來自會計靚女的聖誕禮物

我們公司每年聖誕，直接反映出當年公司生意。2005公司接左大單，加慶祝劉Sir入職（相信後者先係主因），聖誕前特登搵個lunch去大家樂叫十幾盤野玩到會怒食，加各位同事交換禮物，貴為世紀黑仔王的我居然抽到老細捐出的MP3機一部（明顯地係信用卡禮物自己唔用先拎出黎抽慳皮到爆），但之後俾抽到個鬚刨的會計靚女強制交換，原來我黑仔依舊。06年生意向下，聖誕一排老細唔出聲，大家側側膊算。今年生意直頭一個慘字形容啦，大陸乜價都加又新勞動法搞到工廠工潮人心惶惶，老細連搞活動的心機都冇。但，有到會。
「生意差反而有得食？唔會係叫大家食飽ｄ上路卦？」
不過我一早決定放長假，有乜食食幾多都唔關我事。冇得食唔緊要，有禮物收就得，會計靚女一早準備晒全公司每人一份禮物，傳統上係拳擊日先拆。但我放完長假返到乜都過晒啦，襯今日開埋佢先放假。

知劉Sir莫若會計靚女，送聖誕禮物都要貫徹佢Metal Christmas之心。
「全公司你份禮物最貴架！我知你實鍾意！」
「你講到咁貴重，我話唔鍾意都唔得啦！」

其實都估到。即係劉Sir除左metal之外，送狗一定冇死錯人。
「又或者變形金剛。囡囡都唔拘！」

「Attack！」

隻豬，就變左一劈屎了。其實隻豬唔係聖誕禮物，係早排船務師奶去泰國旅行，
行街見到幾過癮，計番港紙六個半一隻，執左舊返黎俾我當手信。平嘛。
我非常鍾意，一野撻落張檯即時變成一塊久久先能回復圓狀，好似打緊真人快打。

不過早在金豬託世之前，已有銀豬現身，就係會計靚女街邊執番黎，
「我香港街邊貨三蚊隻，仲平過你泰國街邊貨一半呀！」
但隻銀豬已經俾我掟下掟下掟爆左了，一檯都係。
希望隻金豬可以捱得住劉Sir的fatality，唔會咁快toasty。（唔明？堪旋打番舖真人快打）

「一睇，你就知條友返黎唔係返工啦！」
「梗係！我暑假已經放緊聖誕假！」