早幾日老豆買左枝柺杖，非常之醒，因為琴日立即唔多行到，拿拿臨篤住去睇醫生，先發現屋企對面睇開個醫生月中已經唔再做，有點灰，因為全家幫襯左佢好多年，而且唔止我地，佢樓上的屋村居民都係。

老豆老母養到我咁高咁大，仲黐家唔肯走，除左而家香港生活成本高到一個正常收入人士根本冇可能自己搬出黎獨立，仲有舊區以外冇幾多地方仍體會得到香港本土情懷。屋企位處內街，對面就係五十年公共屋村，所以見唔到任何大超市連鎖店，只得士多、雜貨舖、平價茶記，仲有為街坊服務的廉價診所，好似呢個醫生七八年前同今日一樣只收$120，老人家再平$40，你話邊度搵得到。雖然一分錢一分貨藥唔夠人地勁，我通常一次搞得掂但一換季就成日病的老豆未必得，一次唔得咪睇兩次囉，老豆幫襯兩鑊先$160，都平過同區其他醫生。

另一個原因係方便，開正屋企對面，住唐樓落三層樓梯行多一陣路就到，屋企門口去到醫生門口來回半個字唔使，住診所樓上屋村要等電梯搭電梯都冇咁快啦，老豆之前已經行動唔方便，佢咁就近就最好唔需要操勞，要篤埋柺仗更加，其他醫生要行多好多路。做唔住，只有話因為太好人。

香港睇私家醫生向來唔平，屋企附近另一個多人睇醫生，因為幾近獨市霸晒另一條公共屋村生意，我讀小學即廿年前已經可以收$350一個症，而家要二百甚至一百蚊以下睇次醫生實在唔容易，而佢近十年仍然只收百二，老人家仲要打多個六六折。問題係燈油火蠟乜都加時診金唔加，座山幾大斬埋都唔夠柴，兩年前已經淡到姑娘都請唔起全部自己一腳踢，就大鑊了，好似我老母一知道冇左個護士，第一件事就係叫我細妹千祈唔好自己一個人去睇，會噉諗亦絕對唔止我老母一個你知香港最多的生物除左蝗蟲就係港女，少左個姑娘可能等同冇左一半客。跟住連雜誌都冇錢買，年頭睇過一次，放最面本雜誌仲講緊大攝影家陳冠希單野。

耐到我都唔記得幾耐之前開始，已經係每日去睇必定包晒成間診所立即有得睇，每晚經過都係燈火通明但人影冇隻。如此惡性循環下去乜都死，終於年中我老豆腰骨隻腳都出事最需要時告別各位街坊。向來價廉物美簡樸便利的舊區，都慢慢開始難住了。