雖然TRHK閂左之後買少左碟（同埋pop左，頂而家我買好多香港pop），量同類型反而聽多左。其實一年前TRHK皆旺散檔果時執左成大箱碟返，要特登帶隻篋上去，臨尾成篋碟拉返屋企咁激，而家勁多連膠袋都未拆，所以連今年新買落的metal碟，好多真係買返黎擺而唔係聽，或者係買定俾2013年。唔覺就到年中，算係一個開開碟選定今年最佳的藉口。襯呢個難得機會講講兩隻對我黎講幾重要之2011好碟。

敢講TRHK劉Sir將The Project Hate MCMXCIX帶入香港。想當年《Armageddon March Eternal: Symphonies of Slit Wrists》，industrial gothic death metal一聽驚為天碟，立即勁推成為TRHK其中一隻賣得好多的metal碟（post-CoF/CoB世代，非大label metal(core) band賣到廿幾隻，已經算「賣得好多」），仲立即上eBay追晒佢地舊碟，不過早期唔算玩得好好，death metal部份節奏玩到industrial metal噉唔夠狠，其實結他有點失望因為Project Hate班友本身係隨便彈段death metal都勁到黐晒線的癲佬，試試佢地其他side project好似Torture Division、Vomitory同God Among Insects。同好老實佢地電子部份大多數好普通好表面，全靠所有野撈埋夠火花夠性格，但歌超長閒閒地七八分鐘，的確好難維持到每一首歌每一隻碟都由頭好聽到尾，好多時氣氛甚至單調左少少。要到第五隻碟《Armageddon March Eternal》先真正黎料，death metal部份最爆最似death metal，電子部份寫同用得最好，同埋最重要最重旋律加女歌手冇以前唱得咁低調而高低音對比大得多，聽左metal咁多年第一首歌《At the Entrance to Hell's Unholy Fire》2:52仍然係我最愛metal段落，單呢段女聲隻碟已入劉Sir最愛metal碟之列。

可以突然一隻碟跳昇咁多，可能之前合作開個producer、Nasum歌佬Mieszko Talarczyk南亞海嘯死左，在天之靈眷顧，呢隻碟真係寧捨唔同，唔止之前仲有之後，跟住兩隻碟唔用鼓機搵真鼓手但冇乜特色，黎到新碟終於再有新野。《Bleeding the New Apocalypse (Cum Victriciis in Manibus Armis)》（呢隊band真係band名碟名歌名乜野都要長過人）差唔多換晒全部人，新女歌手唔用之前兩個種低調gothic metal清聲唱得好鬼粗豪，又玩以前未試過之交響keyboard／電子ambient，雖然歌唔算寫得非常好 － 佢地種電子男女聲death metal玩法複雜，加首首歌都寫到差唔多兩個字長仲要黎到第八隻碟，可以維持到一定水準同創意已經難得，更何況佢地行貨極都多野聽過九成band加冇人似佢地，換左新女歌手又玩ambient，黎緊應該仲有發揮，而佢地係我最愛metal band之一，新碟點差都一定入全年十大架喇。近來猛咁煲，除左歌深要花時間聽真，仲因為班友已經開始整第九隻碟，黐Ｑ線．．．

djent這回事唔知有幾多人留意，作為Devin Townsend同Meshuggah超級fans我就幾有心追，好簡單：免費嘛。（．．．）簡單黎講，技術又好性格又好生活圈子又好，metal界真係好多人鍾意匿埋自己玩唔多band夾甚至直頭唔夾band。直接的講法係聽metal果班好多毒男。而佢地好多時心態唔單單練技術而玩hi-fi式追靚聲追調音追錄音製作效果，好多時會從現今流行中尋求另類前衛，正正是multitrack音牆玩到癲的Devin Townsend同節奏精奇Meshuggah先討得佢地歡心。當現今電腦錄音技術已成熟，加埋Youtube同無數網站幫手宣傳，好多結他（毒）男屋企寫歌錄歌放上網，慢慢成為一個以互聯網為主平台之djent movement。定位是modern metal同post-metal之間，加上本身好鍾意industrial/cyber metal同科幻音樂對pop化Meshuggah/Strapping Young Lad特別有興趣，djent正是這兩回事正合我意，不過質素太參差老實大半樂隊平平無奇甚至只得中下水平，作為人人皆可隨時參與之免費音樂此乃必然反效果。同始終跟當代／曾經主流如emo同metalcore有一定關連，djent一代較後生佢地係'90-'00成長，到頭來音樂唔出色都衰唱，好似試聽出名幾隊，Periphery歌同技術得但歌佬太emo（好在隻新EP錄音救番唔少）、The Human Abstract好耐以前聽佢地第一隻碟其實好正但而家唔講歌差左同Periphery一樣太alternative點解一定要唱到咁衰，Born of Osiris唱、歌、彈算最佳不過從整張專輯宏觀評論依然不足。好老實好多djent band唔鍾意就係衰歌佬一樣野，但佢地堅持一定要用metalcore甚至emo聲唱我都冇計，由始至終未來金屬裡Devin Townsend才是主音之王。

好在純音樂亦是djent中一大主流，高手亦往往出於此道如Tyrant of Death、Cloudkicker同唔少以djent為主solo為輔之結他佬，上年Chimp Spanner已經覺得好勁點知一山還有一山高今年Paul Wardingham更強。不過始終djent業餘同理論派中人主導，而且軟件錄音音色往往太電子或過份壓縮，大多數樂隊音樂未成熟之餘錄音亦假過頭，聽過咁多TesseracT係難得俾到人專業而非家居樂隊印象，真正大規模錄音室效果已經唔同，音樂冇顧住玩Meshuggah riff結果得番技術悶過頭又或Periphery一類太pop，真正集中djent「未來流行」精神創作。2010年出EP《Concealing Fate》，實際上係一首半個鐘長六部曲，氣氛夠灰暗夠嚴肅，同歌佬應該係我聽過最好的djent歌手（雖然唱法仍然唔係我鍾意果類，最少聲線唱功搭救），明顯唔係玩玩下或趕潮流同其他人兩個級數，難怪Century Media會簽佢地 － 冇查明但TesseracT可能係至目前為止第一隊加唯一一隊CM會簽的djent band。新碟《One》其實只係《Concealing Fate》加多幾首新歌，因為唔似六部曲玩長篇新歌比較簡單，部份較遜色但以djent論djent仍跑贏近全部對手，有歌手唱之djent我覺得Periphery同Born of Osiris會更得（香港）人鍾意，自己則繼續迷TesseracT勝在獨特性同完整性，仲有專業形象。特別版除左多首歌仲送隻DVD，有大量bouns加《Concealing Fate》完整studio live，興趣好大，但按照傳統，呢類DVD通常到死都唔會開黎睇．．．

睇番先知原來TesseracT係英國band，雖然唔少出名djent band／人來自美國，反而美國以外之djent單位玩得更好更放更得我心。而另一現象是雖然djent本身自成一門睡房音樂文化，某程度上anti-label崇尚自由傳播，但成功同出名一班往往選擇投靠唱片公司，TesseracT是最成功例子第一隻EP已經由metal界大label Century Media出，但你唔會鬧佢地背叛自由精神，甚至覺得簽label決定好正確，屬一種肯定實力之象徵。此課題值得寫番篇文探討。