或者好多人唔記得左，十七年前六月三十，黃家駒離開左我地。不妨回想，全個六月，自己身邊幾多人提及過？雖事隔十七年，BEYOND直接或間接影響左現今好多人沉迷樂隊，當「rock」呢個terms已經成為過氣，而家band sound係metal core emo嘛仲齋rock？加上香港人從來唔多珍惜或注重有潮流價錢之本地文化，BEYOND又「唔夠underground」，即使地位如何崇高、有多重大歷史意義、多少人受過佢影響，遺憾地仍被潮流沖淡。近幾年客觀環境再落石，七一已成全港市民年度重頭活動，就連藝術、音樂一班六月都好唔得閒；跟住Michael Jackson同期升仙，大家只有再加遺忘。直到今時今日，仍然有固定Hide／X-JAPAN致敬演唱會，甚至Dimebag／PANTERA（不過，都好少了），但已經冇乜黃家駒／BEYOND tribute show。
終於，有呢個非常特色tribute。好坦白我唔識呢班外國朋友，官網話表演左十幾年，同由美國搬黎香港住，入鄉隨俗就順便唱唱中文歌。唔係第一次唱中文歌，之前有容祖兒《我的驕傲》，向來對佢冇乜好感唔好意思連搵黎試聽都懶，今次就唔同，cover香港最重要搖滾樂隊最經典金曲，亦是重要香港流行曲之一《海闊天空》，之前講過每逢場合需要搵首歌振奮人心，《海闊天空》常成首選，就連兩年前四川地震，演藝人都係改編佢做《承諾》作地震賑災曲（雖然兩年後災民仍然水深火熱，相反各位官僚車同屋越換越大，大家都知捐款到頭來去左邊度，相信黃家駒見到自己名作由助貧變成助貪，死左都難暝目）。多年來翻玩《海闊天空》，不離木結他版或rock版，epic是林子祥港樂symphonic rock，反而難得聽到如此另外風格版本。好老實講呢類抒情歌a cappella化好少可唔好聽，最過癮梗係外國人唱廣東話，出奇地正，除左頭幾句聽得出口音，跟住呃得人。勾番起好多回憶。幾時先有香港人搞的tribute？
「最後，又一個劉Sir cliche：官網大大隻字寫住Metro A Cappella。非常開心。因為，我睇左成Metal A Cappella。」
今晚2010七月三，一定係今年甚至近幾年，香港indie gig最鼎盛一晚，前無古人後無來者的一晚。閃靈喎。Doris喎。噉都唔爆，香港地收得皮啦。成場show寫晒，等多半年都唔知寫好未。不過今日非常過癮，前一晚起玩／喪／笑到睇完show訓覺。先簡單幾句。
其實買飛果時，已有打算訪問今晚兩隊EVOCATION同閃靈，最好可以拍片，不過一路幾班人話玩拍片最後都成唔到事，冇技術，近排公司又忙，就算數了。直到星期五臨放工幾個字前傾英問：
「訪問閃靈，有冇興趣？」
原來約左Freddy同Doris面對面傾。再俾佢昆幾句，雄心壯志返來了，做足全晚第二朝返到公司繼續趕，起左份訪問稿出黎。三十幾條題目。嗟。而且都唔夠時間問晒。完全版有五十二條。希望有朝一日可以完成。
初時諗住只係顧問身份，幫人作完題目就收得皮襯個熱鬧算，點知去到臨時拉伕左去問問題。好慶幸呢幾年同工廠日講夜講，口普通話叫做呃得下人，最少佢地兩個知我問緊乜先。（雖然，事實是一早印好晒題目俾佢地，咪劉Sir 9up都知要答乜囉）立即明白國語的重要性。最抵死係閃靈今次澳門／香港巡迴個tour manager，原來係香港人。過台灣發展，其中一個原因係
「台妹真係好撚正！」（請原諒原意被劉Sir大幅放大及市井化）（但，的確只有噉先可以指出現實）
今天開始，我決定要苦練普通話。
全個訪問因為試聲分兩次進行，夾埋傾左個半鐘，都係問歷史、音樂等，最重要梗係政治同Doris輯靚相。估佢地唔到地親民同開放，問乜都冇問題，就算問題好敏感一樣百無禁忌再同你講講笑，而且一條簡單問題兩個人可以用個幾字答你交足貨。唔好話當訪問，就算當成平時無聊吹水，都係我吹過最開心一次水。所以，咪好想可以搵佢地完成埋個完全版訪問囉。
「Doris素顏都無能敵，雖則近兩年實在被人過於神化，但在搵條女都難的metal界，Doris就算用全世界排，都屬於神級非第一即第二。」
「再同佢傾過玩過，就明白的確需要學好普通話移民過台灣了。」
訪問完，先正。當然係影相時間。成班人鬥快將ｄ相post上Facebook爭做全港第一。表表者是藍調人，合照時特登企到最邊Doris隔籬，之後將張團體大合照cut剩最左邊變成自己同Doris合照，再upload上Facebook做車頭相。實在毒到無可再毒。
對Hidden Agenda印象一路正面，今日終於搵到樣野唔妥。訪問完去牛頭角地頭站拎飛俾七刀同側田哥，發現果頭想搵野食超難，除左屋村入間似殯儀館多過茶餐廳的茶餐廳，居然乜野食都冇，唔計超級市場同七仔的話。而且工廠區舖少之餘，一到七點基本上成條街收晒，得番麥記。最後三條友行到去創紀之城即係觀塘咁滯先搵到間似樣茶餐廳。故事教訓我地，以後黎HA睇show，記得食完飯至好過黎。
今晚一定可以成為香港史上最特別indie gig之一，因為玩埋主題，入場就有姐姐仔塞大大疊溪錢俾你灑。不得不佩服久未蒲頭的Joe姐，做fans敬業樂業到自己買左成個環保袋咁多的溪錢，普通全白版嫌太齋，仲有各種貨幣任君選擇。此乃睇show睇到傻也。
因為以前一係睇舖一係有事，EVOCATION今次先正式第一次睇，上次城大有機會點知玩左半首就cut show。首次完整演出．．．基本上鼓佬一踩bass就乜都聽唔到，去double bass時，只聽到佢踩，同唱。低音調得比disco更重。只有話，向來覺得第一隻碟細節好但整體有些許雜亂無章。今次玩左兩首新歌，雖低音之外接近乜都聽唔到，結構上進步左好多。期待更多新歌，同新碟。不過希望第時出show唔好推咁爆bass。
閃靈，唔使講啦。就算冇Doris都是天下無敵，踩盡歐美場你估路人甲？live metal gig拉埋二胡過你又見過未？重點之一，是band introduction。
「鼓手：元華！bass：元秋！on guitar：火雲邪神！我是歌手葉問！」
當然大家勁嗌。但可能冇乜人知佢講緊乜、知佢玩緊野，總之，Freddy嗌，我咪嗌囉，呵呵。
完show之後，見到搞手，我同佢講，每張隊應該賣貴一百蚊。係我係仆街的。如果我搞，何止加一百蚊，直頭賣貴一倍添啦。我成日覺得，而家香港indie gig實在做得太賤了，其實如此藝術同級數絕對值更多。只不過，有幾多閃靈？當有四五隊band但收你兩舊水都要俾人小時（傳聞是大約一年前的真人真事）、當我真係只賣一百蚊張飛你一樣唔黎睇全場可能得廿個人唔夠買飛時（可比較今場閃靈，同上年年底「韓國閃靈」，不過「韓國閃靈」未至於得廿人買飛，雖則都唔理想），唔難明點解我會噉講。有幾多閃靈？
撞到EVOCATION Tomy，大家傾左陣。對於metal，今年真係好灰，見到其他好似punk、core、pop等等等等差唔多每個月都有獨立樂隊出新碟、每個星期六日多gig睇到你都唔知點揀，metal scene卻全無動靜。假使唔包括metalcore/deathcore等非「純正」系別，過左半年都冇metal band出過碟，幾隊出名band又差唔多唔出show，而TRHK已經難再搞show，其他metal單位似乎今年都唔會大搞，現今仍會有metal gig之Hidden Agenda銷情亦普遍慘淡（老實講，就算個場係自己地方，我真係唔知道一場show只賣十幾張飛，可以點維皮？），2010是香港metal沉寂一年。所以幾隊名band大band需要盡快出新碟，振一振奮。
完場大半人唔走，梗係啦仲有簽名會影相會嘛，有內應Oli姐出手，我精人出口就夠呵呵。其實唔太大動機簽名，不過放工時特登上TRHK拎左幾隻《賽德克巴萊》，因為 － 我諗直到今時今日都冇乜人知或理過 － TRHK出版之《賽德克巴萊》，係全球獨家同時有國語版歌曲及外國版美術及bouns MV版本。見過晒國語版同外國版封面，就會明點解TRHK幫佢地出碟時會要求噉樣集兩家之大成，所以特別希望佢地可以幫我簽番一兩隻，真真正正全球獨家呀。keyboard手出過一隻solo碟，坦白音樂普通，估唔到最重大意義在於今晚。而影相．．．
「你覺得同Doris影到相，好威？今日演出之前，我有最少三個機會可以同素顏Doris影相，想企住影得想坐住梳化影都得。但係我都唔影。噉我咪仲威？」
見到有得搵佢影相唔影，懶型完懶威完事後先發現柒左喊苦喊忽的劉Sir，想笑又唔好意思大聲笑出口，只好收收埋埋陰陰嘴地笑的Doris
（訪問果時我同佢就係差唔多呢個位呢個距離咋）
近排要寫，多野寫到寫唔晒。繼2007年除夕，剛剛個禮拜日兩年半後八三三終於再上大陸消費。之前一晚睇閃靈，之後一晚睇F.I.R.，真忙。今次黎香港真係唔聲唔聲，隻新碟上年出已經唔宣傳，連開紅館咁大件事都係，或者佢地同主辦單位都知隻新碟出事卦？結果入得半場，對一個咁成功pop rock組合黎講簡直是灰爆，紅館坐得一半人是頗為樣衰同失敗的大佬，再者相信極大量平飛位，我都係半價入場咋，肯定更多人半價都唔使。老實講隻新碟印象十分負面係撻Ｑ撻到你唔信咁平庸，加上上次黎香港實在太太太太太太太強了，所以入場冇乜期望，雖然編曲有改善空間，又可能太少人開頭冇乜狀態好倦，表演總算合格，同三人每人一個solo環節我鍾意，加大玩medley，同唔少得全場合唱《Fly Away》、《Lydia》、《我們的愛》，仍然睇得感動。 同感慨。咁精彩可以咁冷清，同直到今時今日，香港地連如此最簡單最純粹的pop rock都冇。
不過多野寫一回事，冇乜時間，皆因實在太忙。好似一睇完F.I.R.，返到屋企沖完涼即訓，因為今朝就要晨早返工廠同客開會，十一點幾傾到差唔多兩點先食得飯，都未夠呢樣咁難頂：
「今日上工廠，成42度。黐Ｑ線。」
同，呢個廣告。船上面日播夜播，一來一回夾埋睇左三十次以上。
唔知點解，我返工程路只係沿太子道九龍城去到大角咀幾個字小巴，都可以經常發生好多事。大量交通意外唔在講，旺角地帶加返工時間人多車多，近窩打老道勞弟學校（我十分鍾意呢個名）果頭成日撞車，最勁試過成個月個個禮拜起碼一單，即係多到我同老細解釋「交通意外所以遲到」已經變成現代版《狼來了》，雖是事實都廢事再講。對唔住各位乘客，係劉Sir黑仔邪住大家。同耐唔耐就會見到奇人奇事。今日一程車遇到三單。
說話勞弟學校交匯處之前有個小巴站，因為坐呢架車九成人都為去新世紀或者太子地鐵站，中間好少人落車，呢個站就係例子。今朝有個西裝友等車，架車仲有幾個車位至埋站，個西裝友一見到，立即展露非常高興的笑容，再加非常熱情地招手，差在未衝過黎攬住架小巴。以為佢識得個小巴司機，點知司機見到佢係木口木面完全冇反應十分抵死。或者嚇親所以唔識反應。可能個西裝友覺得，只要笑得咁燦爛打招呼打得夠落力就一定有位坐。佢又好彩，剛剛好有一個人落車俾佢上到。如果唔係就笑死。
大家搭小巴嗌落車，好耐以前ｄ司機聽到就算理鬼理，之後開始有改善會舉手應你話聽到，近幾年連小巴都學巴士裝電鐘，不過可能我比較old-school有鐘照計較方便但搭小巴總信唔過個鐘寧願自己嗌落車多ｄ。因為又要開車又要睇路又要聽實幾時有人叫落車，小巴佬通常冇咁得閒睬你，你嗌完求祈遞遞手應酬算，今程車個司機好唔同，一睇就知佢非常熱愛自己份工。有位乘客叫落車，佢好用力地向天舉起左手，並擺出勝利手勢。非常熱血的小巴司機。
「如果唔係V係\m/，就型到爆。」（假如有朝一日劉Sir轉行做小巴司機，你應該好易知道係咪上左佢架車）
太子地鐵站是重點。搭得呢架車多數為黎地鐵站轉車，試過除左我成車人落晒，再換成車人上黎。今次都落左半架車，反正唔關仲有兩個站先落車的我事繼續訓覺，點知俾人嘈醒左，有條友上車第一件事係大大聲
「對唔住咁多位！」
跟住仲講左幾句野，不過太早未瞌醒聽唔清楚。發生咩事？因為之前有幾架車疏導，其實落車人數比上車多，而且因為紅燈，司機將架車泊埋站等人上冇話趕住走，果位仁兄坐低仲夠時間等多幾個人上先開車。何解佢上到車反應會咁戲劇性？是一個謎。
「搞到我覺得好超現實。好似入左個日本搞笑電視節目噉。」
今朝同一位好耐冇見的老朋友碰番面。佢就係長沙灣市長二寶樂。正確黎講唔係碰面，碰耳嗟，九點幾無端端打電話黎。先醒番起，對上一次見到市長真人，可能要追溯到上年「韓國閃靈」DARK MIRROR OV TRAGEDY。對香港metal有認識都知道，二寶樂係近十年其中一個推動香港獨立音樂最大功臣，
「試問香港地有幾多隊玩嘈野indie band未上過佢主理之LiveHouse表演？」
作為一個長期死忠old-school death & thrash迷，頭髮長到落腰，出街十件衫九件係(death) metal tee，仲要講親野50%內容粗口，唔使講都知屬於邊一種人，跟住神秘消失，原因相估冇乜人估到：上年年底即係頭先講場show大概時間世伯走左，潛水一輪，蒲番頭已經從良投身耶教。雖則好多人知道市長本身係教徒好耐以前受過洗，只係跟住離開教會一段長時間，見佢而家個款入番教，始終一時間難以接受。再睇睇市長信教後的撚樣書留言，已經完全唔metal了，十足一個「非耶即柒」激進派信徒。唔覺唔覺就過左大半年，咁突然晨早打電話黎仲要撞正老細同各位同事開緊早會時先搵我，都唔夠原因來得意外：
「而家轉左三三四，如果中五衰左，應該點樣讀上去？」
可能比hardcore metal友突然做左hardcore耶撚更震驚。雖然我一早離開本地教育界，都吹吹水應酬下知乜講乜。何解突然咁有興趣認識新學制？據聞市長你十幾年前考會考，成績好到連張cert都撕爛埋喎！
「我諗住讀神學院，不過好貴，夾埋要五十萬！」
嘩屌。我發覺開始同唔到佢溝通。仲有點心寒添嚇到。莫非死一死老豆，真係有咁大影響力？成個人完全唔同晒，開始諗將來，想讀番書學番野。好驚。同埋戒晒粗口，以前就算返工時間打俾我（接近每次都係查實），照樣想幾爛口有幾爛口，今個電話可以傾左成分鐘仍然小狗懶擦鞋都唔見一個。再戒酒，以前一個星期劈五晚劈到工都唔返，而家吧都少落。黎緊仲會戒煙。好恐怖。有樣野都唔好意思問，難得當事人自爆：
「metal我仲有聽，不過詩歌比例大過metal！」
越來越驚。以前睇書只限《重型音樂》之類同game書，而家係「近來睇左好多書」，是日閱讀是《基督教與回教的分別》。同原來耶教都有underground，教會摷到好多錄音帶，係好耐以前講道紀錄，慢慢逐餅帶開黎聽。因為又要返工，又要追求耶教真諦人生道理，冇乜時間留俾metal，新野除左大band會追追，多數只聽往日經典。
「有時見到而家ｄ靚仔，會覺得佢地好metal。」
重投教會見識廣左，好多野想法變晒，好似有隊台灣聖樂團「第一日開始就影響住香港教會音樂，組成十年影響足十年」，早前黎香港搞三場，佢睇頭場，已經有八千人。自己搞左band show咁多年，面對如斯大場面，當堂覺得自己好渺小，冇八千人一場，搞得到一場八百人都好。幾個月，令佢覺得世界真係好鬼大，人生真係好短暫，未來真係好廣闊，理想真係好撚多。
「講到呢度，我諗係時候收線了。宗教特別耶教有其善處，但從另一面睇，其實好恐怖。都係膚膚淺淺聽metal好。」
越返得大陸多、同大陸做野多，就越頂唔順大陸ｄ野。每一次大陸有乜大型活動國家級盛事，第一件事，當然係立即頒布大量措施加大量（面子）工程擾一擾民先。唔好以為香港隔咁遠冇事，有時仲死。
話說我公司差唔多每一件產品都會用到電池同LED。兩年前2008北京奧運，因為「國家安全」，全國海關大整頓，好多野唔可以隨便郵遞過關，其中一種係電子類產品，咁好彩電池屬於「電子產品」，即係「具危險性類別」，每次工廠要送樣辦黎香港都好大鑊，連埋電池寄搏慒，可以一粒電池搞到成架貨車扣關唔俾過；但唔寄又用唔到，點寄俾外國客人？因為速遞先有事自己過關唔會，結果要工廠訂番千幾粒電池，之後開車上去帶落香港用，又或者有時批貨夠大，直頭自己開車過關拎唔速遞。最大鑊係活動完左唔代表措施會一齊完，禁開就繼續禁，廢事煩嘛一個政策行開就行煩到你，如果又要改煩到我喎，我梗係死都唔改啦由佢而家係點就點啦！換言之每經過一單盛事，你會發覺麻煩比以前更多。
事隔兩年 － 奧運完左兩年，但當時「國家安全理由速遞唔可以寄電池」條例仲未撤銷，死未 － 到廣州亞運會，又係搞搞震時間。電子產品難逃熱門命運，今次唔止電池連LED都唔得。但我公司乜野都要用LED喎，電池拆得出可以避，LED可以點搞？七八月仲要係旺季，個個禮拜工廠都要寄幾十套樣辦落黎香港，而家話電子產品一律禁過關，等於封左關乜都唔寄得過黎，當堂大鑊。唔通日日自己開車過關交收接貨？一次五舊水起碼，當一個禮拜一次啦，三十幾個禮拜喎，條數點計呀。同好似我地呢種差唔多全部產品都「犯法」的公司，黎緊半年可以點做？官方梗唔會理你，「這是為了成全國家大業的少許犧牲」嘛，國家利益才是重要，你果ｄ濕碎野自己諗辦法解決啦，有乜損失都係為左亞運而付出，是值得的。最抵死係，亞運十一月先開始，而家就開始「先試行禁令」，即係下年逗埋利是，都唔知個關開番通未。
好在身在大陸，任何有利可圖，即使其利多麼微薄仍總有人會做，一家唔肯自可以搵第二家肯接。不過今次關口執得比奧運更嚴，遲寄到已經算好彩，平時幫襯開順豐，相信好多人識，船務姐姐解說係「由得幾個人租人地車開始，做到有自己車隊，而家送晒差唔多全個中國同台灣連韓國都送，遲ｄ分分鐘上埋市」，聽到都知十分堅啦，點知最大間死得最快，老闆娘話中央電視台新聞報告點名小佢地幫人帶違禁品過關，得罪左中央，睇黎有排唔使搵佢地／有排見唔到佢地了。但辦始終要寄，唔係點同外國客傾生意接單？所以要靠我。有張單下星期出，因為客唔得閒，今日返左工廠幫佢驗貨，但另負重任：既然上得工廠，請順便回程時有幾多野帶幾多野返香港，反正坐船，當行李寄運，落船時公司派車過黎拎就得。你話而家幾折墮。都仲未處理得晒成個問題。上黎仲要同工廠傾傾黎緊走貨點算：據聞部份大城市有實行單雙日子行車制，單數日子只准車牌最後個字係單數即係13579ｄ車行，雙數日子調轉24680，用以疏導交通同「保護（已經俾大陸人破壞到根本冇得救的）環境」。十一月廣州搞亞運，而廣東地區咁多工廠咁多貨車，難免成為整頓重點，就同電子產品唔准過關一樣，亞運開幕半年前就要「試行新政」，今個月開始廣州地區都推行日子行車制。又關我事？工廠話睇日子先知一架車行唔行得，送貨果陣就大件事，因為唔知道租唔租到車，可能你要十架車，點知間物流公司有得三架車牌對號出得，你點算？下星期我就有單貨面對呢個情況。除左電子產品一律唔准過關，估唔到單雙日行車都有影響。同呢個措施你話大城市實施可以叫合理，但工業區都做，有冇諗過速遞同物流果班點算？就算我真係咁好彩全隊車隊一半單號一半雙號，最少2010淨番咁多個月，每一日我只可以動用50%資源出去做野，點會對生意冇影響？如果灰到大部份甚至全部車車牌都係其中一邊，咪仲大鑊可能每個月有一半時間直頭車都出唔到？當然，面對問題果班唔係諗政策果班、唔係捉人果班。呵。我公司仲型到，叫我搭船返香港時，順便留意搵唔搵得到每日過關幾次班水貨佬幫數頂住速遞先。你話幾戇鳩？
今屆廣州亞運會，口號係
文明同和諧已經成為中央口頭禪，禪到cliche果隻。但最諷刺係，講左咁多年、一日比一日cliche，你行晒全個中國，都搵唔到呢兩樣野。
需要首先嚴正鳴謝Rock爺 － 已榮升Rock帝 － 的神機妙算。
「點解要揀22/7禮拜四《Salt》上畫第一日就睇？」
「因為今日黑雨囉！」
今個星期十分無奈。難得終於有風球，明明個波吹到正點睇唔星期三都星期四有假放，可以臨門突然拉西打橫行，李氏力場果真刀槍不入。都算係好事，因為Rock帝一個禮拜前己呼籲一上畫就要去油麻地電影中心睇《Salt》，幾日前已經大班人買晒飛，戲院打風照開，八號都要出去會十分戇居，而家冇風打雖然要返工，起碼叫出開門口順便去睇戲先，又唔怕去唔到蝕左張飛。點知冇八號波仲大鑊，臨放工半個鐘先黎黑雨，已經放工公司頹多半個鐘先走，落到去可以大雨到霧噉睇唔到條街，水多到連水渠蓋都猛咁噴水，街頭行到街尾都過唔到馬路，因為成條馬路水浸晒積水寸幾高，冇水靴點敢行呀大佬。好辛苦先搵到個罅位過到馬路對鞋唔使入咁多水，都搞唔掂大雨過頭，公司隔籬街係市政大樓，有得八達通平兩蚊仲可以上去圖書館避陣雨，唯有走過去避避先。一去到嘟完八達通，就立即變到超細雨了。
「挑。早知我公司上多幾個字網先落樓啦。」
既然細雨甚至差唔多停雨，幾蚊地鐵車錢可以慳番啦，反正我一向反地鐵可以唔搭都唔會搭佢，同其實行路出去油麻地唔係耐得好多，一路行一路掃街篤篤魚蛋仲開心。同埋，有個心願想了。
「以前潮流特區果頭返工，新填地街果邊見過有間五金舖，叫五金堡Metalburg，型到仆街。果時冇影到相，而家想搵間野影番張，已經唔見左。有冇人知間五金堡去左邊？」
「你上次見到間野係幾時呀？」
「五年前．．．」
開場前幾個字，終於齊人了。問問Rock帝，點解一定要上畫第一日就睇？咁好野撞正最大雨果日？
「我想睇咋嘛！只係循例問下其他人睇唔睇嗟！點知你地咁大班人出黎睇！關我咩事！」
多謝Rock帝令我繼凌晨三點幾Megabox睇IMax版《變形金剛2》（其實果次原來計劃係之前打八號個禮拜六凌晨睇的），又多一單黑雨睇戲柒事可以同大家分享。都係講番套戲。《叛諜狂花》個名已經夠晒老土，而家大國崛起仲講蘇聯侵略美國，會唔會old-school過頭？雖然個劇本文戲多左少少之餘只叫剛剛好交代晒所需來龍去脈，老實講整個侵美大計都幾空泛虛幻，叫冇太拖泥帶水唔會似好多導演太執著於解謎或建立謎題，打戲夠多同有心思，似《玉面飛龍》時代種唔止鬥力仲會鬥智，只係主角俾人打一野就傷晒，但各大特技場面全部不廢吹灰之力，好似天橋同高速公司一架車跳去另一架完全冇事，仲有地鐵開恆果陣跳出車居然乜傷都冇打個關斗就企番起身好／懶型地繼續行，會唔會屈機夾造作左少少？後半玩身份，到底主角真係蘇聯特務還是被老屈，又到底成個陰謀係點會點發展？變成無間道加強版，一路落去「咦乜你係間諜？」「下原來你都係？」爭在美國總統未做埋蘇聯間諜咋，雖然因為呢種間諜片拍得太多好多野一早估得到，唔算太鬆太散同有場面搭救。其實同一個題材唔拍成動作片，將劇本改為懸疑特務片講蘇聯間諜已經混入美國政府至敵我難分，主角一伙唔知可以信邊個同可以點挽救局面發展落去，或者更好睇。不過，當搵安祖蓮娜祖莉做主角，都知目標市場係邊種人啦。又要再請Rock帝出黎客串一下。
「阿Rock帝，何解你會咁想睇《Salt》呢？」
「預告片明明有佢除衫架！點解戲院上會冇左？冇扑到野套戲邊度值五十五蚊呀！」
無聊的話上網搵搵《Salt》個trailer，原來真係有除衫戲，全長半秒。點知上畫時連果半秒都冇。相信Rock帝要買番隻無刪剪版DVD重溫一下先會滿意。你明點解要安祖蓮娜祖莉拍啦，唔係點呃到Rock帝呢ｄ人捧場，票房點會咁好？睇得戲多發覺而家好多trailer都係呃九人，好似《Predators》trailer最精彩果幕，你入戲院睇左先發現原來係搵笨實的。
出到油麻地睇戲，唔出廟街食番個煲仔飯又點叫完整呀？不過而家越食越冇癮。第一次起，每次黎睇戲都係幫襯白告推介的一間indie野，即係上次食食下有戲睇果間，係咪特別平特別好食唔知，只知其他幾間特別煩。差唔多包圍住晒都係一家叫興記大label，檯凳擺到出街，次次有人經過就係噉拉客。以前都叫唔太滋擾，而家係見到你街口出現，立即前後左右全方位幾個阿嬸圍住係噉嗌興記興記興記興記興記興記興記，仲要指住indie果間，即係俾佢地夾住、唯一一間唔出門口嗌唔擺檯凳擺到出街果檔大大聲「果間唔係興記」。即係你大聲拉客廢鬼事理啦，但你出到聲噉樣講人，人地唔理唔擋一回事，佢地頂得順你我都頂你唔順。只有令我更加唔妥。
「雖然食左咁多次，我都唔知食開果間其實叫咩名（．．．），但我可以保證，無論食邊間，甚至唔食，都一定唔會幫襯興記同佢地有份果咁多檔。」
今日執舖頭時，摷到來歷不明的李麗珍VCD乙隻。
不過，連套戲叫咩名都未睇清楚，就俾人搶左。
「AV興！小你！快ｄ還番隻李麗珍俾我！」
近來屋企多事，加上歡送皆旺TRHK，非常地忙。今日31/7，都專登抽時間晏晝過會展動漫節。老實講，作為一個美漫fans、作為一個萌潮＆BL反對者，加上唔多打機想打就要換腦，對動漫節從來冇興趣，上一次入場係六年前2004工作人員身份呃免費飛入去睇大哥丞＆官恩娜＆F.I.R.，跟住隔六年今屆先再黎，加第一次真係為自己而入場。原因？唔使問啦。劉Sir咁膚淺，好易估嗟。
「謝安琪喎！自從四大同無記炒左，你記唔記得佢上次出live係幾時？分分鐘今次唔睇，今年都冇得再睇呀。仲有MR.呢！」
經過兩個鐘超體力勞動，本身諗住返屋企沖個涼換套衫先出發去灣仔，都唔敢，場show三點三開始，雖然去時先十二點左右，驚遲到錯過左，身水身汗都立即仆過去。地鐵站行過去過左橋已經知大鑊：出橋已經分左兩條路一出一入，一路跟住行，兜晒第一棟大廈半個圈之後，出去都唔可以直接入會展，要先過會展對面棟鷹君中心，蛇餅式轉好多個彎兜多大半座鷹君，至可以落樓下過對面馬路，而單呢個遊花園環節，已經曬足半個鐘。入到去排隊買完飛，仲要再排多三個幾字隊，因為實Ｑ係一班班人流噉放入去。可以預期到多人得幾恐怖，齋入場都可以用成個鐘，會面入面更加迫到行都有困難，例子是場左係舞台、場右賣野食，雖然會展聽落好大，平常情況例如商業展，行直線來回可能個半字唔使。今日我係舞台睇完成班無線姐姐仔唱動畫歌（有唱歌唔差的官恩娜都彌補唔到冇扮涼官春日的Katy）（同場加送路過某MK妹妹對著女學生水生服的高海寧評論：「嘩，好Ｘ樣衰！」），見距離謝安琪仲有個零鐘空檔，行去買枝野飲（很貴），再走返去個台，可以用左半個鐘。根本多人到你冇可能正正經經噉行同睇野。我都想購物支持呀。咁多人咁迫，埋都埋唔到去睇，點買呀？臨尾執得到我未買的四期《爆粗Band友》已經好好了。
再次低估，是觀眾人數。去買野飲時，諗住返到黎都霸得到頭位，點知去一去走番黎（都半個鐘），已經迫到去空地中間了，前面相信有二百幾人。唔緊要啦反正都睇得清楚，我又唔影相。時間表話MR.加謝安琪加關楚耀三點三玩到三點九，用我部電話個時間計，三點二左右MR.上台set野，仲要係成個結他袋抽上台好似剛剛落車立即跑上台噉款，玩左少少試聲就落台了。過多兩個幾字先至開場。關楚耀唱左一首，不值一提，亦明顯全場冇人係為佢而黎，無論佢點樣唱、點揮手，根本冇人俾反應，中間有一段觀眾揮手，不過唔係因為有人騷佢，而係台下妹妹仔見到台上大電視影緊觀眾，咪個個揮手囉，唱完掌聲零碎過零碎，就證明大家有幾恨睇佢。跟住謝安琪終於出現，加埋MR.，谷自己環球artist個攤位同商品，然後MR.唱番首《搖擺》，唔太掂好老實。
然後。完show了。因為四點鐘到另一個跳舞節目，要清場。拜拜。
「咩話？完左？謝安琪呢？」
半個鐘節目，我預係每人唱到兩首歌，而唔係而家噉夾埋得兩首歌 － 計埋試音咪2.25首囉。最灰係，MR.唔唱多首都算啦。關楚耀唱黎做乜，明顯根本冇人為佢而黎？你俾謝安琪唱番首都好丫，那怕是唔掂果首新廣告歌！大佬作為ultra hardcore fans的我咁多年黎只睇過佢未大紅時去新世紀唱一場，真係擔心而家佢咁灰黎緊連show都冇得出，特登一早起身做野加成身汗出黎，再曬半個幾鐘再豪三條迫個幾鐘，就係為左呢個環節MR.+謝安琪，你MR.唱得一首？謝安琪仲要唱都冇得唱做司儀講幾句就叫「表演嘉賓」？？？邊個有問題？動漫節？唱片公司？定歌手本身？
「屌你老母。
我真係。
好。
撚。
灰。」
陷家產。頂你個肺。屌你老母。本身夜晚有日本學生妹band SCANDAL，年年都黎已經成為動漫節台柱，加每次黎香港必定會九展搞番場，個幾禮拜前九展已經賣晒飛冇得睇，一場黎到有機會，加夜晚Rock School有metal show DARKNESS POOL + 江湖 + 鬍鬚女，就算中間有六個鐘唔知做乜，我都有興致等。本來。而家趕頭趕命過黎，出面曬完入到黎又要同成班MK仔迫餐死已經臭到自己都頂唔順，加噉樣俾人耍左鑊冇晒心情，旋收皮啦。我發譽，除非又係幫人手做野或者特別理由，從今以後我一定唔會再踏入動漫節半步。
「屌你老母。屌！」
Bonus Track 1：早輪沙包瘋send過個日本網，有把忍者刀款遮，綁繩揹住，落雨時拔「刀」開遮，型／柒到爆。會場有得買，不過$180一把。同冇得揹上背脊。老實講，$180買把遮，又唔係有保養，過癮唔起。
Bonus Track 2：有檔專賣寫真類，有得買周秀娜全線，水泡同浮床承惠四舊水乙個。浮床冇辦，但水泡只係普通鴨仔水泡個鴨頸鴨頭變左個印住周秀娜的三角形物體。噉就可以收貴十幾倍價錢。仲有部電視播住寫真集隻立體DVD，醒起好耐之前睇《死神來了4》，完場時唔知點解冇收到我副立體眼鏡（人柒，有時都有好處的），仲要呢幾日執舖頭副立體眼鏡正正跟身。不過唔敢拎出黎睇隻DVD係咪真係咁立體。太撚宅太撚毒了真係幾千人望實拎的伙立體眼鏡出黎睇3D周秀娜的話。
Bonus Track 3：星期一八月二號，要黎動漫節。朝早有李蘊，唔知有乜表演，莫非又是傳說中的drum solo？夜晚有隊所謂「日本三人女子gothic組合」，即係冇gothic個字我絕對唔會理的，張相影到HOTCHA噉；晏晝重點節目係．．．唔知叫咩名，不過有Shiga，即係亞視絕作《激流青春》問大家「點解冇signal」果位姐姐。請大家快去download全球獨家劉Sir提供的「點解冇signal」電話鈴聲，當日Shiga姐姐一上台立即怒loop。
Bonus Track 4：返到屋企，沖涼果陣，收到Rock帝電話。
「喂，特登打電話黎同你講，一定要睇《Sucker Punch》！有《Watchmen》導演！」
「幾時上？」
「下年。」
「我屌你老母！」
（唔好意思，俾人昆左睇唔到謝安琪live，是日心情欠佳，收皮一天）
（收皮前，都要鳴謝一下Rock帝自動送上門俾劉Sir抒發負能量）
這個星期天的節目是同老豆補番祝父親節。上年遲左半個月，仲要撞正退休先有得食，今年又係暑假撞正舖頭有事，旺角門市部臨別秋波再戰江湖加要執舖，日頭返工又忙老豆又老身子多病，結果比上年遲多成個月。而且祝得相當即興，之前一日上皆旺執左幾個鐘頭舖漫畫節迫到仆又睇唔到謝安琪，本來打算豪華廿蚊早場睇番次《Inception》（這就是真真正正的豪華版了），點知琴日心理生理皆大受打擊需要休養，起身已經四點幾。跟住屋企人話「今晚去食飯囉。」食囉。我屋企比較另類食開西餐，老豆唔知幾時剪報紙剪左間K11扒屋，七點打電話，八點就去到坐低開餐了。
補祝父親節，當然有幾大食幾大啦，主角老豆識揀呀，去到就知一定貴野，即係裝修好外國格調入到去又要冇乜光暗到死坐低差唔多睇唔到對面個人咩樣果種。餐牌全英文，如果唔叫套餐的話乜野都拆開晒要獨立叫，即係如果叫扒就真係得塊扒，唔似平時食開cheap野叫個鐵板俾埋雜茶薯條你，想加乜伴碟都要獨立俾錢。激在牛扒有成六七個國家版你揀，老實講我從來唔識分咩國家牛係咩味邊個地方好食ｄ，老豆叫左個set dinner，自己叫個加拿大肉眼扒整多兜薯條算。因為我只得扒，頭幾個字只有睇老豆個套餐有乜食。頭盤係超大個碟但中間放得一塊餅乾仔同一小塊鵝肝，跟住羅宋湯用個普通茶杯仔裝俾你。好在正餐塊扒夠大，不過唔見汁，原來個侍應會捧成盤過黎問你想落邊種，不過要全部講英文，咩醬咩汁係咩黎全部唔知。你知劉Sir食開cheap野架啦鋸極都係茶餐廳扒，反正乜汁打乜汁唔識，懶型地「黑椒丫唔該」，結果條友真係拎左枝黑椒灑落塊扒度．．．更型係有得俾你揀刀，拎個箱過黎入面廿幾把，
「請問你想用邊一把刀？要輕身定重身？」
「梗係要最重果把啦，heavy metal嘛。」
「．．．．．」（侍應哥哥已經唔知應該點樣同呢條傻仔溝通）
我食成世扒，第一次試過可以custom餐具咁型，雖然唔明輕刀同重刀有乜分別，係咪切出黎會唔通或者切得順ｄ爽ｄ？因為我食散餐冇甜品，鋸完扒只有繼續食薯條，四十幾蚊一兜又真係俾得幾足料的多到食唔晒，雖然同一個份量同質素，茶記只收你一半錢唔使．．．套餐仲有甜品同餐飲，即係貴野就係唔同ｄ，正式甜品之前都要先整個「pre-dessert」，只係一小兜兩啖食完的焦糖燉蛋（我唔知呢種番鬼佬甜品叫乜，只識用「燉蛋」去形容），係少，重點是甜品都要整頭盤型嘛夠排場嘛。至於真正個甜品：
上圖可以睇到兩樣野：甜品兩件，同場內的暗淡燈光搞出黎的特別血腥brutal濾鏡效果。右邊舊野係深黑色的查實，我覺得合格的朱古力蛋糕。左邊舊先過癮。上面果劈係棉花燈，不過賣相太衰型住唔食得所以唔敢食，而下面似未切午餐肉／狗糧果舊（．．．），其實係朱古力雪糕黎。淡到唔係舊野啡色都聯想唔到係朱古力味的朱古力雪糕。食左個半鐘，埋單三個人食左一千六百五十，整體質素點值唔值咁貴？即係今天是星期天，當我地八點鐘入場已經差唔多係全晚最後一檯顧客，而大玻璃窗隔開的隔籬酒吧由我地坐低到九點半走人都冇任何一張檯坐過人，大家可以理解得到。
「即係，我絕對相信肯花時間落非旺區搵，可以搵得到環境絕對比唔上，但食物質素及份量一定比呢間更好，同時價錢平幾倍的街坊扒房囉。青山道莉萊你食過未？」
所以，我從來唔去亦唔信呢ｄ所謂高價高級餐廳。好老實我地呢種頹廢青年，由細到大廿幾年食罐頭食味精食茶記大，好多時你俾番所謂真正好野貴野我食，反而會食唔慣覺得唔得，用番扒做例子，你叫我噉樣俾五舊水鋸一餐，好食？感覺得到係有料到，但未必會覺物有所值。同俾我揀，用五分一價錢落第尾食個常餐仲開心，塊扒擺明只係街坊食府貨色、擺明係靠勁落汁黎調味谷到好似好好食（「真正好食的牛扒係唔落汁的」，劉Sir Jr.最愛鋸扒個老豆劉Sir Sr.話），但我地賤開，事實是假野cheap野食得開懷滿足ｄ，就算飲湯，寧願冇咁好飲但俾足大大碗我，好過懶精緻地得個茶杯仔，因為我地食慣感受慣係噉，有乜計？想食好食的高級野，就一定要揀超高價位，即係五百蚊以上酒店餐廳級數，果ｄ就真係好食、好少可會唔滿意會食完覺得唔值。但又豪得滯。
再一個所以：所以，咪媾唔到女囉。香港地好現實，絕對唔少男性朋友跟我一樣賤開，好可惜絕大部份其他香港人 － 尤其女性 － 唔係噉諗，當你去第尾食個六十蚊扒已經係值得的高級時，佢地會覺得埋單最少五六舊水、好唔好食只是其次環境好就補番數果ｄ華而未必實的高檔野先真正叫得上高級。結果，會發現同唔到新一代同女性溝通交際，因為你唔MK的話，大家的價錢觀只會差得太遠。條女日日話要去尖沙咀銅鑼灣食百幾二百蚊餐放題，你敢唔敢出聲話帶佢去長沙灣食幾十蚊平民茶餐廳？條女話要食呢ｄ埋單五六舊水一個人又唔好食的扒屋，你夠唔夠薑話落平得多而事實上亦好食得多的青山道莉萊？
「有乜計？」
應旅遊業近來鼓勵／老屈大家消費，我都出多左街使多左錢。（俾人昆左）去動漫節之後再同老豆補祝遲左個半月的父親節，已有點想收皮，好少可出街出得咁密使錢使得咁多（基本上係老豆果單使得多錢嗟，動漫節只蝕張飛同Ｎ個鐘戇居居）。禮拜一返番工，都想出街，雖則俾人昆左立過誓唔再去動漫節劉Sir講野有幾多次真先大家都知（呵），有李蘊又有Shiga姐姐，四年前漫畫節仲係做緊屈臣氏姐姐，而家榮升舞台嘉賓，作為fans的我應當親身到會場怒播「點解冇signal」慶祝佢升呢啦。夜晚有樂隊比賽總決賽同所謂玩gothic的日本妹組合KALAFINA。其實OK的，加上星期一加尾二一日，應該唔使似星期六噉齋排隊入場都可以迫成個鐘。但同時亦因為星期一，返工點睇呀，唔通射波咩。
夜晚果part係有興趣的，但最後（居然）會遵守誓言冇去，而走左去睇戲。話說Sam少家住佐敦，入左油麻地電影中心個會，但做左會員先發現自己冇乜時間同心機睇咁多戲，年頭已經俾左張免費戲飛coupon我，一直懶用因為自己一個睇戲實係新世紀而成班人睇時又有其他人幫手買飛，唔覺唔覺，今日張coupon八月二就係最後一日，要用了。近來都幾多大戲上，最想睇梗係《Inception》啦，雖然呢ｄ大場面戲我點都揀新世紀畫夠大聲夠爆，黎緊星期六仲會去IMax睇，但有coupon免費換飛先睇一次又何妨？點知上畫第一個星期唔用得，而非新上畫得番《Salt》同《出租天使》。唔通睇多次《Salt》咩？雖然我對《出租天使》真係究極完全徹底地冇興趣，但，冇得揀。本身仲有套《九十後．少女．性起義》，今日同我一齊睇《出租天使》的白告哥極力推薦，點知上到上個禮拜就落畫了。講起呢套《九十後XXX》（很長個名），又要featuring Rock帝。唔計我沖緊涼時打電話黎叫我「下年記得睇」的《Sucker Punch》，近來有兩套戲佢極力推介，頭先都出現過。首當其衝的，就係黑雨果晚要成班人出黎陪佢睇的《Salt》，會睇，因為「trailer好正！」睇完，怒小，因為「好正」果part，即係trailer入面除衫果半秒，冇出現過，成套戲甚至衫都冇除過件。難怪「唔好睇」了。跟住到《九十後．少女．性起義》，同樣地入場前「就知道一定好睇，因為trailer正！」睇完出黎，又要小老母。
「挑！戲名又話咩性體驗，點知乜野都冇得睇！」（好明顯Rock帝以為套戲係巨人院線出品）
因為兩條友睇六點八場，去到油麻地買完飛仲有足夠時間食個靚煲仔飯。我公司大角咀呢邊出油麻地好過癮，雖然行兩三個字就係旺角地鐵站，但放工時間多人，有時直接行過去反而仲快過搭地鐵，試過放工即趕路過到油麻地先搭半唔夠，但搭地鐵可以六點七八先出到站。本來都打算按照傳統行路出，可能因為劉Sir進駐搞到大角咀黑氣沖天，近幾個禮拜放工時間，個天好鍾意一面超大太陽勁曬同時落勁大雨唔知發生咩事，擔把遮擋晒太陽同雨水兩樣野。今日又黎料。搞到唔搭地鐵都唔得，好在公司隔籬街市政大樓有平兩蚊機，冇咁傷。
「平左兩蚊，一程車幾錢呀？」
「$1.7。」
「個七都要咁多聲．．．」
買完飛，就食飯了。我發覺自己個blog，原來潛在性地對整個社會有一定影響性，往往以「劉Sir不入地獄誰入地獄」的身先士卒令社會更美好，好似幾年前返大陸做fair搭錯船，鬧完佢上船時唔查人船飛好容易搞到人地上錯船都唔知，跟住立即改善左上船前船員會先睇你張飛，唔係劉Sir柒過再投訴，唔知仲有幾多人會重蹈佢覆轍呀！（相信，除左佢之外，是冇的．．．）當年食黑椒漢堡都係，剛出時食完上網唱衰「得咁少汁邊度夠」，blog嘈完再買已經多汁到食果陣一手都係。早排小狗阿波羅個啜啜雪糕，Rock帝搭嗲講番孖條，一講完，七仔就出現左隻新孖條，證明當局的確有留意民意，好可惜cult classic雪夾糕小極都冇reissue，連間label窩屎都收皮了。估唔到連煲仔飯業界都。上次睇戲黎食，屌過間興記ｄ生意手法仆街到爆。事隔兩星期，收晒皮了，唔再見你街頭出現已經猛咁嗌，唔再成班阿姐包圍係噉拉人入佢間舖，唔再指住人地間舖話「呢間唔係興記」咁唔屌唔得，終於可以安安靜靜食番餐。
「我買咁多次六合彩，最威果鑊只贏過百六蚊，大角咀投注站領完獎旋拎去對面豪華俾錢睇《打擂台》。下次應該投訴點解六合彩買左十幾年都唔俾我中頭獎。」
（夜晚開電視，先知原來今晚攪珠金多寶。灰，蝕左三千幾萬添．．．）
會睇《出租天使》，都算是一個歷史性創舉。你知劉Sir份人好膚淺。要睇戲，你唔係打到七彩or猛咁標血or玩cult扮cult，都幾難呃到佢入場，所以偶像戲愛情片我從來唔會睇，唔止戲院，就連屋企開電視撞到都會轉台果隻，除非得閒到除左訓覺同屙屎我真係諗唔到仲有咩好做咁doom個地步先至睇。《出租天使》係我成世人第一次入戲院睇的偶像／愛戲片（可想而知劉Sir是多麼的毒、多麼的媾唔到女）。結果係點？係噉打喊路，同頭先煲仔飯食到好滯，打左好多個嘶噫，劇本好老實你睇一套已經知道晒另外一百套會點，一定要絕症、失憶之類，男＆女主角一定係最適當的時候出事或暈低，睇到中段已可估到臨尾係大團圓定doom，而從來唔鍾意日本仔拍戲拍劇吹水吹到喊，話感人的話，唔好意思可能我唔係港女只覺得好眼訓，仲未訓著晒係佐佐木希的確無能敵。對我黎講呢類片唔係鬥劇情煽情，只係鬥囡囡，今場反應就知真係唔多岩我，就算真係想睇囡囡的真係要打飛機的，不如搵寫真集甚至AV乾脆直接咪咁煩，冇計我是好hardcore同膚淺。如果話係同女睇就另一回事。好可惜今晚我地係兩條友入場睇。幾灰。又再返番去琴日食父親節個問題：遺憾地，呢類戲先係正常香港人香港女想睇鍾意睇果種，係悶到喊，但要搵女睇、女搵你睇，你點想睇《Inception》都好，會唔會同條女講「不如睇《Inception》？」定「都係《出租天使》啦。（雖然我入到去實訓著）」？
「相信Rock帝會同我一樣入場睇。除左佐佐木希、『好正』的海報同trailer，仲有個咁巨人院線feel的中文名。」
「但俾我揀多次，我寧願豪左張coupon佢，去動漫節睇KALAFINA算。」
「記唔記得上學期，劉Sir叫大家齊齊參與考英文？當時顧及大家level，拎份中一卷俾你地做就算，點知都冇個人做得掂。冇叉用。」
「話咁快，學期尾喇。有始有終，上學期考左，下學期點可以唔考埋呢？同我醒醒定定個半鐘搞掂佢。」
「同上學期果份比，係咪覺得淺左？梗係啦，知你地英文垃圾架喇，大考特登出番易ｄ就番，唔係我諗在座咁多位同學，冇乜邊個升到上中二。」
「話淺左，只講緊最後兩三版，果幾版先叫似番中一英文水平。頭大半份，仍然是搵笨的，正常中學起碼中三先會做。」
「同樣，提供試卷的同事，表示個女考得七十幾分，『全班黎計好低分』。而我？早排考公務員招聘試，英文卷比A-Level水平高，覺得好難。點知做完呢份『中一英文考試卷』，立即覺得政府個試，都冇咩難度嗟。」
「叫做好少少，上次做完係成份冇一part敢講自己識做、過到骨，今次最少臨尾兩三頁可以話『我識我有信心』。但係講一回事，做完一樣唔敢睇番，我怕以為自己好掂時，點知易過上學期反而收皮得仲犀利，就灰了以為唔敢講同寫英文。」
「出卷之日，正值末代中五會考放榜之時。當一份中五生考都嫌深的試卷，在新一代只是中學一年級的普通考試，即時覺得同而家後生一班有代溝。佢地，太強了。」
不如玩玩時光倒流。我個Facebook可能係開左兩年黎，第一次真正發揮到Facebook原意用途。話說幾個月前收到幾個message，見唔識以為send錯，原來係小學四至六年級個英文Miss兼班主任，畢左業差唔多二十年，佢同當年幾個小學同學靠Facebook搵番差唔多成班出黎。初中之後已經冇再見過小學同學，全靠Facebook先撞番，果時有個非常好朋友的，中三之後唔見左佢，睇番先知原來去左美國讀書，今個暑假返香港擺酒結婚，不過捧唔到佢場，因為今日8/8晏晝三點半沙田搞婚體，而我起身時，已經三點三．．．而禮拜日，因為熱同屋企多事，好多時盡量唔出又或唔出得街。各位小學同學、miss阿sir，下次有緣再聚了。
實在支力，因為之前一日做加玩足全日。行程唔包括恕。呢兩個月Hidden Agenda演出十分吸引，上一場臨出門口老豆坐骨神經痛坐低左連身都起唔到唯有唔睇，直到而家都因為呢樣野唔可以成日出街，果場headliner係邊隊已經唔記得左，畢竟我對opening兩隊MANIAC同ADVERSARY更大興趣；今次都係，恕玩乜其實唔多知，一廂情願是ARCH ENEMY，但當一個Starcraft fans見到有隊opening叫PROTOSS，headliner玩乜都冇緊要啦下嘩？但成班人食完Murder King之後，八點幾已返到屋企沖涼撻低訓左兩個鐘。殘晒。
如果朝早唔使返工，或者唔會咁殘，但上個禮拜六屋企有事又要執舖加動漫節調左更，既一早買左飛今個晏晝iSquare睇《Inception》就當順便。唔太想去MegaBox因為等專車出入麻鬼煩，iSquare新開未黎過就試試呢度IMax，早近成個月買飛，都只買得到中間G行。通常一套猛片會睇兩次，特別IMax場之前會先睇一次，今鑊冇計，有免費coupon但新上畫唔用得，結果去電影中心睇《Inception》變左睇《出租天使》；今日一點放工有冇機會先去豪華睇一次？點知兩點半至有得睇，冇計了我只有《Inception》之前特別預習番《Dark City》先。未睇／聽過《Dark City》的話，套野講主角某日醒覺自己處身一個不正常環境，原來處身外星人利用思想建構之虛擬城市，城內只得佢一個擁有自由意志知道唔對路，故事講佢點樣探索真相尋找出路。再簡單一點，《Dark City》係一套 noir 版《Matrix》，而第一次睇《Inception》trailer立即知道一定要睇番《Dark City》，因為兩者都係講控制現實時空。初時以為會好《Dark City》，點知控制現實比想像中少好多，而故事當然完全唔同啦，一套講進入深層意識犯罪，一套講外星人，兩者冇得比的，真係要比較，就好似上畫後網上有人將《Matrix》同《Inception》拉埋黎講，再話「《Matrix》勁好多《Inception》垃撚圾」一樣，得個笑字。我只單從視覺效果出發。《Inception》場面冇預期中咁天馬行空咁大陣仗，感覺上trailer剪接有迫力過完整版好多，或者因為Christopher Nolan拍戲向來將動作片面比重降到最低，實際上扭曲時空之場面，特別牽涉到動作打鬥，係非常非常少。令一心諗住睇特技的我有點失望。套戲是正的為近年最值得一看再看電影，大家的學習榜樣有已經去左三間唔同戲院睇左三次的白告。我的確想再入戲院睇多次。未知幾時同邊間嗟。（或者MegaBox IMax呵呵呵）
「好多人問結局：主角其實係醒左定死左？我支持後者。」
「再送一點冷智識：同當年《Matrix》一樣，《Inception》一上畫已經對之後電影帶來重大影響，就好似玩大堆頭的《X-Men: First Class》首當其衝。雖則《Inception》種反轉現實時空場面，好多漫畫同電影之前都玩過，而X-Men世界中心靈感應、出入及分享他人思識、顛覆現實物理之意識層空間是非常普遍一門，實際上冇必要特登修改，但Christopher Nolan同《Inception》個朵實在太響，以後無論乜野人做同一樣野，即使意念構思得比佢地更早，都只有比人話係抄。」
睇果陣，十分眼訓，唔係套戲唔掂，而真係好好好支力。逢禮拜六要返工已經灰爆，心理自不然影響生理，所以向來禮拜六長週的話，精神只得平日六七成。《Inception》四點場，之前三個鐘冇野做，公司附近買左幾個生煎包行住食當晏晝飯，前排考完公務員試，成績單寄左黎，順便買左個file執執自己咁耐以黎ｄ證書，整一整理個portfolio先。本來諗住旺角買完行路出尖沙咀，但唔掂，太熱了，行到油麻地頂唔順都係搭地鐵算。去到尖沙咀，熱同曬到一經過有咩冷氣地方，入去涼番一兩個字先繼續上路，地鐵站去到新港城，中間全部商場、藝術中心同文化中心我都入過去，你話幾鬼熱。中間經過碼頭，梗係要買番雪糕食啦，有兩檔俾你揀：一檔係電單車雪糕阿叔，自從之前俾人告，上到法庭法官話拉佢果班戇居輕判，上晒報雜誌訪問晒，就我去到見到好多人幫襯佢成架電單車俾人包圍，我去隔籬買杯富豪軟雪糕算數。最慘係尖沙咀呢ｄ旺區，除非出去露天曬住，你都幾難搵到地方唔使俾錢可以坐低抖抖，所以睇戲之前，差唔多行足三個鐘。仲要噉曬住，乜都殘啦大佬，夜晚仲邊睇到show呀。
再火上加油，之前一晚，其實都睇左一場。上年開始（俾人）笑，估唔到事隔一年，KOLOR終於搞到一場大show。佢地係我近幾年最睇好最欣賞indie band，除左音樂得實力勁台風好，「Law of 14」在本地獨立界是個非常前衛市場策略，同睇住佢地一直進步，第一隻碟比一隻碟超出好多，今年「Law of 14」至今出左六首新歌，雖然基本上我冇特別留意冇乜聽過，但入到場第一次聽已經，冇晒聲出，隻新EP太強了。好耐未寫過gig。今場令我有心機寫番之前幾場。今場自然是首選之一，不過需要時間，想知有幾精彩？睇睇個rundown，希望冇記錯。唔識KOLOR唔緊要，睇紅色果幾首，就知道$280其實抵到爛。
「KOLOR Independence Live：相信難再有多少本地indie gig可超越。」