往年展覽會，六點收檔。跟住六點半。今年，玩到七點。引發的民怨，不止於無端白事要OT一個鐘。仲有七點鐘全展覽會一齊收工，加埋會展果頭本身返工班人放工，幾百人一齊迫上天橋過地鐵站。好似我噉搭巴士返屋企的話，更灰。塞到。

自從我們的會計靚女Ricbey姐姐冇做之後，全公司冇晒展覽會氣氛，去做fair，真係做fair，坐低等客到等收工，唔似以前隔兩三個字就鼠出去睇邊度有禮物拎有文具呃有袋偷有免費野飲野食，檔口長期唔夠一半人。難得今日靚女特登過黎會展探班，又係時候出動四圍搞事了，「同名同姓但唔同公司的兩兄妹」走勻成棟會展兩個展覽玩到人地都冇我地咁好氣，去其他攤位辦左幾百蚊貨，玩埋指定環節buyer證呃禮物遊戲，想當年就係我地公司走法律罅加美色攻勢，一個人換成打禮物，會展特登為我地改晒規矩，而家想換禮物，要預先登記再上網印信再俾埋卡片先換得一份。只是道魔一尺，魔還是高一丈。唔係我地，懶了。去換時，有條友帶左個大袋裝爆所有文件倒滿禮物姐姐張檯，異常壯觀。我諗佢參展就係為左收集買家證同卡片佢換禮物。這，才是專業。我們收皮了。

衰到連詢問處妹妹仔堆筆同memo紙都要呃。想知道經濟好定壞，唔使睇報紙問專家，黎一次會展就知。會展妹妹仔的數目和質素，主辦機構同參展商請得多唔多model仔舉牌同做promotor，佢地著得多布定少布，都是年度經濟指標。今年市道明顯比之前兩年好景不少，起碼隨便一層由頭行到尾，唔會每經過一個counter都想爆句「彈鐘」先。經濟，真的起飛了。

咁開心，收工當然要慶祝一番，去金田食放題。非常多款非常新鮮上菜奇快，叫一轉半個鐘已經食到飽晒，同姐姐講句甜品又有得私底下encore，埋單一個人$185算抵。銅鑼灣一生執左，金田應該係食物環境服務最滿意之放題，又平過一生 － 老實講，一向覺得一生太貴，同服務幾差。第時過海開飯，莊士敦道金田是個好選擇。