唔係又有人搵幫手做功課，都唔會再上皆旺。冇錯係「又」，自從做左TRHK、在香港metal界薄有名聲，除左傳媒好似亞視《慧珊時尚坊》＆《文化潮流》同明報周刊，間唔中都會有人上皆旺搵劉Sir「我有個project同重金屬有關，可唔可以同你做個訪問」。就好似周星馳電影式笑料：

「你責任好重大？」

「係。」

「你負責做咩？」

「俾人研究。」

反而冇諗到TRHK皆旺舖關門大吉左年幾之後，仲會有人記得劉Sir － 應該話仲會知道劉Sir，話說兩位樹仁大學傳理系靚女，完全唔知metal係乜，但其中一份final year assignment選擇左拍一條十分鐘紀錄片研究本地重金屬文化。其實我而家都仲唔太知道點解佢地會揀做metal，不過之前仍於metal界努力時有好多未圓滿之遺憾，所以每當有人有project同metal有關需要人幫手，搵到上門出到聲幫到手都會幫，反正我都係當玩嗟呵呵。咁多年黎幫過唔少人做功課，呢份可以話最認真，同時係唯一一份之後有得睇番（自己有幾7）。

過程都有幾多過癮事，因為想拍揀碟鏡頭但好難搵到室內景，第一場先去旺角西站對面惠豐中心樓下間CD舖，貪門口有排碟架又冇人睇住可以任拍，不過其實唔算多碟，一路拍差唔多全部都睇過拎左成疊碟係手，導演再唔嗌cut，就要睇同拎埋唯一未掂過的《玉蒲團》．．．皆旺之後第二站係總統大廈，巧遇studio負責人ToNick，梗係要立即問問歌頌ThisAV的《我不能忘記你》歌頌到上埋ThisAV出廣告的傳奇故事內情，原來係佢地自薦俾ThisAV，打電話上去問「我地寫左首歌唱好你地，可唔可以整個廣告放你地度？」又受喎，ToNick就成為ThisAV代言人了。知唔知最重點係乜？

「ThisAV聽電話果個係女黎架！莫非佢地絕到搵埋囡囡做marketing咁堅？」

因為兩位靚女的邀請，告別一年零三個月之後，劉Sir終於重臨皆旺商場，其實除左108號舖之外，人面並無全非，年幾以黎冇乜大改變都係對住同一班人，最大或唯一大不同咪係一樓靜左好多、少左成班on9仔聚集囉。事實證明，香港地，聽metal，冇前途。所以，劉Sir都變節了。