2008．帝皇黑椒漢堡：《劉Sir個網七週年誌慶之黑椒漢堡s》
http://lau-sir.com/mcpeppers/mcpeppers.html

2011．黑椒珍堡：《從新黑椒漢堡看麥當奴與香港經濟之衰落》
http://lau-sir.com/one_week_one_photo/2011_week42.html

講到懶講，除左朱柳蛋漢堡，黑椒漢堡就係我最愛麥記包（以前仲有足三兩／足六兩，但而家價錢等於一個飯盒太貴了），可惜麥記乞人憎在每年永遠只得幾個禮拜出黑椒漢堡，就算長推$8個豬柳蛋德政都彌補唔到。亦因為咁難得每次出都會狂食，自2008年crossover《功夫熊貓》起，之後每次出都有單層普通版同雙層珍寶版，每樣買一個自製真．黑椒漢堡成為年度盛事，並順道從中研究一下經濟市道。傳統上每次出將軍漢堡之後就輪到黑椒漢堡，所以唔食將軍漢堡的我每次見到「將軍返黎喇」都會熱切期待，不過今年有少少唔開心，因為將完軍居然先出個唔知咩蝦堡，搞到dum多成個月波鐘先有得食黑椒漢堡。麥記其實你地知唔知，而家你地搞出黎的乜鬼野新口味，十個有個都係得個貴字唔Ｘ掂？

上年個所謂新黑椒漢堡簡直係麥記歷史一大污點，用一塊足三兩牛肉換走一向的兩塊豬柳size牛柳然後瘋狂加價，難食＆勁唔抵食。好在百屌成材今年個黑椒漢堡終於唔係乜野新板而用返兩塊細牛肉，當堂好食返晒，衰落單時唔記得叫多汁多蔥就中招了，雖然仍然好正但越多汁越開心嘛。價錢就一定貴過上年架喇，由$36.6升到上$38加價4%，睇黎真係做足晒市場調查，見年頭大市加薪幅度係幾多價就加足一樣咁多，一仙都唔會蝕俾你。

珍寶版抵唔抵食呢，就可以話你知肯定唔抵，我屋企果邊普通版$16珍寶版$22（珍寶版已經幾乎追得上足六兩價錢了），分別只在於一塊扒，上年俾多六蚊加多塊加厚牛肉已經覺得搵笨啦，何妨今年一樣加咁多錢但只俾多塊細牛柳你。癮呢家野，過一過就算了。

所以，非常懷念幾年前珍寶版真係兩份料兩層包真係等於乘二的淺味。2008年三層六柳帝皇版壯觀之景，不復見矣。