一唔坐Sony返去九龍灣，陣黑氣立即跟住我走返過黎呢邊。今日晏晝公司樓下有三車連環相撞，以為撞到交通意外仲要三架一齊出事已經難遇，點知放工可以再撞多單，仲好似好大單成架電單車飛出去連白車都黎埋封晒路，事發地點係大街位幾架巴士都經呢個位出觀塘出九龍城，而出事時我架巴士剛剛好排第二，如果司機衝快少少或者之前是但一個燈位少一個紅燈，我都唔使困左係度睇警察同救護員點樣善後。

不過已經好彩左架喇，慣左趕六點八德福開架巴士，因為半個鐘先開一班所以六點五到半就撇走去九龍灣運動場追巴士（冇錯，朝朝都十點至返到公司，坐低食埋個早餐十點半至開始做野，但又六點半即閃，我真係一個唔值得原諒既仆街），有兩個站俾我揀，今日見時間鬆動少少就去前面個站上車，如果我身痕或懶揀左去後面個站，分分鐘等到七點頭果班開至有得返屋企，而且因為差佬封路，司機睇左陣見勢色唔對就兜條近路出九龍城，反而仲快過平時返到屋企。

不過改道搞到差少少撞到第三單交通意外分分鐘做埋主角，因為行條平時莫講巴士連車都冇乜的內街，有架貨車明顯冇諗過會有巴士入黎，睇住佢超高速打橫衝埋黎然後急停，好在煞得切車停正架巴士車尾側邊，因為好明顯坐車尾果位咁（唔）好彩就係我啦，如果個貨車司機踩慢少少brake，聽日報紙頭版你就見到「九龍灣一日三宗交通意外，六點半至七點同一條街，街頭私家車撞電單車，街尾貨車撞巴士，仲撞瓜左條死長毛。」