委員會備案。
最後一段話你知，如果要修改立法會選舉，例要改動功能組別，基本上冇可能。當然唔少得，又係加番句「根據實際情況和循序漸進的原則」模稜兩可一番。
第七十五條：香港特別行政區立法會舉行會議的法定人數為不少於全體議員的二分之一。
左派佔大多數優勢，要濫用制度蓄意流會非難事。
第七十七條：香港特別行政區立法會議員在立法會的會議上發言，不受法律追究。
第七十八條：香港特別行政區立法會議員出席會議時和赴會途中不受逮捕。
呢兩條唔知幾時會破呢？呵呵
第一百五十八條：本法的解釋權屬於全國人民代表大會常務委員會。
第一百五十九條：本法的修改權屬於全國人民代表大會。
本法的任何修改，均不得同中華人民共和國對香港既定的基本方針政策相抵觸。
見到呢條，就知道講幾多都冇用了，屈機。
《基本法》原意係保障香港人權益維持一國兩際，讀完睇番推行第一日即1997/7/1到而家十三年，香港只有越來越偏離基本。選舉行比例代表制已經係仆街的開始。跟住單2010年五六兩個月所見所聞，唔使再多講啦。所以點解政府死都要保留功能組別？因為如果全部立法會議員民選的話，根本冇幾多左派入得到立法會，政府就冇可能似而家鍾意做乜就做乜，好似鬧完人公投浪費公帑自己又拎千幾萬出黎嗌「起錨」，唔係左派當道，邊會發生？果陣可能次次開會都拉到去《基本法》第四十九同五十條先得。
「多謝政府教識我《基本法》，令我明白而家香港政府同一國兩際點樣失敗。事實證明，政府現今對《基本法》之推廣與普及宣傳，是非常成功的。」
「所以，今年真係好難唔去遊行。」
（（其實好多人已經知道的）小道消息：七一當日，閃靈都會參加遊行！有Doris陪你遊行，係咪立即想去呢！）
琴日講完基本法，難得有人回應（老實講，我真係冇預過有人會睇／理的，呵），又可以吹吹水。
見倒Stan gor咁房抽后算將色流言，角德移加香講珍系好[灰]，馮一拉到去正(字)，年向萊乜9刀講duck母禁技的hongkong，齋呢yet連證苦吐拱化、差老工安far，搞 到 網 上 寫 隻字 刀腰豪似大六gum dor故*忌。上forum講野，要隱藏身份好容易，出事都未必燒到埋身；如果係自己xanga自己blog，「證據確鑿」，第時會發生咩事真係好難講，詳可見陳大文個blog HKGal Today（我初頭都俾個名呃左，唔好學我咁柒），當今其中一個寫本地政府及社會文化最好部落格，可能真係得罪人多，五毛黨常駐之餘連YouTube頻道都俾人封埋。香港政治治安一年間已經可以變到同大陸相差無幾，而家網上自由一樣，打手日多，連民主重陣高登主持都話成日收律師信，既文化雜誌都開始受制，幾時輪到網上都行文字獄？講到我都有ｄ肴底添呵呵∼
冇Stan哥解話，睇完基本法，都冇諗過三分二比例當中原來咁大玄機，因為一直覺得功能組別加蛇宴買位，政府夠晒議員票通過或推翻任何基本方案，正如高鐵六百億，全城屌，包圍埋立法局，又點咪又係照過？而達到呢個地步其實已經唔需要再憂乜野，正如而家政改，唔夠三分二票數通唔過又點？反正咩都係佢定，下次可以用番同一個方案叫人再投過甚至威脅「今次唔接受下次會再改衰ｄ吹咩」，總之一係接受唔係就繼續拖，基本法只提「循序漸進」冇講到明幾時先到序需進嘛，鍾意點樣定義都可以啦。而家香港政府只差在太柒。做ｄ野同大陸中央政府一樣，但大陸擺明惡晒，我話係就係你只有肴底，香港政府係唔夠惡，唯有死撐夾硬黎（一國兩際哈哈）。好多野講大聲又唔夠大聲，講道理又根本冇道理，好似政府電視賣廣告叫人撐政改冇政治成份，但其他人電視賣廣告反政改就有，已經係笑爆咀的on9。同明知政府玩乜都得人地就做乜都唔得，補選用左1.5億嘈到爆，轉個頭嗌「起錨」幾日已經燒左幾千萬，而且你知道一定係（勁）報細數，就如補選一定（勁）報大條數同一道理。仲有又係高鐵做到執笠都唔會回到本果600億，同訂時大大聲結果蝕左兩億果ｄ豬流感疫苗？而家政改新方案，加多最少五個功能組別議席，仲可以笑笑口同你講「比以前民主左」，然後話各位柴台的市民係「支持政改的民意」，先最搞笑。左派議員更加唔使講咁多野啦，咁多旅行咁多蛇宴咁多功能組別。而家大半個香港唔妥政府同民建聯，連咁多年黎一直唔理時局班靚仔靚妹都開始出聲出手，做得差固然係大原因，但同時亦因太柒柒到大家都頂唔順。
就我八到番黎，閃靈係特別為參加遊行而七一過黎香港，二號澳門出，三號到香港表演，Facebook已吹恆晒搞接機團，痴漢R先生快報名。不過我同好多人睇法正好相反：假如閃靈同綠營時代一樣咁政治掛帥，又或政治比重仍然高於Doris（事實：Doris冒起，係藍營當道後之事），一向善忘同追潮流的香港、CRADLE OF FILTH同DIMMU BORGIR一早「out左啦仲唔聽emo」的香港，而家仲有冇咁多人記得佢地、會聽同睇佢地？再者，咁多位香港閃靈迷／Doris fans，有幾多真係會留意佢地音樂以外甚至造型以外，不論以前綠營年代份抗爭意識，還是而家「連閃靈都特登台灣飛黎香港參加遊行，我點可以唔上街」？以metal宣傳政治其實絕對行得通，在外國。香港地？第一件事：歌詞，你睇？
「相信七月三日之後，我又會得罪好多人。」
呢場show相當過癮。我係上星期六考完公務員試走去睇，雖然大家都係觀塘，考試考樂華，要去番牛頭角果邊都幾困難。香港地真係冇幾多場show玩過industrial，仲要裝扮到咁恆玩，不過更大個意外可能係梵姬，事前完全唔識佢地，但歌同造型都一流，而且已經錄好隻碟，加隻碟設計超靚。（第一首歌好似HEADHUNTER都有唱過，唔知兩隊有乜關係？）仲有上次DARK MIRROR OV TRAGEDY睇過一次已經好想再睇的WEEPING ROSE。近來睇番多左show，今場係其中最想寫之一，不過，又係時間問題。點解咁好睇？講真係好難講，上Facebook偷偷相俾大家睇，肯定冇幾多人香港地睇過有show會噉玩：
又食。上星期三端午節，校花搵人同佢行街，經過大氣電波用佢超把難頂高音聲，迫到我打算全日屋企攤抖夜晚都要特登飛出尖沙咀一齊食飯。星期日原來班友又即興地電話吹雞走左去唱K，好在冇搵到我，熱到死我都唔鬼想出街啦。不過要來的終要來點避都避唔到，禮拜日唱完K，「食飯啦！」星期一晚又食。我就黎對住紅燈山丘中咁多位，多過對住屋企人同公司同事。
當以前兩三個月先出次黎，變到而家差唔多個個星期大家都食一餐，諗食乜野好成為大難題。今次個波踢左落我度，你地就大鑊啦，我食野從來求祈，一大班人的話唔係打邊爐就係韓燒，兩樣野其他人已經食到唔想食（上兩個星期都有打．．．）。你地好彩。話說近得劉Sir多，會計靚女覺得自己實在太頹了，頂唔順，就遞信走人了。咁毅然，辭職之後有咩打算？
「「放兩三個月假先，等男朋友養我囉。」（．．．）
六月頭走，經歷左兩個last day，黎緊仲有第三餐，係另一個／另外好多個故事。其中一個last day，成班同事拉左去兆萬青葉，從來唔多鍾意食日本野，不過放題有炸野西式野食我又OK，而全香港99%人同我相反勁迷日本菜，雖剛食完冇耐又encore多次啦，唔係我都係拉大家去花園金閣，跟住俾人打死。
想知日本菜幾受香港人歡迎，食次青葉知道晒，打電話訂位分分鐘要早兩日，而且只接受七點前九點後，平日黃金入座時間八點只准walk-in，局你預約班友早ｄ放工趕過黎入七點場，而且訂左位到左都唔係立即有都要等等，因為真係好叉多人。我冇食過多少放題，不過青葉算最少野食揀果間，因為我只食燒物炸物卦，最普通的炸薯炸豆腐之類反而冇，其實呢ｄ小點先好食呀。漢堡豬柳，居然係普通漢堡扒，但落日式燒汁搞到超怪（每講起漢堡豬柳，就諗番起自助餐食到伴碟薯蓉都唔放過的太子冰室，佢地ｄ正宗漢堡扒實在很正呀）。好在主打雞軟骨同炸餃子勁掂，齋靠呢兩味夠我食成餐。其他人梗滿足，係噉叫刺身壽司，成檯都係船泊到太多要叫姐姐幫手起錨駛走幾架留番ｄ位俾我ｄ雞軟骨。野飲都得玩兩溝，水蜜桃溝橙汁係噉飲，同難得在食到最後仲有甜品。上次每人一個雪米磁，我好鍾意食架不知幾高興，點知今晚得雀巢雪糕杯仲要唔多掂的紅豆味。如果按每人百四計，除左地方好迫又嘈，食得兩個鐘唔夠喉仲要半個鐘前last order遞晒單趕你走，整體係滿意偏中上。不過，當然都係打邊爐開心。我要聯邦無限芒果布甸。
因為雞軟骨加炸餃子無限供應（每樣食左各最少一打以上，很飽），食到好鬼死滯，本來想行番屋企消化消化，實在太熱加隻腳始終傷患未癒，死死地氣搭番巴士算。都驚第二朝起唔到身食到咁飽。其實唔使憂，個天都體諒我，撞車。九龍城出旺角有兩條大街，亞皆老街同太子道，兩架車正正就係兩條大街中間果段撞左，結果兩條大街封晒全部車入唔到。反正都係返唔到工，早知我就唔使趕起身，呢個情況其實可以行番去土瓜灣搭小巴或者的士，一樣可以及早返到公司，但我咁死懶梗唔會咁搏命寧願守巴士站等車啦（．．．）。因為返工時間個個趕路，巴士小巴的士唯有路中心放人叫佢地自己行路，好似睇災難片，馬路全部車停晒成條行車道都係人，有人真係照行路出旺角，我等左幾個字先上到架巴士，平時太子果頭落今朝要朗豪坊行番出大角咀，落車果陣認得有個女人，我等車時佢落左巴士行，到我落車時朗豪坊樓下又見到佢，咁熱仲走咁大段路真係夠晒毅力。
食飽飽，就梗要娛樂下啦。臨近暑假多番好戲上，一晚睇兩套，豪華《通天奇兵》之後，再過新世紀《血聘》睇足成晚，其實最好梗調番轉，豪華唔知點解播親西片ｄ音響都勁差平時細聲有時甚至冇聲（港產片反而冇事喎，吹脹），新世紀調番轉ｄ喇叭爆到慌死你聽唔清楚睇《通天奇兵》呢ｄ動作片最開心，問題係《血聘》豪華冇得上（之前又係走呢種懶cult路線的《一百萬連鎖兇殺》反而有，再吹脹），加時間就唔到，唯有噉樣走兩頭。
「就近排睇過，印象較深係《打擂台》同《血聘》，前者係近年已難求的100%地道風味港產片，同睇得人感動，加豪華睇再加分，後者唔算好但夠獨特。最想睇其實係講傳奇全女glam rock band套《The Runaways》，只不過得電影中心上，仲要話咁快冇晒夜場，相信過左今個禮拜就會落，唔射波冇得睇，似乎要等DVD。」
「同超極勁大期待《Predators》。《Sin City》導演擔正喎，加睇trailer、睇見個名，都知佢想將Predator拍到成套異形噉，而且見到《鋼琴戰曲》個男主角做軍人又唔似，覺得好鬼搞笑。有見兩集《AVP》特別第一集爛到笑（但我受，呵），作為Predator＆爛片fans，呢套肯定係年度大作。」